Tavaitai Anga i te Au mea o te Rangi e te Au Mea o te Ao Nei
“Tona uaorai inangaro takinga-meitaki . . .kia tavaitai aia i te au mea katoatoa i te Mesia ra, to te rangi, e to te ao katoa nei.”—EPHESIA 1:9, 10.
1. Eaa ra to Iehova “inangaro takinga-meitaki” no te rangi e te ao katoa?
AU I TE AO KATOA E PINI UA AKE! Ko te reira oki te akakoroanga kaka o Iehova, “te Atua au.” (Ebera 13:20) Kua akauru aia i te apotetoro ko Paulo kia tata e ko Tona “inangaro takinga-meitaki” koia oki “kia tavaitai aia i te au mea katoatoa i te Mesia ra, to te rangi, e to te ao katoa nei.” (Ephesia 1:9, 10) Eaa tikai ra te tamanakoia maira e te verepa tei uriia ei ‘tavaitai’ i roto i teia irava? Te akakite ra te tangata apii Pipiria ko J. B. Lightfoot e: “Te tamanako maira te reira tuatua i te tu rotai o te ao katoa e pini ua ake, te kare rava e au tuanga ke e te tau kore e vai ki roto, kareka te au tuanga katoatoa ka kiteaia to ratou akapuanga e te pirianga okotai i roto ia Karaiti. Te ara e te mate, te mii e te puapinga kore e te mamae, ka kore ia.”
‘Au Mea i te Rangi’
2. Koai ma ‘te au mea i te rangi’ e anoanoia ra kia tavaitaiia?
2 Kua tapoto mai te apotetoro ko Petero i te manakonakoanga umere o te au Kerititiano mou i tona tata anga: “Te tatari nei ra tatou i te rangi ou e te enua ou tana i tuatua maira, i te vai tika anga o te tuatua-tika ra.” (2 Petero 3:13) Te tou ra te “rangi ou” tei taputouia mai i konei ki te mana akatere ou, te Patireia Mesia. ‘Te au mea i te rangi’ tei taikuia mai e Paulo i roto i tana reta ki to Ephesia ka tavaitaiia i roto “i te Mesia.” Ko ratou te au tangata toko iti ua tei ikiia kia tutara ma Karaiti i te rangi. (1 Petero 1:3, 4) Ko teia 144,000 Kerititiano akatainuia i “okoia no roto i teianei ao,” i “okoia ïa aronga no roto i te tangata nei,” kia riro ei aronga tuanga katoa ma Karaiti i roto i tona Patireia i te rangi.—Apokalupo 5:9, 10; 14:3, 4; 2 Korinetia 1:21; Ephesia 1:11; 3:6.
3. Eaa ka karangaia ai te aronga akatainuia e kua ‘akanooia i te ao’ noatu tei runga nei rai i te enua?
3 Kua apaiia mai te au Kerititiano akatainuia, me kore kua anau akaouia, i te vaerua tapu kia riro mai ei au tamariki vaerua na Iehova. (Ioane 1:12, 13; 3:5-7) No te mea kua rave a Iehova ei “tamariki,” nana kua riro mai ratou i reira ei au taeake no Iesu. (Roma 8:15; Ephesia 1:5) No te reira, noatu tei runga nei rai i te enua, kua karangaia ratou e kua ‘akatuia e kua akanooia i te ao i te Mesia ra ia Iesu.’ (Ephesia 1:3; 2:6) Te mou nei ratou i teia turanga teitei i te pae vaerua no te mea kua ‘akairoia ratou i te vaerua tapu i tuatuaia maira, ko te akakite ïa o to ratou tuanga’ tei akonoia no ratou i te rangi. (Ephesia 1:13, 14; Kolosa 1:5) Ko ratou, i reira ‘te au mea i te rangi,’ tei anoanoia kia tavaitaiia te numero katoa i akatainuia e Iehova.
Akamata te Tavaitaianga
4. I naea e akapeea te tavaitaianga o ‘te au mea i te rangi’ i te akamata anga?
4 Kia tau ki ta Iehova “akaaerenga,” me kore mataara no te akatere anga i te au mea, ka akamata te tavaitaianga o ‘te au mea i te rangi’ “i te openga tikai o te au tuatau ra.” (Ephesia 1:10) Kua tae mai taua tuatau ra i te Penetekote 33 T.N. I taua ra ra, kua riringiia mai te vaerua tapu ki rungao i te au apotetoro e tetai pupu pipi, tane e te vaine. (Angaanga 1:13-15; 2:1-4) Kua oronga mai teia i te akapapuanga e kua akamata te koreromotu ou i te angaanga, te akairo anga i te anauanga o te putuputuanga Kerititiano e te iti tangata ou o te Iseraela vaerua, “te Iseraela o te Atua.”—Galatia 6:16; Ebera 9:15; 12:23, 24.
5. No teaa ra a Iehova i akatupu mai ei i tetai “iti-tangata” ou ei mono i te Iseraela kopapa?
5 Kare te Ture koreromotu tei papauia ki te Iseraela kopapa i akaua mai ana i tetai ‘basileia taunga e te iti-tangata tapu’ te ka tavini e mutu kore ua atu. (Exodo 19:5, 6) Kua akakite a Iesu ki te au arataki akonoanga ngati Iuda: “E apai keia te basileia o te Atua nei ia kotou, e tukuia atu ki te aronga e akaua mai i te ua ra.” (Mataio 21:43) To roto i taua iti tangata ra, te Iseraela vaerua, ko te au Kerititiano akatainuia tei apaiia mai ki roto i te koreromotu ou. Kia ratou, kua tata te apotetoro ko Petero: “E uki ikiia ra kotou, e kau taunga ariki, e iti-tangata tapu, e aronga okoia; kia akakite ua kotou i tona meitaki, to tei kapiki ia kotou i to roto i te poiri, kia tae ki tona mārama umereia ra: Ko kotou, kare te tangata no te Atua i muatangana, i teianei ra e tangata ïa no te Atua.” (1 Petero 2:9, 10) Kare te Iseraela kopapa i te iti tangata koreromotu akaou no Iehova. (Ebera 8:7-13) Mei ta Iesu i totou, kua rave ke ia mei ia ratou te akameitakianga kia riro ei tuanga no te Patireia Mesia e kua orongaia ki te 144,000 mema o te Iseraela vaerua.—Apokalupo 7:4-8.
Apaiia ki Roto i te Koreromotu Patireia
6, 7. Eaa te koreromotu takake roa ta Iesu i papau ki tona au taeake anauia i te vaerua, e eaa ra te aiteanga o teia no ratou?
6 I te po i akanoo ei a Iesu i te Akamaaraanga no tona matenga, kua akakite aia ki tana au apotetoro akarongo mou: “Ko kotou ko te aronga e noo tamou i vaitata iaku i toku au timataanga nei: Mei toku metua i akono i tetai basileia noku ra, kua akono katoa au ia kotou; Kia kai katoa kotou e kia inu oki i taku kaingakai i toku basileia ra, e kia noo ki rungao i te au terono i te akava anga i nga kopu tino ngauru ma rua o Iseraela ra.” (Luka 22:28-30) Te tou ra a Iesu i konei ki tetai koreromotu takake tana i papau ki tona au taeake 144,000 tei anau akaouia i te vaerua, te ka vai “akarongo mou e tae ua atu ki te mate” e ka riro ratou uaorai ei ‘aronga re.’—Apokalupo 2:10, NW; 3:21.
7 Te aronga i roto i teia pupu tokoiti ua kua akaruke ratou i te au manakonakoanga katoatoa o te noo anga e mutu kore ua atu i te enua nei ei au tangata kiko e te toto. Ka tutara ratou ma Karaiti i te rangi, ka noo ki runga i te au terono i te akava i te tangata nei. (Apokalupo 20:4, 6) Ka akarakara ana tatou i etai au irava ke atu tei tau ua no teia aronga i akatainuia e tei akaari mai eaa te “mamoe ke atu” kare ei e kai te nga oroa o te Akamaaraanga.—Ioane 10:16.
8. Eaa ta te aronga akatainuia e akakite maira na roto i te kai anga i te varaoa? (Akara i te pia i te kapi 23.)
8 Te piri ra te aronga akatainuia ki to Karaiti au mamaeanga e te puareinga ua ra i te akaarite ki tona mate. Kua akakite a Paulo, tetai o taua pupu ra e kua papa ua aia i te rave i tetai ua atu akaatingaanga kia ‘rauka iaia te Mesia. Kia kite oki au iaia, e te marōrō o tona tuakaouanga, e te kapiti anga atu i tona au mamae.’ Ae, kua puareinga ua a Paulo i te akaarite anga atu iaia uaorai “i tona mate.” (Philipi 3:8, 10) Maata te au Kerititiano akatainuia tei akakoromaki ana “i te mate o te Atu ra o Iesu” i roto i to ratou kopapa—2 Korinetia 4:10.
9. Eaa te kopapa e akatutuia maira e te varaoa Akamaaraanga?
9 I te akanoo anga i te Kaikai Anga Aiai a te Atu, kua tuatua maira a Iesu: “Ko toku kopapa teia.” (Mareko 14:22) Te tou ra aia ki tona kopapa tikai, kare e roa atu ana ka papaia e ka akatuparaia ki te toto. Te varaoa kare e opue e akatutuanga tau tikai no taua kopapa ra. No teaa ra? No te mea i roto i te Pipiria, e akatutu ana te opue i te ara me kore i te kino. (Mataio 16:4, 11, 12; 1 Korinetia 5:6-8) E tu apa kore to Iesu, e te ara kore oki tona kopapa tangata. Ka oronga aia i taua kopapa ra ei tarangaara. (Ebera 7:26; 1 Ioane 2:2) Me rave aia i te reira ka puapingaia te au Kerititiano akarongo mou katoatoa, noatu te manakonako ra ratou i te oraanga i te rangi me kore i te oraanga mutu kore i te parataito i te enua nei.—Ioane 6:51.
10. Na teea mataara te aronga e inu ra i te uaina o te Akamaaraanga i te “kapiti katoa anga i te toto o te Mesia”?
10 No runga i te uaina ka inu te au Kerititiano akatainuia i ko i te Akamaaraanga, kua tata a Paulo: “Te kapu no te meitaki ta tatou e akameitaki nei, kare aina i te kapiti katoa anga i te toto o te Mesia nei?” (1 Korinetia 10:16) Na teea mataara te aronga e inu ra i te uaina i te “kapiti katoa anga i te toto o te Mesia”? Kare oki ratou e kapiti atu ki roto i te oronga anga i te atinga oko, i te mea ka anoano ratou uaorai i te oko. Na roto i to ratou akarongo i roto i te mana oko o te toto o Karaiti, ka akakoreia ta ratou ara e ka akatikaia ratou ei aronga tuatua tika no te oraanga i te rangi. (Roma 5:8, 9; Tito 3:4-7) Na roto i te toto o Karaiti tei akamaringiia e ‘akatapuia’ ai te 144,000 aronga tuanga o Karaiti e e akatakakeia ai, e tamaia ai te ara kia riro mai ei “aronga tapu.” (Ebera 10:29; Daniela 7:18, 27; Ephesia 2:19) Ae, na roto i tona toto tei akamaringiia kua ‘oko a Karaiti i te tangata no te Atua mei roto mai i te au kopu e te au reo e te au iti tangata e te au pa enua ravarai, e . . . kua akariro ia ratou ei patireia e ei kau taunga ki to tatou Atua, e kia tutara ratou ei au ariki i rungao i te enua nei.’—Apokalupo 5:9, 10, NW.
11. Eaa ta te aronga akatainuia e akatutuia maira na te inu anga i te uaina o te Akamaaraanga?
11 I te akamana anga a Iesu i te Akamaaraanga o tona matenga, kua tuku atura aia i te kapu uaina ki tana au apotetoro akarongo mou e kua tuatua atura: “Ka inu na kotou ravarai; Ko toku ïa toto teia, no te koreromotu ou ra, tei akamaringiia no te tangata e manganui, kia matara te ara.” (Mataio 26:27, 28) Mei te toto o te au puakatoro e te au puakanio i akapapu mai i te Ture koreromotu i rotopu i te Atua e te iti tangata o Iseraela, kua akapapu katoa mai te toto o Iesu i te koreromotu ou ta Iehova i papau ki te Iseraela vaerua, akamata mai i te Penetekote 33 T.N. (Exodo 24:5-8; Luka 22:20; Ebera 9:14, 15) Na te inu anga i te uaina tei akatutu mai i te “toto o te koreromotu,” te akakite ra te aronga akatainuia e kua apaiia ratou ki roto i te koreromotu ou e te rauka maira te au puapinga no te reira.
12. Akapeea ra te aronga akatainuia me papetitoia i roto i to Karaiti mate?
12 Te akamaara katoaia maira te aronga akatainuia no runga i tetai apinga ke mai. Kua akakite atura a Iesu ki tana au pipi akarongo mou: ‘Ka inu rai kotou i te kapu taku e vaitata i te inu nei, e bapetizoia oki kotou i te bapetizo e bapetizoiaʼi au nei.’ (Mareko 10:38, 39) Kua tuatua te apotetoro ko Paulo i muri mai no te au Kerititiano tei “bapetizoia ki roto i [to te Mesia] mate.” (Roma 6:3) Te noo nei te aronga akatainuia i te oraanga akaatinga. E mate akaatinga to ratou na roto i te tu e kua akaruke ratou i tetai ua atu manakonakoanga no te ora mutu kore i runga nei i te enua. Ka oti takiri te papetitoanga o teia au Kerititiano akatainuia i roto i te mate o Karaiti i muri ake i te mate anga ma te akarongo mou i reira e akatu akaouia mai ei ratou ei au mea ora vaerua kia ‘tutara kapipiti katoa ei au ariki’ ma Karaiti i te rangi.—2 Timoteo 2:10-12, NW; Roma 6:5; 1 Korinetia 15:42-44, 50.
Kai Anga i te Nga Oroa
13. No teaa ra te aronga tei te enua te manakonakoanga kare ei e kai i te nga oroa o te Akamaaraanga, inara no teaa ratou ka aere ei ki te Akamaaraanga?
13 I te mea e ka o pouroa mai teia ki te kai anga i te varaoa e te uaina ka patiia i te taime o te Akamaaraanga, te taka ua ra e kare e tau kia kai te aronga e manakonakoanga enua to ratou. Ka kite ua te aronga e manakonakoanga enua to ratou e kare ratou uaorai i te au mema akatainuia no te kopapa o Karaiti, e kare katoa ratou i roto i te koreromotu ou ta Iehova i papau ki te aronga ka tutara ma Iesu Karaiti. I te mea te akatutu maira “te kapu” i te koreromotu ou, ko te aronga anake ua i roto i te koreromotu ou te ka kai i te nga oroa. Te aronga e akara atura ki mua ki te oraanga mutu kore ei tangata apakore i te enua nei i raro ake i te Patireia kare i papetitoia i roto i to Iesu mate e kare katoa i kapikiia kia tutara ma ia i te rangi. Me e ake e kai ratou i te nga oroa, ka akatutu mai te reira i tetai apinga kare i te tika no runga ia ratou. No reira, kare ratou e kai, noatu ka tae ratou ki te Akamaaraanga ei aronga akarakara. Te akameitaki maata nei ratou i te au mea pouroa ta Iehova i rave no ratou na roto i tana Tamaiti, kapiti mai te akatika anga mai i te akakoreanga ara tei akanooia ki runga i te toto o Karaiti tei akamaringiia.
14. Akapeea te aronga akatainuia i te akaketaketa angaia i te pae vaerua na te kai anga i te varaoa e te uaina?
14 Te vaitata nei i te oti te akairoanga openga o te numero meangiti ua o te au Kerititiano tei kapikiia kia tutara ma Karaiti i te rangi. E tae ua atu ki te openga o to ratou oraanga akaatinga i te enua nei, ka akaketaketaia te aronga akatainuia i te pae vaerua na te kai anga i te nga oroa Akamaaraanga. Ei au mema no te kopapa o Karaiti te kite ra ratou i te pirianga okotai ma to ratou au taeake e te au tuaine. Te riro ra te kai anga i te oroa varaoa e te uaina i te akamaara ia ratou i ta ratou apainga kia vai akarongo mou ua e tae ua atu ki te mate.—2 Petero 1:10, 11.
Tavaitai Anga i te ‘Au Mea o te Ao Nei’
15. Koai ma tei tavaitaiia mai ki te pae i te au Kerititiano akatainuia?
15 Mei rotopu mai i te 1930, e maata ua atu te numero o te “mamoe ke atu,” kare no te “anana iti” ko to ratou manakonakoanga kia noo i te oraanga mutu kore i te enua nei, tei akaputuputu mai ki te pae i te aronga akatainuia. (Ioane 10:16; Luka 12:32; Zekaria 8:23) Kua riro mai ratou ei au oa tiratiratu no to Karaiti au taeake, i te oronga i te tauturu puapinga i roto i te tutu anga i “te evangelia o te basileia” ei kite ki te pa enua ravarai. (Mataio 24:14; 25:40) I te pera anga, te tuku ra ratou i tetai tuatau no ratou uaorai kia akavaia e Karaiti ei “mamoe” nana, kia tukuia ma te akaperepere ki tona “rima katau” me aere mai aia e akava i te pa enua. (Mataio 25:33-36, 46) Na roto i te akarongo i roto i te toto o Karaiti, ko ratou te “aronga maata rava,” te ka ora mai mei roto “i te mate maata.”—Apokalupo 7:9-14.
16. Koai ma ra te ka piri mai ki ‘te au mea o te ao nei,’ e ka akapeea ra e rauka ai i teia aronga katoatoa te tuatau kia riro mai ei ‘tamariki na te Atua’?
16 Ka akamaka te akairoanga openga o te 144,000 i te mataara no te tuku anga mai i “nga matangi” o te akapouanga ki runga i to Satani akatereanga kino o te au mea i te enua nei. (Apokalupo 7:1-4) I te tuatau o te Tutaraanga Tauatini Mataiti a Karaiti e tona au taeake ariki kau taunga, ka piri mai te manganui ua atu o te aronga tei akatuia mai ki te aronga maata rava. (Apokalupo 20:12, 13) Ka rauka i teia aronga te tuatau kia riro mai ei au tangata tinamou i te enua nei no te Ariki Mesia, ko Iesu Karaiti. I te openga o te Tutaraanga Tauatini Mataiti, pouroa teia ‘au mea o te ao nei’ ka tukuia na roto i tetai timataanga openga. Te aronga tei vai akarongo mou ua ka arikiia ratou ei ‘tamariki na te Atua.’—Ephesia 1:10; Roma 8:21; Apokalupo 20:7, 8.
17. Akapeea ra to Iehova akakoroanga me akatupuia?
17 Na roto i reira, i tana “akaaerenga” pakari openga kore me kore mataara no te akatere anga i te au mea katoa, e akatupu ei a Iehova i tona akakoroanga “kia tavaitai aia i te au mea katoatoa i te Mesia ra, to te rangi, e to te ao nei.” Ka tavaitaiia i reira te au mea ora kite katoatoa i te rangi e te enua i roto i te au i te ao katoa e pini ua ake, ma te akaarite anga rekareka ki te turanga ngateitei o Tei Akakoro Maata, ko Iehova.
18. Akapeea te aronga akatainuia e to ratou au oa e puapingaia ai mei te tae anga ki te Akamaaraanga?
18 E akaketaketa anga tikai ki te akarongo o te numero meangiti ua o te aronga akatainuia e te mirioni ua atu o to ratou au oa kia akaputuputu mai i roto ia Aperira 12, 2006! Ka akono ratou i te Akamaaraanga o to Karaiti matenga, mei ta Iesu i akaue: “E akapera kotou ei manako anga iaku.” (Luka 22:19) E mea tau kia akamaara te katoatoa ka tae mai eaa ta Iehova i rave no ratou na roto i tana Tamaiti akaperepere, ko Iesu Karaiti.
Na te Akamanako Akaou Anga
• Eaa to Iehova akakoroanga no te au mea i te rangi e te au mea i te ao nei?
• Koai ma ‘te au mea i te rangi,’ e i akapeea ratou i te tavaitai angaia?
• Koai ma ‘te au mea i te ao nei,’ e eaa te manakonakoanga e o maira?
[Pia i te kapi 23]
“Te Kopapa o te Mesia”
I roto ia 1 Korinetia 10:16, 17, i te uriuri anga i te puapinga tikai o te varaoa no te au taeake o Karaiti tei akatainuia i te vaerua, kua taiku atu a Paulo, i te “kopapa” na roto i te tu takake rava. Kua akakite aia: “Te manga ta tatou e atiati nei, kare aina i te kapiti anga i te kopapa o te Mesia nei? No te mea okotai rai manga.” Me kai te au Kerititiano akatainuia i te varaoa Akamaaraanga, te akakite ra ratou i to ratou tu okotai i roto i te putuputuanga o te aronga akatainuia, tei riro mei te kopapa rai ma Karaiti ei Upoko.—Mataio 23:10; 1 Korinetia 12:12, 13, 18.
[Au Tutu i te kapi 23]
Eaa ra te tumu e ko te aronga ua tei akatainuia te ka kai i te varaoa e te uaina?
[Tutu i te kapi 25]
Na roto i ta Iehova akaaerenga, ka taokotaiia te au mea ora katoatoa i te rangi e i te enua nei