Eaa ta Tatou ka Rave e Ora’i?

KUA ui tetai tangata kia Iesu e: “E te Atu, e toko iti aina te ka ora?” Akapeea a Iesu i te pau anga atu? Kua karanga ainei aia: ‘E ariki ua mai iaku ei Atu e te Akaora noou, e ka ora koe’? Kare! Kua karanga a Iesu e: “E uapou ua atu na i te tomo na te ngutupa o iti: e karanga atu oki au kia kotou, e manganui te ka timata i te tomo ki roto, e kare rava e tika.”​—Luka 13:23, 24.

Kua autu kore ainei a Iesu i te pau atu i te uianga a te tangata ra? Kare, kare te tangata i ui ana e mei teaa te ngata e ora atu ei; kua ui aia e me e toko iti ua te numero. No reira kua akakite ua atu a Iesu e e toko iti ua te au tangata tei tapapaia te ka uapou ia ratou uaorai kia rauka teia akameitakianga umere.

Penei ka tuatua etai aronga tatau ma te patoi e: ‘Kare ko tena tei akakiteia mai kiaku.’ Penei ka taiku teia aronga ia Ioane 3:16, e karanga ra: “No to te Atua aroa i te ao nei, kua oronga mai aia i tana Tamaiti anau tai, e ko tetai ua atu tei irinaki ra iaia kare ia e mate, inara ka rauka te ora mutu kore.” (King James Version) Inara, ka pau tatou e: ‘Eaa, i reira, ta tatou ka irinaki? E i vai tikai ainei a Iesu? Eaa oki. E ko ia ainei te Tamaiti a te Atua? E tikai! E mei te mea te kapiki ra te Puka Tapu ia Iesu e ko “te Orometua” e “te Atu,” kare ainei e kia irinaki katoa tatou i tana i apii ra, te akarongo iaia, e te aru iaia?’​—Ioane 13:13; Mataio 16:16.

Aruanga ia Iesu

Ko teia te ngai e tupu maira te manamanata! E manganui te au tangata tei akakiteia e kua “ora” ratou te akara anga e e meangiti ua to ratou inangaro i te aru me kore te akarongo ia Iesu. Ko te tika, kua tata tetai orometua Porotetani e: “Ae oki, e tau to tatou akarongo ki roto ia Karaiti kia tupu ua atu. Ko te tuatua ra e kia tupu rava te reira, me kore ra kia anoanoia, kare ia i turuia i roto i te Puka Tapu.”

Tei tuke ra, te akapapa ra te Puka Tapu i te au angaanga tau kore tei matauia i roto i etai au tangata tei manako e ka “ora” ratou. No runga i tetai tei rave ua atu i teia au tu nei, kua akoia te au Kerititiano e: “E akataka ke atu kotou i taua tangata tuatua kino i roto ia kotou na.” Papu e kare te Atua e inangaro i te au tangata rave kino kia takino i tana putuputuanga Kerititiano!​—1 Korinetia 5:11-13.

Eaa, i reira, te aiteanga kia aru ia Iesu, e akapeea tatou i te rave anga i te reira? Eaa ra ta Iesu i rave? E tangata akono tau kore ainei aia? e akaturi ainei? e kona kava ainei? e pikikaa ainei? E tiratiratu kore ainei aia i roto i te angaanga pitiniti? Kare rava! ‘Inara,’ penei ka ui koe e, ‘kia tama ainei au i taua au mea pouroa i roto i toku oraanga?’ Ei pau anga, ka akara ana ia Ephesia 4:17 e tae atu ki te 5:5. Kare te reira e karanga ana e ka ariki te Atua ia tatou noatu eaa ta tatou ka rave. Mari ra, te akakite ra i reira e kia tuke mai tatou mei te au pa enua o teianei ao tei “kite kore i te akama, . . . kare ra mei te reira ta kotou i apii i te Mesia . . . Kia kopae kotou i ta kotou tuatua i muatangana ra, i te tangata taito . . . Te tangata i keia na, auraka aia e keia akaou . . . Kareka te akaturi, e te au tuatua viivii ravarai, e te noinoi apinga, auraka rava e akaikiia ki o kotou na, ko tei tau ïa i te aronga tapu . . . Kia kite oki kotou e, kare a te akaturi, e te tangata viivii ra, kare a te noinoi apinga ra, e akamori idolo ïa, kare anake a ratou tuanga i te basileia o te Mesia ra e te Atua.”

Te aru ra ainei tatou ia Iesu me kare tatou e tauta ua i te noo kia rotai atu ki tona akaraanga? Kare ainei tatou e anoanoia kia taangaanga i to tatou oraanga mei to Karaiti rai? Takitai ua ake te taime ka manakoia teia uianga puapinga e te au tangata tei karanga, mei ta tetai pepa akonoanga i karanga ra: “E aere mai kia Karaiti i teianei​—mei tera ua.”

Kua akamatakite tetai o ta Iesu au pipi no te au tangata atua kore “ko tei ruri ke i te aroa ua o te Atua ei kanga anga, e kua akakore i te Atu okotai ra i te Atua, i to tatou Atu ia Iesu Mesia ra.” (Iuda 4) Akapeea tikai ra tatou i te ruri ke anga i to te Atua tu aroa ua “ei kanga anga”? Penei ka pera tatou na te tamanakoanga e te tapoki ra te atinga o Karaiti i te au ara pakari ta tatou i manako atura no te rave ua e kare i te au ara o te tu apa kore o te tangata ta tatou e tauta nei i te akaruke atu. Papu roa e kare tatou e inangaro i te akatika atu ki ta tetai tangata evangeria Marike rongoia, tei karanga e kare koe e anoanoia “kia tama, kia akaruke, me kore kia uri mai.”​—Akatuke ia Angaanga 17:30; Roma 3:25; Iakobo 5:19, 20.

Na te Irinaki Anga e Akakeu Kia Rave Atu

E manganui te au tangata tei akakiteia e na te “irinakianga ia Iesu” ko te rave anga okotai ia e kare to tatou akarongo e anoanoia kia pakari rava no te akakeu i te akarongo. Inara kare te Puka Tapu e akatika ana ki te reira. Kare a Iesu i karanga ana e ka ora te au tangata tei akamata ra i te kaveinga Kerititiano. Mari ra, kua karanga aia e: “Ko te tāpu marie ra e kia tae ki te openga, koia te ka ora.” (Mataio 10:22) Te akaaite ra te Puka Tapu i to tatou kaveinga Kerititiano ki tetai taemoemo anga, ko te ora oki te re i te openga ra. E te raurau ra te reira e: “E akaarite i to kotou taemoemo anga, kia rauka te korona.”​—1 Korinetia 9:24.

No reira, te “arikianga ia Karaiti” e maata atu te ka o mai i te ariki ua i te au akameitakianga ta te atinga maata roa o Iesu ka oronga mai. Te umuumuia ra te akarongo. Te karanga ra te apotetoro ko Petero e ka akamata te akava anga “i te ngutuare o te Atua nei,” e oti: “E na ko nei atu ia tatou nei te akavaanga i te tupu, eaa ra oki te openga o te aronga kare i akarongo i te evangelia o te Atua ra?” (1 Petero 4:17) No reira kia maata atu ta tatou ka rave i te akarongo ua e te irinaki ua. Te karanga ra te Puka Tapu e kia riro tatou ‘ei aronga rave i te tuatua nei, auraka ei aronga akarongo ua, i te pikikaa ua anga ia tatou uaorai.’​—Iakobo 1:22.

Ta Iesu Uaorai Au Tuatua

Te ki ra te puka Puka Tapu o Apokalupo i te au tuatua mei ko mai ia Iesu, tei tukuia mai na roto ia Ioane ki te au putuputuanga Kerititiano e itu o mua ana. (Apokalupo 1:1, 4) Kua karanga ainei a Iesu e mei te mea kua “ariki” takere te au tangata o teia au putuputuanga iaia, kua rava ua te reira? Kare. Kua akapaapaa aia i ta ratou au angaanga, to ratou roiroi anga e to ratou akakoromaki anga e kua tuatua no runga i to ratou aroa, te akarongo, e te angaanga orometua. Inara kua karanga aia e ka timata te Tiaporo ia ratou e ka tutakiia ratou “i te tau i ta [ratou] angaanga.”​—Apokalupo 2:2, 10, 19, 23.

No reira kua akataka a Iesu i tetai apainga maata atu i tei maramaia e te maata anga o te au tangata i te akakite angaia kia ratou e to ratou ora e “angaanga akaotiia” ia ratou e “ariki” ra iaia i roto i tetai uipaanga akonoanga. Kua karanga a Iesu e: “Ko tei inangaro i te aru mai iaku, e akaruke aia iaia uaorai, e rave i tana satauro, ka aru mai ei iaku. Ko tei umuumu atu i tona uaorai ora, ka ngere ïa i te ora: ko tei kopae ra i tona ora iaku nei, e rauka iaia te ora.”​—Mataio 16:24, 25.

E akaruke ia tatou uaorai? E aru tamou ia Iesu? Ka umuumuia te tu tauta. Ka taui te reira i to tatou oraanga. Inara, kua karanga tikai ainei a Iesu e penei ka anoanoia etai pae ia tatou kia ‘kopae i to tatou au ora’​—kia mate nona ra? Ae, ka rauka te reira tu akarongo ma te kite o te au mea umere tikai taau ka mou mai mei te apiianga i te Tuatua na te Atua. Kua kiteaia i te ra i te pei angaia a Setephano ki te toka e te aronga akonoanga neneva ra “kare atura i tika ia ratou kia patoi mai i te pakari e te vaerua i tuatuaʼi aia ra.” (Angaanga 6:8-12; 7:57-60) E kua akaariia taua tu akarongo i to tatou tuatau nei e te au anere Au Kite o Iehova tei matemate ra i roto i te au puakapa tamamae anga o te Nati kare ra i takino i to ratou au akava ngakau tereniia e te Puka Tapu.a

Te Toto Mapu Kerititiano

Kia mou ngaueue kore tatou i to tatou akarongo Kerititiano no te mea, kare mei taau e akarongo ra i roto i etai au akonoanga me kore i runga i te au porokarama akonoanga i runga i te tivi, te karanga ra te Puka Tapu e ka rauka rai ia tatou i te topa ke. Te akakite ra te reira no runga i te au Kerititiano tei akaruke ra i “te ara mou.” (2 Petero 2:1, 15) No reira ka anoanoia tatou i te ‘rave akaoti ua i to tatou uaorai ora ma te mataku e te rutetetete.’​—Philipi 2:12; 2 Petero 2:20.

Ko teia ainei te tu tei maramaia e te au Kerititiano o te anere mataiti mua, te au tangata tikai tei rongo ia Iesu e tana au apotetoro i te apii anga? Ae. Kua kite ratou e te anoanoia ra ratou kia rave i tetai mea. Kua karanga a Iesu e: “E teianei, ka aere kotou, e akariro i to te pa enua katoa ei pipi; . . . Ma te apii atu ia ratou, kia akono i te au mea katoa taku i akaue atu kia kotou.”​—Mataio 28:19, 20.

I etai au epetoma i muri ake i to Iesu karanga anga i te reira, e 3,000 au tangata tei papetitoia i roto i te tai ra. Kua tupu viviki te numero o te aronga irinaki ki te 5,000. Te aronga tei irinaki ra kua apii atu ratou i tetai ke ra. I te akapueu ke angaia ratou e te takinokino anga, kua riro te reira ei akatotoa atu i ta ratou tuatua. Te karanga ra te Puka Tapu e kare ko tetai au arataki ua mari ra “ko taua aronga ra i pueurikiriki ke ra, aere atura e akakite aere i te tuatua e pini rava ake te enua katoa.” I etai 30 mataiti i muri mai, kua rauka i reira i te apotetoro Paulo i te tata no te tuatua meitaki e kua “akakiteia akenei ki te tangata ravarai i raro ake i teianei rangi.”​—Angaanga 2:41; 4:4; 8:4; Kolosa 1:23.

Kare e aronga i aru ana ia Paulo, mei ta etai aronga evangeria i runga i te tivi e rave ana, na te karanga anga e: ‘E ariki ia Iesu i teia taime nei, e ka ora koe e tuatau ua atu.’ E kare katoa aia i irinaki ana mei te orometua Marike rai tei tata ra: “Ei tamaiti mapu, . . . kua ora takere au.” E tere atu i te 20 mataiti i muri ake i to Iesu iki tikai anga ia Paulo kia apai i te tuatua Kerititiano ki te au tangata o te pa enua, kua tata teia apotetoro angaanga pakari ra: “Te moto nei ra au i taku kopapa kia vi: ko te riro ua aea oki au, ko tei ako ia etai ke ra, ei tangata kite koreia mai.”​—1 Korinetia 9:27; Angaanga 9:5, 6, 15.

E apinga aroa te ora no ko mai i te Atua. Kare te reira e angaangaia e raukaʼi. Inara ka umuumuia te tu tauta ia tatou ra. Me oronga atu tetai tangata i tetai apinga aroa puapinga rava naau e kare koe i ariki roa ana no te mou mai i te reira e te apai i te reira, na roto i toou tu ariki kore penei ka akakeuia tei oronga ra kia oronga i te reira ki tetai tangata ke. Mei teaa ra te puapinga o te toto ora o Iesu Karaiti? E apinga aroa oronga ua te reira, inara kia akaari tatou i te tu ariki oonu no te reira.

Tei roto te au Kerititiano mou i tetai turanga akaoraia koia oki tei roto ratou i tetai turanga marekaia i mua i te Atua. Ei pupu, te papu ra to ratou ora. Ei au tangata tataki tai, ka tau ratou kia aravei atu i ta te Atua au umuumu anga. Inara, ka autu kore rai tatou, no te mea kua karanga a Iesu e: “Ko te tangata kare e topiri mai iaku ra, e akarukeia ïa mei te rara ra, marō atura ïa.”​—Ioane 15:6.

“E Mea Ora Oki te Tuatua a te Atua”

Te pukapuka anga tei taikuia i te akamata anga o te atikara i mua ake i teia kua tupu te reira e vaitata i te 60 mataiti i topa. Te irinaki ra rai a Johnny e ka tupu anake ua te ora na roto ia Iesu Karaiti, inara kua kite aia e ka anoanoia tatou kia itae i te reira. Kua papu iaia e te tou ra te Puka Tapu ki te tumu anake tikai o te manakonakoanga no te tangata nei e kia apii tatou i te reira puka umere, kia akakeuia e te reira, e kia tuku i te reira kia akakeu ia tatou kia rave i te au angaanga aroa, te akarongo, te takinga meitaki, te aru tikai, e te akakoromaki. Kua utuutu mai aia i tana au tamariki kia irinaki i taua au mea ra, e i teianei te rekareka ra aia i te kite ia ratou e utuutu ra i ta ratou au tamariki na te reira tu katoa. Te inangaro ra aia i te katoatoa kia rauka te reira tu akarongo, e te rave ra aia i te ka rauka iaia no te tamou i te reira ki roto i te au ngakau e te au manako o tetai ke ra.

Kua akauruia te apotetoro Paulo kia tata e “e mea ora oki te tuatua a te Atua, e te ririnui.” (Ebera 4:12) Ka taui te reira i te oraanga. Ka akakeu te reira ia koe kia rave i te au angaanga aroa, te akarongo, e te aru tikai. Inara e maata atu te ka anoanoia i te “ariki” manako ua i ta te Puka Tapu e karanga ra. E apii i te reira e e tuku i toou ngakau kia akakeuia e te reira. E tuku i tona pakari kia arataki ia koe. Mei tetai 5,000,000 Au Kite puareinga o Iehova i roto i te 230 au enua e tere atu te oronga ra i te au apii Puka Tapu oronga ua i te kainga. E kite ei i taau ka mou mai mei teia tu apii, e tata ki te au papuritia o teia makatini. Ka riro te akarongo e te maroiroi pae vaerua taau ka rauka ra ei akarekareka ia koe!

[Tataanga Rikiriki i Raro]

[Pia i te kapi 7]

Eaa ra ‘Kia Taumāro Tikai i te Akarongo’?

Kua tataia te puka Puka Tapu o Iuda ki “tei tiakiia i roto ia Iesu Mesia, i te aronga i kapikiia ra.” Kua karanga ainei te reira e no te mea kua ‘ariki ratou ia Iesu’ kua papu to ratou ora? Kare, kua akakite a Iuda ki teia au tu Kerititiano ‘kia taumaro tikai i te akarongo.’ Kua oronga aia e toru au tumu no te raveanga i teia. Te mea mua, kua ‘akaora te Atua i te tangata i te enua ra i Aiphiti,’ inara i muri mai e manganui ia ratou tei topa ra. Te rua, kua meameaau katoa te au angera e kua riro mai ei au temoni. Te toru, kua takore te Atua ia Sodoma e Gomora no te tu ainga tau kore viivii ra tei raveia i roto i taua au oire. Kua oronga mai a Iuda i teia au papaanga Puka Tapu “ei akaraanga.” Ae, te aronga irinaki katoa “tei tiakiia i roto ia Iesu Mesia” kua anoanoia kia matakite ko te topa aea mei te akarongo mou.​—Iuda 1-7.

[Pia i te kapi 8]

Ko Teea te Mea Tika?

Te karanga ra te Puka Tapu e: “I akatikaia te tangata i te akarongo, auraka i te angaanga a te ture.” Te karanga katoa ra te reira e: “Kua kite atura kotou e i akatikaia te tangata i te angaanga, kare i te akarongo anake ua.” Ko teea te mea tika? Ka akatikaia ainei tatou i te akarongo me kore i te angaanga?​—Roma 3:28; Iakobo 2:24.

Te pau anga rotai no roto mai i te Puka Tapu koia oki kua tano nga mea e rua.

No te au anere mataiti ko te Ture ta te Atua i oronga na roto ia Mose kua umuumuia te au ngati Iuda tei akamori kia rave i te au atinga tikai e te au oronga anga atinga, kia akono i te au ra tarekareka anga, e kia aru i te au umuumu anga o te kai e tetai atu au mea. Ko teia “au angaanga o te ture,” me kore “au angaanga” ua nei, kare ia i anoano akaouia i muri ake i to Iesu oronga anga i te atinga apa kore ra.​—Roma 10:4.

Inara ko te tika e ko teia au angaanga tei raveia i raro ake i te Ture a Mose tei tupauia e te atinga maata roa o Iesu kare te aite anga e ka rauka ia tatou i te kopae i te au ikuiku anga a te Puka Tapu. Te karanga ra te reira e: “Ka tangaʼi oki i te toto o te Mesia ra . . . e maata atu ïa te mā o to tatou akava-ngakau i te angaanga mate [taito atu], kia akamori i te Atua ora ra”?​—Ebera 9:14.

Akapeea tatou i te “akamori i te Atua ora”? I roto i tetai atu au mea, te akakite maira te Puka Tapu kia tatou kia tamaki i te au angaanga o te kopapa, kia patoi i te tu akono tau kore o teianei ao, e kia kopae i tana au puereere. Te karanga ra te reira e: “Kukumi ua ïa i te kukumianga meitaki ra i te akarongo,” e kopae i “te ara e rokoia ngoie ei tatou nei,” e e “oro tamou marie ei i teianei oroanga i tukuia mai ki mua ia tatou nei, Ma te akara tamou kia Iesu i te tumu e te akaoti i to tatou akarongo.” E te raurau ra te Puka Tapu ia tatou ‘kia kore tatou e akaroiroi, kia kore oki e taitaia to tatou ngakau.’​—1 Timoteo 6:12; Ebera 12:1-3; Galatia 5:19-21.

Kare tatou e angaanga no to tatou ora na te rave anga i teia au mea, no te mea kare e rauka i tetai tangata okotai te angaanga kia rava kia tau no teia au tu akameitakianga umere. Inara kare tatou e tau no teia apinga aroa umere, me autu kore tatou i te akaari i to tatou aroa e te akarongo na te raveanga i te au mea ta te Puka Tapu e karanga ra te inangaro ra te Atua e Karaiti ia tatou kia rave. Me kare e au angaanga ei akaari i to tatou akarongo, ka puapinga kore ta tatou tuatua anga no te aru ia Iesu, no te mea te karanga ra te Puka Tapu e: “Koia katoa te akarongo, kare e angaanga, e mea mate ïa, i te mea te vai okotai ua ra.”​—Iakobo 2:17.

[Tutu i te kapi 7]

E apii i te Puka Tapu, kia akakeuia e te reira