Tetai Oraanga Meitaki Atu​—Kare e Roa!

KA AKAMANAKO ana i tetai tangata akakite i te reva e vaitata ua ana rai tana au tamanako anga i te tano. Me akakite aia ki runga i te au nuti aiai e ka ua i tera mai ra, kare koe e emiemi i te apai i toou tamaru me akaruke koe i te are i tera mai popongi. Kua riro tona papaanga i topa ra ei akapapu anga kia koe. Kua rave atu koe i tana i karanga ra.

I teianei, mei teaa atura i te papu ta Iehova taputou no tetai oraanga meitaki atu i runga i te enua parataito nei? Eaa ta tona papaanga i topa ra e akakite maira? Te akaari taka ua maira te tupuanga o te au totou Puka Tapu i te papaanga o Iehova. E Atua aia ma te tu tika tikai kare e autu kore e te tuatua mou. (Iosua 23:14; Isaia 55:11) No te papu i te au taputou a te Atua ko Iehova e i tetai au taime kua tuatua tikai aia no runga i te au tupu anga taputouia no te tuatau ki mua mei te mea e kua tupu takere te reira. Ei akaraanga, i muri ake i tana taputou o tetai ao ou te ngai ka kore te mate e te mii, ka tatau tatou e: “Kua tupu [te reira au akameitakianga taputouia].” Mei tera te tu, “E tika te reira!”​—Apokalupo 21:5, 6, NW tataanga i raro ake.

Ae, te riro ra te tupuanga o ta Iehova au taputou i topa ei oronga mai kia tatou i te akapapu anga i te tika anga o tana taputou no tetai oraanga meitaki atu no te tangata nei. Inara aea teia oraanga meitaki atu e tae mai ei?

Tetai Oraanga Meitaki Atu​—Aea?

Kare e roa atu ana ka tae mai tetai oraanga meitaki atu! Ka papu ia tatou te reira no te mea te karanga ra te Puka Tapu e e manganui te au mea kino e tupu ra i te enua nei i mua ake te Parataito ka tuku mai ei i tetai oraanga meitaki atu. Te tupu ra te reira au mea kino i teianei.

Ei akaraanga, kua akakite a Iesu Karaiti e ka tupu te au tamaki maata ra. Kua karanga aia e: “E tu mai tetai enua e tamaki mai ki tetai enua, e tetai basileia e tamaki mai ki tetai basileia.” (Mataio 24:7) Kua tika atu rai teia totou. I te au mataiti mei te 1914 ki te 1945, kua tupu ana e rua nga tamaki i teianei ao, e i muri ake i teia ko tetai atu au tamaki e manganui te ngai i tamaki ei te au pa enua i tetai e tetai. “I te au mataiti averiti okotai, e maata atu i te taki rua taime te au mate mei te tamaki i teia tuatau [mei te Tamaki II o Teianei Ao mai] i to te au mate i te 19 anere mataiti e e itu taime maata atu i to te 18 anere mataiti.”​—World Military and Social Expenditures 1993.

Ko te totoa anga o te maki tetai akakite anga tika o te vaitata anga mai o tetai oraanga meitaki atu i roto i te Parataito. Kua akakite a Iesu e ka tupu te au ‘maki-mate i tera ngai i tera ngai.’ (Luka 21:11) Kua tika ainei teia totou? Ae. I muri ake i te tamaki mua o teianei ao, kua tamate te maki vuru Paniora e tere atu i te 20 mirioni au tangata. Mei te reira taime mai, kua tamate te kaneta, te maki pukuatu, te maki mariri, te AIDS, e tetai atu au maki e mirioni ua atu au tangata. I te au enua tutupu, te au maki tei akatupuia e te au vai kino (kapiti mai te maki eke e te au maki toke i roto i te ara kopu) te tamate ra e au mirioni ua atu au oraanga i te au mataiti ravarai.

Kua karanga katoa a Iesu e: “E onge oki.” (Mataio 24:7) Mei tei akakiteia i roto i te atikara i mua ake ana, kare e rava ana ta te aronga putaua kai no te kai. Ko tetai tuanga teia o te akakite anga e kare e roa atu ana ka tae mai tetai oraanga meitaki atu i roto i te Parataito.

“E te ngaruerue maata i te enua i tera ngai i tera ngai,” i na Iesu ei. (Luka 21:11) Kua tika katoa teia i to tatou tuatau nei. Mei te 1914 mai kua tamatemate te au ngaruerue enua kino ra e au anere e te au tauatini ua atu oraanga.

Te karanga katoa ra te Puka Tapu no “te tuatau openga” e ka akairoia te reira e tetai taui anga i roto i te au tangata. Ka riro ratou “ei akaperepere ia ratou uaorai” e “ei noinoi,” e ka riro te au tamariki “ei akarongo kore ki te metua.” Ka riro te au tangata ua nei “ei anoano i te au mea e navenave ei ra, kare i anoano i te Atua.” (2 Timoteo 3:1-5) Kare ainei koe e akatika e te tano ra teia akatutu anga ki te manganui?

I te maata e te maata ua atu au tangata e rave ra i te au mea kino ra, ka tupu ua atu te kino. Kua totou katoaia teia. Kia tau kia Mataio 24:12, kua karanga a Iesu e ka “maata te kino.” Papu e ka akatika koe e te kino ua atura te rave kino i teianei i to te au mataiti i topa ra. Te mataku ra te au tangata i te au ngai ravarai ko te keiaia ratou, ko te pikikaaia, me kore e takinga kinoia na tetai atu tu.

Te au tamaki, te au maki totoa, te rava kore o te kai, te au ngaruerue enua, te tupu anga o te kino, e tetai taui anga kino o te au piri anga tangata​—te kitea pouroaia ra teia i teia tuatau, mei ta te Puka Tapu i totou ra. Penei ka ui koe, ‘Inara kare ainei teia au mea i tupu i roto i te tuatua enua tei aereia mai o te tangata nei? Eaa te tuke i to tatou tuatau nei?’

Te vaira etai au tu puapinga maata tikai no runga i te tupu ra i teia tuatau. Kare te Puka Tapu i karanga ana e tetai ua atu tu, mei te rava kore o te kai, e ka riro koia anake ua ei akapapu anga e tei roto tatou i te tuatau openga e te vaitata maira tetai oraanga meitaki atu. Te au totou a te Puka Tapu no runga i te tuatau openga kua tau te reira kia akatupuia ki rungao i tetai uki atua kore.​—Mataio 24:34-39; Luka 17:26, 27.

Pera katoa, e mea tuke e ko etai au mea o ta Iesu totou​—no runga tikai i te rava kore o te kai e te totoa anga o te maki​—te tika ra te reira i teia tuatau. No teaa ra? No te mea kare te au rave anga taineti i maata ana mei teia. Kare te au kite rapakau anga e te au tu rapakau anga i tere rava atu ana me kore i totoa ana mei teia rai. Na te Atua anake ua tei rauka i te totou i roto i tana Tuatua, koia te Puka Tapu, e a tetai tuatau, ka kino maata ua atu te maki e te onge, kare e meitaki atu.

Mei te mea te tika aere maira te au totou a te Puka Tapu no runga i te openga o te tuatau, me kore “te tuatau openga,” eaa ta tatou ka taopenga? E te vaitata maira tetai oraanga meitaki atu! Inara akapeea te reira e tupu ei?

Tetai Oraanga Meitaki Atu​—Akapeea?

I toou manako e ka rauka i te au tangata nei i te apai mai ia Parataito? I te tuatua enua tei aereia mai e tae mai ki teia ra, i vai ana te au tu kavamani tangata. Kua tauta pakari etai pae no te akamerengo i te au anoano o te tangata. Inara, e manganui te au manamanata te kino ua atura. I te au enua apinganui e te au enua putaua, te putoto ra te au kavamani ma te takino anga apinga akakino, te au are kinokino, te putaua, te rave kino, te kore e ngai angaanga, e te tamaki.

Noatu e ka rauka i te au kavamani i te rapakau i etai o teia au manamanata ra, kare rava e rauka ia ratou i te oronga i te rangatira katoa mei te oraanga maki; e kare katoa e rauka ia ratou i te akaope i te tangata metua e te mate. Te taka meitaki ra, kare rava e rauka i te au tangata i te apai mai ia Parataito ki teia enua.

Te karanga ra te Puka Tapu ma te pakari e: “Auraka e irinaki ki te ui ariki, i te tamaiti a te tangata nei, kare oki ona ora.” Koai, i reira, ta tatou ka irinaki? Te pau ra te Puka Tapu e: “E ao tona tei te Atua o Iakoba te tauturu iaia; tei tona Atua tei ia Iehova tona irinaki anga.” (Salamo 146:3, 5) Me tuku tatou i to tatou manakonakoanga ki roto i te Atua ko Iehova, kare rava tatou e ati ngakau.

Te papu ra e ko Tei rauka ra te pakari e te mana no te anga i te enua, te ra, e te au etu ka rauka katoa iaia i te maani i tetai enua ei parataito. Ka rauka katoa iaia i te maani i te au tangata kia rekareka i tetai oraanga meitaki atu. Noatu eaa ta te Atua ko Iehova ka akanoo no te rave, ka rauka iaia e ka akatupu katoa aia i te reira. Te karanga ra tana Tuatua e: “Kare rava oki e mea e kore e tika i te Atua.” (Luka 1:37) Inara akapeea te Atua i te apai anga mai i tetai oraanga meitaki atu?

Ka apai mai a Iehova i tetai oraanga meitaki atu na roto i tona Patireia. E eaa te Patireia o te Atua? E kavamani tikai teia ma tetai Tutara tei akataoongaia e te Atua, koia ko Iesu Karaiti. Tei te rangi to te Atua Patireia, inara kare e roa atu ana ka apai mai te reira i te au akameitakianga umere e tetai oraanga meitaki atu ki te au tangata o te enua Parataito ra.​—Isaia 9:6, 7.

Penei kua matau takere koe i te pure a Iesu ra, tei kitea i roto i te Puka Tapu ia Mataio 6:9-13. Tetai tuanga o te reira pure ki te Atua te karanga ra e: “Kia tae toou basileia. Kia akonoia toou anoano i te enua nei, mei tei te ao katoa na.” Ei rotai atu ki te reira pure, ka “tae” mai te Patireia o te Atua no te rave i te akakoroanga o te Atua ko Iehova no te enua nei. E e akakoroanga nona kia riro mai te enua ei parataito.

Okotai uianga openga: Eaa taau ka rave e rekarekaʼi i tetai oraanga meitaki atu i roto i te Parataito te aere maira?

Taau ka Anoanoia kia Rave

Te mou ra te Atua ko Iehova i te manakonakoanga no tetai oraanga meitaki atu i roto i te Parataito no te katoatoa te ka rave i tona anoano. Te akakite ra te Puka Tapu e: “Ka riro te enua no te aronga tuatua-tika, ka noo tamou rai ratou i reira.” (Salamo 37:29) Inara eaa te mea e riro ei tetai tangata ei tuatua tika i roto i nga mata o te Atua?

Ei akamareka ia Iehova ka anoanoia tatou kia apii maata atu i tana ka inangaro ia tatou kia rave. Me apii tatou i te kite i te Atua e te taangaanga i te reira ki roto i to tatou oraanga, ka ora i reira tatou e tuatau ua atu. I roto i tetai pure ki te Atua, kua karanga a Iesu e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:3.

Te puka te ka akakite mai kia tatou no runga i te Atua ko Iehova e Iesu Karaiti ko te Tuatua na te Atua, koia oki te Puka Tapu. Ko tetai ia o ta Iehova apinga aroa akaperepere rava atu. Te aite ra te Puka Tapu mei tetai reta mei ko mai i tetai metua tane aroa ki tana au tamariki. Te akakite maira te reira no runga i te taputou a te Atua no te apai mai i tetai oraanga meitaki atu no te tangata nei e te akaari maira kia tatou e akapeea te reira e raukaʼi ia tatou. Te akakite maira te Puka Tapu kia tatou i ta te Atua i rave ra i te tuatau i topa e eaa tana ka rave i te tuatau ki mua. Te oronga katoa maira te reira i te ako anga meitaki e akapeea tatou i te rave anga atu i to tatou au manamanata ma te autu ra i teianei. E tikai, te apii maira te Tuatua na te Atua e akapeea e kiteaʼi tetai tu mataora noatu i roto i teia ao manamanata ra.​—2 Timoteo 3:16, 17.

Ka rekareka ua te Au Kite o Iehova i te akanoo i tetai apii Puka Tapu oronga ua naau i te kainga. E apii e akapeea e raukaʼi ia koe tetai oraanga mataora atu i teianei, ma te manakonakoanga o tetai oraanga meitaki maata atu i te tuatau ki mua te vaitata maira.

[Tutu i te kapi 5]

Te akakite maira te au totou Puka Tapu e te vaitata maira tetai oraanga meitaki atu

[Tutu i te kapi 7]

Ka apai mai te Patireia o te Atua i tetai oraanga meitaki atu no te tangata nei