Te Tu Muna na Roto i te Ingoa o te Atu

KUA akaruke mai tetai tamaki anga kati poitini i runga i te subway o Tokyo, Tiapani ia Mati 1995 e 12 au tangata matemate, e tauatini maata atu tei makiia, e kua riro ei tauturu i te kitea anga mai tetai muna. Tetai akapupu anga akonoanga tei kitea ko te Aum Shinrikyo (Tika Teitei) kua akatu muna ua i tetai ngai maani anga kati sarin ei taangaanga no te kimi atu i te au akakoro anga ngaro.

Okotai marama i muri mai kua pueu tetai are kavamani i te aruru anga tetai pomu i Oklahoma City, U.T.M., e kua matemate e 167 au tangata. Tei kiteaia mai te akaari maira e kua akapiriia te aruru anga ki ta te kavamani rauka kore anga i te rave i tei tupu ki te akapupu anga akonoanga Manga David i Waco, Texas, e rua tikai mataiti i mua atu. I te reira taime e 80 au mema o te akapupu anga tei matemate. Kua akaari katoa mai te aruru anga pomu tei riro ei apinga muna ki te maata anga o te au tangata: E tatini ua atu au pupu ta tei tereniia i te tu vaeau te angaanga ra i teianei i te Unaite Teite, etai pae te tarotokakaia te parani muna anga i te patoi atu i te kavamani.

I muri mai, vaitata ki te openga o te 1995, kua kitea mai e 16 au kopapa ka i te ai i roto i tetai ngai vao rakau i te pae ia Grenoble, Varani. E mema ratou no te Akatereanga o te Iero Ra, e akapupu anga akonoanga meangiti tei o ki roto i te nuti o Okotopa 1994 i Tuiterani e Kanata e 53 o tona au mema tei ta ia ratou uaorai me kore ra tei taiaia. Inara noatu i muri ake i teia tumatetenga, kua angaanga ua atu te akapupu anga. Ki teia ra te vaira rai tona akakeu anga e te au akakoro anga ei apinga muna.

Te Au Kino o te Tu Muna o te Akonoanga

Te manako anga i teia au tupu anga, e mea umere ainei e manganui te au tangata te tarotokaka ra i te au pupu akonoanga? E tikai kare tetai tangata e inangaro i te turu i tetai akaaerenga muna​—noatu me e rave anga akonoanga e me kare​—tei taangaanga tau kore ra i tona irinaki e tei akatupu iaia kia aruaru i te au akakoro anga kare aia e akatika ana. Eaa ta te au tangata ka tau kia rave, ra, no te kopae atu i te topaanga ki roto i te ereere o te o anga ki roto i te au taiate muna tei tarotokakaia?

E tikai, ko tetai ua atu te manako ra i te piri atu ei mema ki roto i tetai taiate muna e mea tau kia akapapu i tona au akakoro anga tikai. Te taomi anga mei te au taeake me kore te au oa ka tau kia paruruia, e te au tuku anga ka tau kia akanooia kare ki runga i te manako ngakau mari ra ki runga i te au tika. Kia akamaara, papu ko te tangata tataki tai uaorai​—kare ko tetai atu​—te ka rokoia e tetai ua atu apinga ka tupu.

Na te aruanga i te au kaveinga Pipiria ko te ravenga papu roa atu ia o te akaateaanga mai mei te au pupu kino kare to ratou au akakoro anga i te mea ngateitei. (Isaia 30:21) Te o maira te noo neutara anga i te angaanga poritiki, te akaarianga i te aroa ki tetai atu, pera katoa te au enemi, te kopaeanga i “te au angaanga a te kopapa,” e te tatanuanga i te ua o te vaerua o te Atua. Tei maata rava atu, kia tau te au Kerititiano mou kare no teianei ao, mei ia Iesu rai, e na teia aerenga ka kopaeia te pirianga ki roto i te au taiate muna o teianei ao.​—Galatia 5:19-23; Ioane 17:14, 16; 18:36; Roma 12:17-21; Iakobo 4:4.

E aronga te Au Kite o Iehova tei irinaki akatenga i te Pipiria tei papu tikai i to ratou akarongo e tei tauta ra i te noo kia tau ki te reira. I te ao katoa, kua kite meitakiia ratou ei pupu akonoanga tei “kimi i te au, e aruaru atu.” (1 Petero 3:11) Ta ratou puka Jehovah’s Witnesses​—Proclaimers of God’s Kingdom te akakite tika ra: “Kare rava te Au Kite o Iehova i tetai taiate muna. Te akamarama meitakiia ra ta ratou au irinaki anga Pipiria i roto i te au puka te ka rauka ua i tetai ua atu. Pera katoa, te tauta tikai ra ratou i te pati i te katoatoa kia aere mai ki te au uipaanga kia kite e kia akarongo ratou uaorai eaa te tupu ana.”

Kare te akonoanga tika e rave ana i te au angaanga muna. Kua apiiia te aronga akamori o te Atua mou auraka e uuna i to ratou vai ua anga e kia kore e uuna i to ratou akakoro anga ei Au Kite o Iehova. Kua akaki te au pipi mua a Iesu ia Ierusalema ki ta ratou apiianga. Kua akakite ua atu ratou i ta ratou au irinaki anga e te angaanga. Te aiteite katoa ra ki te Au Kite o Iehova i teia tuatau. Ma te maramaia, me arai te au akatere anga kavamani maro i te akamori anga rangatira, ka rave matakite ua e te mataku kore te au Kerititiano i ta ratou angaanga, te akarongoanga i ‘te Atua auraka te tangata,’ e turanga tei maroia ki runga ia ratou no to ratou tu mataku kore i te akakite ki te ngai tangata.​—Angaanga 5:27-29; 8:1; 12:1-14; Mataio 10:16, 26, 27.

Me kua manako koe e penei e akapupu anga akonoanga muna te Au Kite o Iehova, penei no te mea e meangiti ua taau i kite no runga ia ratou. Papu ko te turanga rai ia o te manganui i te anere mataiti mua.

Te akakite maira a Angaanga pene 28 ia tatou i tetai uipaanga tei raveia e te apotetoro Paulo i Roma ki te “aronga nunui ngati Iuda.” Kua karanga ratou kiaia: “Te inangaro atu nei ra matou kia kite matou ia koe i toou manako; i tenana pupu, kua akakinoia ïa e kare e ngai toe, kua kite matou.” (Angaanga 28:16-22) I te pau anga, kua “apii atura [Paulo] ia ratou, e akakite atura i te basileia o te Atua,” e “kua akarongo maira tetai pae.” (Angaanga 28:23, 24) Kua riro te reira ei puapinga mutu kore kia ratou kia rauka mai te au tika no runga i te akonoanga Kerititiano mou.

Ma te akatapuia ratou i tetai ua atu ngai e te ngai tangata te tavini anga i te Atua, ka mataora te Au Kite o Iehova i te akakite atu i te au tika tau i ta ratou angaanga e te au irinaki anga ki tetai ua atu tei inangaro i te kite i te au tika. Ka kore i reira koe uaorai e akara matatio atu, e raukaʼi i te akakite meitakiia atu no to ratou akarongo?

[Tutu i te kapi 6]

Ka mataora te Au Kite o Iehova i te akaari e koai ratou e eaa ta ratou e rave ra