Te Apii Pamiri Tei Apai Mai i te Rekareka

“E ki oki te au pia ra i te kite ki te au apinga memeitaki katoa i inangaroia ra,” i karangaʼi te Pipiria. (Maseli 24:4) Kare teia au apinga memeitaki inangaroia i te au apinga materia ua mari ra te kapiti maira te aroa mou, te mataku i te Atua, e te akarongo ketaketa. Ka akatupu teia au tu i tetai oraanga pamiri puapinga maata. (Maseli 15:16, 17; 1 Petero 1:7) E raukaʼi ratou, ka anoanoia tatou kia apai i te kite i te Atua ki roto i to tatou au ngutuare tangata.

E APAINGA na te upoko pamiri kia apii i teia kite ki te au mema o te pamiri. (Deuteronomi 6:6, 7; Ephesia 5:25, 26; 6:4) Tetai o te au tu meitaki roa atu o te raveanga i teia koia oki na roto i tetai apii pamiri tamou. Mei teaa atura i te meitaki i teia no te aronga e piri maira me raveia te apii ma te ikuiku e te rekareka! Ka akara ana i reira tatou, i etai au puapinga te raveanga i tetai apii pamiri meitaki.a

Ka meitaki roa atu tetai apii pamiri me rave tamouia te reira. Me akarukeia ki te ka tupu ua me kore ki tetai taime ua, kare te reira e tupu tamou. No reira ka anoanoia koe kia “taporoporo marie i te tuatau” no te apii. (Ephesia 5:15-17) Te iki anga i tetai taime tamou tei tau no te katoatoa ka riro ei akaao anga. “Kua ngata ia matou i te rave tamou i ta matou apii pamiri,” i aaki ei tetai upoko pamiri. “Kua tamata matou i te au taime ke ke e tae ua atu te kitea anga mai tetai taime i te aiai roa tei tano no matou. I teianei te rave tamouia ra ta matou apii pamiri.”

Me rauka tetai tuatau tau, kia matakite kia kore e akatika i te au tamanamanata anga kia kopae i te apii. “Me tae mai te au manuiri ia matou e rave ra i tetai apii,” i maaraʼi ia Maria,b e 33, i teianei, “ka pati a Papa ia ratou kia tiaki kia oti roa ta matou apii. Ko te au kapiki anga terepaoni ra, ka akakite ua aia ki te tangata e ka terepaoni atu aia a muri ake.”

Inara, kare te aite anga e kare e anoanoia kia akatanotano atu. Penei ka tupu mai te au tuatau anoanoia me kore te au tupu anga kitea koreia, e penei ka anoanoia kia tipuia me kore te akarukeia atu te apii i tetai au taime. (Koheleta 9:11) Inara kia matakite kia kore e tuku i tetai ua atu o teia kia tamanata i te akapapaanga tei akanooia.​—Philipi 3:16.

Eaa te roa o tetai apii? Te karanga ra a Robert, tei utuutu manuia mai i tetai tamaine e te tamaiti: “Kua taea okotai ora ta matou au apii. I te meangiti anga te tamariki, kua tauta maua i te tamou i to raua inangaro i taua okotai ora na te uriurianga i tetai au mea tukeke, mei tetai au parakaoa i roto i te atikara apii o Te Punanga Tiaki, te au irava tei raveia mai mei te Pipiria, e tetai au ngai o tetai atu au puka.” Kua maara ia Maria: “I to matou meangiti anga ko toku nga tuakana e rua, e 20 miniti rai ta matou apii e rua me kore e toru taime i te epetoma. Ia matou e maata maira, kua taea ta matou apii epetoma i te tai ora e tere atu.”

Eaa ta Tatou ka Apii?

Ka tupu te riri e te akapou taime apii te manakonakoanga i teia uianga me akaputu mai te katoatoa no tetai apii. Me ko teia te tu, kare a te tamariki apinga tikai no te akara atu ki mua e ka ngaro vave ua te inangaro. No reira e iki i mua ake ana tetai o te au puka Taiate no te uriuri atu.

Kua oronga mai “te tavini akono meitaki e te pakari” i tetai putunga puka kia iki tatou. (Mataio 24:45-47) Penei ka taangaanga koe i tetai puka kare te pamiri i apii ake. E mei teaa atura i te reka i te iki i tetai au ngai o te Insight on the Scriptures me ka rauka teia au voriumu i toou reo! Ei akaraanga, ka rauka ia koe i te uriuri i te atikara no runga i te Kaikai Anga Aiai a te Atu i te au epetoma i mua ake i te Akamaaraanga. E manganui te au pamiri e reka ra i te akateateamamao i te Apii Punanga Tiaki no te epetoma. Inara te riro katoa ra tetai atu au atikara i roto i Te Punanga Tiaki ei apii anga meitaki tikai no te apii. Tei roto te upoko pamiri, tei kite i te au anoano vaerua o te pamiri, i te turanga meitaki tikai no te manako e ko teea te au puka kia apiiia.

“E apii ua ana rai matou i tetai puka tei ikiia i mua ake ana,” i maaraʼi ia Maria. “Inara me tupu mai tetai uianga me kore tetai turanga i te apii, i reira kua aere atu matou ki te papaanga tuatua tei tau.” Ka tupu mai te au manata takake, mei te au manamanata ta te aronga mapu e aro atura i te apii, te akainangaro, te au angaanga i vao ake i te ora apii, e te vai atura. Me tupu mai teia, e aere atu ki te au atikara me kore te au puka tei akakite ra i te manamanata tei tupu mai. Me kite koe i te papaanga tuatua i roto i te itiu ou o Te Punanga Tiaki me kore Awake! taau ka inangaro i te akakite ki te pamiri i te reira taime tikai, auraka e imiimi i te akanoo i te reira. E tikai, ka inangaro koe i te akakite ki te au mema pamiri no te taui anga i mua. Inara kia papu i te oki ki te papaanga tuatua tei akapapaia me oti te anoano i te akonoia.

E Akatupu Tamou i te Reva Maru

Ka tupu meitaki atu te apiianga i raro ake i te au turanga au. (Iakobo 3:18) No reira e tatanu i etai mareva maru e te ngateitei. Te karanga ra tetai upoko pamiri i te Unaite Teite: “Me ka apii matou i roto i te pia akaangaroi anga me kore i runga i te porotito maru ra, ka noo vaitata matou tetai e tetai i te mea e ka totoa aere i roto i tetai pia maatamaata. No matou, ka akatupu teia i te tu maana.” E kua maara ia Maria ma te akaperepere maata: “Kua akatikaia matou ko toku nga tuakana kia iki e ka apii matou kiea i tetai ngai ua o te are i te reira epetoma. Kua reka matou i teia.” Kia akamaara ka riro te mori meitaki, e tetai akanoonoo anga tau, e te ngai reka e te piripiri kore ei akamaata atu ki te tu maru. Na te raukaanga te au apinga katikati no te pamiri i muri ake i te apii ka tauturu katoa i te akariro i te aiai ei mea reka tikai.

Kua iki katoa etai au pamiri i te kapiti mai i tetai atu au pamiri ki ta ratou apii anga i tetai au taime, te kapiti anga i te inangaro pera katoa te au paupau anga tukeke. Me patiia te aronga ou i roto i te tuatua mou kia piri mai ki roto i teia akanoonooanga, ka puapinga ratou mei te akaraanga i tetai upoko pamiri karape i te rave anga i tetai apii pamiri.

E Akariro i te Pipiria ei Mea Oraora

E akariro i te au tuatau apii ei mea oraora no te tamariki, e ka inangaro ua rai ratou i te reira ma te aruaru. Ka rauka ia koe i te rave i teia na te akamaroiroianga i te au tamariki rikiriki kia toroa i te au tutu Pipiria. I te ngai tei tau, e rave i te tamariki kia akatutu i te au tupu anga e te au nuku Pipiria. Ma te au tamariki rikiriki kare e anoanoia kia rave i tetai tu apii titika ma te uianga e te pau anga. Te tatauanga me kore te akakiteanga i te au tua no te au tangata o te Pipiria e tu reka te reira no te apii i te au kaveinga tu Atua. Kua maara ia Robert, tei taikuia i te akamata anga: “I etai au taime ka tatau matou i te au irava Pipiria, te tuku taime anga, te tatauanga i te au tuanga ‘reo’ ke ke.” Ka rauka te tamariki kia patiia kia iki i te tangata ta ratou ka inangaro i te akatutu i roto i te tatauanga.

Na te taangaanga anga i te au mapu e te au tiata ka tauturu i te au tamariki mamaata kia akatutu i te au ngai e te au tu o te enua te ngai i tupu ei te au tupu anga e uriuriia ra. Ma te taka meitaki, me akamanako meangitiia, ka rauka tetai apii pamiri i te akaoraoraia e kia tukeke. Ka akatupu i reira te tamariki i tetai anoano no te Tuatua a te Atua.​—1 Petero 2:2, 3.

E Tauturu i te Katoatoa kia Piri Mai

E rekaʼi te tamariki i te apii, kia piri katoa ratou ki roto. Tera ra, e raukaʼi te tamariki o te au mataiti ke ke kia piri mai, e akaao anga ia. Inara te akakite ra tetai kaveinga Pipiria: “Ko tei akakite ra, kia akakite ïa ma te akono meitaki.” (Roma 12:8) Na te tu oraora ka riro ia ei tauturu, no te mea ka akatupu i tetai atu kia oraora katoa.

E akao mai ana a Ronald i tana tamaine e rima mataiti, ko Dina, ki roto i te tatau anga i te au tumu manako i roto i te apii e te pati anga iaia kia paupau no runga i te au tutu. I te Akamaaraanga o te matenga o Karaiti e vaitata maira i te mataiti i topa, kua akara ua aia ki te au akatutu anga puapinga i roto i te puka Te Tangata Maata Rava Atu Tei Ora Ana.c Kua akakite aia: “Na teia i tauturu iaia kia marama i te puapinga o teia oroa.”

Ki tana tamaine e tai ngauru mataiti, ko Misha, e maata atu ta Ronald i rave. “Kua tere a Misha ki te turanga e raukaʼi iaia i te marama i te au tutu e to ratou aiteanga,” i karangaʼi a Ronald. “No reira me uriuriia te puka Revelation​—Its Grand Climax At Hand!,d kua apii ua matou i te aiteanga o te au tutu e kua tauturu teia iaia.”

I te au tamariki e tupu maira ei aronga mapu ou, e pati ia ratou kia taangaanga meitaki i te apii e raveia ra. Me tupu mai te au uianga i te tuatau o te apii, e tuku i te au tuanga no te kimikimi anga. Kua rave a Robert i te reira i te ui anga mai a Paul, e 12 ona mataiti, i tetai karapu apii tei akatupu ouia tei o mai te au Ngai Poiri e te au Puaka Taae. Kua kimi a Paul e tetai pae i roto i te pamiri i te au akakite anga no roto i te Watchtower Publications Index, e kua uriuri ratou i te reira i ta ratou apii pamiri. “Tei tupu,” i karangaʼi a Robert, “kua marama viviki mai a Paul e e kanga tarevake te reira no te au Kerititiano.”

Kua tuku katoa a Robert i te au kimikimi anga i tetai atu au taime. Kua maara i tana vaine ko Nancy: “I to matou kimikimi anga no runga i te au apotetoro a Iesu, kua tuku takitaiia matou kia kimi okotai apotetoro i te au epetoma ravarai. Mei teaa atura i te rekareka i te kite i te tamariki ma te oraora te oronga i ta ratou ripoti i roto i te apii pamiri!” Te raveanga i ta ratou uaorai kimikimi anga e te oronga i te au akakite anga ki te pamiri ka tauturu i te tamariki kia ‘tupu ki mua ia Iehova.’​—1 Samuela 2:20, 21.

Te uiui uianga​—au uianga manako pera katoa te au uianga arataki​—e tu memeitaki katoa ia no te akao mai i te au tamariki. Kua ui te Puapii Maata, ko Iesu, i te au uianga manako, mei te, “Eaa toou manako?” (Mataio 17:25) “Me e uianga ta tetai ua ia matou, kare toku nga metua e pau tika mai i te reira,” i maaraʼi ia Maria. “Ka ui ua mai rai raua i te au uianga arataki, te tauturu ia matou kia akamanako i te tumu manako.”

E Komunikeiti​—Auraka e Akariri!

Ka akamaataia atu te rekareka o tetai pamiri me ka rauka i te katoatoa i reira i te komunikeiti i to ratou au manako e te au manako ngakau ma te kore e mataku i te akakino angaia. Inara “te komunikeiti meitaki i te tuatau o tetai apii pamiri ka rauka anake ia me te rauka ra te au manako anga komunikeiti i tetai atu au taime,” i karangaʼi tetai metua tane. “Kare e rauka ia koe i te tuku ua i te reira no te tuatau o te apii.” E kopae tikai i te au tuatua manako kore tei koputa, mei te, ‘Tira rai? Manako nei au e e apinga puapinga’; ‘Te neneva e’; ‘Eaa atu oki taau i manako? Kare e kino e tamariki ua koe.’ (Maseli 12:18) E akaari i te tu tangi e te akaaroa ki taau tamariki. (Salamo 103:13; Malaki 3:17) E mareka ia ratou, e turu ia ratou ia ratou e titau ra i te taangaanga i ta ratou e apii ra.

Ka tau te reva o te apii pamiri kia riro ei akaariu mai i te manako o te tamaiti ki te ikuiku anga. “Me akamata koe i te ako i te tamariki,” i akakite ei tetai metua manuia ma te a tamariki, “e aronga akarongorongo kino i reira taau.” I roto i teia tu reva, papu kare te akakite anga tuatua e mou. No reira e kopae i te akariro anga i te au tuatau apii no te ako anga e te papa anga. Me kua anoanoia te reira, e oronga i te reira a muri ake ma te tatakitai.

Ka Pauna te Taime te Tauta Anga

Te patuanga i tetai pamiri puapinga maata i te pae vaerua ka pou te taime te tauta anga. Inara te akakite ra te tata taramo: “I na, te tamariki ra, e tuanga ïa no ko ia Iehova ra; ta te kopu i anau ra, e tutaki ïa.” (Salamo 127:3) E kua orongaia ki te au metua ma te irinakiia te apainga o te ‘apii anga i te tamariki kia pakari ma te ako a te Atu ra.’ (Ephesia 6:4) No reira e akatupu i te au ravenga karape no te rave i tetai apii pamiri tau meitaki e te reka. E rave i taau ka rauka no te oronga i te “u iro koreia ra, i te tuatua,” e “[“ora,” NW]” atu ei ta kotou tamariki.​—1 Petero 2:2; Ioane 17:3.

[Au Tataanga Rikiriki i Raro]