Akapapaanga a te Pamiri—Te Apii a te Pamiri
1 Te apinga aroa maata roa atu te ka rauka ia koe i te oronga atu ei metua Kerititiano ki taau tamariki koia oki ko toou aroa no Iehova. Tetai akanoonooanga puapinga e rauka ai teia i te raveia koia oki me “noo ua koe i roto i to are” no te apii Pipiria a te pamiri i te epetoma. (Deu. 6:5-7) Noatu me e tokorua irinaki toou, te noo ra i roto i tetai ngutuare e tuke te akonoanga, me kore e metua takaua, ka rauka ia koe i te akapiri vaitata i taau tamariki kia koe e kia Iehova na te akono putuputu anga ei pamiri i tetai apii.
2 Akamata Anga: Te takainga mua koia oki kia akanoo i tetai peu no te apiianga ei pamiri. Me kare e papu roa ana ia koe e aea e raveia ai te apii, kore oki e uriuri atu i teia ei pamiri? (Maseli 15:22) Me e tamariki rikiriki aere taau, penei ka inangaro koe kia maata te au apiianga potopoto ua i roto i te epetoma. E akara eaa te mea meitaki atu no toou ngutuare tangata. Akanoo i tetai taime tikai no te apii i runga i taau akapapaanga a te pamiri, e kia papu tikai i te mou piri atu ki te reira.
3 Eaa paa taau ka apii? E akapapa ana tetai i te apii anga te ka akamanakoia i te Apii Puka a te Putuputuanga me kore te Apii Punanga Tiaki te aere maira. E rekareka ana tetai atu i te au puka tei akanoo tikai ia no te aronga mapu. Kua karanga mai tetai metua tane o tetai tamaiti e te tamaine ou: “Ko tetai apinga te akariro ra i ta matou apii ei tumu teitei i te epetoma no te tamariki ra koia oki e akono ana matou i tetai au akatutuanga mei te My Book of Bible Stories. Ko te oonu o te manako anga e te kite anga te ka tupu mai e maata roa atu te puapinga i to te au parakarapa e manganui ta matou ka apii.”
4 Apii i te Epetoma Tataki Tai: Ka inangaroia te apii a te pamiri kia rave putuputuia e kia tapapa mataoraia e te au mema pamiri katoatoa. Penei ka akatikaia tetai tu ngoie ua no te tauianga i te ra e te ora i te akonoanga i te au turanga tapapa koreia. Penei te vai ra tetai au atianga e ka inangaroia kia tauiia te tumu manako. Inara auraka tetai tauianga inangaroia e akatupu roa i tetai tapupu anga mei te akapapaanga akanooia no te apii a te pamiri. I roto i tetai ngutuare tangata, kua karanga mai te tamaine e: “Me kua tauiia te ora o ta matou apii, e tuku ua ana a Tati i te ora ou i runga i te ngutupa o te pia akaanu kia kite pouroa matou e aea te reira e raveia ai.” Mei teaa tikai te akameitakianga taua au tautaanga ra i te akono marie i tetai apii putuputu a te pamiri! Ia koe e utuutu maira i taau tamariki i “te ako anga e te akatikatikaanga manako a Iehova,” te akaari ra koe i toou inangaro no ratou e no toou Metua katoa i te rangi ra.—Ephe. 6:4