Ei te Apikepike o te Tangata i Akamaataiaʼi to Iehova Ririnui

“Kua manako te katoatoa iaku ei tavini tamou mataora e te oraora. Ko au ua rai te ka tauturu i tetai atu ma to ratou au manamanata. I taua taime rai, ra, kua manako au e te mate atura au i roto. Te riro ra te au manako manamanata e te apiapi anga manako ei mea kino i roto iaku. Kua akamata au i te manako i te akamamao iaku mei te au tangata. Kua inangaro ua au i te noo i te kainga i roto i toku roi. No te au marama, kua pati akatenga au kia Iehova kia tuku ua iaku kia mate.”​—Vanessa.

MEI te akaraanga i taikuia i runga ake nei, e mea tau i te tapapa atu i tetai au taime e ka kite te au tavini o Iehova i te au kino o te nooanga i teia “au tuatau kikino tei ngata roa no te akono atu.” (2 Timoteo 3:1, NW) Pera katoa ka mamae ngakau etai pae. (Philipi 2:25-27) Me akaroaia, ka keia atu te manako puapinga kore i to tatou maroiroi, no te mea te akakite ra te Pipiria: “Kia potopoto to aʼo i te rā i eke ei ra, kua iti roa toou maroiroi.” (Maseli 24:10) Ae, me manako akamaroiroi koreia tatou, ka anoano tatou i te ririnui​—penei ta te apotetoro Paulo i kapiki “te mana maata meitaki.”​—2 Korinetia 4:7.

Ko te Atua ko Iehova te tumu o te ririnui kotinga koreia. Ka kiteaia teia me akara matatio tatou i tana au apinga i anga. (Roma 1:20) Ka tamanako ana i te ra, ei akaraanga. Ka opu mai te enua i etai 240 tirioni ririnui oroenua tau ua mei te ra. Inara, i teia numero e apa o te tai pirioni ua ia ririnui o te ra. E e meangiti ua te ra me akaaiteia ki te au etu tei kitea e ko te au etu tuputupua. I rotopu i teia ko te Rigel, e etu i roto i te puono Oriona e 50 taime maatamaata atu i to tatou ra e ka tuku mai e 150,000 taime maata atu te ririnui!

I te mea e au tumu ririnui to Tei Anga i te rangi, papu e tei iaia katoa tetai “ririnui.” (Isaia 40:26; Salamo 8:3, 4) E tikai, kua akakite te peroveta ko Isaia no runga ia Iehova “kare aia e paruparu, e kare oki e roiroi.” E te puareinga ua ra te Atua i te oronga i tona ririnui ki tetai ua atu, no te tu paruparu o te tangata, tei manako e te roiroi atura ratou. (Isaia 40:28, 29) E akapeea aia i te rave anga i teia te akatutuia ra i te akaraanga o te apotetoro Kerititiano ko Paulo.

Autuanga ma te Au Timata Anga

Kua akakite a Paulo ki te au Kerititiano no runga i tetai manamanata tei anoanoia aia kia akakoromaki. Kua kapiki aia i te reira ei ‘tara i roto i te kopapa.’ (2 Korinetia 12:7) Teia “tara” nei penei e manamanata pae kopapa, penei e maki mata. (Galatia 4:15; 6:11) Me kore ra penei te tuatua ra a Paulo no runga i te au apotetoro pikikaa e tetai atu aronga tamanamanata tei akaao i tona taoonga apotetoro e te angaanga. (2 Korinetia 11:5, 6, 12-15; Galatia 1:6-9; 5:12) Noatu eaa te tu, kua riro teia “tara i roto i te kopapa” ei akataitaia ia Paulo, e kua pure taokioki aia kia akakoreia atu te reira.​—2 Korinetia 12:8.

Inara, kare a Iehova i rave ana i ta Paulo pati anga. Mari ra, kua akakite aia kia Paulo: “Toku nei aroa ua, oti ra ua ïa taau.” (2 Korinetia 12:9) Eaa te aiteanga o ta Iehova tuatua? Me akamanako tatou i to Paulo tu i mua ana i te takinokino anga i te au Kerititiano, no te tu aroa ua i raukaʼi iaia tetai pirianga ki te Atua​—pera katoa te tavini ei apotetoro!a (Akaaite ia Zekaria 2:8; Apokalupo 16:5, 6.) Penei kua akakite a Iehova kia Paulo e kua “oti ra ua” te akameitaki anga o te riro anga mai ei pipi. Kare te reira e kapiti mai i tetai akaatea anga temeio i te au manamanata uaorai i te oraanga. E tikai, penei ka tupu mai etai au tu ngata no te au akameitaki anga maata atu tei aru mai. (2 Korinetia 11:24-27; 2 Timoteo 3:12) I tetai ua atu tu ka anoano ngoie uaia a Paulo kia akakoromaki i tona ‘tara i roto i te kopapa.’

Inara, kare te aiteanga e te akaruke ra a Iehova ia Paulo ma te ngakau tangi kore. Mari ra, kua karanga aia kiaia: “Ei te apikepike e taka meitaki ravaʼi toku maroiroi.” (2 Korinetia 12:9) Ae, ka oronga aroa ua mai a Iehova i te maroiroi kia Paulo no te autu atu i tona turanga. No reira, kua riro mai to Paulo ‘tara i roto i te kopapa’ ei apii anga puapinga. Kua apii te reira iaia kia irinaki ki rungao i to Iehova maroiroi kare i tona uaorai. Te akaraanga kua tamou meitaki a Paulo i teia apiianga meitaki tikai, no etai au mataiti i muri mai kua tata aia ki te au tangata Philipi: “Kua kite au i te akakoromaki i te au mea ravarai i rokoia mai ei au nei. E tika iaku te au mea ravarai nei i te Mesia, ko tei akamaroiroi mai iaku nei.”​—Philipi 4:11, 13.

Akapeea koe? Te akakoromaki ra ainei koe i tetai ‘tara i roto i te kopapa,’ penei e maki me kore e turanga i te oraanga tei akatupu ra i te apiapi anga kia koe? Me koia ia, e akamaroiroi. Noatu kare a Iehova e akakore i te manamanata na roto i te temeio, ka rauka iaia i te oronga mai i te pakari e te maroiroi kia koe no te autu atu i te reira ia koe e tamou ra i te tuku i te au inangaro Patireia i te ngai mua i te oraanga.​—Mataio 6:33.

Me te riro ra te maki me kore te tangata metua ei tapupu ia koe mei te akatupu anga kia maata atu i te ka rauka ia koe i te rave i roto i te angaanga Kerititiano, auraka e taitaia. I te mea ka akara i toou timata anga ei kotinga i taau tavini anga ia Iehova, e akara i te reira ei tuatau no te akamaata atu i toou irinaki anga ki rungao iaia. Kia akamaara katoa, te vaito anga o te puapinga o tetai Kerititiano kare na runga i te maata o tana angaanga i rave, mari ra na tona akarongo e te oonu o te aroa. (Akaaite ia Mareko 12:41-44.) Te aiteanga o te aroa anga ia Iehova ma toou meta katoa e kia tavini koe iaia i taau i rauka tikai i te rave​—kare mei ta tetai atura i rave.​—Mataio 22:37; Galatia 6:4, 5.

Me te o maira toou ‘tara i roto i te kopapa’ i tetai turanga taitaia i te oraanga, mei te mate o tetai tei akaperepereia, e aru i te ako anga a te Pipiria: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.” (Salamo 55:22) Kua rave tetai vaine Kerititiano i teia ko Sylvia tona ingoa. I roto i tetai tuatau o nga mea mataiti, kua mate tana tane i muri ake i te akaipoipoanga e 50 mataiti pera katoa e iva mema o te pamiri​—kapiti mai nga mokopuna meangiti e rua. “Naringa kare a Iehova,” i na Sylvia ei, “ka aue ua atu au kare e akamutu. Inara kua kite au i te akapumaana anga maata i roto i te pure. Ka tuatua putuputu ua au kia Iehova. Kua kite au e ka oronga mai aia i te maroiroi kiaku kia akakoromaki.”

Mei teaa atura i te akapapuanga meitaki i te kite e ka rauka i “te Atua nona anake te pumaana” i te oronga ki te aronga tei taitaia te ririnui no te akakoromaki! (2 Korinetia 1:3; 1 Tesalonia 4:13) Te arikianga i teia, ka rauka ia tatou i te marama i te tuatua openga a Paulo no runga i teia manako. Kua tata aia: “E teianei e mea rekareka iaku te paruparu, te akakino, te pini, te takinga-kino, e te tumatetenga i te Mesia nei; kia paruparu oki au ra, te maroiroi ra au i reira.”​—2 Korinetia 12:10.

Autuanga ma te Au Tu Ara Ua

Kua iri mai ki runga ia tatou katoatoa te tu ara ua mei to tatou nga metua mua. (Roma 5:12) Tei tupu, tei roto tatou i tetai tamaki anga i te au anoano o te kopapa ara ua. Mei teaa atura i te mamae ngakau i te kite i te au tu o te “tangata taito” e e mou anga ririnui maata atu tana ki rungao ia tatou i ta tatou i manako ra! (Ephesia 4:22-24) I teia au taime penei ka manako tatou mei te apotetoro rai ko Paulo, tei tata: “Te rekareka nei oki au i te ture a te Atua i te akonoanga i te tangata i roto ra; te kite nei ra au i tetai ture i roto i toku kopapa nei, i te māro mai anga i te ture i roto i toku ngakau, e te akariro anga iaku ei tuikaa na te ture kino i roto i toku nei kopapa.”​—Roma 7:22, 23.

Pera katoa i konei, ka rauka ia tatou i te tuku ia tatou uaorai kia tauturuia e te ririnui o Iehova. Me te putoto ra tatou ma tetai apikepike uaorai, auraka e akamutu i te aere anga kiaia ma te pure, te kimi akatenga anga i tona tu akakore anga ara noatu eia ua atu taime taau aere anga kiaia no runga i taua manamanata ra. No tona tu aroa ua, ko Iehova, tei ‘kimi matatio i te ngakau’ e tei kite i te oonu o toou ra tu ngakau tae, ka oronga atu kia koe tetai akava ngakau ma. (Maseli 21:2) Na roto i tona vaerua tapu, ka rauka ia Iehova i te oronga kia koe te maroiroi no te akamata i te tamaki atu i te au apikepike pae kopapa.​—Luka 11:13.

Ka anoano katoa tatou i te maroiroi mei ia Iehova i te autu anga atu i te au tu ara ua o tetai pae. Ei akaraanga, penei ka tuatua tetai taeake Kerititiano kia tatou ma te “vaa karea ua ra, e tau ïa ki te koputaputa koke ra.” (Maseli 12:18) Penei ka mamae oonu tatou, i te mea tikai e no ko mai i tetai tangata tei manako tatou e kua kite e e tu tarevake te reira. Penei ka manamanata pakariia tatou. Kua taangaanga katoa etai pae i teia au tu kino ei tumu no te akarukeanga ia Iehova​—te tarevake maata roa atu!

Inara, ka riro tetai tu parani ei tauturu ia tatou kia akara tau meitaki i te au apikepike o tetai atu. Kare e rauka ia tatou i te tapapa atu i te tu apa kore mei te au tangata apa ua. “Kare atu oki e tangata e kore ei te ara,” te akamaaraia maira tatou e te tangata pakari ko Solomona. (1 Ariki 8:46) Ko Arthur, e Kerititiano akatainuia tei tavini tiratiratu ia Iehova no etai itu ngauru mataiti, kua kite mai e: “Te au tu apikepike o te au taeake tavini ka akatupu i tetai ngai no te tu tika i roto ia tatou, te timataanga i to tatou tu Kerititiano. Me akatika tatou i ta te au tangata ka tuatua me kore ka rave ei tamanata i to tatou tavini anga ia Iehova, te tavini ra i reira tatou i te au tangata. Pera katoa, papu e te inangaro ra rai to tatou au taeake ia Iehova. Me akara tatou i te meitaki i roto ia ratou, kare e roa ka kite mai tatou e kare ratou e kino roa ana.”

Te Ririnui no te Tutu Aere

I mua ake ka aere ei ki te rangi, kua akakite a Iesu ki tana au pipi: “Ka rauka ra to kotou mana i te Vaerua Tapu, kia aere mai aia i rungao ia kotou; e ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.”​—Angaanga 1:8.

Tei tika ki ta Iesu au tuatua, te raveia ra teia angaanga e te Au Kite o Iehova i roto e 233 au enua takapini i te ao katoa. Me kapitiia, te akapou ra ratou e tere atu i te tai pirioni ora i te mataiti te tauturuanga i tetai atu kia kite ia Iehova. Te akatupuanga i teia angaanga kare i te mea ngoie ua rai. I etai au enua te tapupuia ra te angaanga tutu Patireia me kore te araiia ra. Ka akamanako, katoa, e koai te rave ra i te angaanga​—te au tangata apikepike, apa kore, e au manamanata rai to ratou e te au apiapi anga. Inara ka tupu ua atu te angaanga, e tei tupu, e toru mataiti i topa ake nei, e tere atu i te mirioni au tangata tei akatapu i to ratou oraanga kia Iehova e tei akatutu i to ratou akatapu anga na roto i te papetito anga ki te vai. (Mataio 28:18-20) E tikai, te akatupuia ra teia angaanga na roto anake ua i to te Atua maroiroi. Kua karanga a Iehova na roto i te peroveta Zekaria: “Kare i te ririnui, kare rai i te mana, na taku Vaerua ra, te tuatua mairā Iehova Sabaota ra.”​—Zekaria 4:6.

Me e papuritia koe o te tuatua meitaki, te piri ra koe​—noatu mei teaa te meangiti​—ki roto i te reira akatupu anga maata tikai. Noatu te ‘au tara’ taau ka akakoromaki, noou te akapapu anga e kare rava a Iehova e akangaropoina i ‘taau angaanga i rave, e toou anoano, i tona ingoa i akakite puia e koe na.’ (Ebera 6:10) No reira e tamou ua atu i te irinaki ki rungao i te Tumu o te ririnui maroiroi katoatoa ei turu anga. E akamaara, na roto anake ua i to Iehova maroiroi e raukaʼi ia tatou i te akakoromaki; ei to tatou au apikepike e taka ravaʼi tona maroiroi.

[Tataanga Rikiriki i Raro]

[Tutu i te kapi 26]

Te akatupuia ra te angaanga tutu aere na roto anake i to Iehova ririnui