“E Akakite Mai Koe ia Matou i te Tupu Anga o Taua au Mea Nei”

1. Mei te au apotetoro rai, eaa ta tatou ka inangaro i te kite?

VAITATA ki te openga o ta Iesu angaanga orometua i te enua nei, kua inangaro tana au pipi i te kite e eaa te ka tupu a te tuatau ki mua. Tetai nga ra i mua ake ka mate aia, kua ui tana au apotetoro e: “E akakite mai koe ia matou i te tupu anga o taua au mea nei, e te akairo o toou aerenga mai, e te openga o teianei ao”? (Mata. 24:3; Mare. 13:3) Ei pau i ta ratou uianga, kua akakite a Iesu i tetai totou no runga i tetai au mea ka tupu. Ka rauka ia tatou i te tatau i te reira i roto ia Mataio pene 24 e te 25. E manganui te au mea ta Iesu i totou, e e puapinga tikai te reira kia tatou no te mea ka inangaro tatou i te kite e eaa te ka tupu a te tuatau ki mua.

2. (a) I te au mataiti i aereia, eaa ta tatou i marama meitaki mai? (e) Eaa te au uianga e toru ka pauia i roto i teia atikara?

² I te au mataiti i topa, kua apii ana te au tavini o Iehova i te totou a Iesu no runga i te au ra openga e kua pure kia tauturu mai te Atua ia ratou kia marama i te reira. Inangaro ratou kia marama meitaki i te tupu anga o te au mea i roto i ta Iesu totou. Ka pau teia atikara e toru uianga: Aea te “mate maata” e akamata ai? Aea a Iesu e akava ei i te “mamoe” e te “puaka-nio”? E aea a Iesu e ‘tae mai ei,’ me kore e ‘aere mai ei’?—Mata. 24:21; 25:31-33.

AEA TE MATE MAATA E AKAMATA AI?

3. I mua ana, eaa ta tatou i marama no runga i te mate maata?

³ I mua ana, kua manako tatou e kua akamata te mate maata i te mataiti 1914, te akamataanga te Tamaki I o te Ao. Kua manako tatou e kua ‘tapotoia’ e Iehova taua au ra ra, te akamutu anga te tamaki i te mataiti 1918, kia rauka i te toenga o te aronga akatainuia kia tutu aere i te tuatua meitaki ki te pa enua katoa. (Mata. 24:21, 22) Me oti taua angaanga tutuanga, irinaki tatou e ka takoreia to Satani ao. No reira, kua manako tatou e e toru tuanga to te mate maata. Ka akamata te reira i te mataiti 1914, ka tapotoia i te mataiti 1918, e ka taopenga i Aramakito.

4. Eaa ta tatou i marama mai no runga i te totou a Iesu?

⁴ Inara, kua marama mai tatou e e rua akatupuanga i roto i tetai tuanga o ta Iesu totou no runga i te au ra openga. (Mata. 24:4-22) Kua akatupuia te reira i te anere mataiti mua i Iudea, e e akatupuanga maata atu tetai te ka tupu i te ao katoa nei i to tatou tuatau. No reira, te anoanoia ra tatou kia taui i ta tatou i marama no runga i tetai au tuanga o te totou.a

5. (a) Eaa tei akamata i te mataiti 1914? (e) Ko teea au mataiti i tupu ei te “au mea nei no te mate” i Ierusalema e Iudea?

⁵ Ei akaraanga, kare te mate maata i akamata ana i te mataiti 1914. Akapeea tatou i kite ei? No te mea, te akaari ra te au totou Pipiria e ka akamata te mate maata me tamakiia atu te au akonoanga pikikaa. Kare te reira e akamata me tamaki tetai pa enua ki tetai. No reira, te tamaki tei akamata i te mataiti 1914, kare te reira i te akamataanga o te mate maata. Ko te “momua anake teia katoa au mea nei no te mate.” (Mata. 24:8) Kua aite teia “au mea nei no te mate” ki tei tupu i Ierusalema e Iudea i te mataiti 33 ki te 66 T.N.

6. Akapeea tatou e kite ei e kua akamata te mate maata?

⁶ Akapeea tatou e kite ei e kua akamata te mate maata? Kua totou a Iesu e: ‘E teianei, kia akara atu kotou i te mea rikarika e taneaʼi ra, tei tuatuaia mai e Daniela peroveta, i te tu anga i te ngai-tapu ra, (ko tei tatau ra ka akono ïa kia kite.) Te aronga e noo i Iudea ra, ka oro ratou ki te maunga i reira.’ (Mata. 24:15, 16) Kua tupu te tupuanga mua i te mataiti 66 T.N., te tomo anga te vaeau o Roma ki roto ia Ierusalema e tona iero. Ko taua vaeau ra te “mea rikarika” i te “tu anga i te ngai-tapu,” koia oki, e ngai tapu ki te ngati Iuda. E tupuanga maata atu tetai no teia totou. Ko te United Nations te “mea rikarika,” e ko Kerititome te “ngai tapu” ki te aronga e aru ra iaia. Ka tamaki atu te United Nations ia Kerititome e te toenga o Babulonia Maata, mei tei totouia i roto ia Apokalupo 17:16-18. Ko te akamataanga teia o te mate maata.

7. (a) Akapeea te au Kerititiano akatainuia i te anere mataiti mua te “ora” mai anga? (e) Eaa te ka tupu i te tuatau o te mate maata?

⁷ Kua totou katoa a Iesu e: “E riro ïa au rā i te tapotoia.” I roto i te akatupuanga mua, kua “tapotoia” te au ra i te mataiti 66 T.N., te akaruke anga te vaeau Roma ia Ierusalema. E oti, kua rauka i te au Kerititiano akatainuia i Ierusalema e Iudea i te oro mei te oire, kia “ora” ratou. (E tatau ia Mataio 24:22; Mala. 3:17) No reira, eaa te ka tupu i te tuatau o te mate maata? Ka ‘tapoto’ a Iehova i te tamakianga a te United Nations ki runga i te au akonoanga pikikaa, kia kore e takoreia te akonoanga mou. Ka akaoraia mai tona iti tangata.

8. (a) Eaa te ka tupu i muri ake i te tuanga mua o te mate maata? (e) Aea te mema openga o te 144,000 e rauka ai tana tutaki no te rangi? (Akara i te au manako poto.)

⁸ Eaa te ka tupu i muri ake i te tuanga mua o te mate maata? Kua akamarama mai a Iesu e ka tupu tetai au mea i mua ake ka akamata ai a Aramakito. Te taikuia ra te reira i roto ia Ezekiela 38:14-16 e Mataio 24:29-31. (E tatau.)b Me oti te reira, ka kite tatou i te akamataanga o Aramakito. Ko te reira te tuanga maata o te mate maata, tei aite mei te akapouanga ia Ierusalema i te mataiti 70 T.N. (Mala. 4:1) No reira, ko te tamaki o Aramakito te tuanga maata o te mate maata. Kare atu e mea mei te mate maata rai i tupu ana “mei muatangana mai i teianei ao.” (Mata. 24:21) I muri ake i te reira, ka tutara a Karaiti ei Ariki no tetai 1,000 mataiti.

9. Eaa to tatou manako no te totou a Iesu no runga i te mate maata?

⁹ Te oronga mai nei teia totou no runga i te mate maata i te akamaroiroi anga no tatou. No teaa ra? No te mea te akapapu maira te reira e noatu eaa te ka tupu i te tuatau o te mate maata, ka ora mai te iti tangata o Iehova. (Apo. 7:9, 14) Ka akapapu katoa a Iehova e koia te Tutara Ngateitei i te tuatau o Aramakito e ka akatapu aia i tona ingoa.​—Sala. 83:18; Eze. 38:23.

AEA A IESU E AKAVA EI I TE MAMOE E TE PUAKANIO?

10. I mua ana, eaa ta tatou i marama no runga i te tuatau e akava ei a Iesu i te mamoe e te puakanio?

¹⁰ Tetai tuanga ke o ta Iesu totou, ko te akatutuanga o te mamoe e te puakanio. Aea a Iesu e akava ei i te mamoe e te puakanio? (Mata. 25:31-46) I mua ana, kua manako tatou e kua akamata a Iesu i te akava i te tangata ei mamoe me kore ei puakanio i te mataiti 1914. Kua manako tatou e ko te aronga tei kore i ariki i te karere Patireia e tei mate i mua ake ka akamata ai te mate maata, kua akava keia ana ratou ei puakanio e kare o ratou tuakaouanga.

11. Eaa ra e kare a Iesu i akamata ana i te akava i te tangata ei mamoe me kore ei puakanio i te mataiti 1914?

¹¹ I te mataiti 1995, kua oronga mai Te Punanga Tiaki i tetai akamaramaanga ou no runga ia Mataio 25:31. Te akakite ra taua irava e: “Kia tae maira te Tamaiti a te tangata ma tona kakā, e te aronga angela tapu ravarai, ei reira aia e noo ei ki rungao i tona terono kakā.” Karanga Te Punanga Tiaki e kua riro a Iesu ei Ariki no te Patireia o te Atua i te mataiti 1914, inara kare aia i riro mai ana ei Akava no “te pa enua ravarai” i taua mataiti ra. (Mata. 25:32; akaaite ia Daniela 7:17.) Kia akamaara e, ko te akatutuanga no runga i te mamoe e te puakanio, no runga te reira i te angaanga puapinga ta Iesu ka rave ei Akava. (E tatau ia Mataio 25:31-34, 41, 46) I te mea e kare a Iesu i akamata ana ei Akava no te pa enua ravarai i te mataiti 1914, kare e tau ana e kua akamata aia i te akava i te tangata ei mamoe me kore ei puakanio i taua mataiti ra.c Aea ra a Iesu e akamata ai i te akava i te pa enua ravarai?

12. (a) Aea a Iesu e akamata ai ei Akava no te au pa enua ravarai? (e) Eaa te au mea tei akatakaia mai i roto ia Mataio 24:30, 31 e Mataio 25:31-33, 46?

¹² Te akaari maira ta Iesu totou no runga i te au ra openga e ka akamata aia i te akava i te pa enua ravarai i muri ake me takoreia te au akonoanga pikikaa. Mei tei akakiteia i roto i te parakarapa 8, tetai au mea te ka tupu i taua tuatau ra, te akatakaia maira i roto ia Mataio 24:30, 31 Me akara tatou i te au mea ta Iesu i totou mai, aiteite te reira ki tana i taiku i roto i te akatutuanga o te mamoe e te puakanio. Ei akaraanga, ka tae mai te Tamaiti a te tangata ma tona kaka e ma te au angera; ka akaputuputuia te iti tangata e te au pa enua katoa; te aronga tei akavaia ei mamoe, ‘ka akateitei i to ratou mimiti’ no te mea, e “ora mutu kore” to ratou.d Te aronga ka akavaia ei puakanio, ka “aue” ratou no te mea kua kite ratou e e “mate mutu kore” to ratou.​—Mata. 25:31-33, 46

13. (a) Aea a Iesu e akava ei i te tangata ei mamoe me kore ei puakanio? (e) Akapeea teia maramaanga te taui anga i to tatou manako no runga i te angaanga orometua?

¹³ Ka akava a Iesu i te tangata o te pa enua ravarai ei mamoe me kore ei puakanio me tae mai aia i te tuatau o te mate maata. E oti, ka takoreia te au puakanio i te tuatau o Aramakito, koia oki e “mate mutu kore” to ratou. No reira te akaari mai nei teia e e puapinga tikai ta tatou angaanga tutuanga. I mua ake ka akamata ai te mate maata, e tuatau to te tangata kia taui i to ratou manako e kia aere na te arataa “e tae atu ei ki te ora.” (Mata. 7:13, 14) E tika, tetai taime no te tu o tetai aronga, e manako ana tatou e penei e mamoe me kore e puakanio ratou. Inara kia akamaara e na Iesu e rave i te akavaanga openga no te mamoe e te puakanio i te tuatau o te mate maata. No reira, e mea puapinga tikai kia tutu aere i te karere o te Patireia kia rauka i te tangata e manganui i te ariki i te reira.

AEA A IESU E TAE MAI EI, ME KORE E AERE MAI EI?

14, 15 Ko teea au irava e a te tuatua ra no runga i te tuatau ki mua me tae mai a Karaiti ei Akava?

¹⁴ Ia tatou e akara meitaki ra i te totou a Iesu, ka anoanoia ainei tatou kia taui i ta tatou e marama ra no runga i te tuatau e tupu ei tetai au mea puapinga i roto i ta Iesu totou? Ka akakite mai te totou i te pauanga. Ka akara ana tatou e ka akapeea.

¹⁵ I roto i tetai tuanga o tana totou i roto ia Mataio 24:29–25:46, te tuatua ra a Iesu eaa te ka tupu i te tuatau o te au ra openga e te tuatau o te mate maata. I roto i taua au irava ra, e varu taime to Iesu tuatua anga no runga i tona “aere anga mai,” me kore, ‘tae anga mai,’ e te ‘oki anga mai.’e Teia tana i tuatua no runga i te mate maata: ‘Ka kite ratou i te Tamaiti a te tangata i te aere anga mai na roto i te tiao rangi.’ “Kare kotou i kite i te ora e tae mai ei to kotou Atu.” “Ei te ora manako koreia e kotou, e tae mai ei te Tamaiti a te tangata.” I roto i tana akatutuanga o te mamoe e te puakanio, kua akakite a Iesu e: ‘Ka tae mai te Tamaiti a te tangata ma tona kakā.’ (Mata. 24:30, 42, 44; 25:31) Te tuatua ra teia au irava e a no runga i te tuatau ki mua me aere mai a Karaiti ei Akava. Teiea i roto i ta Iesu totou te toenga o te au irava e a no runga i tona “aere anga mai”?

16. Eaa tetai au irava ke te taiku maira i to Iesu aere anga mai?

¹⁶ Teia ta Iesu i tuatua no runga i te tavini akono meitaki e te pakari: “E ao to te reira tavini, to tei rokoia mai e tona pu [me kore kua tae mai tona pu], te pera ra.” I roto i te akatutuanga o te au paretenia, kua akakite a Iesu e: “Te aere atura ratou e oko ra, tae maira taua tane akaipoipo ou ra.” I roto i te akatutuanga o te au tareni, kua na ko a Iesu e: “E roa akera, oki maira te pu o taua aronga tavini ra.” I roto i taua akatutuanga ra, kua karanga te pu e: “Kia tae mai au ra, rauka iora taku.” (Mata. 24:46; 25:10, 19, 27) Aea a Iesu e tae mai ei, me kore e oki mai ei, mei tei akatakaia i roto i teia au irava?

17. I te tuatau i topa, eaa ta tatou i akakite ana no runga i to Iesu tae anga mai i roto ia Mataio 24:46?

¹⁷ I mua ana, kua akakite ana tatou i roto i ta tatou au puka e te tau ra teia au irava openga e a ki to Iesu tae anga mai, me kore tona oki anga mai i te mataiti 1918. Ei akaraanga, ka akara ana tatou e akapeea te tuatua “tei rokoia mai” me kore tae anga mai, te taangaangaia anga i roto i ta Iesu tuatua no runga i “te tavini akono meitaki e te pakari.” (E tatau ia Mataio 24:45-47.) Kua marama tatou i te aiteanga o te tuatua “tei rokoia mai” i roto ia Mataio 24:46, e kua aere mai a Iesu i te tutaka i te aronga akatainuia i te mataiti 1918 e kua akariro aia i te tavini ei akaaere i te au apinga ravarai a te Pu i te mataiti 1919. (Mala. 3:1) Inara, ka anoanoia tatou kia taui i ta tatou i marama no runga i te tuatau me tupu tetai au mea i roto i ta Iesu i totou. Eaa te tumu?

18. Eaa ta te totou a Iesu e akaari maira no runga i tona aere anga mai?

¹⁸ Te au taime ravarai me taikuia te tuatua ‘tae anga mai’ i roto i te au irava i mua ake ia Mataio 24:46, te tuatua ra te reira no te tuatau ka aere mai a Iesu kia akava i te au pa enua i te tuatau o te mate maata. (Mata. 24:30, 42, 44) Pera katoa, mei ta tatou i kite i roto i te parakarapa 12, te akataka maira a Mataio 25:31 i taua tuatau ra me akava a Iesu i te au pa enua a te tuatau ki mua. No reira, e tumuanga tau kia marama tatou e ko te aiteanga o Mataio 24:46, 47, koia oki, ka tae mai a Iesu i te akariro i te tavini akono meitaki ei akaaere i te au apinga ravarai nana i te tuatau ki mua o te mate maata.f (Akara i te au manako poto 6.) Te akaari maira ta Iesu totou e ko teia au irava e varu e tuatua ra no runga i tona aere anga mai, te tou ra ki te akavaanga a te tuatau o te mate maata.

19. Eaa te au mea ou ta tatou i apii i roto i teia atikara, e eaa te au uianga ka pauia i roto i te au atikara ka aru mai?

¹⁹ Eaa ta tatou i apii mai i roto i teia atikara? Kua pauia e toru uianga no runga i te tuatau e tupu ei tetai au mea. Te mea mua, kare te mate maata i akamata ana i te mataiti 1914, inara ka akamata me tamaki atu te United Nations ia Babulonia Maata. Te rua, kare a Iesu i akamata ana i te akava i te mamoe e te puakanio i te mataiti 1914. Kareka ra, ka akamata aia i tana akavaanga i te tuatau o te mate maata. Te toru, kare a Iesu i akariro ana i te tavini akono meitaki ei akaaere i tana apinga ravarai i te mataiti 1919. Ka rave aia i teia i te tuatau o te mate maata. No reira, te au mea e toru tei taikuia i te akamataanga o teia atikara, ka tupu i te tuatau o te mate maata. Ka taui ainei teia i ta tatou e marama ra no runga i te akatutuanga o te tavini akono meitaki? Ka taui ainei te reira i to tatou marama no runga i tetai au akatutuanga a Iesu e akatupuia nei i teia tuatau openga? Ka pauia teia au uianga puapinga i roto i te au atikara ka aru mai.