I Na te Tiratiratu!

“Koai oki te ka kore e mataku tikai ia koe, e Iehova, e te akakaka oki i toou ingoa, no te mea ko koe anake ua tei tiratiratu ra?”​—APOKALUPO 15:4, NW.

1. Eaa te akakite anga ta J. F. Rutherford i oronga mai no te tiratiratu o te peretiteni i mua ake iaia, koia C. T. Russell?

KO JOSEPH F. RUTHERFORD, tei komono ra ia C. T. Russell ei peretiteni no te Watch Tower Society i te 1917, kua akamata i tana au tuatua i te tuatua akamaara anga i te tanumanga ia Russell, i te na ko anga: “Kua tiratiratu a Charles Taze Russell ki te Atua, kua tiratiratu kia Iesu Karaiti, kua tiratiratu katoa oki ki te tumu no te patireia o te Mesia. Kua tiratiratu aia tae roa ki roto roa​—ae, kua tiratiratu tae roa ki te matenga.” E tika tikai, ko tetai taunga meitaki ia kia orongaia ki tetai tavini tiratiratu no te Atua ko Iehova. Kare e taunga maata atu te ka rauka ia tatou kia oronga ki tetai ua atu tangata mari ra kia tuatua e kua tau iaia te akaaoanga no te tiratiratu, e kua tiratiratu aia​—tiratiratu tae roa ki roto roa.

2, 3. (a) Eaa ra te tiratiratu i oronga mai ei i te akaaoanga ra? (e) Koai katoa te patoi ra i te au Kerititiano mou i ta ratou au tauta anga kia vai tiratiratu?

² Te oronga ra te tiratiratu i tetai akaaoanga. No teaa ra? No te mea te patoi ra te tiratiratu i te manako nona uaorai. I roto i te aronga maata tei tiratiratu kore ki te Atua ra ko te au orometua o Kerititome. I reira, katoa oki, kare i tupu atea ana te tiratiratu kore i mua ana i roto i te pirianga akaipoipo mei to teianei tuatua. E mea matauia te akaturi. Te tupu maata katoa ra te tiratiratu kore ki roto i te ao pitiniti. No runga i teia, te akakiteia maira kia tatou: “E manganui te au manitia e te aronga kite . . . te irinaki ra e ko te aronga ua i te pae pakiri e te au uri te tiratiratu ra ki to ratou au kamupani i teia tuatau.” Te au tangata tei “tiratiratu roa” te akara taakaakaia ra. “Ko toou tiratiratu mua ka tau noou anake ia” ko te tu te reira a tetai peretiteni no tetai ngai akaaere e te kimikimi anga i akataka mai. Kia tuatua no te tiratiratu tetai kiaia uaorai e taviivii anga ia i te aiteanga o taua tuatua ra. Te akamaaraara maira ia kia tatou i tei tuatuaia ia Mika 7:2: “Kua mate te tangata meitaki i runga i te enua nei, e kare ua e tangata tiratiratu.”

³ Na runga i tetai tu maata roa atu, kua akapapa a Satani e tana au temoni kia patoi ia tatou, i te manako anga kia akariro ia tatou kia tiratiratu kore ki te Atua. Ko te tumu te reira i tuatuaiaʼi ki te au Kerititiano ia Ephesia 6:12 e: “Kare oki te tangata anake ta tatou e kukumi nei, ko te au ariki katoa ra, e te aronga mana, e te au tutara o teianei ao poiri, e te au vaerua kikino i te reva nei.” Ae, ka tau tatou kia akarongo i te akamatakiteanga: “E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.”​—1 Petero 5:8.

4. Eaa te au tu manako te akariro ra i te tiratiratu ei mea ngata?

⁴ Pera katoa oki te akariro ra kia ngata te tu tiratiratu no tatou te vaira te au anoano noinoi tei akatuangaia maira mei to tatou au metua mai, mei tei taikuia ra ia Genese 8:21: “Kino uaorai te manako o te ngakau tangata”​—e te noinoi—​“mei tona tamariki mea riki anga mai.” Tei ia tatou ravarai te manamanata ta te apotetoro ko Paulo i aaki ra e kua tu aia: “Ko te meitaki oki taku e anoano ra, kare ïa au e rave; kareka te kino anoano koreia e au ra, ko taku ïa e rave nei.”​—Roma 7:19.

E Apinga Taka Ke te Tiratiratu

5, 6. Eaa te ka rauka kia tuatuaia e eaa tikai te tiratiratu, e i akapeea te akataka anga i te reira?

⁵ Te “tiratiratu” ko tetai tuatua taka ke roa ia. E no reira te tuatua ra te Insight on the Scriptures: “I te akara anga kare e au tuatua reo Engarani te akataka tika maira i te aiteanga tikai o nga tuatua Epera e te Ereni, inara te ‘tiratiratu,’ kapiti katoa, mei tana e rave ra, i te manako no te akamori e te akono meitaki, me taikuia no te pae ki te Atua e tana angaanga, te oronga maira i tetai aiteanga piri vaitata.”a No runga i te “tiratiratu” kua akakite mai Te Punanga Tiaki i tetai taime e: “Ko te akono meitaki, te akono, te aroa, te apainga, e te kauraro anga. Eaa te tu aiteite o teia nga tuatua? E au tu tuke tuke ratou no te tiratiratu.” Ae, e manganui te au tu meitaki e au tu tuke tuke anake no te tiratiratu. E mea tau tikai kia manakoia te putuputu o te kapiti anga o te tiratiratu e te tuatua tika i roto i te Au Tuatua Tapu.

⁶ E mea tauturu katoa oki te au akatakaanga te aru mai nei: ‘Penei ka akakite te tiratiratu i te tamou marieanga i te akono meitaki e te kauraro, te tinamou i te ngaueue kore me kare au timataanga.’ ‘Te akataka maira te tiratiratu i te akono meitaki i te tuatua taputou me kare te kauraro tamou marie ki te akaaerenga me kare au kaveinga ta tetai i manako ra e e apainga nana uaorai; te akataka maira te reira tuatua kare i te rave anga anake ra mari ra kia kore e akavareia e kia akaruke i taua rave anga ra.’ E no reira, ko te au tangata tei akono meitaki tamou marie noatu rai te au timataanga, te patoi anga, e te takinga kinoanga te tau ra kia tapaia e “tiratiratu.”

7. Eaa te tuke anga te ka rauka kia akatakaia i rotopu i te tiratiratu e te akono meitaki?

⁷ Inara, i roto i teia turanga, penei ka tau kia akatutu i tetai tuke anga i rotopu i te tiratiratu e te akono meitaki. I te tuanga opunga ra i Unaite Teite, te vaira tetai puna vai pupui vai vera ra ki runga, vaitata i te au ora ravarai. No tona putuputu i te pupui anga e kua tapaia ia ko tei Akono Meitaki Taito. Te tuatua ra te Puka Tapu i taua au apinga kare ra e ora anga mei te marama rai ei akono meitaki, no te mea ka tau kia irinakiia. Te tuatua ra a Salamo 89:37 no te marama ei tetai “kite pikikaa kore ki runga i te rangi ra.” Te karangaia ra te au tuatua a te Atua e pikikaa kore. Te tuatua ra Apokalupo 21:5: “Kua tuatua maira tei noo ki runga i te terono ra, I na, te akariro nei au i te au mea ravarai ei mea ou. E kua tuatua maira aia kiaku, Ka tata ana: e tuatua-mou oki teianei au tuatua e te pikikaa kore.” Pouroa teia au tu e pikikaa kore, e te tau kia irinakiia, inara kare e rauka tetai ua atu pirianga ia ratou me kare au tu tau, mei te tiratiratu rai.

Ko Iehova, Tei Tiratiratu Meitaki Roa

8. Eaa te akakiteanga Tuatua Tapu te akataka maira i te akatauanga meitaki roa no te tiratiratu?

⁸ Kare te ata ekoko anga e, ko te Atua ko Iehova te akatauanga meitaki roa no te tiratiratu. Kua tiratiratu a Iehova ki te uanga tangata, tae roa ki te orongaanga i tana Tamaiti kia rauka te ora mutu kore no te au tangata nei. (Ioane 3:16) Ka tatau tatou ia Ieremia 3:12 e: “‘E Oki mai, e Iseraela akatitima,’ te tuatua maira Iehova. ‘Kare au e akatopa riri ua i toku mata ki rungao ia kotou e te au tangata, no te mea te tiratiratu nei au.’” (NW) I te akakite anga i to Iehova tiratiratu tera katoa te au tuatua tataia ia Apokalupo 16:5: “Ko Koe, te vai nei e Tei vai ana, Tei tiratiratu ra, e tuatua tika oki.” (NW) E pera katoa, ia Salamo 145:17 te tuatuaia maira kia tatou: “E tuatua tika a Iehova i tona au aerenga katoa ra, e e tiratiratu i tana au angaanga katoatoa ra.” (NW) Ko te tika, no to Iehova meitaki roa i te tu tiratiratu e kua tuatua a Apokalupo 15:4: “Koai oki te ka kore e mataku tikai ia koe, e Iehova, e te akakaka oki i toou ingoa, no te mea ko koe anake ua tei tiratiratu ra?” (NW) E tiratiratu tae roa ki te turanga teitei roa to te Atua ra ko Iehova!

9, 10. Eaa te akakite anga i te tiratiratu ta Iehova i rave i tana akonoanga i te iti tangata o Iseraela ra?

⁹ I te tuatua enua o te iti tangata o Iseraela te kitea puia ra te akakite anga maata i to Iehova ra tiratiratu ki tona au tangata. I te tuatau o te au Akava ra, e putuputu te topa ke anga to Iseraela i te akamori mou ra, inara kua putuputu katoa a Iehova i te manako aroa atu e kua akaora ia ratou. (Au Akava 2:15-22) Na roto i te rima anere mataiti katoa e au ariki to Iseraela ra, kua akaari atu a Iehova i tona tiratiratu ki taua iti tangata ra.

¹⁰ Kua akariro to Iehova tiratiratu iaia kia akakoromaki i tona au tangata ra, mei tei akakiteia maira ia 2 Paraleipomeno 36:15, 16: “Kua tono maira te Atua o to ratou ai metua ko Iehova i te rima o te au karere nona kia ratou ra, kare i tukumoe i te tono anga; no te mea te aroa ra aia i tona iti-tangata e tona uaorai nooanga: Kua taitoito ra ratou i te au karere a te Atua, e kua akavaavaa i tana tuatua, e kua takinga-kino i te au peroveta nana, e tupu rava akera te riri o Iehova i tona tangata, e kare rava akera e ravenga e oraʼi.”

11. Eaa te akapapu anga me kare akapumaana ta te tiratiratu o Iehova e oronga maira kia tatou?

¹¹ No te mea e tiratiratu teitei roa a Iehova, kua rauka i te apotetoro ko Paulo i te tata, i tei tataia ia Roma 8:38, 39: “Kua kite tikai oki au e, kare te mate, kare oki te ora, kare oki te au angela, kare oki te ui ariki, kare oki te au mea mana, kare oki te au mea e vai nei, kare oki te au mea e ka tupu a muri atu, Kare oki te teitei, kare oki te akaaka, e kare katoa te au mea i angaia nei, e tika kia akataka ke ia tatou i te aroa o te Atua i roto i to tatou Atu ia Iesu Mesia ra.” Ae, te akapapu maira a Iehova kia tatou e: “Kare rava au e akaruke atu ia koe, kare oki au e taka ke ia koe.” (Ebera 13:5) E tika tikai, e pumaana ia kia kite e e tiratiratu tamou marie to te Atua ko Iehova ra!

Ko Iesu Karaiti, te Tamaiti Tiratiratu

12, 13. Eaa te akakiteanga tei ia tatou nei no te tu tiratiratu o te Tamaiti a te Atua ra?

¹² Ko Iesu Karaiti tei aru apa kore ua ia Iehova i te akono anga i te akaaoanga no te tiratiratu. Kua tika te apotetoro ko Petero kia taiku ia Salamo 16:10 e kia akapiri atu i te reira kia Iesu Karaiti ia Angaanga 2:27: “No te mea kare koe e akaruke i toku meta i Ade, kare katoa koe e tuku i tei tiratiratu ra kia kite i te pe.” (NW) Kua tau tikai a Iesu Karaiti kia tapaia ei “tei tiratiratu” ra. Na roto i te au tu ravarai, e tiratiratu aia ki tona Metua e ki te Patireia taputouia maira e te Atua. Kua tamata mua a Satani kia aati i to Iesu tu tiratiratu na te rave anga i nga timataanga, kia akariro ke i tona uaorai manako. I te kore anga a Satani i re, kua rave taua Tiaporo ra i te takinga kinoanga, i te openga ra kua akatupu i to Iesu ra matenga ki runga i te rakau tamateanga. Kare ra a Iesu i tapae ke i tona tu tiratiratu ki tona Metua i te rangi ra, ki te Atua ko Iehova.​—Mataio 4:1-11.

¹³ Kua vai tiratiratu a Iesu Karaiti ki tana au pipi i te tamou marieanga i te taputou tei tataia ia Mataio 28:20: “E i na, tei vaitata ua ra au ia kotou, e tae ua atu ki te openga o teianei ao.” I te akatupu anga i taua taputou ra, kua rave tiratiratu ua aia i te akonoanga i te arataki anga ki rungao i tana putuputuanga mei ia Penetekote 33 T.N. maira ki teianei tuatau.

Au Tangata Apa Ua Tei Vai Tiratiratu Ra

14. Eaa te akatauanga no te tiratiratu ta Iobu i akanoo mai?

¹⁴ I teianei, akapeea te au tangata apa ua ra? Ka rauka ainei ia ratou te tu tiratiratu ki te Atua? Tei ia tatou te tu meitaki roa o Iobu. Kua akataka meitaki mai Satani i te maroanga i tona turanga ra. I vai tiratiratu ainei a Iobu ki te Atua ko Iehova, me kare kua tavini ua iaia no te manako nona uaorai? Kua akaparau a Satani e ka rauka iaia i te akaariu ke ia Iobu mei ia Iehova na te akatupuanga taitaia no Iobu. I te ngere anga a Iobu i tana au apinga ravarai, e tana au tamariki katoa oki, e pera katoa tona ora kopapa, kua raurau tana vaine iaia: “Ka akakino atu i te Atua, ka mate atu ei!” Inara e tiratiratu to Iobu, no te mea kua tuatua atu aia ki tana vaine: “Te tuatua nei koe mei tetai o te au vaine neneva e tuatua ra. E ariki ainei tatou i te meitaki mei ko mai i te Atua, e auraka tatou e āriki katoa i te kino? Kare rai te vaa o Iobu i ara i teia katoa nei au mea.” (Iobu 2:9, 10) Ko te tika, kua tuatua a Iobu, ki nga tangata akapumaana pikikaa ra iaia: “Ta oti mai aia [ko te Atua] iaku, ka irinaki atu rai au iaia.” (Iobu 13:15) No reira rai i raukaʼi ia Iobu ta Iehova akamareka anga! No reira, kua tuatua a Iehova kia Eliphaza ngati Temana: “Kua tupu toku riri ia koe, e nga oa katoa noo ra toko rua; kare oki ta kotou tuatua i tau iaku, mei ta toku tavini mei ta Iobu.”​—Iobu 42:7, 10-16; Iakobo 5:11.

15. Eaa te akakiteanga Tuatua Tapu tei ia tatou nei no te tu tiratiratu o te au tavini e manganui o te Atua ko Iehova ra?

¹⁵ Pouroa te au tane e te au vaine akarongo tei akatakaia maira ia Ebera pene 11 ka rauka kia tuatuaia ei aronga tiratiratu. Kare ratou i te aronga akono meitaki anake mari ra e tiratiratu katoa oki i roto i te au taomianga. E no reira, ka tatau tatou no te aronga “ko tei . . . akarongo . . . kua mopani i te vaa o te au liona, Kua tamate i te ririnui i o te ai, kua ora i te mata koke ra, . . . E e mate maata to tetai pae i te akavaavaa, e te pāpā, e te ruru, e te tapeka i roto i te are tapekaanga: I peiia ratou i te toka, i kekeia rotopu ia ratou e taka ke atura, i timataia, i tamate takiriia i te koke; i koka aere ua ratou ma te kakau kiri mamoe e te kiri puaka-nio, ma te puapinga kore, te tairoia, e te takinga-kinoia ra.”​—Ebera 11:33-37.

16. Eaa te akatauanga no te tiratiratu ta te apotetoro ko Paulo i akanoo maira?

¹⁶ Te oronga katoa maira te au Tuatua Tapu Ereni Kerititiano i te akatauanga meitaki a te apotetoro ko Paulo. E tika rava aia kia tuatua ki ki te au Kerititiano Tesalonia no runga i tana angaanga orometua: “Ko kotou oki te kite e te Atua katoa, i te meitaki anga, e te tika anga, e te ara kore anga, o ta matou tuatua i rotopu ia kotou i te aronga akarongo.” (1 Tesalonia 2:10) E akapapu anga katoa oki ta tatou i te tiratiratu o Paulo i tana au tuatua i tataia ia 2 Korinetia 6:4, 5, te ngai ka tatau tatou: “Te akakite ua nei ra matou ia matou uaorai e e rave angaanga na te Atua i te au mea katoa nei, i te akakoromaki maata, i te mate, i te apiapi, i te tumatetenga, I te pāpā, i te tapeka, i te aue, i te angaanga, i te tapapa, i te akakoreanga kai.” Pouroa teia te akakite maira i to te apotetoro Paulo uaorai ngateitei no tona tiratiratu.

Te Aronga Tiratiratu i Teia Tuatau Nei

17. Eaa te au tuatua a J. F. Rutherford tei akaari maira i tona manako anga papu kia tiratiratu?

¹⁷ I te aerenga mai ki teia tuatau nei, tei ia tatou te akatauanga meitaki tei akamanakoia akera i ta tatou akamata anga maira. Ka akara ana i tei akakiteia i roto i te puka Worldwide Security Under the “Prince of Peace,” i te kapi 146 i raro ake i te tumu “Tiratiratu i te Tuatau o te Tapekaanga.” I reira kua karangaia: “Akaarianga i te tu tiratiratu ki ta Iehova akaaerenga i teia tuatau tapeka anga, kua tata te peretiteni o te Totaiete Punanga Tiaki, ko Joseph F. Rutherford, ia Titema 25, 1918, i te tuatua aru mai nei: ‘No toku kore e akatika kia tuku ua kia Babulonia, mari ra kua tauta kia tavini atu i taku Atu, tei roto au i te are tapekaanga, te akameitaki nei au i te reira. . . . Ka rekareka maata atu au i Tona mareka anga e te katakata e kia noo au ki roto i te are tapeka anga, kia kore e tuku ua me kare e akatika ki ta te Taae e ka aaere rangatira uaʼi e kia marekaia mai e to te ao katoatoa nei.’”b

18, 19. Eaa te au akatauanga meitaki no te tiratiratu tei ia tatou i teia tuatau nei?

¹⁸ E au akatauanga meitaki roa ta tatou no te tiratiratu i etai atu Kerititiano e manganui tei akakoromaki ra i te takinga kinoanga. I roto i taua aronga tiratiratu tataki tai Au Kite Tiamani o Iehova i te tuatau o te tutara Nati ra, tei akatutuia ra i te vitio Purple Triangles, tei tua maataia i te reo Engarani. E tau katoa oki kia manakoia te Au Kite Aperika tiratiratu o Iehova e manganui, mei te aronga i Maraui ra. I reira, kua akakite tetai tiaki are tapekaanga i te tiratiratu o te Au Kite, i te na ko anga: “Kare rava ratou e tuku ua. Ka tupu ua atu rai ratou.”

¹⁹ Kare e rauka i tetai i te tatau i te au Yearbook of Jehovah’s Witnesses ma te kore e manako umere i te tiratiratu tei akaariia maira e te au Kerititiano mou, mei to te aronga i Ereni ra, i Motamapiki, e i Porani oki. E manganui i o ratou tei mamae i te tamamaeanga kino roa; kua taia tetai papaki. Te akakiteia maira i te kapi 177 o te 1992 Yearbook te au tutu o nga tangata Kerititiano e iva i Etiopia tei autu ra i te akaaoanga no te tiratiratu tae roa ki te taia angaia. Ei Au Kite no Iehova, kare ainei tatou e mataora ana i te manganui o te au akatauanga meitaki ei akamaroiroi ia tatou kia autu i te akaaoanga no te tiratiratu?

20. Eaa te ka aru mai me ka vai tiratiratu tatou nei?

²⁰ Na te akakoromakianga tiratiratu i te au timataanga e te au taomi anga, ka patu tatou i to tatou uaorai tu ngateitei. E no reira, ka anoano tatou kia kitea mai ki runga i toai tua o te maroanga? Na te autuanga i te akaaoanga no te tiratiratu, ka mou tatou i to te Atua ko Iehova tua no te maroanga e ka akapapu ko te Tiaporo ko Satani te pikikaa kino roa! Na reira e raukaʼi ia tatou te mareka anga o Tei Anga Mai ia tatou, koia te Atua ko Iehova, e te tutaki no te ora mutu kore i te tu mataora. (Salamo 37:29; 144:15e) Ka uriuri manakoia te mea umuumuia kia autu ei i te akaaoanga no te tiratiratu i roto i te ka aru mai.

[Au Tataanga Rikiriki i Raro]

Akapeea Koe me Pau?

◻ Eaa ra te tu tiratiratu i oronga mai ei i te akaaoanga?

◻ Eaa ka raukaʼi kia tuatuaia e ko te “tiratiratu” tetai tuatua taka ke roa?

◻ Eaa etai akatauanga no te Tuatua Tapu tei ia tatou no te au tangata apa ua tei tiratiratu ra?

◻ Eaa etai akatauanga meitaki no te tiratiratu tei ia tatou no teia tuatau nei?

[Tutu i te kapi 11]

Charles Taze Russell

[Tutu i te kapi 12]

Ko Iesu tikai “tei tiratiratu” kia Iehova

[Tutu i te kapi 13]

Ko Iobu, noatu e apa ua aia, kua akapapu i tona tiratiratu ki te Atua

[Tutu i te kapi 14]

Kua akanoo a Paulo i te akatauanga tiratiratu kia Iehova