Autuanga i te Akaaoanga no te Tiratiratu
“E kia aao i te tu tangata ou tei angaia i tau ki to te Atua anoano i te tuatua tika ra e te tiratiratu.”—EPHESIA 4:24, NW.
1. Eaa tatou i kaiou ei i te tiratiratu ki te Atua ra kia Iehova?
E MANGANUI te au tu o te autuanga i te akaaoanga no te tiratiratu. Ko te mea puapinga roa ko te autuanga i te akaaoanga no te tiratiratu ki te Atua ko Iehova. E tika tikai, i te manako anga e koai a Iehova e eaa tana i rave no tatou, e no to tatou akatapuanga kiaia, te kaiou ra tatou i te tiratiratu kiaia. Akapeea tatou i te akakite anga i te tiratiratu ki te Atua ko Iehova? Ko tetai rave anga maata na te tiratiratu ki ta Iehova au kaveinga tuatua tika.
2, 3. Eaa te pirianga i rotopu i te tiratiratu e te tuatua tika?
2 E autu ei i te reira akaaoanga, ka tau tatou kia akarongo i te au tuatua te kitea ra ia 1 Petero 1:15, 16: “Mei iaia i kapiki mai ia kotou e tapu ra, kia tapu katoa kotou i ta kotou tuatua ravarai ra; Kua oti oki i te tataia e, ‘Kia tapu kotou; te tapu nei oki au.’” Ka akariro ia tatou te tiratiratu ki te Atua ko Iehova kia akarongo kiaia i te au taime ravarai, ma te apai mai anga i to tatou manako, te au tuatua, e te au angaanga kia rotai ma tona anoano tapu. Tera te aite anga e akatinamouanga i te akava ngakau meitaki, mei tei akaueia maira tatou ia 1 Timoteo 1:3-5: “E te openga o te akauenga nei, [auraka e apii i te apiianga tuke me kare auraka e akarongo atu i te au tuatua pikikaa] ko te aroa ia no roto i te ngakau mā, e te akava-ngakau meitaki, e te akarongo pikikaa kore.” E tika, kare tetai i o tatou nei i te apa kore, inara ka tau tatou kia tauta kia rave i te meitaki roa e rauka, kare ainei tatou e tau kia pera?
3 Na te tiratiratu kia Iehova e arai ia tatou kia kore e tuku noinoi ua i te au kaveinga tuatua tika. E tika, na te tiratiratu e arai ia tatou kia kore e riro ei apinga ke to roto e e apinga ke to vao. Ko te tiratiratu ta te tata taramo i roto i tona manako i tana imene anga: “E apii mai koe, e Iehova, i toou ra arataa, kia aere au i taau ra tuatua-mou; kia tavaitai toku ngakau i te mataku anga i to ingoa.” (Salamo 86:11) Te umuumuia ra te tu tiratiratu i tei akataka meitakiia maira ei “akarongo anga ki te apinga kare ra i manonoia mai kia raveia.”
4, 5. Ka akariro te tiratiratu ia tatou kia matakite, kia kore e rave i teaa?
4 Ka arai katoa oki te tiratiratu ki te Atua ko Iehova ia tatou kia kore e rave i tetai apinga te ka apai mai i te akakino anga ki runga i tona ingoa e tona Patireia. Ei akatauanga, kua o atu nga Kerititiano e rua i tetai tuatau ki roto i tetai tu ngata tetai ma tetai e kua aere tau kore ua raua ki tetai akavaanga ture no teianei ao. E kua ui atura te akava, ‘E nga Kite ainei korua no Iehova?’ I te akara anga kare aia i kite eaa ta raua e rave ra i roto i te akavaanga. Mei teaa ra tetai akakino anga te reira! Ka akariro te tiratiratu ki te Atua ko Iehova i taua nga taeake ra kia akarongo i te ako a te apotetoro ko Paulo ra: “E teianei, e ara tikai tei roto ia kotou na, i te mea te akava na kotou ia kotou uaorai. Eaa kotou i kore ei i akakoromaki i te kino? eaa kotou i kore ei i akakoromaki kia akangereia?” (1 Korinetia 6:7) E mea tika, ko te rave anga tiratiratu ki te Atua kia Iehova kia akangereia tetai kare ra kia apai mai i te akakino anga ki runga ia Iehova e tana akaaerenga.
5 Ko te tiratiratu ki te Atua ko Iehova te kapiti katoa ra i te kore e tuku ua ki te mataku i te tangata. “E rokoia e te ii tei mataku i te tangata ra: ko tei irinaki ia Iehova ra, e ora ia.” (Maseli 29:25) E no reira, kare tatou e tuku ua me aro atu i te takinga kinoanga, mari ra ka aru tatou i te akatauanga tei akanooia e te Au Kite o Iehova i te Toviete Unioni taito ra, i Maraui, i Etiopia, e i etai atu enua katoa e manganui ra.
6. Ka arai te tiratiratu kia kore tatou e piri oa atu kiaai ma?
6 Me e tiratiratu to tatou ki te Atua ko Iehova, ka kopae ke tatou i te akaoa anga ma te aronga katoa e au enemi nona ra. No reira rai te pipi ko Iakobo i tataʼi: “E te au akaturi tane, e te au akaturi vaine, kare kotou i kite e ko te anoano i teianei ao, e enemi ïa i te Atua ra? E teianei ko te anoano e ei oa aia no teianei ao, e enemi ïa tangata no te Atua.” (Iakobo 4:4) E anoano tatou i te tiratiratu ta te Ariki ko Davida i akakite maira i tana tuatua anga: “Kare ainei tei riri au i te aronga i riri mai ia koe, e Iehova? e te atata nei au i te aronga i tu mai e māro ia koe? E makitakita maata toku ia ratou, e makitakita maata roa; e enemi tikai ia ratou noku.” (Salamo 139:21, 22) Kare tatou e anoano kia kapiti atu ma tetai ua atu aronga rave ara akakoroia, no te mea kare a tatou apinga tau atu ia ratou. Kare ainei te tu tiratiratu ki te Atua e arai ia tatou kia kore e kapiti atu ma tetai ua atu enemi o Iehova ra, me i tetai tangata me kare na roto i te akara anga tivi?
Aerenga Mai kia Paruru ia Iehova
7. Ka tauturu te tiratiratu ia tatou kia rave i teaa no runga ia Iehova ra, e i akapeea a Eliu i te rave anga i teia?
7 Ka akakeu te tiratiratu ia tatou kia aere mai ki te paruru anga i te Atua ko Iehova. Mei teaa ra te akatauanga meitaki ta tatou ia Eliu! Te akakite maira a Iobu 32:2, 3 kia tatou: “Kua tupu akera te riri o Eliu . . . i tupu tona riri ia Iobu, no te mea kua akatika aia iaia uaorai kare te Atua. Tupu akera oki tona riri i nga oa nona toko toru, no te mea kare a ratou tuatua i kitea kia karanga atu, akaapa uaʼi ratou ia Iobu.” I roto ia Iobu nga pene 32 ki te 37, kua aere maira a Eliu ki te paruru anga ia Iehova. Ei akatauanga, kua tuatua aia: “E akakoromaki iti ua mai koe e naku e akakite atu e, te vai nei rai taku tuatua no te Atua. . . . e tuku au i te tuatua-tika i Tei anga iaku ra. . . . Kare aia e akataka ke i ona mata i te aronga tuatua-tika ra.”—Iobu 36:2-7.
8. Eaa ra tatou i tau ei kia paruru ia Iehova ra?
8 Eaa ra i tau ei kia aere mai e paruru ia Iehova? I teia tuatau, te akakinoia ra to tatou Atua ko Iehova na roto i te au tu e manganui. Te tuatuaia ra e kare ua aia e vai ana, e e tuanga aia no tetai Toru Tai, e te tamamae mutu kore ra aia i te au tangata i roto i tetai era te ka ra, e te tauta apikepike ua ra aia i te akaariu ke i to teianei ao, e kare ona manako no te au tangata, e te vai atura. Ka akakite tatou i to tatou tiratiratu kiaia na te aerenga mai ki te paruru iaia e te akapapuanga e te vai nei rai a Iehova; e e pakari aia, e tuatua tau, e mana katoatoa, e e Atua aroa; e e tuatau tana no te au mea ravarai; e kia tae mai tana tuatau tau, ka apai mai aia i te openga ki te au tu kino ravarai e ka akariro i te enua katoa ei parataito. (Koheleta 3:1) Te umuumu ra teia kia akono tatou i te au tuatau katoa no te akakiteanga i te ingoa o Iehova e tona Patireia.
Tiratiratu ki te Akaaerenga a Iehova
9. No runga i teea au tumu i akakite ei tetai papaki i to ratou ngere i te tiratiratu ra?
9 Kua tae mai tatou i teianei ki te tumu o te tiratiratu ki te akaaerenga akaraia a Iehova. E tika, te kaiou ra tatou i te tiratiratu ki te reira, kapiti katoa ki “te tavini akono meitaki e te pakari,” na roto maira i reira te angai anga i te putuputuanga Kerititiano i te pae vaerua. (Mataio 24:45-47) E manako ana e me ka mama mai tetai apinga ki roto i te au puka a te Punanga Tiaki e kare tatou i kite marama me kare i akatika i te reira i taua atinga ra. Eaa ta tatou ka rave? Ka riri e ka akaruke i te akaaerenga? Ko te reira ta tetai papaki i rave i ta Te Punanga Tiaki, akapiri anga i te koreromotu ou ki te Tutara Tauatini Mataiti, i te au mataiti e manganui kua topa. Ko etai ke ra kua riri ki ta Te Punanga Tiaki i tuatua no te maroanga neutara. Naringa taua aronga i turoriia ra i taua au tumu ra i tiratiratu ki te akaaerenga e ki to ratou au taeake, kua tapapa atu ratou ia Iehova kia akataka mai i taua au tumu ra, ko tana ia i rave i tana tuatau tau. No reira, te kapiti ra te tu tiratiratu i te tiaki akakoromakianga kia akakiteia mai kia tere atu te maramaanga e te tavini akono meitaki e te pakari ra.
10. Ka arai te tiratiratu ia tatou kia kore e kimi manako no runga i teaa?
10 Te aite anga katoa oki o te tiratiratu ki te akaaerenga akaraia a Iehova ra koia oki kia kopae takiri atu i te aronga akonoanga akaruke e te patoi i te tuatua mou. Kare te au Kerititiano tiratiratu e kimikimi manako no te tuatua a taua aronga tangata ra. E tika, te aronga te taangaangaia ra e te Atua ko Iehova ei arataki i tana angaanga i te enua nei kare i te apa kore ua. Inara eaa ta te Tuatua a te Atua e akakite maira ia tatou kia rave? Kia akaruke i te akaaerenga a te Atua? Kare. Ka tau te inangaro taeake kia tamou marie i to tatou tu tiratiratu ki te reira, e ka tau tatou “kia aroa maata [tatou ia tatou] uaorai ma te ngakau kinokino kore.”—1 Petero 1:22.
Tiratiratu ki te Aronga Pakari Tiratiratu
11. Ka tauturu te tiratiratu ia tatou kia paruru atu i teea manakoanga tau kore ra?
11 Me ka tuatuaia tetai apinga me kare ka raveia i te putuputuanga tei ngata ra tatou i te kite meitaki, na te tiratiratu e akakore i to tatou manako akavaanga e ka tauturu ia tatou kia mou i te turanga e penei e tumu ia no te akava anga. Kare ainei i te meitaki atu kia manako ki runga i te au tu meitaki o te aronga pakari akataoongaia ra e to etai atu au taeake akarongo ra, e kare ki runga i to ratou au tu tarevake? Ae, ka tau tatou kia paruru atu i taua au manakoanga tau kore ra, no te mea te piri atura te reira ki te tu tiratiratu kore! Ka tauturu katoa te tu tiratiratu ia tatou kia akarongo i ta Paulo arataki anga e “auraka rava e akakino atu i te tangata ravarai.”—Tito 3:1, 2.
12, 13. Eaa te au akaaoanga taka ke te aro atura te aronga pakari?
12 Te oronga ra te tu tiratiratu i te au akaaoanga taka ke ki te aronga pakari. Ko tetai o teia au akaaoanga ko te tuatua muna. Penei ka irinaki tetai mema o tetai putuputuanga i te tuatua muna ki tetai o te aronga pakari. Na te tiratiratu kiaia kare te tangata pakari ra e akakore i te kaveinga no te tuatua muna. Ka akarongo aia i te ako ia Maseli 25:9 ra: “Auraka koe e aaki i tana ra tuatua muna ki tetai ke.” Tera te aite anga kare katoa oki e akakite noatu ki tana uaorai vaine ra!
13 Te vai katoa ra etai atu au timataanga no te tiratiratu kia akonoia e te aronga pakari. Ka riro ainei ratou ei akamareka i te au tangata, me kare ka tauturu mataku kore ainei ratou ma te maru i te aronga te anoanoia ra te akatikatika anga, noatu rai me e kopu tangata ratou me kare e oa piri vaitata? Ka akariro te tu tiratiratu ki te akaaerenga a Iehova i to tatou e aronga pakari kia tauta i te tauturu i tetai ua atu te anoanoia ra te tauturu i te pae vaerua. (Galatia 6:1, 2) Noatu ka takinga meitaki tatou, ka akariro te tiratiratu ia tatou kia tuatua tika tika atu ki to tatou oa tangata pakari, mei ta Paulo i tuatua tika atu ki te apotetoro ko Petero ra. (Galatia 2:11-14) I tetai pae, ka tau te au akaaere kia matakite, kia kore e rave pakari kore ua e te akaari i te tu tau kore e te akakinoanga i to ratou mana na roto i tetai atu mataara ke ra, ka akariro ratou kia ngata no te aronga ta ratou e utuutu ra kia tiratiratu ki te akaaerenga a te Atua ra.—Philipi 4:5.
14, 15. Eaa te au tika e penei ka timata i te tu tiratiratu o te au mema o te putuputuanga?
14 Te vaira etai atu au tu no te autuanga i te akaaoanga i te tiratiratu ki te putuputuanga e tona aronga pakari. Me e au tu taitaia etai i roto i te putuputuanga, te oronga maira teia i te tuatau no tatou kia akaari i te tiratiratu kia Iehova e ki te aronga komono ra iaia. (E akara i The Watchtower, Tiunu 15, 1987, nga kapi 15-17.) Me kua raveia tetai akaatea keanga ki vao, te umuumuia ra te tu tiratiratu kia turu tatou i te aronga pakari, eiaa e tamata i te tuku e rua tika me te rava ra te au tumu no te tuku anga tika tei raveia.
15 Te umuumu katoaia ra te tu tiratiratu i te putuputuanga kia turu tatou i nga uipaanga e rima katoa i te epetoma ki te maata anga te ka rauka ia tatou e to tatou au turanga. Te umuumuia ra te tiratiratu e kare kia aere putuputu anake tatou mari ra kia teateamamao katoa oki e kia oronga i te au pauanga akamaroiroi me te vai ra te au atianga.—Ebera 10:24, 25.
Te Tiratiratu Akaipoipo Anga
16, 17. Eaa te au akaaoanga ki te tiratiratu te aro atura te au Kerititiano akaipoipoia ra?
16 Koai katoa ta tatou e kaiou ra i te tiratiratu? Me kua akaipoipoia tatou, i te manako anga i ta tatou tia anga i te akaipoipo anga, ka tau tatou kia akono i te akaaoanga no te tiratiratu ki to tatou tokorua akaipoipo. Ka akakore te tiratiratu ki to tatou tokorua i te akono anga i te tarevake no te rave anga meitaki atu ki etai vaine ke me kare tangata ke atu i ta tatou e rave ana ki ta tatou uaorai vaine me kare tane. Te umuumu katoaia ra te tiratiratu ki to tatou tokorua kia kore tatou e akakite kia etai ke ra i te au tu paruparu e te au tarevake o to tatou tokorua. E ngoie ua atu te akaapa atu ki etai ke ra i to te akono pakari kia tuera ua te pirianga manako ma to tatou tokorua, ko ta tatou ia i tau kia rave e rotai ei ma te Ture Auro ra. (Mataio 7:12) E tika, te oronga maira te turanga akaipoipo anga i tetai akaaoanga tikai ki to tatou tiratiratu Kerititiano.
17 E autu ei i teia akaaoanga no te tiratiratu, kare e kia kopae anake tatou i te tu akono i te apa kino takiri mari ra ka tika tatou kia paruru katoa i to tatou au manako tikai e te manako ngakau. (Salamo 19:14) Ei akatauanga, me te noinoi ra to tatou ngakau akavare i te mea e navenave ei e te mareka anga, e mea ngoie ua no tatou kia aere noinoi atu mei te marekaanga ki te inangaroanga. I te raurau anga i te akaipoipo anga mako, kua ako mai te Ariki ko Solomona i te au tane ma te akatutu anga kia ‘inu i te vai i ta ratou uaorai āriki.’ (Maseli 5:15) E kua tuatua a Iesu: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mataio 5:28) Te au tane te akarakara putuputu ra i te au apinga akaturi te tuku atura ia ratou uaorai ki roto i te akavare anga kia rave i te akaturi, na reira te akangereanga i ta ratou vaine, e te tiratiratu kore oki kia ratou. Na taua tu katoa oki, ko tetai vaine te rave putuputu ra i te akara anga i te au soap opera i te akonoanga i te au ravenga akaturi ka rauka kia timataia kia tiratiratu kore ki tana tane. Inara, na te tiratiratu tikai ki to tatou tokorua, ka akamaroiroi tatou i te tapeka o te akaipoipo anga, e ka tauturu tatou tetai i tetai i ta tatou tauta anga kia akamareka i te Atua ko Iehova.
Au Tauturu kia Tamou Marie i te Tiratiratu
18. Na te ariki anga i teaa te ka tauturu ia tatou kia tiratiratu?
18 Eaa te ka tauturu ia tatou kia autu i te akaaoanga i te tiratiratu i teia nga tuanga e a: te tiratiratu kia Iehova, ki tana akaaerenga, ki te putuputuanga, e ki to tatou tokorua akaipoipo? Ko tetai tauturu ko te arikianga e ko te autu anga i te akaaoanga no te tiratiratu te kapitiia atura ki te akatika anga i to Iehova ra ngateitei. Ae, na te vai tiratiratuanga ka akaari tatou e te manako ra tatou ia Iehova ei Tei Ngateitei i te Ao Katoa e Pini Ua Ake. Na reira katoa e raukaʼi ia tatou te ngateitei no tatou uaorai e te manakonako anga no te ora mutu kore i roto i te ao ou a Iehova. Ka rauka ia tatou te tauturu ia tatou uaorai kia vai tiratiratu na te akamanakoanga i te au akaraanga meitaki no te tiratiratu, mei ia Iehova tae roa mai ki te aronga te taikuia maira i te Puka Tapu e i roto i ta tatou au puka Punanga Tiaki, kapiti katoa te au mea tataia i te Yearbook ra.
19. Eaa te tuanga ta te akarongo ka rave i to tatou riroanga kia tiratiratu?
19 Na te akarongo maroiroi i te Atua ko Iehova e te mataku i te akamareka koreanga iaia ka tauturu ia tatou kia autu i te akaaoanga no te tiratiratu. Ka akamaroiroi tatou i to tatou akarongo e te mataku ia Iehova na te apiianga meitaki i te Tuatua a te Atua e na te raveanga i te angaanga Kerititiano. Na teia e tauturu ia tatou kia rave rotai ma te ako a Paulo tei tataia ia Ephesia 4:23, 24: “Inara kia akaouia kotou i te mana te taangaanga ra i to kotou manako, e kia aao i te tu tangata ou tei angaia i tau ki to te Atua anoano i te tuatua tika ra e te tiratiratu.”—NW.
20. I runga katoao, eaa te tu te ka tauturu ia tatou kia tiratiratu kia Iehova e ki etai katoa oki ta tatou e kaiou ra i te tiratiratu?
20 Ka tauturu te ariki anga i te au tu o Iehova ia tatou kia tiratiratu. I runga katoao, na te inangaro noinoi kore no to tatou Metua i te rangi ra e te akameitaki no tana au mea ravarai i rave no tatou, te aroaanga iaia ma to tatou ngakau katoa e te meta e te manako e te ririnui oki ka tauturu ia tatou kia tiratiratu kiaia. Pera katoa oki, na te aroa anga mei ta Iesu i tuatua ra te ka akataka i tana au pipi ka tauturu ia ia tatou kia tiratiratu ki te au Kerititiano katoatoa i roto i te putuputuanga e i roto i te ngutuare tangata. Na roto i tetai atu tu, e tumu tikai ia no te noinoi me kare no te noinoi kore. Te aite anga o te tiratiratu kore e noinoi ia. Te aite anga o te tiratiratu e noinoi kore ia.—Mareko 12:30, 31; Ioane 13:34, 35.
21. Akapeea e raukaʼi te akaoti anga i te autu anga i te akaaoanga i te tumu no te tiratiratu ra?
21 Ei akaoti anga: Ko te tiratiratu e tu apinga maata ia ta te Atua ko Iehova ra i akakite mai, ta Iesu Karaiti katoa, e ta te au tavini mou o Iehova katoatoa ra. E raukaʼi te pirianga meitaki ma te Atua ko Iehova ra, ka tika tatou kia autu i te akaaoanga no te tiratiratu kiaia no te akonoanga i tana au umuumuanga tuatua tika, na te kore e pirianga ma tona au enemi, e na te paruru anga ia Iehova i te akakitekiteanga akapapaia e tei akapapa koreia ra. Ka tika katoa tatou kia autu i te akaaoanga no te tiratiratu anga ki te akaaerenga akaraia a Iehova ra. Ka tika katoa tatou kia tiratiratu ki to tatou au putuputuanga e kia tiratiratu ki to tatou nga tokorua akaipoipo. Na te autuanga takiri i te akaaoanga no te tiratiratu, ka piri atu tatou i te akatika anga i te ngateitei o Iehova, e ka mou i tona tuanga no te maroanga ra. Na reira ka rauka ia tatou tana akaperepere anga e ka rauka mai te tutaki no te ora mutu kore. Ko ta te apotetoro ko Paulo i tuatua no te akono i te Atua ra ka rauka katoa kia tuatuaia no to tatou autu anga i te akaaoanga no te tiratiratu. E puapinga to te reira no te oraanga i teianei e no tera te aere maira.—Salamo 18:25; 1 Timoteo 4:8.
Akapeea Koe me Pau?
◻ Na roto i teea au tu e raukaʼi ia tatou kia autu i te akaaoanga i te tiratiratu ki te Atua?
◻ Eaa te umuumuia maira ia tatou no te tiratiratu ki te akaaerenga a Iehova ra?
◻ Akapeea e raukaʼi i te aronga pakari kia autu i te akaaoanga no te tiratiratu?
◻ Eaa te akaaoanga te ka o mai te tiratiratu te ka tika kia autu te au Kerititiano akaipoipoia ra?
◻ Eaa te au tu te ka tauturu ia tatou kia autu i te akaaoanga no te tiratiratu?
[Tutu i te kapi 17]
Ka arai te tiratiratu ki te au mema o te putuputuanga kia kore te aronga pakari e akakite i te au tumu tuatua muna kia etai ke
[Au Tutu i te kapi 18]
Ko te tu tiratiratu ki tona tokorua ka akamaroiroi i te tapeka akaipoipo anga