“Te Tau Ra Ainei Toou Ra Ngakau ki Toku?”
“E aere mai ana kia kite koe i toku nei maroiroi ia Iehova.”—2 ARIKI 10:16.
1, 2. (a) I akapeea te turanga akonoanga o Iseraela i aere ei mei te tu kino ki te kino rava atu? (e) I te 905 M.T.N., eaa te au taui anga maata tei vaitata ra i te tupu ki to Iseraela?
TE MATAITI 905 M.T.N. ko tetai tuatau no te taui anga maata i Iseraela. E vaitata i te 100 mataiti i mua akera, kua akariro a Iehova i te patireia taokotaiia o Iseraela ra kia akatakakeia no ta Solomona ra akonoanga apoteiti. (1 Ariki 11:9-13) I reira kua riro te patireia apatonga, o Iuda, na Rehoboama tamaiti a Solomona e tutara e ko te patireia apatokerau, to Iseraela, kua riro ki raro ake i te Ariki ko Ieroboama, e ngati Epheraima. E mea reka kore ra, e akamata anga kino to te patireia apatokerau ra. Kare a Ieroboama i anoano kia aere atu tona au tangata ki raro ki te patireia apatonga ra kia akamori i te iero ra, i te matakuanga e ka manako ratou kia oki akaou atu ki te are o Davida. No reira kua akanoo aia i te akamori anga punua puakatoro i Iseraela e no reira kua akanoo i tetai akaraanga akamori itoro tei vaira i tetai tu i te tuatua enua katoa o te patireia apatokerau ra.—1 Ariki 12:26-33.
2 Kua kino rava atu te au apinga i te riro anga ko Ahaba, tamaiti a Omeri, ei ariki. Ko tana vaine tangata ke ra, ko Iezebela, kua akatupu i te akamori anga ia Baala e kua tamate i te au peroveta a Iehova ra. Noatu rai te au akamatakiteanga tau a te peroveta ko Elia, kare a Ahaba i rave apinga kia arai iaia. Inara, i te 905 M.T.N., kua mate atu a Ahaba, e kua tutara tana tamaiti, ko Iehorama. Kua tae i teianei ki te tuatau kia tamaia te enua. Kua akakite atu a Elisaia, koia te mono o Elia ra, ki te rangatira vaeau, ko Iehu, e ka akatainu a Iehova iaia ei ariki no Iseraela i muri akera. Tana angaanga? Kia ta i te ngutuare rave ara o Ahaba ra e kia tutaki atu i te toto o te au peroveta ta Iezebela i akamaringi ra!—2 Ariki 9:1-10.
3, 4. Akapeea ta Iehonadaba akaari anga e ko tona ngakau ‘te tau ra ki to Iehu ngakau’?
3 Kua akarongo i ta te Atua akauenga ra, kua tamate a Iehu ia Iezebela rave kino ra, e i muri akera kua rave aia i te tama anga ia Iseraela na te taanga i to te ngutuare o Ahaba ra. (2 Ariki 9:15–10:14, 17) I reira kua aravei atu aia i tetai turu nona. “Kua kitea e iā Iehonadaba te tamaiti a Rekabi, ko tei aere mai e aravei iaia: kua aroa atura aia iaia, e kua karanga atura kiaia, Te tau ra ainei toou ra ngakau ki toku, mei toku nei ngakau e tau ki toou ra ngakau? Kua tuatua mairā Iehonadaba, Koia ïa. Koia tikai ra, o mai ana i to rima. Kua oronga maira oki aia i tona rima; e kua tuku maira aia iaia ki runga i te kariota. Kua tuatua maira aia, E aere mai ana kia kite koe i toku nei maroiroi ia Iehova. Kua akanoo iora ratou iaia ki runga i te kariota.”—2 Ariki 10:15, 16.
4 Ko Iehonadaba (me kare, Ionadaba) kare ia i tetai ngati Iseraela. Inara, kia rotai ma tona ingoa (te aiteanga “Te Anoano Ra Iehova,” “E Ngateitei A Iehova,” me kare “E Maoraora A Iehova”) e tangata akamori aia ia Iehova. (Ieremia 35:6) E tika ra, e manako tuke tona i te inangaro kia kite i to Iehu ra “maroiroi ia Iehova.” Akapeea tatou i kite ei? No te mea, kare i rokoia ua tona araveianga ma to Iseraela ra ariki akatainuia. Ko Iehonadaba “tei aere mai e aravei iaia,” e ko teia i tetai tuatau kua oti ke ra ia Iehu i te ta ia Iezebela e etai atu oki no te ngutuare o Ahaba. Kua kite a Iehonadaba e eaa te tupu ra i tana ariki anga i ta Iehu ra patianga kia kake atu aia ki roto i tona kariota. Kare e ekoko anga e tei runga aia i to Iehu—e to Iehova ra—pae i teianei maro anga i rotopu i te akamori anga pikikaa e te akamori mou ra.
Te Iehu no Teia Tuatau e te Iehonadaba no Teia Tuatau
5. (a) Eaa te au taui anga te ka tupu no te au tangata katoatoa kare e roaia? (e) Koai te Iehu Maata atu, e koai ma te komono ra iaia i runga i te enua nei?
5 I teia tuatau, kare e roaia ka taui maataia te au apinga no te au tangata katoatoa mei tei tupu ra no to Iseraela i te 905 M.T.N. ra. Te vaitata nei te tuatau i teianei e tama ei a Iehova i te enua i te au tupu anga kikino katoatoa no te mana o Satani, kapiti katoa te akonoanga pikikaa. Koai te Iehu o teia tuatau nei? Kare i tetai ke mari ra ko Iesu Karaiti, tei tuatuaia atura te au tuatua totou: “E tatua ana to koke ki to ūā, e tei ririnui ra, toou ra kakā e toou ra mana; E ma toou ra mana, ka akaoro ei ma te manuia, ei akatupu i te tuatua-mou, e te maru, e te tuatua-tika.” (Salamo 45:3, 4) Te monoia ra a Iesu i te enua nei na “te Iseraela o te Atua ra,” te au Kerititiano akatainuia “tei akono i te au akauenga a te Atua ra, i tei mou marie i te tuatua-akakite a Iesu Mesia ra.” (Galatia 6:16; Apokalupo 12:17) Mei te 1922 maira kua akamatakite mataku kore teia au taeake o Iesu i ta Iehova ra au angaanga akavaanga te aere maira.—Isaia 61:1, 2; Apokalupo 8:7–9:21; 16:2-21.
6. Koai tei aere mai mei te au pa enua kia turu i te au Kerititiano akatainuia ra, e akapeea ratou i te tomo anga i te kariota, akatutuia ra, no te Iehu Maata atu?
6 Kare te au Kerititiano akatainuia i vai ko ratou anake ua. Mei ia Iehonadaba i aere maira kia aravei ia Iehu, e manganui no te au pa enua kua aere mai kia turu ia Iesu, koia te Iehu Maata atura, e tona au komono i te enua nei i to ratou tu anga no te akamori mou. (Zekaria 8:23) Kua tapaia e Iesu ei “mamoe ke atu” nana, i te 1932 kua matauia ratou i teia tuatau ko tei aite atu kia Iehonadaba i taito ra e kua patiia kia ‘tomo atu ki roto i te kariota’ o Iehu o teia tuatau nei. (Ioane 10:16) Akapeea? Na te ‘akonoanga i te au akauenga a te Atua’ e te rave kapitianga ma tei akatainuia ra i “te tuatua-akakite a Iesu Mesia ra.” I teia tuatau nei, te kapiti maira teia i te tutuanga i te tuatua meitaki o te Patireia o te Atua ra tei akanooia i raro ake ia Iesu ei Ariki. (Mareko 13:10) I te 1935 kua akatakaia teianei aronga “Ionadaba” ei te “aronga maata rava” o Apokalupo 7:9-17.
7. Akapeea ta te au Kerititiano akaari anga i teia tuatau e te ‘tau ra to ratou ngakau’ ma to Iesu ngakau ra?
7 Mei te au mataiti 1930 maira, kua akapapu mataku kore te aronga maata rava e to ratou au taeake akatainuia ra i ta ratou turu anga i te akamori mou. I etai enua i te Itinga e te Opunga o Europa, te Far East, e Aperika oki, e manganui to ratou kua mate no to ratou akarongo. (Luka 9:23, 24) I etai atu enua, kua tapekaia ratou, kua pokia, me kare kua takinga kinoia. (2 Timoteo 3:12) Mei teaa ra tetai akakite anga akarongo ta ratou i rave! E i te Ripoti Tavini Anga Mataiti 1997 te akakite maira e te vaira to ratou manako papu kia tavini i te Atua ra, noatu eaa te ka tupu. ‘Te tau ra to ratou ngakau’ ma to Iesu ngakau katoa ra. Kua akakiteia mai teia i te 1997, i te rave anga e 5,599,931 au papuritia Patireia, e vaitata te katoatoa o ratou no te aronga “Ionadaba,” kua rave i te katoatoa anga o te 1,179,735,841 au ora i te angaanga tutu aere akakite anga ia Iesu ra.
Te Vaira te Tutuanga ma te Maroiroi
8. Akapeea te Au Kite o Iehova i te akaari anga i to ratou maroiroi no te akamori mou?
8 Kua matauia a Iehu no te akaoroanga viviki i tona kariota—ei tetai akakite anga i tona maroiroi kia akaoti i tana angaanga. (2 Ariki 9:20) Kua akatakaia a Iesu, koia te Iehu Maata ra e ‘kua riro roa’ i te maroiroi. (Salamo 69:9) Kare i te mea poitirere, i reira, ko te au Kerititiano mou i teia tuatau nei, te kitea ra to ratou maroiroi. I roto i te putuputuanga e ki te ngai tangata, tera te ‘akakite ua ra ratou i te tuatua i te atianga tau, e te atianga tau kore.’ (2 Timoteo 4:2) Kua akakite maataia to ratou maroiroi i te tuatau o te tuanga mua o te 1997 i muri ake i tetai atikara i roto i Our Kingdom Ministry tei akamaroiroi maira i te manganui te ka rauka kia rave i te tavini ei painia tauturu. I roto i te au enua tataki tai kua akanooia tetai numero no te au painia tauturu. Eaa ra te tupu anga? E maata tikai! E manganui te au manga tei tere atu i te numero i akakoroia. Kua akanoo a Ecuador i te akakoro anga no te 4,000 inara e 6,936 au painia tauturu i ripotiia ia Mati. E 104,215 te katoa anga tei ripotiia i aua nga marama e toru ra i Tiapani. I Zambia, e 6,000 te numero akakoroia, e 6,414 painia tauturu i ripoti ia Mati; e 6,532 ia Aperira; e 7,695 ia Me. Takapini i teianei ao, te take o te au painia tauturu e te tamou kapipiti e 1,110,251, e 34.2 patene te tupuanga mei te 1996!—Roma 10:10.
9. Kapiti atu ki te angaanga i tera are ki tera are, na roto i teea au tu ke atu e kiteaʼi e te Au Kite o Iehova te au tangata kia tuatua atu kia ratou i te tuatua meitaki ra?
9 Kua tuatua atu te apotetoro ko Paulo ki te aronga pakari no Ephesia: “E kare rava akenei e mea e meitaki ei kotou na i vaioia e au, kare akenei au i tivata i te ako atu ia kotou e te apii ia kotou i te ngai tangata, e i tera are i tera are.” (Angaanga 20:20) Te aru ra te Au Kite o Iehova i te akatauanga a Paulo i teia tuatau e te tutu maroiroi ra i te tuatua meitaki mei tera are ki tera are. Inara, penei kare i te mea ngoie kia kitea te au tangata i to ratou au ngutuare. No reira, kua akamaroiroi “te tavini akono meitaki e te pakari” kia aravei atu te au papuritia Patireia i te au tangata i ta ratou au ngai pitiniti, i te au arataa, i te tapa taatai, i te au paka papuriki—i etai ngai ua atu e kiteaʼi te au tangata ra. (Mataio 24:45-47) E meitaki tikai te au tupu anga.
10, 11. Akapeea te au papuritia i nga enua e rua ra i te akaari anga i te tamata anga meitaki i te kimianga i te aronga manako inangaro kare ra i araveiia i to ratou kainga?
10 I Copenhagen, i Denmark, e pupu papuritia meangiti ua tei tutu aere i te au arataa i vao ake i te au ngai rerue. Mei ia Tianuare kia Tiunu, kua oronga ratou e 4,733 au makatini, e meitaki oki te au tuatua anga, e manganui te au oki akaouanga i raveia. E manganui te au papuritia i taua enua ra kua akanoo i te ngai tuaanga makatini i te au toa aere. I tetai oire e makete maata tetai i te au Varaire ravarai, ma te au tauatini ua atu te aronga aere atu ki reira. No reira kua akapapa te putuputuanga i tetai tutuanga putuputu i te makete ra. I tetai ngai te tutakaia ra te au apii ma tetai pute puka akakitekite anga te tau tika ra no te au puapii.
11 I Vaii oki kua raveia te au tauta anga kia itae atu i te aronga kare ra e kitea i to ratou kainga. Etai ngai meitaki te kapiti ra i te au ngai tangata (au arataa, au paka, au ngai vaio anga motoka, e te ngai tapu anga pati), te ngai i te au toa i te oire, e te ngai to anga pairere, te tuatuaanga terepaoni, te tutuanga i runga i te au pati, e te au puakapa kaoreti. Ka tau kia akapapu e tau ua te numero o te Au Kite e akapapaia ki te ngai okotai ra e kia tereni meitakiia taua aronga. Te ripotiia maira te au tauta anga tei papa meitaki ra i te au enua e manganui. E tetai tupu anga, te araveiia ra te au tangata inangaro penei kare e kiteaia na roto i te tutu anga i tera are i tera are.
Tu Ngaueue Koreanga
12, 13. (a) Eaa te ravenga ta Satani i taangaanga ei patoi i te Au Kite o Iehova i te 1997 ra? (e) Na roto i teea tu te oki muri anga mai te pupui anga no te akakiteanga pikikaa i tetai enua ra?
12 I etai au enua i te 1997, kua riro te Au Kite o Iehova kia akakinoia, te au tuatua pikikaaia tei akatupuia ma te akakoro anga kia apaiia atu ratou ki te ture. Inara kare ratou i unui ki muri! (Salamo 112:7, 8) Kua maara ratou i te pure a te tata taramo ra: “Kua akatupu te aronga nengonengo i te tuatua pikikaa iaku: te akono nei ra au ma te ngakau katoa i taau ra au ikuiku anga.” (Salamo 119:69) Ko taua akakiteanga pikikaa ra e akapapu ua anga i te tika e e makitakitaia mai te au Kerititiano mou mei ta Iesu i totou maira. (Mataio 24:9) I etai tuatau kua oki muri mai te pupui anga. Kua tatau tetai tangata i Belgium i tetai atikara tuatua akakinoanga i te Au Kite o Iehova ra i roto i tetai nutipepa matau meitakiia. I te poitirere anga i te au tuatua akakino anga, kua aere atu aia ki tetai uipaanga i tetai Are Uipaanga Patireia i te Tapati i muri maira. Kua akapapa aia kia apii i te Pipiria ma te Au Kite ra e kua rave ua atu i te tereanga viviki ki mua. I mua akera, e mema teia tangata no tetai pupu. Na tana apii Pipiria i tauturu iaia kia tama i tona oraanga, e apinga te reira tei kiteaia e te au tangata takapini iaia ra. E mea tika ra, kare tei tata te atikara akakino ra i manako i taua tupu anga ra!
13 Kua tuatua atea mai tetai papaki o te au tangata ngakau tiratiratu i Belgium ra i te patoi anga i te au tuatua akakino pikikaa ra. I roto ia ratou ko tetai paraimi minita i mua ana tei akatika ra i tona ki i te akapaapaa anga no ta te Au Kite o Iehova ra i rave. E kua tata atu tetai tauturu: “Kia tuke ki te au tuatua akakino anga tei akatotoaia ra i etai atianga, kare te akara anga o te [Au Kite o Iehova] kiaku nei i te akatutu i tetai tu kino meangiti ua ki te au akaaerenga o te Au-Enua. E au tangata enua ratou tei inangaro ra i te au, te akono tau ra, e te akangateitei ra i te aronga mana taoonga.” E pakari tikai te au tuatua a te apotetoro ko Petero ra: “Kia meitaki ta kotou tuatua i rotopu i te au etene: ta ratou oki i akakino mai ia kotou, mei te mea e aronga rave tuatua kino, kia akara ra ratou i ta kotou tuatua meitaki, kia akameitaki ratou i te Atua i te rā e rokoia mai ei ra.”—1 Petero 2:12
Tetai Oroa Akamaaraanga Meitaki Rava
14. Eaa etai au ripoti akamareka anga no te au akaputuanga Akamaaraanga i te 1997?
14 E mea tau ra e ko te aronga te tuatua akakite ra ia Iesu ka manako i te Akamaaraanga i tona matenga ei tetai tumu maata i to ratou mataiti. I te 1997, e 14,322,226 tei akaputu atu ia Mati 23 kia akono i taua oroa ra. Kua tere atu te reira e 1,400,000 tei maata atu i te 1996. (Luka 22:14-20) I te au enua e manganui e tere roatu te aronga tei akaputu atu ki te Akamaaraanga i te numero o te au papuritia Patireia, tei akaari maira i te manakonako anga meitaki no te tupu anga i te tuatau ki mua. Ei akaraanga, i Haiti, kua kitea tetai take no te 10,621 au papuritia i te 1997, e 67,259 tei akaputu atu ki te oroa anga. Ka rauka ia koe te akara i te ripoti mataiti i nga kapi 18 ki te 21 kia kite eaa te manganui o etai au enua ke atu tei aiteite te maata atu te aronga akaputu atu me akaaiteia atu ma te numero o te au papuritia.
15. I etai enua, i akapeea ta to tatou au taeake akakore anga i te au manamanata kikino kia raukaʼi te akono i te Akamaaraanga ra?
15 No tetai papaki, kare te akaputuanga ki te Akamaaraanga ra i ngoie ua. I Albania kua akapapaia e arai anga i te 7:00 p.m. no te maata te taitaia tau kore. I te 115 au pupu rikiriki takapini i taua enua ra, kua akamata te Akamaaraanga i te 5:45 p.m. Kua opu te ra i te 6:08 p.m., i te akairoanga i te akamataanga o Nisana 14. Kua tua aereia te oroa i vaitata i te 6:15 p.m. I te maata anga o te turanga kua raveia te pure openga i te 6:30 p.m., e ko te aronga tei akaputu atu kua taviviki te okianga ki te kainga i mua ake i te arai anga. Inara, ko te aronga tei akaputu atu ki te Akamaaraanga e 3,154, me akaaiteia atu ma te take o te au papuritia e 1,090. I tetai enua i Aperika, no te maata te taitaia tau kore kua riro kia kore e itae atu ki te Are Uipaanga Patireia, no reira kua iki nga tangata pakari e rua kia uipaa ratou ki te ngutuare o te toru o taua aronga pakari ra kia akapapa kia akonoia te oroa i roto i nga pupu rikiriki mai. E tae ei ki te are, ka aere atu nga tangata pakari e rua ra na tetai aerenga vai. Inara, e tamakianga i taua ngai ra, e i reira nga tangata viviki i te pupui i tetai ua atu te ka tauta kia na reira atu i taua aerenga vai ra. Kua oro atu tetai o taua nga tangata pakari ra na reira kare i puia mai. Kua na reira atu te rua o aua nga tangata ra e kua rongo aia i te pupui anga. Kua akatopa iaia uaorai ki te enua e kua totoro aere ki te ngai e oraʼi te aere ra te au katiriti na runga i tona upoko. Kua puapingaia te uipaanga a aua nga tangata pakari e kua akonoia tei umuumuia no te putuputuanga.
“No te Pa Enua Ravarai, e te Au Kopu . . . e te Au Reo”
16. Akapeea ta te tavini akono meitaki e te pakari akapapa anga no te tuatua meitaki kia totoa ki roto i te au pupu reo rikiriki ra?
16 Kua karanga te apotetoro ko Ioane e ka aere mai te aronga maata rava “no te pa enua ravarai, e te au kopu ravarai, e te au iti-tangata ravarai, e te au reo katoa oki.” (Apokalupo 7:9) No reira, kua akapapa te Pupu Akaaere no te au puka kia papa no te au reo kia tere roa atu—kapiti katoa i tei tuatuaia e te au kopu e te au pupu rikiriki o te au tangata mamao ke ra. I Mozambique ei akatauanga, te aenga pepa Life in a Peaceful New World kua orongaia i nga reo ke atu e rima ra. I Nicaragua, ko te poroutia Kia Rekareka i te Oraanga ki Runga i te Enua e Tuatau Uatu! kua orongaia i te reo Miskito—ko te puka mua ia a te Taiate Punanga Tiaki i taua reo ra. E manganui te au Miskito Indian tei ariki i taua poroutia ra ma te rekareka i te kiteanga i tetai apinga i roto i to ratou uaorai reo. I te 1997 kua akatikaia e te Taiate etai au puka i roto e 25 etai atu reo ke ke ra e kua nenei e maata atu i te tai pirioni au makatini.
17. Ko teea te pupu reo tei tauturuia ra i Korea, e i akapeea te au tepe vitio i te tauturu anga maata i teia tuanga tangata?
17 I Korea kua tauturuia tetai pupu reo ke. I te mataiti 1997 kua raveia te uruoaanga mua i te reo akairo Korea. E 15 au putuputuanga reo akairo i Korea ma etai 543 au papuritia, inara e 1,174 tei akaputu atu ki te uruoaanga, e 21 tei papetitoia. Ei tauturu i te aronga taringa turi tei kore ra e kite ngoie i te tuatua tuatuaia me kare tataia, te maaniia nei te au puka no runga i te tepe vitio i roto i e 13 au reo akairo ke ke. E no reira kua tauturuia te aronga taringa turi kia “tatau” e pera katoa kia apii i te tuatua meitaki, ma te au tupu anga meitaki. I Marike, i mua akenei ka tae ki te rima mataiti no tetai tangata taringa turi kia papa tikai no te papetitoanga. I teianei, ma te au vitio tei papa maira i te Reo Akairo Marike, no tetai papaki o te aronga turi, kua akatopaia mai te reira ki te vaitata i te mataiti okotai.
‘Vaianga ki Runga i te Kariota’
18. I muri ake i te araveianga ia Iehonadaba ra, eaa ta Iehu i tamata i te raveanga?
18 I te tuatau 905 M.T.N., i muri ake i te kapiti anga atu a Iehonadaba, kua akamata a Iehu i te akapouanga i te akamori pikikaa ra. Kua oronga aia i tetai patianga ki te aronga akamori katoatoa ia Baala: “E tutu ana, ei uruoaanga tapu ta Baala.” I reira kua tonokia e ia na roto i te enua katoa kia akapapu e kare e tangata akamori ia Baala e vai mai ki vao. I te aere maata atu anga te au urupu ra ki roto i te iero maata o te atua pikikaa ra, kua akamatakiteia e kia kore tetai e akamori ra ia Iehova i reira. I te openga ra, kua tipu keia e Iehu e tana nuku ra te aronga akamori ia Baala ra. “Pou rava akera Baala i Iseraela ia Iehu.”—2 Ariki 10:20-28.
19. I te manako anga i tei vai maira ki mua no te au tangata, eaa te vaerua tau no tatou kia akaari, e eaa te angaanga tau na tatou kia rave ma te ngakau katoa?
19 I teia tuatau nei, te vai maira i mua vaitata te akavaanga openga no te au akonoanga pikikaa katoatoa. I raro ake i te arataki anga a te au angera te tutu aere nei te au Kerititiano i te tuatua meitaki ki te au tangata katoatoa, ma te akamaroiroianga ia ratou kia mataku i te Atua e kia akataka ke ia ratou uaorai i te akonoanga pikikaa. (Apokalupo 14:6-8; 18:2, 4) Te akamaroiroiia ra te aronga maru kia kauraro ia ratou uaorai ki te Patireia o te Atua i raro ake i te Ariki akateronoia a Iehova, koia Iesu Karaiti. (Apokalupo 12:10) I teia tuatau rapurapu nei, kare tatou e tika kia tuku i to tatou maroiroi kia paruparu mai ia tatou e tu ngaueue kore nei no te akamori anga mou ra.
20. Eaa taau te ka manako papu kia rave i te tuatau o te tavini anga mataiti o te 1998?
20 I tetai tuatau, i te Ariki ko Davida i raro akera i te taomi anga maata, kua pure aia: “Kua mou toku ngakau, e te Atua, kua mou toku ngakau; ka imene au, e e akameitaki rai au. Ka akameitaki au ia koe, e te Atu, i rotopu i te au tangata nei.” (Salamo 57:7, 9) Kia mou katoa oki tatou. I te tuatau o te mataiti tavini anga o te 1997, i te aro atu anga i te au tu ngata e manganui, kua akateiteiia tetai kapiki anga akapaapaa ei akakaka i te Atua ko Iehova ra. Kia akarongo katoaia oki tetai kapiki anga aiteite, e kia maata atu oki, i teianei mataiti tavini anga. E kia tika oki teia noatu eaa ta Satani te ka tauta kia rave ei akamaroiroi kore ia tatou me kare kia patoi ia tatou. E no reira, ka akaari tatou e te vai tu tika ra to tatou ngakau ma te ngakau katoa oki o te Iehu Maata atura, koia Iesu Karaiti, e ka akono tatou ma to tatou au ngakau katoa ki te akamaroiroi anga akauruia ra: “Kia rekareka e kia pereperekavana ia Iehova, kotou e te aronga tuatua-tika ra; e maeva i te rekareka, kotou katoa, e te aronga i tiratiratu te ngakau ra.”—Salamo 32:11.
Ka Rauka Ainei ia Koe te Akataka?
◻ Eaa te au taui anga tei tupu ki to Iseraela i te 905 M.T.N.?
◻ Koai te Iehu o teia tuatau, e akapeea te “aronga maata rava” i te akaari anga i te ‘tau to ratou ngakau’ ma tona ngakau ra?
◻ Eaa te au tumu tataia mai i te ripoti mataiti te akatutu mai ra i te maroiroi akaariia e te Au Kite o Iehova i te mataiti tavini anga o te 1997?
◻ Noatu eaa ta Satani e rave ei patoi mai ia tatou, eaa te vaerua ta tatou te ka akaari i te mataiti tavini anga o te 1998?
[Tutu i te kapi 18-21]
1997 SERVICE YEAR REPORT OF JEHOVAH’S WITNESSES WORLDWIDE
(Akara i te au puka)
[Tutu i te kapi 15]
Te akaari maira te akaputuanga meitaki maata ra ki te Akamaaraanga i te au manakonako anga meitaki no te tupuanga i te tuatau ki mua ra
[Tutu i te kapi 16]
Mei ta Iehonadaba turu anga ia Iehu ra, kua turu katoa oki te “aronga maata rava” i teia tuatau i te Iehu Maata atu, koia Iesu Karaiti, e tona au taeake akatainuia ra