Te Au Akameitakianga no te Angaanga Orometua Painia
“Na Iehova te meitaki i apingaʼi te apinga, kare oki e kapiti katoaia mai te kino i te reira.”—MASELI 10:22.
1, 2. (a) Akapeea ta tetai painia akakite anga i tona manako ngakau no te angaanga orometua i te au tuatau ravarai? (e) Eaa ra te au painia i tau ei te turanga kia kite i te rekareka anga ki katoa no akariroanga tangata ei pipi?
“E REKAREKA maata atu ainei tetai i to te kiteanga i tetai taau i apii ana i te riro anga ei tangata akapaapaa ia Iehova? E mea marekaanga ia e te akamaroiroianga akarongo kia kite i te mana ririnui o te Tuatua a te Atua i te akakeuanga i te au tangata kia rave i te au tauianga i to ratou oraanga kia raukaʼi te akamareka ia Iehova.” Ia tetai painia no Kanata mai i tata tei rave ra i te angaanga orometua i te au tuatau ravarai no te tere atu i te 32 mataiti. No tana angaanga orometua painia, kua tuatua aia: “Kare e rauka iaku te tamanako i te raveanga i tetai ua atu apinga. Kare tikai e rauka iaku kia tamanako i tetai ua atu apinga te ka apai mai i taua rekareka anga ra.”
2 Te akatika ra ainei koe e te vaira te rekareka maata i te rave anga tauturuanga i tetai kia aere na runga i te aerenga ki te ora? Inara, kare ko te au painia anake te aronga tei kite ana i taua rekareka anga ra. Pouroa te au tavini o Iehova tei raro ake i te akauenga kia “akariro i to te pa enua katoa ei pipi,” e te tauta ra ratou kia pera. (Mataio 28:19) Inara, i te mea te rauka ra i te au painia i te akapou e manganui te au ora i te angaanga tutu aere, e putuputu ratou i te o atu ki te turanga kia kite i te au rekareka no te akariroanga tangata ei pipi i te tu ki katoa. Inara te vaira etai atu tutaki no te painiaanga. E tuatua ma te au painia, e ka akakite atu ratou kia koe e ko te rave anga ei painia tetai mataara meitaki e kite ei i ‘te meitaki o Iehova e apingaʼi tetai i te apinga ra.’—Maseli 10:22.
3. Eaa penei ka akakeu ia tatou, ia tatou e tavini tamou ra ia Iehova?
3 Kare i roa akenei, kua patiia te au painia no etai tuanga ke ke o teianei ao kia akataka mai i te au akameitakianga ta ratou i kite i te angaanga orometua i te au tuatau ravarai. E akamanako tatou i ta ratou i tuatuaʼi. Inara, auraka e akamaroiroi koreia me te kotingaia ra taau angaanga no te apikepike te ora anga, te ruaineanga, me kare no etai atu au turanga. Kia maara e, ko te apinga puapinga maata ko te tavini ia Iehova ma te ngakau katoa, noatu eaa te angaanga. Noatu ra, na te akarongoanga i te au tuatua a etai au painia penei ka akatupu i toou inangaro kia rave i teia angaanga meitaki te tutaki anga me ka rauka te reira.
Au Manako Oonu no te Merengo Anga e te Rekareka Anga
4, 5. (a) Eaa ra te tuaanga i te tuatua meitaki ma etai ke ra i riro ei ei tetai tupu anga tutaki maata? (e) Akapeea te manako ngakau o te au painia no te raveanga i te angaanga orometua i te tuatau katoa?
4 “E mea meitaki i te oronga atu i te rave mai,” ta Iesu i tuatua. (Angaanga 20:35) Ae, tei te orongaanga noinoi kore tona uaorai tutaki. (Maseli 11:25) E maata oki te tika o teianei me no te orongaanga i te tuatua meitaki ma etai ke ra. E tika oki, eaa te apinga maata atu te ka rauka ia tatou kia oronga atu ki tetai taeake tangata nei mari ra kia tauturu atu iaia kia rauka te kite i te Atua, te ka taki atu ki te ora mutu kore?—Ioane 17:3.
5 Kare i te mea poitirere, e putuputu te aronga te rave ra i te angaanga orometua i te au taime ravarai ka tuatua i te rekareka anga e te tu oonu te merengo anga te rauka ra ia ratou mei ta ratou angaanga orometua. “Kua kite au e kare e rauka i tetai angaanga ke i te apai mai i te merengo anga kiaku nei tei rauka maira no te orongaanga i te tuatua mou ma etai ke ra,” ko ta tetai painia e 64 mataiti no Peritane mai, i tuatua. Kua akakite mai tetai vaine takaua no Taire eaa ta te angaanga painia i akatupu kiaia: “E akapumaana tikai te tavini anga ei painia kiaku nei i muri ake i te taka ke anga taku tane akaperepere. Te maata atu taku aere ki vao i te tavini tauturu atu ia etai ke ra, ko te meangiti mai toku manako ngakau no toku ngere kino. Kua tuku au i toku akarongo ki roto i ta Iehova ra au taputou e ka manako maata oki e akapeea au i te tauturu anga i te aronga taku e apii ra kia rave i te taui anga i to ratou oraanga. I te openga o te au ra taki tai, e reka taku moe, e kua ki toku ngakau i te rekareka.”
6. Eaa te rekareka taka ke kua tupu ki etai au painia ra?
6 Ko tetai papaki tei painia ra no etai raungauru mataiti e manganui kua rauka ia ratou te rekareka anga taka ke i te tavinianga i te au ngai mamao, i te akanooanga i te au putuputuanga, tei tupu maira i te openga ei au ngai kotingaia. Ei akaraanga, i Abashiri, i Hokkaido (koia te motu apatokerau mamao roa o Tiapani), e tuaine tetai tei painia ra no etai 33 mataiti. Te maara ra iaia e i tona akaputuputuanga kotinga mua i aere ei—no te katoa anga o Hokkaido—e 70 ua te katoatoa tei akaputu atu. I teianei? E 12 kotinga i runga i taua motu ra, ma tetai tere atu i te 12,000 au papuritia katoatoa i reira. E tamanako ana e akapeea te ki maringiringi tona ngakau i te rekareka me aere atu aia ki te au akaputuputuanga e te au uruoaanga ma te aronga tini o te au taeake akakitekite aere i te Patireia i taua motu ra!
7, 8. Eaa te rekareka anga tei kitea e te maata anga o te aronga kua roa te painia anga?
7 Ko etai atu painia roa te tavini anga kua rekareka i te kite anga i te aronga apiiia i te Pipiria i te papetito angaia e i muri akera kua itae atu no etai au angaanga maata no te tavini anga. I Tiapani ko tetai tuaine tei tavini ra ei painia ie iva au ngai keke mei te 1957 mairai kua maara iaia te orongaanga i tetai makatini Awake! ma tetai vaine ou tei angaanga ra ki tetai pangika. E iva marama kua papetitoia taua vaine ou ra. I muri akera kua akaipoipo aia, e kua riro raua ko tana tane ei nga painia taka ke. Mei teaa ra te rekareka anga no te tuaine painia ra i muri maira, i te toru o tana ngai i painiaʼi, kua aere mai tetai akaaere kotinga ou e tana vaine ki tona putuputuanga ra—ko taua vaine ia tana i apii ra i te Pipiria i mua ana!
8 Kare i te mea poitirere e ko te aronga tei akariro ra i te angaanga orometua ei painia tetai tavini anga na ratou kua manako i te reira ei “tetai angaanga okomaata kia akaperepereia,” mei ta tetai painia no te 22 mataiti i akakite maira i te reira!
Akakite Anga i ta Iehova Utuutu Anga
9. Ei Tei Oronga Maata maira, eaa ta Iehova i taputou ki tona au tavini, e eaa te aite anga o teia no tatou nei?
9 Ko Iehova, koia te Oronga Maata, te taputou ra kia turu i tona au tavini, ma te akonoanga no ratou i te pae vaerua e te pae kopapa oki. Kua tika ra ta te ariki taito ko Davida i tuatua ra: “I vai ou ana au, e teianei kua ruaine; kare ra au i kite i te tangata tuatua-tika i te akaruke angaia, e tona uanga i te pati aere anga i te kai.” (Salamo 37:25) Tera ra, kare teianei akapapu anga tu-Atua i tetai kotoe anga no tatou kia kore e rave i te apainga kia oronga apinga no to tatou ngutuare tangata, kare katoa oki e oronga mai i te tika no tatou kia manako atu i te tu maoraora o to tatou au taeake Kerititiano ra. (1 Tesalonia 4:11, 12; 1 Timoteo 5:8) Inara, me ka rave mareka ua tatou i te au atinga i to tatou oraanga kia rauka te tavini atu ia Iehova ma te ki katoa, kare ra aia e akaruke mai ia tatou.—Mataio 6:33.
10, 11. I te au tupu anga, eaa ta te au painia e manganui i kite no te ka rauka ia Iehova ra kia oronga mai?
10 Kua kite te au painia i te ao katoa nei mei te au tupu anga ra e te oronga maira Iehova i te apinga na te aronga tei tuku ra ia ratou uaorai ki roto i tona nga rima utuutu maira. E akamanako ana i tei tupu ki nga tokorua painia tei aere atura ki tetai oire rikiriki te ngai e maata ra te tauturu anoanoia no te aronga tutu aere i te Patireia. I muri ake i etai marama toko iti, kua kore e angaanga moni, e kua ngere raua i te moni. I reira kua rauka mai ta raua pira insurance no te motoka e $81. “Kare a maua moni ei tutaki i te reira,” ta te taeake i akataka mai. “Kua pure pakari tikai maua i taua po ra.” I tetai ra mai, kua rauka ia raua tetai kati mei ko mai i tetai pamiri tei tauta maroiroi katoa ra oki i te pae o te moni. Kua rauka mai i taua pamiri ra tetai moni tero tei akaokiia mai, kua akataka katoa taua kati ra, e i te mea e tere atu i ta ratou i manako, kua anoano ratou kia tua atu i tetai tuanga o te reira ma te tokorua painia ra. Tauruia mai ki roto ko tetai cheque e $81! “Kare e ngaropoina iaku taua ra ra—kua tu tu tika mai ki runga te au rauru o toku kaki!” ta te taeake painia i tuatua. “Kua ariki tikai maua i te tu oronga ua o teianei pamiri.” Kua ariki katoa a Iehova i taua tu takinga meitaki ra, tei akatutu maira i te tu oronga ua tana e akamaroiroi ra i tona au tavini.—Maseli 19:17; Ebera 13:16.
11 Ka rauka i te au painia e manganui te akakite i taua au tu tupuanga ra. E ui kia ratou, e ka akakite ratou kia koe e kare i tupu kia ratou te “akaruke angaia.” I te akara anga ki muri e tere atu i te 55 mataiti i te angaanga orometua i te au taime ravarai, kua tuatua tetai painia e 72 ra ona mataiti, “Kare ua a Iehova e akaruke mai iaku.”—Ebera 13:5, 6.
“Tetai Mataara Meitaki kia Piri Vaitata kia Iehova”
12. Eaa ra te angaanga akakitekiteanga i te tuatua meitaki i riro ei ei tetai angaanga meitaki roa?
12 I te mea te pati maira Iehova ia tatou kia akakitekite i te tuatua meitaki no tona Patireia te oronga maira i tetai angaanga na tatou. Te manako maira aia ia tatou—noatu e au tangata apa ua tatou—ei “oa rave angaanga” nona i teianei angaanga akaoraanga. (1 Korinetia 3:9; 1 Timoteo 4:16) Ia tatou e tutu aere atura kia etai ke i te Patireia o te Atua, ia tatou e akakitekite ra i tetai openga ki te rave kino, ia tatou e akataka ra ki te au tangata i tona aroa umere i te oronga mai anga i tetai oko, ia tatou e akatuera ra i tana Tuatua ora e te apii atu i tana au tuatua ki te au tangata ngakau tika, te akapiri vaitataia atura tatou ki Tei Anga ia tatou, ko Iehova.—Salamo 145:11; Ioane 3:16; Ebera 4:12.
13. Eaa ta tetai papaki i tuatua no te tupu anga no ta ratou angaanga orometua painia ki to ratou pirianga ma Iehova ra?
13 Te rauka ra i te au painia i te akapou kia maata te taime i te au marama tataki tai i te tamouanga e te apiianga kia kite ia Iehova. Eaa to ratou manako ta te reira ka akatupu ki to ratou pirianga ma te Atua ra? “Ko te angaanga ei painia tetai mataara meitaki kia piri vaitata kia Iehova,” ta tetai o te aronga pakari i Varani i pau kua painia aia no te tere atu i te tai ngauru mataiti. Ko tetai atu painia i taua enua ra, tei rave ra i te angaanga orometua i te au taime ravarai no te 18 mataiti, kua tuatua e: “Te akatika ra te tavini anga painia ia matou kia ‘tongi kia kite i te meitaki o Iehova,’ mei tetai ra ki tetai ra te patuanga kia maroiroi atu te pirianga ma Tei Anga mai ia tatou ra.” (Salamo 34:8) Ko tetai tuaine i Peritane tei painia ra no etai 30 au mataiti te manako pera katoa ra. “No te irinaki anga ki runga i te vaerua o Iehova no te arataki anga i taku angaanga orometua kua apai mai iaku kia piri vaitata kiaia,” tana i tuatua. “Kua manako tikai au i etai atianga e manganui e na te vaerua o Iehova i arataki atu iaku ki tetai ngutuare i te tuatau tau tikai.”—Akaaite ia Angaanga 16:6-10.
14. Akapeea i puapingaiaʼi te au painia no te taangaanga i te Pipiria e te au puka akatumuia ki runga i te Pipiria ra i te au ra ravarai kia apii atu ia etai ke ra?
14 E manganui te au painia kua kite e na te taangaanga i te Pipiria e te au puka akatumuia ki runga i te Pipiria i tera ra i tera ra kia akataka e kia apii i te au tuatua mou o te Tuatua Tapu te tauturu ra ia ratou kia tupu te kite i te Tuatua a te Atua ra. Kua akataka tetai taeake e 85 mataiti i Paniora tei painia ra no etai 31 mataiti e: “Kua tauturu te tavinianga ei painia iaku kia rauka te kite oonu i te Pipiria, ko te kite ia taku i taangaanga kia tauturu i te au tangata e manganui kia kite ia Iehova e tana au akakoro anga oki.” Kua tuatua tetai tuaine no Peritane mai tei painia ra no etai 23 mataiti e: “Kua tauturu te angaanga orometua iaku i te au taime ravarai kia tatanu i tetai kaki anga no te ngakau mai i te kaikai vaerua.” Na te akatakaanga kia etai ke ra “i te manako i roto ia kotou na” ka akamaroiroi i toou uaorai au irinaki anga no te au mea taau e irinaki akaperepere ra. (1 Petero 3:15) Kua tuatua tetai painia no Autireria mai: “Te akameitaki maira te angaanga painia i toku akarongo iaku e akakite marama ra iaku uaorai kia etai ke.”
15. Eaa ta te aronga e manganui i mareka kia rave kia tomo ei ki te angaanga orometua ei painia e kia vai marie ki roto i te reira, e no teaa ra?
15 Te taka meitaki ra, i teianei aronga orometua painia e te irinaki ra ratou e kua iki ratou i tetai tu tavini anga te apai maira i te au akameitakianga kare e rauka kia tatau mei ko mai ia Iehova ra. No reira rai te aronga e manganui i marekaʼi kia rave akatikatika anga i to ratou oraanga, e kua tuku atinga i tetai angaanga moni e te au apinga nui, kia tomo ki te angaanga orometua painia e kia vai ki roto i te reira!—Maseli 28:20.
Te Inangaro ra Toou Ngakau kia Rave Maata Atu?
16, 17. (a) Me te tamanako ra koe e me ka rauka ia koe te painia, eaa te mea tau naau kia rave? (e) Akapeea te manako ngakau o tetai papaki me ka kore e rauka kia painia?
16 I muri ake i te akamanakoanga i ta te au painia i tuatua no te au akameitakianga o te angaanga orometua ei painia, penei te tamanako ra koe me te tau ra koe ei painia. Me koia ia, eaa koe ka kore ei e tuatua atu ki tetai painia tei puapingaia ra i te angaanga orometua i te au tuatau ravarai? Penei oki ka kite katoa koe ei tauturu kia tuatua atu ki tetai o te aronga pakari i te putuputuanga ra, tetai tei kite ra ia koe—i toou tu oraanga kopapa, toou au kotinga, e taau au apainga i te ngutuare tangata. (Maseli 15:22) Te au tuatua tikai a etai ke ra penei ka tauturu ia koe kia akataka marie me ka rauka ia koe te painia. (Akaaite ia Luka 14:28.) Me ka rauka ia koe kia painia, ka maata tikai toou au akameitakianga.—Malaki 3:10.
17 Inara, ka peea oki te aronga papuritia Patireia tiratiratu e manganui kare ra to ratou i te turanga tau kia painia, noatu rai e inangaro to ratou kia rave kia tere atu i te angaanga orometua? Ei akatauanga, e akamanako ana i te au manako ngakau o tetai tuaine Kerititiano tei tauta pakari ra kia akono koia anake e tana nga tamariki e a. “Te kino nei toku manako,” tana i tuatua, “no te mea i painia tamou ana au, inara i teianei, no toku au turanga, kare e rauka iaku kia maata te rave tutu aere mei taku i rave ana i mua ana.” E akaperepere to teianei tuaine i tana nga tamariki e te anoano ra kia oronga i tei tau no ratou. I taua tuatau rai, te inangaro ra aia kia tere atu tana rave anga i te angaanga tutu aere. “E inangaro toku i te angaanga orometua,” tana i akataka mai. E aiteite te au manako o etai atu aronga akamori Kerititiano tei akakeuia ra ratou e te inangaro no te Atua kia anoano i te tavini ia Iehova ‘ma to ratou ngakau katoa ra.’—Salamo 86:12.
18. (a) Eaa ta Iehova e manako maira ia tatou kia rave? (e) Eaa tatou ka kore ei e tau kia mareka kore me ka kotingaia e te au turanga ta tatou ka rauka kia rave?
18 Kia maara e ko ta Iehova e anoano maira ia tatou ko te tavini iaia ma te ngakau katoa. Penei ko te maata o te reira ka tuke tuke mai tetai meta ki tetai meta. Ko tetai papaki ka rauka kia akatikatika i ta ratou au ravenga kia raukaʼi te tavini anga ei au painia tamou. E manganui etai ke kua rave ei au painia tauturu i etai atianga me kare na runga i te tumuanga tamou, i te raveanga e 60 ora i te marama takitai i te angaanga orometua. Inara, ko te maata anga o te au tangata o Iehova, ka rave ratou uaorai i te angaanga tutuanga e te apiianga ma te ngakau katoa ei au papuritia putuputuanga. E no reira me te kotinga tikaia ra koe no te apikepike te ora anga, no te ruaineanga, te au apainga ngutuare tangata, me kare no etai atu turanga, auraka e maroiroi koreia. Me ka oronga koe i taau meitaki, e mea akaperepere i nga mata o te Atua ra taau tavini anga, mei ta te aronga te rave angaanga orometua ra i te au tuatau ravarai!
Ka Rauka i te Katoatoa te Akakite i te Vaerua Painia
19. Eaa te vaerua painia?
19 Noatu rai kare e rauka ia koe kia akapapa ei tetai painia, ka rauka ia koe kia akakite i te vaerua painia. Eaa te vaerua painia? I te itiu o Tiurai 1988 o Our Kingdom Ministry te tuatua ra: “Penei ka akatakaia te reira ei tetai tu manako papu ki te akauenga kia tutu aere e kia akariro au tangata ei pipi, na te akapapa anga ki katoa kia akaari i te aroa e te manako anga no te au tangata, te tuku atinga ia koe uaorai, te rekareka anga i te aruanga kia piri vaitata ki te Pu, e te marekaanga i te au apinga vaerua, e kare i te au apinga kopapa ra.” Akapeea koe me akaari i te vaerua painia ra?
20. Akapeea te akakite anga a te au metua i te vaerua painia?
20 Me ko koe tetai e metua ma te au tamariki ou, ka rauka ia koe te akakite atu kia ratou ma to ngakau katoa i te meitaki o te tavini ei au painia. Na toou tu manako papu i te angaanga orometua penei ka akapapu ki roto ia ratou i te umuumu anga kia akariro i te tavini anga ia Iehova ei apinga puapinga maata i to ratou ora anga. Penei e pati atu koe i etai painia e te au akaaere tutaka e ta ratou au vaine ki to kainga kia puapingaiaʼi taau tamariki i ta ratou au akatauanga o te aronga kua kite i te rekareka anga i te angaanga orometua i te au tuatau katoa. (Akaaite ia Ebera 13:7.) Noatu rai i te au ngutuare te tataka ke ra te akonoanga, ka rauka i te au metua akarongo, na te tuatua e na te akatauanga, kia tauturu i ta ratou tamariki kia akariro i te angaanga orometua i te au tuatau ravarai ei akakoro anga i te oraanga ra.—2 Timoteo 1:5; 3:15.
21. (a) Akapeea e raukaʼi ia tatou katoatoa te turu atu i te aronga te painia ra? (e) Eaa te ka rauka i te aronga pakari kia rave ei akamaroiroi i te au painia ra?
21 I roto i te putuputuanga ka rauka ia tatou katoatoa kia oronga i te turu anga ma te ngakau katoa ki te aronga te ka rauka kia painia. Ei akatauanga, ka rauka ainei ia koe kia tauta i te angaanga kapiti ma tetai painia i te angaanga orometua, kia maata oki i te au tuatau penei te angaanga ra te painia koia anake ua? Penei ka kite koe i “te akamaroiroi anga tetai i tetai.” (Roma 1:11, 12, akaaite NW) Me ko koe tetai o te aronga pakari, ka rauka ia koe kia rave kia maata atu te akamaroiroi anga i te au painia. Me uipa te pupu o te aronga pakari, ka tau ratou kia akamanako putuputu i te au mea umuumuia no te au painia. Me te rokoia ra tetai painia e te tu maroiroi kore me kare te kite ra i etai au tu ngata, auraka e viviki rava i te tuatua atu kia akamutu aia i te painia anga. Noatu me te tau ra taua akakite anga ra i etai au tu, auraka e ngaropoina e e angaanga apinga nui te painia ta te tavini i te au tuatau ravarai e akaperepere oonu ra. Penei ko tetai manga akamaroiroi anga e etai akoanga tau me kare tauturu anga ko te reira ua te umuumuia ra. Kua tata te opati manga o te Taiate i Paniora: “Me akamaroiroi te aronga pakari i te painiaanga, ka turu oki i te au painia i te angaanga tutu aere, e ka rave i te tiaki anga putuputu ia ratou, ka tere atu te rekareka anga o te au painia, ka manako e puapinga ratou, e ka anoano kia rave tamou ua atu noatu te au arairai anga te ka tu mai.”
22. I teianei tuatau kino o te tuatua enua tangata nei, eaa ta tatou ka tau kia akapapu i te rave?
22 Te noo nei tatou i tetai tuatau kino no te tuatua enua o te tangata nei. Kua oronga mai a Iehova kia tatou i tetai angaanga akaoraanga tangata kia rave kia oti. (Roma 10:13, 14) Noatu me ka rave tatou i teianei angaanga i te au tuatau ravarai ei painia e me kare, e akaari tatou i te vaerua painia. Kia rave tatou i tetai tu rapurapu e tetai vaerua tuku atinga ia tatou uaorai. Kia manako papu tatou kia oronga kia Iehova i tana ka pati mai ia tatou—koia te tavini anga ma te ngakau katoa. E kia maara tatou e me ka oronga tatou i te katoa anga te ka rauka ia tatou, me te akatutu maira i nga moni iti a te vaine takaua ra e me ko ta Maria manongi apinga nui, ta tatou tavini anga ma te ngakau katoa, e te akaperepere ra Iehova i ta tatou tavini anga ma te ngakau katoa ra!
Maara Ainei ia Koe?
◻ Eaa ra te angaanga orometua i te au tuatau ravarai ka apai mai ei i te au manako merengo anga e te rekareka?
◻ Mei te tupu anga mai, eaa ta te au painia e manganui i kite no te rauka anga ia Iehova i te utuutu anga no tona au tavini?
◻ Eaa ta te au painia e manako ngakau ra e e au tupu anga no to ratou pirianga ma Iehova ra?
◻ Akapeea koe me akakite i te vaerua painia ra?
[Tutu i te kapi 23]
E rekareka anga maata to te au painia no te akariro anga au tangata ei pipi
[Tutu i te kapi 23]
Ka puapingaia taau tamariki i te kapiti anga ma te aronga akakitekite Patireia i te au tuatau ravarai
[Tutu i te kapi 23]
Ka rauka i te aronga pakari i te akamaroiroi atu i te au painia i te angaanga tutu ra