Au Uianga a te Aronga Tatau

Kua tuatuaia i “Te Punanga Tiaki” o Aukute 15, 1996: “I te tuanga openga o te mate ra, ko te ‘tangata’ tei oro ki to Iehova ra tua ka ora ia.” Te akakite maira ainei te reira e i muri ake i te tuanga mua o te mate maata ra, e manganui te aronga ou te ka aere mai ki to Iehova tua?

Kare te reira i te tumu tei akatakaia maira.

Ka akatupu maataia ta Iesu au tuatua te kitea ra ia Mataio 24:22 i te tuatau ki mua ra na tetai akaora anga mei roto mai i te tuanga mua o te mate maata te aere maira, koia te takore anga i te akonoanga. Te tuatua ra taua atikara ra: “E akamaaraara e ko te ‘tangata’ to te toenga o tei akatainuia ra e to te ‘aronga maata’ ra, ka akaoraia i te topa viviki takiri anga a Babulonia Maata i te tuanga mua o te mate ra.”

Kare taua aronga tiratiratu ra e o atu ki tetai tu kino me rave mai a Iesu e tona vaeau i te rangi ra i te tuanga openga o te mate ra. Inara koai te ka ora atu na roto i taua tuanga o te mate ra? Te akakite maira Apokalupo 7:9, 14 e ko tetai aronga maata e manakonako anga to ratou no te enua nei, te ka ora atu. Ka peea oki te au Kerititiano akatainuia i te vaerua ra? Kua uriuri manakoia i te “Au Uianga a te Aronga Tatau” i Te Punanga Tiaki o Aukute 15, 1990, e eaa tatou ka kore ei e tau kia tuatua papu ma te ketaketa e aea te toenga o te aronga akatainuia ra e raveia atu ei ki te rangi. No reira kua akaruke uaia i te atikara i mua ua akenei (ia Aukute 15, 1996) ma te tuatua uaanga e: “Pera katoa oki i te tuanga openga o te mate ra, ko te ‘tangata’ tei oro ki to Iehova ra tua ka ora ia.”

No tetai ua atu aronga ou e penei ka kite i te tuatua mou e ka aere mai ki to Iehova tua i muri ake i te akamata anga te mate maata ra, e akara i ta Iesu au tuatua tei tataia ia Mataio 24:29-31. E i muringao i taua tuatau mate ra, ei reira e kiteaʼi te akairo o te Tamaiti a te tangata. Kua karanga a Iesu e ei reira te au kopu tangata ravarai o te ao nei e aue ei. Kare aia i tuatua ana i tetai apinga no te au tangata te ka tu mai ki te turanga, tataraara anga, ma te tu anga ki to te Atua ra tua, e te riroanga ei au pipi mou.

Mei te reira katoa oki, i te parapore o te mamoe e te au puaka nio, ka mama mai te Tamaiti a te tangata ra e ka akataka akavaanga i te au tangata na runga i te tumuanga no ta ratou i rave me kore ta ratou kare i rave i te tuatau kua topa. Kare a Iesu i tuatua no te au tangata tei roa ra te akakite anga i te akono mei te puaka nio rai i te ariu viviki keanga e te riroanga mei te mamoe rai te tu. Ka aere mai aia i te akava anga na runga i te tumuanga o ta te au tangata i akataka ra i to ratou tu e eaa ratou.​—Mataio 25:31-46.

Inara, i teia tu, kare e tumu no tatou kia akapapu ketaketa no runga i teianei tumu. Te kite nei te au tangata o te Atua, eaa ta ratou ka rave i teianei te aronga akatainuia e te aronga maata​—ka tutu aere e te akariro te tangata ei pipi. (Mataio 28:19, 20; Mareko 13:10) I teianei tikai te tuatau no tatou kia tuku ki to tatou ngakau i te akamaroiroi anga: “E teianei, te ako katoa atu nei matou te rave angaanga kapiti nei, ia kotou, e auraka kotou e āriki puapinga kore ua i te aroa ua o te Atua ra: Te karanga ra oki aia e, ‘Kua akarongo au ia koe i te tuatau tau ra, e kua tauturu atu au ia koe i te rā e oraʼi ra:’ i na, teia taua tuatau tau ra, teia taua rā e oraʼi ra.”​—2 Korinetia 6:1, 2.