Akakoromakianga Ma “Tetai Tara i Roto i Taku Kopapa Nei”

“Toku nei aroa ua, oti ra ua ïa taau.”​—2 KORINETIA 12:9.

1, 2. (a) Eaa tatou i korei e tau kia ekoko i te tika e te aro atu nei tatou i te au timataanga e te au manamanata? (e) Eaa ka raukai ia tatou kia irinaki i te aro atu anga i te au timataanga?

“TE ARONGA katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.” (2 Timoteo 3:12) Eaa ra i perai? No te mea te maro ra a Satani e te tavini ra te tangata i te Atua no te au tumu noinoi anake ua, e te tauta ra aia kia akapapu i tana tumu. Kua akamatakite maira Iesu i tana au apotetoro tiratiratu: “I pati anā Satani ia kotou, e ruru mei te sitona e ruruia ra.” (Luka 22:31) Kua kite meitaki a Iesu e ka tuku te Atua ra ia Satani kia timata ia tatou na roto i te au manamanata mamae. Inara, kare te aiteanga o te reira e ko te au tu ngata ravarai ta tatou ka aro atu i te oraanga no ko tika mai ia Satani me kare i tana au temoni. (Koheleta 9:11) Inara te inangaro ra a Satani kia taangaanga i tetai ua atu apinga tei roto i tona mana kia aati i to tatou tiratiratu.

² Te akakite maira te Pipiria kia tatou e kare tatou e tau kia poitirere i to tatou au timataanga. Noatu eaa te ka tupu kia tatou, kare ia i te mea ke kare katoa e tika kia kore e manakoia atu. (1 Petero 4:12) Ko te tika, “kua kite oki kotou e, tei to [tatou] au taeake katoa i te ao nei taua au mate ra.” (1 Petero 5:9) I teia tuatau, te tuku nei a Satani i te taomianga maata ki runga i te au tavini ravarai o te Atua ra. Te mareka ra te Tiaporo i te kite mai ia tatou i te tamamae angaia ma te au manamanata e manganui mei te tara rai. Ei akatupu i te reira, te taangaanga ra aia i tana akatereanga o te au mea nei na roto i te tu penei ka kapiti mai me kare ka akatere atu i te ‘au tara i roto i to tatou kopapa.’ (2 Korinetia 12:7) Tera ra, kare e tau te au ravenga a Satani kia aati i to tatou tiratiratu. Mei ta Iehova e ‘akatupu ra i te akapuanga’ no tatou kia akakoromaki i te timataanga, ka rave katoa aia i te reira me ka aro atu tatou i te au taitaia mei te au tara rai te tu i roto i to tatou kopapa.​—1 Korinetia 10:13.

Akapeea i te Akakoromaki Anga ma Tetai Tara

3. Akapeea ta Iehova ra pauanga i ta Paulo pati anga iaia kia takore atu i te tara i roto i tona kopapa?

³ Kua pati atu te apotetoro ko Paulo ki te Atua kia takore atu i te tara mei tona kopapa. “E toru oki aku pati anga atu i te Atu i taua mea ra, kia akataka keia iaku.” Eaa ta Iehova pauanga ki ta Paulo patianga akatenga? “Toku nei aroa ua, oti ra ua ïa taau: ei te apikepike e taka meitaki ravaʼi toku maroiroi.” (2 Korinetia 12:​8, 9) E akara matatio tatou i teianei pauanga e akara e akapeea te reira i te tauturu anga ia tatou kia akakoromaki i etai ua atu au manamanata mei te tara rai te tamamae ra ia tatou.

4. Na roto i teea au tu to Paulo puapinga anga mei te aroa ua o Iehova ra?

⁴ E akamanako ana kua akamaroiroi atu te Atua ia Paulo kia ariki i te aroa ua tei orongaia atura kiaia na roto ia Karaiti. E tika, kua akameitaki maataia a Paulo i roto i te au tu e manganui kia Paulo. Kua oronga aroa atura Iehova kiaia i te tika no te riroanga ei pipi, noatu rai kua patoi neneva ua aia i te au pipi a Iesu. (Angaanga 7:58: 8:3; 9:​1-4) Kua oronga aroa atura Iehova i muri akera i te au angaanga e te au tika mareka anga e manganui. Te apiianga no tatou te taka meitaki ra. Noatu rai i te au taime kino roa, te vaira te au akameitakianga e manganui no tatou kia akameitaki. Kare e tau to tatou au timataanga kia akariro ia tatou kia ngaropoina i to Iehova tu meitaki maata.​—Salamo 31:19.

5, 6. (a) Akapeea ta Iehova apii anga ia Paulo e “ei te apikepike e taka meitaki ravaʼi” te mana tu-Atua? (e) I akapeea to Paulo akatauanga ei akapapu e pikikaa a Satani?

⁵ Te papu ra e te rava ra to Iehova aroa ua i roto i tetai atu tu. E maata atu i te rava to te Atua mana kia tauturu ia tatou i to tatou au timataanga. (Ephesia 3:20) Kua apii a Iehova ia Paulo e ko te mana tu-Atua “ei te apikepike e taka meitaki ravaʼi.” Akapeea ra? Kua oronga aroa ua aia kia Paulo i te maroiroi tana i umuumu kia raukai iaia te akakoromaki i tona timataanga. I tetai tua, na to Paulo akakoromaki anga e tona irinaki ia Iehova i akakite ki te katoatoa e kua autu te mana o te Atua i roto i teia tangata apikepike e te ki i te ara. I teianei e akamanako ana i te tupuanga ki te Tiaporo, tei karanga ra e kua tavini te au tangata i te Atua me pumaana anake to ratou oraanga e kare e au pekapeka. Kua riro to Paulo ra tiratiratu anga ei papa anga i te mata o taua tuatua akakino ra!

⁶ Teia a Paulo, tei taokotai ra ma Satani i tana tamaki anga i te Atua, tetai tei takinga kino ra i te au Kerititiano, e Pharisea totomapu, kare e ekoko anga e kua rekareka i mua ana i te au tu pumaana o te oraanga e manganui no te mea kua anauia mai aia ki roto i tetai pupu turanga teitei. I teianei kua tavini a Paulo ia Iehova raua ko Karaiti e ko tei ‘iti i te au aposetolo ravarai.’ (1 Korinetia 15:9) No te reira, kua kauraro akaaka aia i te mana taoonga o te pupu akaaere Kerititiano i te anere mataiti mua ra. E kua akakoromaki tiratiratu aia noatu rai tona tara i roto i te kopapa. I to Satani pekapeka, kare te au timataanga i te oraanga i akariro i to Paulo totomapu kia topa mai. Kare rava i ngere to Paulo akara anga ki runga i te manakonako anga e ka o atu aia ki roto i te Patireia o Karaiti i te rangi. (2 Timoteo 2:12; 4:18) Kare e tara noatu te mamae, e akameangiti mai i tona tu totomapu. Kia pera katoa oki to tatou tu totomapu, kia maroiroi ua atu! Na te akatinamouanga ia tatou i roto i to tatou au timata anga, te akateitei maira Iehova ia tatou ma te tika i te tauturuanga kia akapapu ia Satani ei pikikaa.​—Maseli 27:11.

E Puapinga Maata ta Iehova Au Mea i Oronga Mai

7, 8. (a) Na roto i teaa ta Iehova ra akamaroiroi anga i tona au tavini i teia tuatau? (e) Eaa te tatauanga Pipiria i te au ra taki tai e te apiianga i puapinga maatai i te akakoromaki anga i tetai tara i roto i to tatou kopapa?

⁷ I teia tuatau, te akamaroiroi maira Iehova i te au Kerititiano tiratiratu na roto i tona vaerua tapu, e tana Tuatua, e to tatou taeake anga Kerititiano oki. Mei te apotetoro ko Paulo rai, ka rauka ia tatou te tuku i ta tatou apainga kia Iehova na roto i te pure. (Salamo 55:22) Noatu rai e penei kare te Atua e takore atu i to tatou au timataanga, ka rauka iaia i te oronga mai i te pakari kia akakoromaki ia ratou, noatu i te au timataanga tei ngata ra kia apaiia. Ka rauka katoa ia Iehova te oronga mai i te maroiroi kia tatou​—ma te orongaanga mai kia tatou i “te mana maata meitaki nei”​—ei tauturu ia tatou kia akakoromaki.​—2 Korinetia 4:7.

⁸ Akapeea e raukai ia tatou taua tauturu ra? Ka tika tatou kia apii maroiroi i te Tuatua a te Atua, no te mea i roto i te reira ka kitea e tatou tana au akapumaana tika. (Salamo 94:19) I roto i te Pipiria, ka tatau tatou i te au tuatua akatukia mai a te au tavini o te Atua ia ratou i pati ei no te tauturu tu-Atua ra. Ta Iehova ra au pauanga, tei putuputu ra te kapiti i te au tuatua akapumaanaanga, e kai no te akamanako anga. Ka akamatutu mai te apii anga ia tatou nei “kia riro te mana maata meitaki nei ki te Atua, auraka ia [tatou].” Mei ia tatou katoa e umuumu nei kia kai i te kai kopapa i te au ra ravarai no te maroiroi anga e te ririnui, no reira kia kai putuputu tatou i te au tuatua a te Atua ra. Te rave ra ainei tatou i teianei? Me te pera ra tatou, ka kite tatou i reira e ko te raukaanga ia tatou “te mana maata meitaki nei” ka tauturu ia tatou kia akakoromaki i etai ua atu au tara akatutuia penei ka rokoia mai tatou i teianei.

9. Akapeea e raukai i te aronga pakari te turu atu i te aronga te akakoromaki ra i te au manamanata?

⁹ Ka rauka i te aronga pakari Kerititiano tei mataku ra i te Atua ‘kia riro mei te punanga i te uriia ra’ no te taitaia, “mei te pipinianga i te matangi maata ra” no te au manamanata. Ko te aronga pakari, tei anoano ra kia tau ki taua akataka anga akauruia ra, ka pati taakaaka ma te ngakau tae kia Iehova kia oronga atu kia ratou “i te arero o te aronga i apiiia” kia raukai ia ratou te kite e akapeea i te pau atu i te aronga e mamae ra ma te au tuatua tika. Ka aite te au tuatua a te aronga pakari ra ki tetai ua maru te ka akaanu mai e ka akapumaana i to tatou vaerua i te tuatau ngata i te oraanga. Na te tuatua “akapumaana atu i te ngakau taitaia,” te turu tika ra te aronga pakari i to ratou au taeake pae vaerua e te au tuaine penei te riro ra kia roiroi me kare kua ati ngakau no etai tara i roto i to ratou kopapa ra.​—Isaia 32:2; 50:4; 1 Tesalonia 5:14.

10, 11. Akapeea e raukai i te au tavini o te Atua kia akamaroiroi atu ia etai ke ra tei raro ake i te au timataanga kino?

¹⁰ Pouroa te au tavini o Iehova e tuanga no tana pamiri Kerititiano taokotaiia ra. Ae, “e melo oki tatou no tatou uaorai e ope rava ake,” e “kia aroa katoa tatou ia tatou uaorai e tikaʼi.” (Roma 12:5; 1 Ioane 4:11) Akapeea tatou i te akatupu anga i teianei apainga? Kia tau ki ta 1 Petero 3:8, ka rave tatou i te reira na “te aroa katoa anga, ei aroa taeake ra, ei ngakau maru,” ki te aronga katoatoa tei piri maira kia tatou i te akarongo. E ko te aronga tei akakoromaki ra ma tetai tara mamae i te kopapa, me e ou ratou me kare kua ruaine, ka rauka ia tatou katoatoa kia oronga kia ratou i te akamanako anga taka ke. Akapeea ra?

¹¹ Ka tau tatou kia tauta kia kite atu i to ratou mamaeanga. Me kare o tatou tangi ngakau, e anu ua, me kare e manako ngakau kore ua, penei ka akariro tatou i to ratou mamaeanga kia kino atu. Te kite anga tatou i to ratou au timataanga ka tau kia akakeu ia tatou kia matakite i ta tatou tuatua, akapeea te tuatua anga i te reira, e akapeea ta tatou akono anga. Na to tatou rave papu anga e te akamaroiroianga ka tauturu kia akamea ngiti mai i etai o te mamae kokoi o te tara e tamamae maira ia ratou. Penei ka riro tatou ei tauturu akamaroiroianga kia ratou.​—Kolosa 4:11.

Akapeea Tetai Papaki i te Akakoromaki Autu Anga

12-14. (a) Eaa ta tetai Kerititiano i rave kia akakoromaki atu i te maki cancer? (e) Akapeea ta te au taeake e te au tuaine pae vaerua turu anga e te akamaroiroi anga iaia?

¹² Ia tatou e akavaitata nei ki te openga o teia tuatau openga nei, te tupu maata maira “teia katoa au mea nei no te mate” i te au ra taki tai. (Mataio 24:8) No reira, te au timataanga ka tupu ki te katoatoa i te enua nei, e maata oki ki te au tavini tiratiratu o Iehova ra, te kimi ra kia rave i tona anoano. Ei akatauanga, e akamanako ana i tetai Kerititiano te tavini ra i roto i te angaanga orometua tamou. Kua kitea mai e maki cancer tona e ka vaiia kia kiriti mai i tona salivary e te au lymphatic gland. I te kite anga raua ko tana tane e kua rokoia aia e teianei maki mate, kua ariu viviki atura raua kia Iehova na roto i tetai pure anga roa. Kua tuatua aia i muri akera e kua tapoki mai tetai tu au ki rungao ia raua kare i rauka kia irinakiia. Inara, kua akakoromaki aia i te au tuatau meitaki e te kino, e maata oki i te akakoromakianga i te au tupuanga o tona rapakau anga.

¹³ Kia akono i tona turanga, kua tauta teia tuaine i te kimi kia maata tona kite no runga i te maki cancer. Kua aravei aia e kua tuatua ki tona au taote. I roto i Te Punanga Tiaki, e te Awake!, e etai atu au puka Kerititiano, kua kitea e ia etai tataanga a te tangata i te akaarianga mai akapeea tetai aronga tataki tai te akakoromaki anga i te pae ngakau ma teianei maki. Kua tatau katoa aia i etai au irava Pipiria tau te akaari maira i to Iehova kite i te akatinamou i tona au tangata i te au tuatau ngata, e etai atu akakite anga tauturu mai.

¹⁴ Ko tetai atikara no runga i te akakoromakianga ma te tu taitaia kua akakite mai i teianei au tuatua pakari: “Ko tei tau kore i tetai ke, kua ketaketa ra i tona uaorai manako.” (Maseli 18:1) No reira kua oronga mai taua atikara ra i teianei apiianga: “E kopae ke i te akatakake anga.”a Kua akakite mai taua tuaine ra: “E manganui tei akakite mai kiaku e te pure ra ratou noku; kua ringi mai etai kiaku. E rua o te aronga pakari tei ringi putuputu mai iaku kia kite e te peea ra au. Kua rauka mai iaku te au tiare e te au kati e manganui. Kua akapapa mai tetai papaki i te au manga. Pera katoa, e manganui tei pati mai e na ratou e apai atu iaku ki toku ngai rapakau anga.”

15-17. (a) Akapeea tetai Kerititiano te akakoromaki anga ma te au tu ngata tei tupu maira no te au tumatetenga? (e) Eaa te turu anga ta te aronga i roto i te putuputuanga i oronga atu?

¹⁵ Tetai vaine kua roa te tavini anga ia Iehova i New Mexico, i Marike, kua rokoia e nga tumatetenga e rua motoka. Kua kino tona kaki e nga pakuivi, e kua akakino atu i tetai turanga maki arthritic tana i akakoromaki ana tere atu i te 25 mataiti. Kua tuatua aia: “E ngata maata noku i te taaki i toku upoko ki runga e te apaianga i tetai apinga e tere atu i te 2 kiro karama. Inara na te pure akatenga kia Iehova i akatinamou maata mai iaku. E pera katoa oki te au atikara i roto i Te Punanga Tiaki ta tatou i apii ana. Kua akataka mai tetai no runga ia Mika 6:8, i te akakiteanga e ko te riroanga kia mako tikai i te aerenga ma te Atua ra ko te kiteanga i toou uaorai au kotinga. Na teianei i tauturu iaku kia ariki e noatu rai toku turanga, kare au e tau kia maroiroi kore, noatu rai te taime taku i akapou i te angaanga orometua e meangiti mai i taku i anoano. Ko te tavinianga iaia ma te au akakeu anga ma ko te mea mua ia.”

¹⁶ Kua ripoti katoa aia: “Kua tuatua akameitaki ua mai te aronga pakari iaku no taku au tauta anga kia aere ki te au uipaanga e te aere oki ki vao i te angaanga tutu aere. Kua aravei mai te aronga ou iaku ma te takave anga mai. E akakoromaki meitaki tikai to te au orometua painia iaku e e putuputu te akapapa akaou anga i ta ratou au parani i toku au ra kino. Me e kino te reva, ka apai aroa ua ratou iaku ki etai oki akaou anga me kare ka pati mai iaku kia noo atu ki roto i ta ratou au apii Pipiria. E i te mea kare e rauka iaku i te apai aere i tetai kiri puka, kua tuku atu tetai au papuritia i taku au puka ki roto i ta ratou kiri me ka aere au ki te angaanga tutu aereanga.”

¹⁷ E akamanako ana i akapeea te aronga pakari o te putuputuanga e te au oa akarongo i te tauturu anga i eia nga tuaine e rua kia akakoromaki i to raua au tu mei te tara rai te tupuanga. Kua oronga ratou i te tauturu tau, e te akapapa anga aroa kia tau i te au umuumu anga pae vaerua, pae kopapa, e te manako ngakau oki. Kare ainei te reira e akamaroiroi ana ia koe kia oronga tauturu kia etai atu taeake e te au tuaine te kite ra i te au manamanata? Ka rauka katoa ia kotou e te aronga ou te tauturu atu i te aronga i roto i to kotou putuputuanga tei akakoromaki ra i te au tara i roto i to ratou kopapa.​—Maseli 20:29.

18. Eaa te akamaroiroi anga ka kitea e tatou i roto i te au tua oraanga tei neneiia i roto i te au makatini Punanga Tiaki e te Awake!?

¹⁸ E manganui te au tua no te oraanga e te au tupuanga i te Au Kite kua neneiia ki roto i te au makatini o Te Punanga Tiaki e te Awake! tei akakoromaki ra e te akakoromaki ua atura, i te au manamanata i te oraanga. Ia koe e tatau putuputu ra i taua au atikara ra, ka kite koe e e manganui toou au taeake e te au tuaine pae vaerua takapini i te ao nei kua akakoromaki i te au tu ngata i te pae puapinga, te ngere anga i te aronga akaperepere i roto i te au tumatetenga, e te au turanga kikino i te tuatau tamaki. Ko etai te noo ra ma te maki mate kare e rauka kia rave angaanga. E manganui kare e rauka kia rave i etai au apinga mama ua nei i te oraanga te manako kore uaia ra e te aronga ora meitaki. Te timata maata ra to ratou au maki ia ratou, e maata oki me kare ratou e o atu ki roto i te au angaanga Kerititiano mei ta ratou e anoano ra. Mei teaa ra ta ratou akameitaki anga i te tauturu e te turuanga ta to ratou au taeake e te au tuaine, i te aronga ou e te ruaine, i rave no ratou!

Apai Maira te Akakoromaki Anga i te Mataora

19. Eaa ra i raukai ia Paulo kia rekareka noatu rai tona au timataanga mei te tara rai e te au tu paruparu oki?

¹⁹ Kua rekareka a Paulo i te kite anga akapeea ta te Atua ra akamaroiroi anga iaia. Kua tuatua aia: “E mea rekareka ïa iaku kia akatietie i toku nei paruparu, kia vai marie te maroiroi o te Mesia i runga iaku nei. E teianei e mea rekareka iaku te paruparu, te akakino, te pini, te takinga-kino, e te tumatetenga i te Mesia nei; kia paruparu oki au ra, te maroiroi ra au i reira.” (2 Korinetia 12:​9, 10) No te au tupuanga kiaia uaorai kua tuatua papu a Paulo: “Kare no te ngere i tuatua atu ei au nei: kua kite au i te akakoromaki i te au mea ravarai i rokoia mai ei au nei. E tika iaku te akaaka, e e tika oki iaku te apinga maata: i te au ngai katoa e te au mea katoa, kua piki ïa au i te merengo e te pongi, te taonga nui e te ngere. E tika iaku te au mea ravarai nei i te Mesia, ko tei akamaroiroi mai iaku nei.”​—Philipi 4:​11-13.

20, 21. (a) Penei eaa ka kiteai e tatou te rekareka anga i te tamanakoanga i te “au mea akara koreia”? (e) Eaa etai “au mea akara koreia” taau e manakonako ra kia kite i roto i te Parataito i te enua nei?

²⁰ No reira, na te akakoromakianga i te au tara akatutu ua i to tatou kopapa nei, ka kitea e tatou te mataora maata i te akaarianga ki te au tangata ravarai e te akameitakiia ra te mana o Iehova i to tatou tu paruparu. Kua tata a Paulo: “I kore ei matou i roiroi; . . . te akaouia nei te tangata i roto, i tera rā i tera rā. To tatou oki mate mea ngiti poto māmā i teianei, te akatupu nei ïa i te kakā maata rava teimaa mutu kore no tatou. Tatou oki e akono nei . . . i te au mea akara koreia ra: ko te au mea . . . akara koreia ra, e tika ïa i te vai ranga.”​—2 Korinetia 4:​16-18.

²¹ Te maataanga o te au tangata o Iehova i teia tuatau te manakonako ra kia noo i roto i tana Parataito i te enua nei e kia rekareka i te au akameitakianga tana i taputou maira. Taua au akameitakianga ra penei ka akamanakoia e “akara koreia” kia tatou i teia tuatau. Inara, te aere viviki mai nei te taime e akarai tatou i taua au akameitakianga ra ma to tatou uaorai nga mata, ae, ka rekarekai ia ratou e mutu kore ua atu. Ko tetai o aua akameitakianga ra ko te mataraanga mai e kare e noo akaou ma tetai ua atu manamanata mei te tara rai te tu! Na te Tamaiti a te Atua ra e ‘akakore i te angaanga a te diabolo ra’ e i “te akangere atu iaia nona te mate ra.”​—1 Ioane 3:8; Ebera 2:14.

22. Eaa te irinaki anga e te tamanako anga tau no tatou?

²² No reira, noatu eaa te tara i roto i to tatou kopapa te tamamae maira ia tatou i teia tuatau, e akakoromaki ua atu tatou i te reira. Mei ia Paulo rai, ka rauka ia tatou te maroiroi kia rave i te reira na roto ia Iehova, tei oronga maoraora maira i te mana kia tatou. A te tuatau e noo ei tatou i Parataito i te enua nei, ka akameitaki tatou i to tatou Atua ia Iehova i te au ra ravarai no tana au angaanga meitaki katoatoa no tatou nei.​—Salamo 103:2.

[Tataanga Rikiriki i Raro]

Akapeea Koe me Pau?

• Eaa e akapeea oki te Tiaporo i te tauta anga kia aati i te tiratiratu o te au Kerititiano mou ra?

• Akapeea to Iehova mana e ‘taka meitaki ravaʼi i te apikepike’?

• Akapeea e raukai i te aronga pakari e etai atura te akamaroiroi atu i te aronga te mamae ra i te au manamanata?

[Tutu i te kapi 18]

E toru taime i pure ei a Paulo e kia takore atu te Atua i te tara i roto i tona kopapa