Te Akaora Tona Aiteanga Tikai

‘KUA ora ainei koe?’ I te maata anga o te taime, te aronga tei ui i teia uianga te manako ra e kua ora ratou no te mea kua ‘ariki ratou ia Iesu ei Akaora no ratou uaorai.’ Inara te manako ra tetai atu e te vaira te au ara tukeke ki te ora tera ua me ‘tei roto a Iesu i toou ngakau,’ kare e kino ana eaa toou irinaki anga e eaa taau akonoanga.

Te karanga ra te Pipiria e e anoano no te Atua ‘kia ora te tangata katoatoa.’ (1 Timoteo 2:3, 4) Ka rauka i reira te akaora i te katoatoa tei ariki ra i te reira. Inara eaa tikai te aiteanga e kia ora? E mea ainei te reira tei tupu ua kia koe ma te tauta anga meangiti me kore kare roa?

Te aiteanga o te tuatua “akaora” ko te “ora anga mei te tumatetenga me kore te akapou anga.” No reira ko te akaora mou e maata atu te ka o mai i tetai turanga manako maru ua. Tera te aiteanga te ora anga mai mei te akapou anga o teia akatereanga kino e i te openga ra mei te mate uaorai! Inara koai ta te Atua ka akaora? Ei pau anga, ka akara matatio ana tatou i ta Iesu Karaiti e apii ra no runga i teia tumu manako. Penei ka riro te au tupu anga o ta tatou kimikimi anga ei mea poitirere kia koe.

Te Akaora​—Ka Kiteia Ainei i te Au Akonoanga Katoatoa?

I tetai ati anga, kua tupu tetai pukapuka anga a Iesu ki tetai vaine Samaria. Noatu kare aia i tetai ngati Iuda, kua irinaki rai aia e ka aere mai te Mesia “tei kapikiia ko Karaiti.” (Ioane 4:25, NW) Kua rava ua ainei te reira irinaki anga kia ora atu aia? Kare, no te mea kua tuatua va ua a Iesu ki te vaine: “Kare kotou i kite i ta kotou e akamori nei.” Kua kite a Iesu e e raukaʼi i teia vaine te akaora, ka anoanoia aia kia akatikatika i tana tu akamori anga. No reira kua akataka a Iesu: “Kua vaitata, e teianei oki taua ora ra, e akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra.”​—Ioane 4:22, 23.

I tetai atu ati anga to Iesu akakite anga i tona manako no runga i te akaora kua o mai te au Pharisea, e akapupu anga akonoanga rongonui o te akonoanga ngati Iuda. Kua patu te au Pharisea i tetai akatereanga akamori te irinaki anga e kua mareka te Atua i te reira. Inara ka akarongo ana ki ta Iesu au tuatua ki te au Pharisea: “E au pikikaa e! Kua tika ta Isaia i tona totou anga no runga ia kotou: ‘Te akangateitei ra teia au tangata iaku ma to ratou vaa, inara e mamao to ratou ngakau mei iaku nei. Te akamori ra ratou iaku ma te puapinga kore; ta ratou au apiianga e au ture anake tei apiiia e te tangata nei.’”​—Mataio 15:7-9, New International Version.

Akapeea te au pupu akonoanga e manganui i teia tuatau tei karanga e te irinaki ra ratou ia Karaiti? Ka akatika ainei Iesu ia ratou ei au mataara tau e raukaʼi te akaora? Kare tatou e anoanoia kia tamanako ua i teia, no te mea te karanga papu ra a Iesu: “Kare te aronga e tuatua mai iaku e, e te Atu, e te Atu, e ope katoatoa i te tae ki te basileia ra ki te ao; ko tei akono ra i te anoano o taku Metua i te ao ra. E manganui te ka tuatua mai kiaku i taua rā ra, e te Atu, e te Atu, kare aina kua apii matou ma toou ingoa; e kua tuaru i te au demoni i toou ingoa; e kua rave i te au akairo e manganui ma toou ingoa? Ko taku ïa e karanga atu, kare takiri au i kite ia kotou: ka aere ke atu kotou, te aronga rave tuatua kino.”​—Mataio 7:21-23.

Te Kite Tikai ia Iesu e Puapinga Ia no te Akaora

E au tuatua tau tikai teia na Iesu. Te akakite maira te reira e e manganui te au tangata tu akono kare ‘e akono ana i te anoano o te Metua.’ Akapeea, i reira, e raukaʼi i tetai te akaora mou? Te pau ra a 1 Timoteo 2:3, 4: “Ko [te Atua] tei inangaro i te tangata katoatoa kia ora, e kia rauka te kite [“tikai,” NW] i te tuatua-mou.”​—Akaaite ia Kolosa 1:9, 10.

Ka anoano tikaia teia kite e raukaʼi te akaora. I te ui anga tetai tangata Roma tiaki are auri ki te apotetoro ko Paulo e tona tokorua, ko Sila, “Eaa au e oraʼi au?” kua pau atu raua: “E akarongo i te Atu ia Iesu Mesia, ka ora ïa koe e to kopu-tangata katoa.” (Angaanga 16:30, 31) Ko te aiteanga ainei e kua anoanoia te tangata tiaki are auri e tona pamiri katoa kia rauka tetai manakoanga i roto i to ratou ngakau? Kare, okotai tumu, kare ratou e “akarongo [tikai] i te Atu ia Iesu” kia rauka roa etai maramaanga e koai a Iesu, eaa tana i rave, e eaa tana i apii.

Ei akaraanga, kua apii a Iesu i te akanoo anga o tetai kavamani i te rangi​—“te basileia o te Atua.” (Luka 4:43) Kua akanoo katoa aia i te au kaveinga no te tu akono tau e te tu tangata. (Mataio, pene 5-7) Kua akakite aia i te turanga o tana au pipi ka rave me tupu mai te au angaanga poritiki. (Ioane 15:19) Kua akatumu aia i tetai porokarama apiianga i te ao katoa e kua tono i tana au pipi kia piri ki roto i te reira. (Mataio 24:14; Angaanga 1:8) Ae, kia ‘akarongo ia Iesu’ tera te aiteanga kia marama i te au mea e manganui! No reira, oki, a Paulo raua ko Sila i ‘tuatuaʼi [ki te tangata tiaki are auri], e te aronga katoa i roto i tona are, i te tuatua a te Atu’ i mua ake ka papetitoiaʼi teia aronga irinaki ou.​—Angaanga 16:32, 33.

Puapinga Katoa te Kite Tikai i te Atua

Tetai tuanga anoanoia o te irinaki tikai anga ia Iesu ka o mai te akamorianga i te Atua ta Iesu uaorai e akamori ra. Kua pure a Iesu: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:3.

I te tuatau o tana angaanga tutu aere i te enua nei, kua arataki ua rai te Tamaiti a te Atua i te akarongo ki tona Metua kare kiaia uaorai. Kare rava aia i karanga ana e e Atua Mana Katoatoa aia. (Ioane 12:49, 50) I tetai atu au ati anga e manganui kua akataka meitaki a Iesu i tona taoonga i roto i te akanoo anga a te Atua na te akakiteanga e tei raro ake aia i tona Metua. (Luka 22:41, 42; Ioane 5:19) Eaa oki, kua akakite a Iesu: “E maata oki toku Metua iaku.” (Ioane 14:28) Kua apii ainei taau akonoanga ia koe no runga i te pirianga i rotopu i te Atua e Karaiti? Me kua aratakiia ainei koe kia irinaki e ko Iesu uaorai te Atua Mana Katoatoa? Tei runga toou akaora i te akatikatika anga i teia maramaanga.

I roto i te Pure a te Atu, kua raurau a Iesu i tana au pipi kia pure: “Kia tapu toou ingoa.” (Mataio 6:9) Kua uuna te maata anga o te au urianga o te Pipiria, i to te Atua ingoa, te karanga anga i te reira e e “Atu.” Inara i roto i te au kopi taito o te “Koreromotu Taito,” tei roto to te Atua ingoa e tere atu i te ono tauatini taime! No reira te tatau ra a Salamo 83:18: “Kia kite ratou e, ko Iehova toou ingoa, e ko koe anake Tei Teitei i te enua katoa nei.” Kua apiiia ainei koe kia taangaanga i to te Atua ingoa, ko Iehova? Me kare ia, te rokoia ra i reira toou akaora anga e te tumatetenga, no te mea “ko te kapiki i te ingoa o te Atu ra, e ora ïa”!​—Angaanga 2:21; akaaite ia Ioela 2:32.

Ma te Vaerua e te Tuatua Mou

Kua arataki katoa a Iesu Karaiti i te akarongo ki te Tuatua na te Atua, koia te Pipiria. I te akakiteanga i to te Atua manako no runga i tetai au mea, ka tuatua putuputu aia: “Kua tataia.” (Mataio 4:4, 7, 10; 11:10; 21:13) I te po i mua ake ka mate ei aia, kua pure a Iesu no runga i tana au pipi: “Ka akatapu koe ia ratou i te tuatua-mou naau, ko te tuatua aau na te tuatua-mou.”​—Ioane 17:17.

Na te raukaanga tetai maramaanga o te au apiianga o te Tuatua a te Atua, koia te Pipiria, ko tetai apinga anoano katoaia e oraʼi. (2 Timoteo 3:16) Na te Pipiria anake ua e pau i te au uianga mei te: Eaa te aiteanga o te ora? Eaa ra te Atua i akatikaʼi i te kino kia tupu ua atu kia roa? Eaa te ka tupu ki tetai tangata me mate aia? Te tamamae tikai ra ainei te Atua i te au tangata i roto i te era vera? Eaa ta te Atua akakoro anga no te enua?a Kare e rauka i tetai i te akamori meitaki i te Atua me kare e maramaanga o teia au maro anga, no te mea kua karanga a Iesu: “E akamori ei i te Metua te aronga akamori tika ra, ma te vaerua e te tuatua-mou.”​—Ioane 4:23.

Ka Akakeu te Akarongo i te Angaanga

E maata atu te ka o mai e oraʼi i te pae i te rauka ua mai anga te au papaanga tuatua. I tetai ngakau akarongo, ka akatupu te kite tikai i te Atua i te akarongo. (Roma 10:10, 17; Ebera 11:6) Ka akakeu te reira tu akarongo i tetai kia angaanga. Ei akaraanga, te ako ra te Pipiria: “E teianei, e tataraara kotou, e e ariu mai, kia taparaia ta kotou ara; kia kitea mai te tuatau rekareka no mua mai i te aroaro o te Atua ra.”​—Angaanga 3:19.

Ae, e oraʼi ka o katoa mai te tauianga ki ta te Atua au turanga o te tu tangata e te tu akono tau. I raro ake i te mana taui anga o te Tuatua na te Atua, te au tu peu roa o te pikikaa anga e te akavare anga ka tupauia e te tu tika e te tuatua mou. (Tito 2:10) Te au peu tau kore, mei te totoma, te akaturi, e te poneia ka akarukeia e ka tupauia ki te tu akono tau tikai. (1 Korinetia 6:9-11) Kare teia i tetai akakore anga ua nei tei akanooia ki runga i te manako ngakau inara e taui anga tamou tei tupu mai mei te apii meitaki anga e te taangaanga anga i te Tuatua na te Atua.​—Ephesia 4:22-24.

Kare e roa, ka akakeu te aroa e te tu ariki i te Atua i tetai tangata ngakau tika kia akatapu tikai ki te Atua e kia akatutu i te reira na roto i te papetito anga ki te vai. (Mataio 28:19, 20; Roma 12:1) I roto i to te Atua mata kua ora te au Kerititiano papetitoia. (1 Petero 3:21) I te tuatau o te akapou anga e aere maira o teia ao kino, ka akaora takiri te Atua ia ratou na te akonoanga ia ratou i roto i te reira mate maata.​—Apokalupo 7:9, 14.

Te Aiteanga o te Akaora kia Koe

Te taka ua ra mei teia uriuri anga e e raukaʼi te akaora e maata atu te ka o mai i te ‘rauka ua anga te Atu ko Iesu i toou ngakau.’ Tera te aiteanga te apiianga i te kite tikai no runga i te Atua ko Iehova e Iesu Karaiti e te rave anga i te au taui anga tei anoanoia i to tetai oraanga. Na te raveanga i teia penei ka akara anga aka angaanga, inara te puareinga ua ra te Au Kite o Iehova i te tauturu ia koe i te rave i teia. Na roto i tetai apii Pipiria oronga ua i te kainga, ka rauka ia ratou i te tauturu ia koe kia akamata i te aaereanga i te ara o te akaora mou.b

Te akamanako anga i te vaitata o te ra akavaanga o te Atua e aere maira, e mea rapurapu roaia i te rave i te reira i teianei! Ko te taime teia no te akarongo i te au tuatua a te peroveta: “Kare kotou i rokoia e te rā riri o Iehova. E kimi ia Iehova, e te aronga akaaka ravarai o te enua nei, ko tei rave i te tuatua-tau nana ra; e kimi i te tuatua-tika, e kimi i te akaaka, peneiake kotou ko te uunaia i te rā e riri ei a Iehova ra.”​—Zephania 2:2, 3.

[Au Tataanga Rikiriki i Raro]

[Pia i te kapi 6]

Ka Rauka te Akaora Anga na te . . .

◻ Raukaanga te kite tikai i te Atua e Iesu.​—Ioane 17:3.

◻ Taangaangaanga i te akarongo.​—Roma 10:17; Ebera 11:6.

◻ Tataraaraanga e te ariuanga mai.​—Angaanga 3:19; Ephesia 4:22-24.

◻ Akatapuanga e te papetito anga.​—Mataio 16:24; 28:19, 20.

◻ Akakitekite tamou ua anga.​—Mataio 24:14; Roma 10:10.

[Au Tutu i te kapi 7]

Apiianga i te Pipiria, te taangaangaanga i tei apiiia, te akatapu anga, e te papetito anga e au takainga te ka arataki ki te akaora anga