Akaora Anga ki Roto i Tetai Ao Ou Tuatua Tika

“Ka rekareka ratou i te maata o te au ra.”​—SALAMO 37:11.

1, 2. (a) Ka akapeea te tuke anga o ta Iehova ra akaora anga i to tatou tuatau nei i to te au akaora anga i to te au tuatau i taito ra? (e) Eaa te tu o te ao ta Iehova te ka apai mai i tona au tangata ki roto ra?

KO IEHOVA e Atua ia no te akaora anga. I te tuatau taito ra, kua akaora aia i tona au tangata i te au atianga e manganui. Ko taua au akaora anga ra no te tuatau poto ua, no te mea kare a Iehova i rave kia vai tamou tana au akavaanga ki runga i to Satani ao katoatoa ra i taua au atianga ra. Inara i to tatou tuatau nei, kare e roa atu ka rave a Iehova i te akaora anga meitaki rava o te katoa no tona au tavini. I teia taime ka akapou aia i te au tuanga ravarai o ta Satani akatereanga i te enua katoa nei, e ka apai aia i tona au tavini ki roto i tetai ao ou tuatua tika no te tuatau mutu kore.​—2 Petero 2:9; 3:10-13.

² Kua taputou a Iehova: “E roa poto ake, e kare ua te tangata kino ra . . . Kareka te aronga maru ra, ka noo ïa i te enua, e ka rekareka ratou i te maata o te au ra.” (Salamo 37:10, 11) Mei teaa te roa? “Ka riro te enua no te aronga tuatua-tika, ka noo tamou rai ratou i reira.” (Salamo 37:29; Mataio 5:5) Inara, i mua ake ka tupu ei te reira, ka o atu teianei ao ki roto i tetai tuatau maata te taitaia i tana i kite ana.

Te “Mate Maata”

3. Akapeea ta Iesu ra akataka anga i te “mate maata” ra?

³ I te 1914 kua tomo atu teianei ao ki roto i tona “tuatau openga.” (2 Timoteo 3:1-5, 13) Kua toe atu tatou i teianei e 83 mataiti ki roto i taua tuatau ra e te vaitata atura ki tona openga i reira, mei ta Iesu i totou maira, ka tupu te apinga e aru mai nei: “E mate maata tei te reira tuatau, kare ïa mei muatangana mai i teianei ao, e tae rave akenei i teianei rā, e kare oki a muri atu.” (Mataio 24:21) Ae, e kino atu i te Tamaki II o Teianei Ao, i apai ke iaʼi etai 50 mirioni ora anga. Mei teaa ra tetai tuatau akangaueueanga i teianei ao te akavaitata viviki mai nei!

4. Eaa ra ka tupu ei ta te Atua ra akava anga ki runga ia “Babulonia Maata”?

⁴ Ka tae mai oki te “mate maata” ma te rokoia viviki ua, “ora tai uaia.” (Apokalupo 18:10) Ka akairoia tona akamata anga na ta te Atua ra raveanga i te akavaanga ki runga i te au akonoanga katoatoa, ta te Tuatua a te Atua i tapa ra ko “Babulonia Maata.” (Apokalupo 17:1-6, 15) To Babulonia i taito ra tuanga maata ko te akonoanga pikikaa ia. Te aiteite ra te Babulonia o teia tuatau nei ki te mea taito ra e koia oki te patireia o te akonoanga pikikaa o teianei ao. Kua akono aia ei te vaine akaturi na te piri atu anga ma te au tuanga poritiki ra. Kua turu aia i ta ratou au tamaki e kua akameitaki atu i te au vaeau i nga tuanga patoi ra, e kua akatupu i te au tangata o te akonoanga okotai ra kia ta tetai i tetai. (Mataio 26:51, 52; 1 Ioane 4:20, 21) Kua kamo ua tona mata i te au ravenga viivii a tona au tangata ra e kua takinga kino atu i te au Kerititiano mou ra.​—Apokalupo 18:5, 24.

5. Ka akapeea te akamata anga o te “mate maata” ra?

⁵ Ka akamata te “mate maata” me ka uri viviki atu te au tuanga poritiki ra e ka ta ia “Babulonia Maata.” Ka rave ratou “e akaviivii ïa i taua vaine akaturi ra, e e pou oki aia ia ratou i te āru, e e noo apinga kore ua aia, e e kai i tona kopapa, e e tutungi iaia ki te ai.” (Apokalupo 17:16) I muri akera, tona aronga turu iaia i mua ana “e aue ratou iaia, e e ea oki ratou iaia.” (Apokalupo 18:9-19) Inara kua roa te au tavini o Iehova i te tapapa anga i teia, e ka karanga ratou: “Aleluia; . . . kua akautunga io nei oki aia i taua vaine akaturi maata ra, ko tei akaviivii i to te ao nei i tana akaturi anga, e kua akaoko aia i te toto o tona au tavini ta tona rima i akamaringi.”​—Apokalupo 19:1, 2.

Ka Tamakiia te Au Tavini o te Atua

6, 7. Eaa ka raukaʼi i te au tavini o Iehova te irinaki anga me ka tamakiia mai ratou a te tuatau o te “mate maata” ra?

⁶ Me oti te akapou anga i te akonoanga pikikaa, ka tamaki mai te au tuanga poritiki i te au tavini o Iehova. Te tuatua ra a Satani koia, “Goga i te enua o Magoga” i te totou: “E aere au ki te aronga noo ponuiaau ua ra, ko tei noo ma te ora.” Ma te manakoanga e ka ngoie ua ratou no te ta, e ka tamaki atu ia ratou ma tetai “nuku ririnui . . . , mei te tumurangi e ngaro ei te enua ra.” (Ezekiela 38:2, 10-16) Kua kite te au tangata o Iehova e ka puapinga kore teia tamaki anga no te mea te irinaki ra ratou ia Iehova.

⁷ I te manako anga a Pharao e tona nuku e kua mou ia ratou te au tavini o te Atua ra i te Tai Muramura, kua akaora temeio atura Iehova i tona au tangata e kua akapou atura oki i te au nuku o Aiphiti ra. (Exodo 14:26-28) A te “mate maata,” me manako to te au pa enua e kua mou ia ratou to Iehova ra au tangata, ka rave temeio akaou aia i te akaora anga: “Kia tae ki taua tuatau ra . . . e kake katoa mai ia toku riri otooto ki toku nei mata. E no toku vareae, e no te ai o toku riri, i tuatuaʼi au.” (Ezekiela 38:18, 19) Ka tupu i reira kia tae ki te take o te “mate maata” ra!

8. Eaa te au tupu anga ririnui tuke roa te ka rokoia i mua ake i ta Iehova rave anga i te akautunga i te aronga rave kino ra, e eaa oki te tupu anga?

⁸ I tetai tuanga i muri ake i te akamataanga te “mate maata” ra, inara i mua ake i ta Iehova rave anga i te akautunga ki runga i te toenga o teianei ao, ka rokoia te au tupu anga ririnui tuke roa. E akamanako ana i ta te reira ka akatupu. “Ei reira e kiteaʼi te akairo o te Tamaiti a te tangata [Karaiti] ki runga i te rangi: e ei reira te au kopu-tangata ravarai o te ao nei e aue ei, kia kite ratou i te Tamaiti a te tangata i te aere anga mai na roto i te tiao rangi, ma te mana, e te kakā maata.” (Mataio 24:29, 30) “E akairo to roto i te rā, e to roto i te marama, e to roto i te au etu; . . . e te taravai anga o te ngakau tangata i te mataku, e te manako ua anga i taua au mea ra i te vaitata anga mai i te ao nei.”​—Luka 21:25, 26.

“Te Vaitata Maira Oki to Kotou Ora”

9. Eaa ra te au tavini o Iehova ‘ka akateitei ei i to ratou mimiti’ me ka rokoia mai te au tupu anga ririnui tuke roa?

⁹ Ei taua tuatau rai, e tupu ei te totou ia Luka 21:28 ra. Kua tuatua a Iesu: “E kua tupu anake teianei au mea, e nānā to kotou mata ki runga, e akateitei to kotou mimiti; te vaitata maira oki to kotou ora.” Ka ruketekete te au enemi o te Atua ra i te mataku no te mea ka kite ratou e ko taua au tupu anga ririnui tuke roa ra te tupu ra no ko mai ia Iehova ra. Inara ka rekareka te au tavini o Iehova ra no te mea ka kite ratou e kua vaitata to ratou ora.

10. Akapeea ta te Tuatua a te Atua akataka anga i te take o te “mate maata” ra?

¹⁰ Ei reira a Iehova e tuku atu ei i te moto no te mate ki te akatereanga a Satani: “E taumāro atu au [ia Goga] ra ma te maki-mate e te toto; e naku e akatopa i te ua a vai puke ra, e te ua toka mamaata, te ai oki, e te teio, ki runga iaia, e ki runga i te au motuanga nona ra . . . E kite oki ratou e ko Iehova au.” (Ezekiela 38:22, 23) Pouroa te au tuanga katoa o ta Satani ra akatereanga kua akapouia. Te taiate tangata katoa o te aronga manako kore i te Atua ra ka takoreia atu ratou. Ko te reira te tika o Aramakito i te “mate maata” ra.​—Ieremia 25:31-33; 2 Tesalonia 1:6-8; Apokalupo 16:14, 16; 19:11-21.

11. Eaa ra te au tavini o Iehova ka akaoraiaʼi na roto i te “mate maata” ra?

¹¹ Ko te aronga e au mirioni ua atu tei akamori ia Iehova ra i te enua katoa nei te ka akaoraia atu na roto i te “mate maata” ra. Ko teia te “aronga maata” tei aere mai “no te pa enua ravarai, e te au kopu ravarai, e te au iti-tangata ravarai, e te au reo katoa oki.” Eaa ra ratou ka akaoraiaʼi na roto i taua tu umereia ra? No te mea kua akamori ratou ia Iehova “i te po e te ao.” No reira ka ora atu ratou i te openga o teianei ao e ka apaiia atu ki roto i te ao ou no te tuatua tika. (Apokalupo 7:9-15) No reira, ka kite ratou i te tupu anga o ta Iehova ra taputou: “E tiaki atu ia Iehova, e akono tikai i tona arataa, e nana koe e akateitei kia rauka ia koe te enua: e ka kite koe i te mate o te aronga kino ra.”​—Salamo 37:34.

Te Ao Ou

12. Eaa ta te aronga ora atu ia Aramakito te ka rauka kia tapapa atu?

¹² Mei teaa ra tetai tuatau marekaanga te reira​—te akakore anga i te rave kino e te akamata anga o te tuatau kaka maata rava i te tuatua enua katoa o te tangata nei! (Apokalupo 20:1-4) Mei teaa ra te akameitaki anga ia Iehova a te aronga te ka ora atu ia Aramakito kia tomo atu ki roto i tetai ao ou kaka, e akatereanga ma na te Atua i maani mai, ki runga i tetai enua te ka akariroia ei tetai parataito! (Luka 23:43) E kare rava ratou e tau kia mate! (Ioane 11:26) E tika oki, mei te reira tuatau aere ua atu ki mua, ka rauka ia ratou te manakonako anga umere roa no te ora anga no te tuatau katoa e oraʼi a Iehova ra!

13. Akapeea ta Iesu rave ua atu anga i te angaanga rapakauanga tana i akamata ra i runga i te enua nei?

¹³ Ka riro na Iesu, koia ta Iehova i akataoonga ra ei Ariki i te rangi, nana e akaaere te au akameitakianga temeio te ka rekarekaia e te aronga akaoraia ra. Iaia i te enua nei, kua akatuera aia i te mata o te matapo e te taringa oki o te taringa turi e kua rapakau “i te au maki ravarai, e te au mate katoa o te tangata.” (Mataio 9:35; 15:30, 31) I te ao ou, ka rave akaou aia i taua angaanga rapakauanga maata ra inara i te ao katoa nei. Ei rima rave no te Atua ra, ka akatupu aia i te taputou: “E [na te Atua] e orei i te roimata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” (Apokalupo 21:4) Kare rava e umuumu akaouia te au taote me kare te aronga tanu i tei mate!​—Isaia 25:8; 33:24.

14. Eaa te akaora anga te ka tupu ki te au tavini o Iehova kua mate ke ra?

¹⁴ Pera katoa oki ka akaoraia mai te au tavini tiratiratu katoatoa o te Atua tei mate ra i te tuatau kua topa. I te ao ou, ka akaoraia mai ratou mei te mou anga i te tanumanga ra. Te akapapu maira Iehova: “E tuakaouanga to tei mate, te aronga tuatua-tika e te aronga tuatua-tika kore.” (Angaanga 24:15) Penei, ko te aronga “tuatua-tika” te ka akatuakaouia na mua e kia tauturu i te akatotoa anga ia Parataito. Mei teaa ra te akamarekaanga i reira no te aronga te ka ora atu ia Aramakito kia akarongorongo i te au tupu anga tei kite taua aronga tei mate tiratiratu ra i te tuatau roa kua topa, i teianei kua ora akaou mai!​—Ioane 5:28, 29.

15. E akataka mai i etai au turanga te ka akatupuia i te ao ou ra.

¹⁵ Pouroa te aronga te ka ora ka kite i reira i ta te tata taramo i tuatua ra no Iehova: “Te oora nei koe i to rima, e te akamerengo nei i te kaki o te au mea ora katoa nei.” (Salamo 145:16) Kare e onge akaou: Ka akaoraia te enua ki tetai tu tau e ka uua maata mai oki. (Salamo 72:16) Kare e tangata e ngere akaou i te ngutuare: “E patu ratou i te au are, e na ratou uaorai e noo,” e ka noo ratou takitai “ki raro ake i tana uaorai vine, e ki raro ake i tana uaorai suke, e kare tetai e akamataku mai.” (Isaia 65:21, 22; Mika 4:4) Kare e mataku akaou: Kare e tamaki i reira, kare e ta ua, me kare e rave kino oki. (Salamo 46:8, 9; Maseli 2:22) “Kua noo ponuiaau ua te ao katoa nei, kua akaanga te roi; kua puroro ua mai to ratou reo imene.”​—Isaia 14:7.

16. Eaa ra ka ki ei te enua ou i te tuatua tika ra?

¹⁶ I te ao ou ra, kua takore ke ia atu ta Satani ra ravenga akatotoa pikikaa. Mari ra “te apii ra to te ao nei i te tuatua-tika i reira.” (Isaia 26:9; 54:13) Ma te apii anga tau i te pae vaerua i tera mataiti i tera mataiti ravarai, “ka ki te enua i te kite ia Iehova, mei te vairanga tai e ki i te tai ra.” (Isaia 11:9) Ka ki te au tangata katoa i te au manako akamatutu e te au angaanga meitaki. (Philipi 4:8) E tamanako i, tetai taiate tangata i te ao katoa tei matara ra i te au rave kino, te taemoemo, te vareae​—e taeake anga i te pa enua ravarai te akatupuia ra te au ua o te vaerua o te Atua e te katoatoa. E tika oki, noatu i teianei te tatanuia ra taua au tu ra e te aronga maata ra.​—Galatia 5:22, 23.

Eaa ra i Roaʼi?

17. Eaa ra a Iehova i tatari ei mei teia te roa i mua ake i te akaope anga i te rave kino ra?

¹⁷ Inara, eaa a Iehova i tatari ei mei teianei te roa kia takore atu i te rave kino e te akaora oki i tona au tangata ki roto i te ao ou? E akamanako e eaa tei tau ra kia raveia kia oti. Te mea puapinga maata rava ko te akatika anga i to Iehova ra tu ngateitei, ma tona tika oki kia tutara. Na te akatikaanga kia rava te tuatau e topa, kua akakite aia ma te ekoko koreia e ko te tutara a te tangata nei i vao ake i tona ngateitei ra kua riro ei tetai mea puapinga kore takiri. (Ieremia 10:23) No reira i teianei kua tau tikai a Iehova kia taui atu i te tutara a te tangata nei ma te tutara a tona Patireia i te rangi ra i raro ake ia Karaiti.​—Daniela 2:44; Mataio 6:9, 10.

18. I na ea te au uanga o Aberahama i akatuangaiaʼi i te enua o Kanaana ra?

¹⁸ Ko tei tupu ana i teia au anere mataiti katoa te aite ra ki tei tupu i te tuatau ia Aberahama ra. Kua tuatua a Iehova kia Aberahama e ka akatuangaia tona au uanga i te enua o Kanaana​—inara kare no tetai atu a anere mataiti “kare rai oki i rava roa te ara a te ngati Amori ra.” (Genese 12:1-5; 15:13-16) I konei ko te tuatua “ngati Amori” (ko tetai kopu maata) penei ko te au tangata o Kanaana katoa ra. No reira ka topa etai a anere mataiti i mua ake ka tuku ei a Iehova i tona au tangata kia akono takiri ia Kanaana. I te reira tuatau ra kua tuku a Iehova i to te au pa enua i Kanaana ra kia akatupu i to ratou au taiate. Eaa ra te tupu anga?

19, 20. Eaa te au tu taiate ta to Kanaana ra i akatupu?

¹⁹ Te akakite maira te Bible Handbook, na Henry H. Halley, e i Megido, kua kitea e te aronga ko enua te au potonga toenga no tetai iero no Asetoreta, koia te vaine atua a Baala. Kua tata aia: “E tokoiti ua takainga mei tetai ngai tanumanga maira, kua kiteaia e manganui te au moina te vaira te au ivi no te au tamariki rikiriki tei tuku atingaia ra ki roto i te reira iero . . . Ko te au peroveta a Baala raua ko Asetoreta e aronga akataoongaia ei ta i te au tamariki rikiriki ra.” “Ko tetai atu ravenga kino ko ta ratou i tapa ra e ‘au atinga pange.’ Me ka patuia tetai are, ka tuku atingaia tetai tamaiti, e ka patuia atu tona kopapa ki roto i te paruru ra.”

²⁰ Kua tuatua akakite a Halley e: “Ko te akamori anga ia Baala, ia Asetoreta, e etai atu au atua o Kanaana ra kua riro ei au peu oko maata roa; to ratou au iero e au ngai no te ravenga viivii. . . . Kua akamori to Kanaana, na te au ravenga akaturi, . . . e i muri akera, na te taanga i ta ratou tamariki anau mua ra, ei tetai atinga ki taua au atua ra. I te akaraanga e, i roto i tetai tuanga maata, kua riro te enua o Kanaana ei tetai tu no Sodoma e no Gomora i to ratou enua katoa. . . . E tika ainei to tetai akaaerenga tangata mei taua tu viivii rikarika ra e te takino anga kia roa atu te vai maianga? . . . Kua tamanako te aronga ko enua i te au ngai toenga teita o te au oire o Kanaana ra e eaa te Atua i kore ei e akapou ia ratou i mua ake i Tana i rave ra.”​—Akaaite ia 1 Ariki 21:25, 26.

21. Eaa te tu aiteite i rotopu i te turanga o te au Kanaana e to tatou tuatau nei oki?

²¹ “Kua akaotiia” te rave kino a te ngati Amori ra. No reira i teianei kua tau tikai a Iehova kia akapou atu ia ratou ra. Te tika katoa ra te reira tu i teia tuatau nei. Te ki nei teianei ao i te ta ua, te akaturi, e te akarongo kore i te au ture a te Atua ra. E mei ia tatou oki e rikarika ra i te au atinga tamariki i Kanaana i taito ra, ka peea oki te au atinga i te au raungauru ua atu mirioni o te aronga ou ra i roto i te au tamaki o teianei ao, e maata roa atura te kino i to tetai ua atu apinga i Kanaana ra? E tika rava, kua tau tikai kia apai mai a Iehova i te openga no teia akatereanga kino i teianei.

Te Akatupuanga i Tetai Atu Apinga

22. Eaa te ka akatupuia na to Iehova akakoromaki anga i to tatou tuatau nei?

²² Te akatupu ra to Iehova akakoromaki anga i teia tuatau openga nei i tetai atu apinga. Te akatika nei aia i tetai tuatau kia akaputu e kia apii i te aronga maata, kua tae to ratou numero i teianei kia tere atu i te rima mirioni. I raro ake i ta Iehova ra arataki anga, kua akapapaia ratou ki roto i tetai akaaerenga te tere atura ki mua. Te au tane, te au vaine, e te aronga mapu te tereniia ra kia apii ia etai ke i te au tuatua mou Pipiria. Na roto i ta ratou au uipaanga e te au puka apii Pipiria, te apii ra ratou i ta te Atua au ravenga aroa. (Ioane 13:34, 35; Kolosa 3:14; Ebera 10:24, 25) Kapiti katoa oki, te akatupu ra ratou i te au tu karape i te patu anga are, te rave apinga uira te neneiianga, e etai atu au apinga ei turu i te tutuanga i te “tuatua meitaki.” (Mataio 24:14) Penei ko taua au tu karape i te apiianga e te patuanga ka taangaanga maataia i te ao ou ra.

23. Eaa ra i riro ei ei meitaki kia ora i teia tuatau nei?

²³ Ae, i teia tuatau nei te teateamamao ra a Iehova i tona au tavini kia na roto atu i te “mate maata” ki roto i tetai ao ou no te tuatua tika. I reira kare a Satani e tona ao kino no te tamanata mai, kare e maki, e mii, e te mate oki. Ma te maroiroi maata e te rekareka, ka rave te au tangata o te Atua ra i te angaanga mataora i te patuanga i tetai parataito, i te ngai te ka riro te au ra ravarai ei “marekaanga maata.” Mei teaa ra te meitaki no tatou kia ora i teianei take o te au tuatau nei, kia kite e kia tavini atu ia Iehova, e kia kite oki e kare e roa atu ka ‘akateitei tatou i to tatou mimiti no te mea te vaitata maira to tatou ora’!​—Luka 21:28; Salamo 146:5.

Au Uianga Akamanako Akaou Anga

◻ Eaa te “mate maata,” e akapeea tona ra akamata anga?

◻ Eaa ra ka puapinga kore ei te tamaki anga a Goga ki runga i te au tavini o Iehova ra?

◻ Akapeea te akaope anga o te “mate maata”?

◻ Eaa te au puapinga umere roa te ka orongaia mai e te ao ou ra?

◻ Eaa ra Iehova i tatari ei mei teianei te roa i mua ake i te apainga mai i te openga ki teia akatereanga nei?

[Tutu i te kapi 16]

Ka tauiia te enua katoa nei kia riro ei tetai parataito