Au Uianga a te Aronga Tatau

No etai au mataiti roa i teianei te akaari maira te numero e piri ra ki roto i te kai anga i te au oroa Akamaara Anga e kua tupu meangiti. Ko te aite anga ainei o teia e e manganui te aronga ou te akatainuia ra ma te vaerua tapu?

E tumu meitaki te vaira no te irinaki i te numero o te 144,000 au Kerititiano akatainuia e kua ki e ngauru ua atu mataiti i topa.

Ia Angaanga 2:1-4, ka tatau tatou no te aronga mua i roto i te reira pupu kotingaia: “E tae rava atura ki te rā Penetekose, kua taki ruru marie akera ratou katoa i te ngai okotai ma te inangaro okotai. E kare akera i mamia, ko te aruru maira no runga mai i te rangi, mei te matangi viviki maata ra; kua ki rava akera te are i nooia e ratou ra. E kua mama maira te arero manga kia ratou, mei te ai ra te tu, to iora ki rungao ia ratou katoa ra. E ki akera ratou ravarai i te Vaerua Tapu, kua tuatua iora i te tuatua ke, i ta te Vaerua i oronga mai i te tuatua kia ratou ra.”

I muri ake i te reira, kua iki a Iehova i tetai pae atu, e kua akatainu aia ia ratou ma tona vaerua tapu. E tauatini ua atu tei kapitiia atu i te au mataiti mua tikai o te akonoanga Kerititiano. I te akono anga Akamaara Anga i to tatou tuatau nei, i te maata anga o te taime ka tuatua te vaa tuatua no runga i te au tuatua a te apotetoro Paulo ia Roma 8:15-17, tei taiku ra no te aronga akatainuia e ka ‘rauka ia ratou te Vaerua akatamariki ra.’ Kua tuatua katoa a Paulo i te vaerua tapu tei rauka ia ratou ‘e to ratou katoa nei oki vaerua, tei akakite ïa e, e tamariki ratou na te Atua, e aronga tuanga ïa.’ Te aronga tei rauka tikai teia vaerua akatainuanga ka kite ratou i te reira ma te papu tikai. Kare te reira i tetai mea inangaro uaia me kore ra i tetai akamanako anga manako ngakau e te akara anga tika kore ia ratou uaorai.

Kua marama tatou e kua tupu teia kapiki anga ki te rangi na roto mai i te au anere mataiti, noatu i te tuatau tei kapikiia ko te Au Tuatau Poiri, penei te vaira tetai au taime e e meangiti ua te numero o te aronga akatainuia.a Ma te akanoo akaou anga o te akonoanga Kerititiano mou vaitata i te openga o te anere mataiti i topa, e maata tei kapikiia e tei ikiia. Inara te akara anga e i te au mataiti rotopu o te 1930, kua ki rai te numero katoa o te 144,000. I reira i akamataʼi te mama mai tetai pupu o te au Kerititiano tiratiratu ma te manakonako anga no te enua. Kua tuatua a Iesu e e “mamoe ke,” tei taokotai ra i te akamori ma te aronga akatainuia ei anana okotai tei akatikaia.​—Ioane 10:14-16.

Te akaari maira te au tika i te au ngauru mataiti i aereia mai i te ki anga o te kapikianga o te aronga akatainuia e ta Iehova akameitakianga ki rungao i te “aronga maata rava,” e tupu maira tei manakonako ra no te ora atu i “te mate maata.” (Apokalupo 7:9, 14) Ei akaraanga, i te akono anga Akamaara Anga i te 1935, tei tae atura e 63,146, te aronga tei piri atu i te kai anga i te au oroa ei akaari anga i to ratou akakite ua anga e e aronga akatainuia e 52,465 te numero. E toru ngauru mataiti i muri mai, me kore i te 1965, e 1,933,089 aronga tei tae mai, e kua topa te aronga tei piri ki te kai anga ki te 11,550. Te nekeanga atu e 30 mataiti vaitata mai, i te 1995 kua tupu te aronga tei tae mai ki te 13,147,201, inara e 8,645 anake rai tei piri ki roto i te kai anga i te varaoa e te uaina. (1 Korinetia 11:23-26) Ma te taka meitaki, i te au ngauru mataiti e topa ra, kua topa maata ki raro te numero o te aronga tei akakite e no te aronga toenga ratou​—mei te 52,400 i te 1935; e 11,500 i te 1965; e 8,600 i te 1995. Inara, te aronga ma te manakonakoanga no te enua kua akameitakiia ratou, e kua tupu maata tikai to ratou numero.

Te ripoti tei neneiia i ou ake nei tikai no te mataiti 1995, e te akaari maira te reira e e 28 aronga tei piri ki roto i te kai anga tei maata atu i to te mataiti i topa ake nei noatu e kua topa tikai te reitio o te aronga tei kai ra ki raro. Me akamanakoia te au mea ravarai, e ko tetai manga maata mai tei iki ra i te piri ki te kai anga i te au oroa kare ia i te mea manamanata. I te au mataiti tei aereia mai ko etai pae, pera katoa te aronga papetito ouia, kua akamata viviki ua ratou i te piri i te kai. I tetai au tu ra, i muri ake i tetai tuatau poto kua akatika ratou e e tarevake teia. Kua kite mai etai pae e kua piri ratou i te kai ma tetai ariu anga manako ngakau penei ra no tetai apiapi anga kopapa me kore o te manako. Inara i muri akera kua kite mai ratou e kare tikai ratou i kapikiia no te oraanga i te rangi. Kua pati ratou i te aroa takinga meitaki e te marama mei te Atua. E te tamou ra ratou i te tavini iaia ei au Kerititiano memeitaki, tiratiratu, te raukaanga te manakonakoanga o te oraanga mutu kore i te enua nei.

Kare e anoanoia no tetai ua atu ia tatou kia manata me akamata tetai tangata i te piri ki roto i te kai anga i te au oroa me kore ra ka akamutu i te rave i te reira. Kare tikai tei runga ia tatou e me kua akatainuia tikai tetai ua atu ma te vaerua tapu e me kua kapikiia no te oraanga i te rangi e me kare. Ka akamaara ana i te akapapu anga pakari a Iesu: “Ko au te tiaki mamoe meitaki ra: kua kite au i taku uaorai.” Ma te aiteite te akapapu anga, kua kite a Iehova i te aronga tana i iki ei au tamariki vaerua. Te vaira te tumu no te irinaki e ka topa ua atu te numero o te aronga akatainuia ki raro i te tu ruaine e te au tupu anga kitea koreia e riro ra ei akaope i to ratou oraanga i te enua nei. Inara, i teia aronga akatainuia tikai e vai ua ra ma te akarongo e tae ua atu ki te matenga, te manakonako anga i te korona o te ora, te au mamoe ke, tei orei ra i to ratou au kakau i te toto o te Mamoe, ka akara atu ki mua ki te oraanga atu i te mate maata te ka tupu.​—2 Timoteo 4:6-8; Apokalupo 2:10.

[Tataanga Rikiriki i Raro]