‘E Aerenga Akarongo, Kare i te Kite Mata’

“E aerenga akarongo oki to matou, kare i te aerenga kite mata.”​—2 KORINETIA 5:7.

1. Eaa te aite anga no te “aerenga akarongo”?

I TE au taime ravarai e pure ei tatou kia rotai ma te au arataki anga tei akanooia maira i te Tuatua a te Atua, te akakite ra tatou e e tuanga akarongo to tatou. Me akamata tatou i te akakitekite atu kia etai ke ra i te Patireia o te Atua, te akaari katoa ra teia i te akarongo. E me ka akatapu tatou i to tatou oraanga kia Iehova, te oronga ra tatou i te akapapu anga e te anoano ra tatou i te ‘aerenga akarongo,’ koia oki, kia aruaru i te aerenga oraanga na te akarongo e akatere.​—2 Korinetia 5:7; Kolosa 1:9, 10.

2. Eaa ra te raveanga anake i te au angaanga i te putuputuanga i kore ei i te akapapu anga e e akarongo to tetai ra?

² Me ka akono tikai tatou i taua tu ra, ka umuumu tatou i te akarongo tei akatumu meitakiia. (Ebera 11:1, 6) E manganui te au tangata te akara mareka atura ki te Au Kite o Iehova no te au turanga akono tau teitei e te aroa ta ratou e kite ra i roto i te Au Kite ra. E akamata anga meitaki te reira, inara kare te aite anga e e akarongo to taua au tangata ra. Penei ko etai atu e tokorua akaipoipo to ratou me kare e metua tei maroiroi ra i te akarongo, e penei ka kapiti atu ratou i etai o te au angaanga te raveia ra e taua tangata ta ratou e inangaro ra. E tika ko taua mana ra ki roto i te ngutuare o tetai e akameitakianga ia, inara kare katoa oki teia i te mono i te inangaro o tetai uaorai no te Atua e tona uaorai akarongo oki.​—Luka 10:27, 28.

3. (a) E raukaʼi ia tatou te akarongo akatumu meitakiia, eaa te irinaki anga tika na tatou no runga i te Pipiria ra? (e) Eaa tetai papaki tangata ka riro viviki ei kia irinaki e e mea akauruia te Pipiria, i to etai ke ra?

³ Ko te aronga e aerenga akarongo tikai to ratou ka irinaki katoa oki e ko te Pipiria te Tuatua a te Atua. E maata te akapapu anga e ko te au Tuatua Tapu i tataia ra, e tika, e “mea akauruia mai e te Atua.”a (2 Timoteo 3:16) Eaa te maata o teianei akapapu anga te ka tika kia akara matatioia i mua ake ka irinaki ei tetai tangata ra? Penei ka riro te reira ki runga i tona tupuanga mai. Ko te ka akamerengo tikai i tetai tangata penei kare tetai ke ra e inangaro. I etai au tu, noatu rai e ka akaariia ki tetai tangata te au akapapu anga maata kare ra e rauka kia akakoreia, penei ka vairai aia i te araianga i te tika ta te reira e tou maira. No teaa ra? No te au inangaro tei tanu oonuia ra ki roto i tona ngakau. (Ieremia 17:9) E no reira, noatu ra penei te manako ra tetai tangata e inangaro tona i ta te Atua ra akakoroanga, penei te inangaro ra tona ngakau i te mareka anga no teianei ao. Penei kare aia e anoano kia akaruke i tetai tu oraanga te maro ra i te au turanga o te Pipiria. Inara, me te kaki tika ra tetai tangata i te tuatua mou, me te tiratiratu ra aia iaia uaorai, e me e tu akaaka tona, ka kite aia i muri akera e ko te Pipiria te Tuatua a te Atua.

4. Eaa te umuumuia ra i te tuanga a tetai kia raukaʼi te akarongo?

⁴ E putuputu i nga marama tokoiti ua, ka ariki te au tangata tei tauturuia kia apii i te Pipiria e kua rava to ratou kite ei akapapu e ko te reira te Tuatua a te Atua ra. Me ka akakeu teia ia ratou kia akatuera i to ratou ngakau kia apiiia e Iehova, ei reira to ratou au manako i roto roa, to ratou au inangaro, e to ratou au akakeu anga ka akapapa marieia na ta ratou i kite ra. (Salamo 143:10) Te tuatua ra a Roma 10:10 e “ko te ngakau oki” to te tangata nei e akarongo. Na taua akarongo ra e akakite e akapeea tikai te manako ngakau o taua tangata ra, e ka kitea te reira i tana akono anga i tona oraanga.

Kua Akono a Noa i te Akarongo Akatumu Meitakiia

5, 6. I akatumuia to Noa ra akarongo ki runga i teaa?

⁵ Ko Noa tetai e akarongo akatumu meitakiia tona ra. (Ebera 11:7) Eaa tana akatumu anga no te reira? Ia Noa te tuatua a te Atua ra, kare i roto i te tu tataia, mari ra ko tei tuatuaia kiaia ra. Te tuatua ra ia Genese 6:13: “E kua tuatua mairā te Atua ia Noa: Kua vaitata roa te openga o te tangata katoatoa ra iaku; kua ki oki te enua i te takinga-kino ïa ratou.” Kua akaue atura Iehova ia Noa kia patu i tetai araka e kua oronga atu oki i te au tu no te patu anga i te reira. Kua tuatua katoa atu te Atua: “I na oki! teia au ka apai mai i te vai diluvi ki runga i te enua nei, kia mate takiri roa te au mea ora e uti i te aʼo i raro ake i te rangi nei, te au mea katoa o te enua nei ka mate ia.”​—Genese 6:14-17.

⁶ I ua ana ainei i mua ake i teia? Kare te Pipiria i tuatua mai. Te karanga ra a Genese 2:5: “Kare oki te Atua ra ko Iehova i akatopa mai i te ua.” Inara, ko teia ta Mose, tei ora ra e au anere ua atu mataiti i muri akera, tana akakite anga i te au tika i te uriuri anga kare i to Noa tuatau mari ra i te tuatau i mua roa atu i te reira ra. Mei tei akakiteia maira ia Genese 7:4, kua taiku a Iehova i te ua i tana tuatuaanga kia Noa ra, e i te akara anga kua kite a Noa i te aite anga o tana tuatua. Inara, kare to Noa ra akarongo e no tana i akara. Kua tata te apotetoro ko Paulo e no Noa “ka akakiteia mai ei aia e te Atua i te au mea kare rai i kitea maira.” Kua akakite te Atua kia Noa e ka apai mai Aia “i te vai diluvi,” me kare “te moana no te rangi,” ki runga i te enua nei, mei ta te tataanga i raro ake i te New World Translation i akakite mai i te reira ia Genese 6:17. Tae roa mai ki te reira tuatau, kare i rokoia taua tu apinga ra. Inara te au mea angaia ravarai tei akaraia ra e Noa kua tu mai ei tetai tumu tikai ia e ka rauka i te Atua ra kia apai mai i taua tiruvi akapou anga ra. Na tona akarongo i akakeu, kua patu iora Noa i te araka.

7. (a) Eaa ta Noa kare i umuumu i mua ake ka rave ei aia i ta te Atua i akaue maira iaia? (e) Akapeea tatou i puapingaiaʼi na te akamanakoanga i to Noa akarongo, e akapeea to tatou akarongo e riro ei ei akameitakianga kia etai ke ra?

⁷ Kare te Atua i oronga kia Noa i te ra e akamataʼi te Tiruvi. Inara kare a Noa i akariro i te reira ei tetai kotoe anga no te tu manako ekoko anga, na te tukuanga i te patuanga araka e te tutuanga ki roto i te ngai tuanga rua i tona ora anga. I te tuatau tau ra, kua akaue atu te Atua ra ia Noa kia aere atu ki roto i te araka. Inara, “Kua pera oki a Noa; i te au mea katoa ta te Atua i akaue mai iaia ra, ko tana ïa i rave marie.” (Genese 6:22) E aerenga akarongo to Noa, kare i te aerenga kite mata. Mei teaa ra to tatou akameitaki anga e i rave aia i te reira! No tona akarongo, te ora nei tatou i teianei tuatau. I to tatou tu katoa oki, ka riro te akarongo ta tatou e akaari ei tetai tupu anga ta te tuatau ki mua e mou maira kare no tatou anake ua mari ra no ta tatou au tamariki katoa oki e no etai atu au tangata te takapini ra ia tatou.

To Aberahama Akarongo

8, 9. (a) Kua akatumu a Aberahama i tona akarongo ki runga i teaa? (e) Na roto i teea tu to Iehova ra ‘akakite mai anga’ kia Aberahama?

⁸ E akamanako ana i tetai atu akatauanga​—ko to Aberahama ra. (Ebera 11:8-10) Kua akatumu a Aberahama i tona akarongo ki runga i teaa? Ko te ngai takapini i tupu akera aia i Ura ki o te Kaledea ra e aronga akamori itoro e te noinoi apinga oki. Inara na etai atu mana ke i akanoo i to Aberahama ra manakoanga. Kare e ekoko anga e kua rauka iaia kia taokotai atu ma te tamaiti a Noa ra ko Sema, kua kapiti to raua oraanga no te 150 mataiti katoa. Kua riro a Aberahama kia irinaki e ko Iehova ‘te Atua Teitei ra, te Pu o te rangi e te enua nei.’​—Genese 14:22.

⁹ E apinga ke atu tetai tei mana ra ki runga ia Aberahama. “Kua akakite mai a [Iehova] kakā kia Aberahama . . . ka noo ei aia i Mesopotamia ra, ou aia i noo ei i Harana, Kua na ko maira kiaia, E aere ke mai koe i to enua e toou kopu-tangata, e aere mai koe ki te enua taku e akakite atu kia koe.” (Angaanga 7:2, 3) Na teea tu to Iehova ra ‘akakite mai anga’ kia Aberahama? Kare a Aberahama i akara mata tikai i te Atua ra. (Exodo 33:20) Inara, penei kua mama atura Iehova kia Aberahama na roto i te moemoea, ma tetai akakite anga mana kaka, me kare na tetai karere angera, me kare komono ra. (Akaaite ia Genese 18:1-3; 28:10-15; Levitiku 9:4, 6, 23, 24.) Noatu rai eaa te tu to Iehova ra mama anga kia Aberahama, kua irinaki taua tangata tiratiratu ra e te akanoo maira te Atua i tetai angaanga okomaata ki mua iaia. Kua akono atura Aberahama na roto i te akarongo.

10. Akapeea ta Iehova ra akamaroiroi anga i to Aberahama akarongo?

¹⁰ Kare to Aberahama akarongo no runga i te rauka anga iaia te au tu tika no te enua ta te Atua e arataki atura iaia. Kare katoa oki te reira no runga i tona kiteanga a ea taua enua ra ka orongaiaʼi kiaia. E akarongo tona no te mea kua kite aia ia Iehova ei Atua Mana katoatoa. (Exodo 6:3) Kua akakite a Iehova kia Aberahama e ka anau mai e uanga nona, inara i etai tuatau kua kimi to Aberahama manako ka akapeea te reira e tupu ei. Kua ruaine aia. (Genese 15:3, 4) Kua akamaroiroi atura Iehova i to Aberahama akarongo na te tuatuaanga kiaia kia akara i te au etu ra e kia tatau oki ia ratou me ka rauka iaia. “Koia katoa toou na uanga,” ta te Atua i tuatua atu. Kua akakeu oonuia a Aberahama. Kua kitea puia e ka rauka i Tei Anga mai i taua au apinga mekameka i te rangi ra kia akatupu mai i tana i taputou ra. “Kua akarongo atura [Aberahama] ia Iehova.” (Genese 15:5, 6) Kare a Aberahama i iranaki ua no te mea kua rekareka aia i tana i akarongo atura; e akarongo akatumu meitakiia tona ra.

11. (a) I tona vaitata anga ki te 100 mataiti, i akapeea to Aberahama manako anga ki ta te Atua taputou e ka anau mai a Sara ruaine ra i tetai tamaiti? (e) Eaa to Aberahama tu akarongo i te aro atu anga i te timataanga kia apai i tana tamaiti ki Maunga Moria e oronga iaia ei atinga?

¹¹ I to Aberahama vaitata anga ki te 100 mataiti e ko tana vaine, ko Sara, kua vaitata ki te 90, kua tuatua akaou a Iehova i tana taputou e ka anau mai tetai tamaiti na Aberahama e ka riro ko Sara te metua vaine. Kua akamanako tikai a Aberahama ki to raua turanga. “Kare ua oki aia i turori ua i te akarongo kore i tei tuatuaia mai e te Atua ra; i maroiroi ra aia i te akarongo, ma te akakakā i te Atua: Kua kite tikai oki aia e, ko tana i tuatua maira, ka tika iaia kia akatupu.” (Roma 4:19-21) Kua kite a Aberahama e kare e puapinga kore ta te Atua i taputou maira. I muri akera, no tona akarongo, kua rave katoa a Aberahama i ta te Atua ra tuatua anga kiaia kia rave atu i tana tamaiti ia Isaaka ki te enua o Moria e kia oronga iaia ei atinga. (Genese 22:1-12) Kua irinaki tikai a Aberahama e ka rauka i te Atua tei akatupu temeio maira kia anau mai taua tamaiti ra e tika katoa iaia kia akaora iaia kia akatupu i te au taputou anga katoa Tana i tuatua ra no runga iaia ra.​—Ebera 11:17-19.

12. Eaa te roa to Aberahama aerenga akarongo, e eaa te tutaki te tiaki maira iaia e tona au mema ngutuare tangata tei akakite ra i te akarongo maroiroi?

¹² Kua akaari mai a Aberahama e na te akarongo i akatere iaia kare i te au turanga taki tai ua mari ra i tona oraanga katoa ra. I te tuatau o tona oraanga katoa ra kare tetai ua atu tuanga o te Enua Taputouia ra i rauka mai ia Aberahama mei te Atua maira ei tetai akatuanga anga. (Angaanga 7:5) Inara, kare a Aberahama i akaparuparu mai e ka oki atu ei ki Ura o te Kaledea ra. No te 100 mataiti, tae roa mai ki tona matenga, kua noo puakapa ua aia i te enua ta te Atua i arataki atura iaia. (Genese 25:7) No runga iaia e tana vaine ko Sara, ta raua tamaiti ko Isaaka, e ta raua mokopuna ko Iakoba, te tuatua ra a Ebera 11:16 e: “I kore ei te Atua i akama ia ratou kia karangaia aia e e Atua no ratou; kua akono oki aia i tetai oire no ratou.” Ae, e ngai ta Iehova no ratou i te tuanga enua o tona Patireia Mesia ra.

13. Koai ma i roto i to Iehova au tavini i teia tuatau te oronga akapapu anga ra e akarongo to ratou mei to Aberahama ra?

¹³ Te vaira tetai aronga i roto i te au tavini o Iehova i teia tuatau tei aiteite ra kia Aberahama. Kua aaere ratou na te akarongo no te au mataiti e manganui. Na roto i te maroiroi ta te Atua i oronga atu, kua rauka ia ratou kia autu i te au arairai anga mei te maunga rai te tu. (Mataio 17:20) Kare to ratou akarongo e ngaueue ua no to ratou kore i kite e a ea te Atua ra e oronga mai ei i ta ratou tuanga tana i taputou maira. Kua kite ratou e kare e puapinga kore ua ta Iehova tuatua, e te manako ra ratou i te reira ei tetai tuanga meitaki kia kapitiia ki roto i tona Au Kite. Ko toou manako ngakau ainei ia?

Te Akarongo tei Akakeu ra ia Mose

14. Akapeea te tuku anga pange no to Mose ra akarongo?

¹⁴ Tetai atu akatauanga no te akarongo ko Mose ia. Eaa te pange no tona akarongo? Kua akamouia te reira mei tona tamaiti varevare anga maira. Noatu rai e kua kiteia e te tamaine a Pharao, a Mose ki roto i tetai pia raupo i te Kauvai Nile e kua rave atu iaia ei tamaiti nana, na to Mose uaorai metua vaine Epera, ko Iokebeda i akono i taua tamaiti ra e nana i utuutu i tona au mataiti ou anga. I te akara anga kua apii meitaki a Iokebeda iaia, kua tauru i te inangaro no Iehova e te ariki anga no Tana au taputou kia Aberahama ra. I muri iora, ei tetai mema no te ngutuare o Pharao, “e apiiia iorā Mose i te au tuatua pakari a to Aiphiti.” (Angaanga 7:20-22; Exodo 2:1-10; 6:20; Ebera 11:23) Inara, noatu to Mose ra turanga akaperepereia, kua vaira tona ngakau ma te au tangata tuikaaia o te Atua ra.

15. Eaa te aiteanga ta Mose ra akataka anga iaia uaorai ma to Iehova ra au tangata?

¹⁵ I te 40 o tona mataiti, kua ta atu a Mose i tetai tangata Aiphiti kia oraʼi tetai ngati Iseraela tei takinga kino tau koreia ra. Na teia tupu anga i akakite i to Mose ra manako anga no te au tangata o te Atua ra. E tika, “no te akarongo i kore ei i tika ia Mose, ka pakari ei aia ra, kia tapaia i te tamaiti a te tamaine a Pharao ra.” Kare e kia “rave i te navenave poto ua o te tuatua kino ra” ei tetai mema no te akava anga o Aiphiti ra, na te akarongo i akakeu iaia kia akataka iaia uaorai ma te au tangata takinga kinoia ra o te Atua.​—Ebera 11:24, 25; Angaanga 7:23-25.

16. (a) Eaa te angaanga ta Iehova i oronga kia Mose, e akapeea ta te Atua tauturu iaia? (e) I te raveanga i tana angaanga, i akapeea ta Mose akaari anga i te akarongo?

¹⁶ Kua inangaro tikai a Mose kia rave i te apai mai i te tu rangatira ki tona au tangata, inara kare i tae ake ki te tuatau a te Atua ra no to ratou akaora angaia. E kua oro ke atura Mose i Aiphiti. No te tae anga e vaitata i te 40 mataiti i muri iora i rave ei a Iehova na tetai angera e akaue ia Mose kia oki atu ki Aiphiti e taki mai i to Iseraela ra ki vao i taua enua ra. (Exodo 3:2-10) I akapeea to Mose manako anga? Kare aia i akakite i te tu ekoko anga i to Iehova ra tika anga kia akaora i to Iseraela, inara i manako ngakau aia e kare aia i tau no taua tuanga ta te Atua i tuku maira ki mua iaia. Na te tu aroa, kua oronga atura Iehova i te akamaroiroi anga tei umuumuia ra e Mose. (Exodo 3:11–​4:17) Kua tupu maroiroi maira to Mose akarongo. Kua oki atura aia ki Aiphiti e kua akamatakite putuputu atura ia Pharao e mata ki te mata i te au mate te ka tupu kia Aiphiti no te kore taua tutara ra e tuku i to Iseraela kia aere e akamori ia Iehova. Kare o Mose uaorai mana kia akatupu i taua au mate ra. E aerenga akarongo tona, kare i te kite mata. I roto tona akarongo ia Iehova ra e tana tuatua oki. Kua akakoko atura Pharao ia Mose. Inara kua akaketaketa atura Mose. “No te akarongo i akaruke ei aia ia Aiphiti, kare i mataku i te riri o te ariki ra: i maroiroi rava atura aia i te akara anga atu iaia, i tei kore e kitea kia akara ra.” (Ebera 11:27) Kare a Mose i te apa kore ua. Kua rave au tarevake aia. (Numero 20:7-12) Inara i muri ake i te akaue angaia e te Atua ra, kua riro tona oraanga katoa na te akarongo i akatere.

17. Eaa te tupu anga no te aerenga akarongo i tikai no Noa, no Aberahama, e no Mose, noatu rai e kare ratou i ora kia kite i ta te Atua ra ao ou?

¹⁷ Kia riro toou akarongo kia aite ki to Noa, to Aberahama, e to Mose ra. E tika ra kare ratou i akara i te ao ou o te Atua i to ratou tuatau ra. (Ebera 11:39) Kare oki i tae ake ki ta te Atua ra tuatau i akataka; te vaira etai atu au tuanga o tana akakoro anga tei umuumuia ra kia akatupuia. Inara, kare to ratou akarongo i te tuatua a te Atua ra i ngaueue, e tei roto to ratou ingoa i ta te Atua puka o te ora.

18. No te aronga tei kapikiia ra ki te oraanga i te rangi, eaa i umuumuiaʼi te aerenga akarongo ra?

¹⁸ “Kua vaooia e te Atua te mea meitaki rava atu no tatou,” ta te apotetoro ko Paulo i tata. Koia oki, kua vaooia e te Atua te mea meitaki rava atu no te aronga tei, aite kia Paulo ra, kua kapikiia ki te oraanga i te rangi ma Karaiti katoa oki. (Ebera 11:40) Ko te reira te aronga ta Paulo i manako ra i tana tata anga i te au tuatua tataia ra ia 2 Korinetia 5:7: “E aerenga akarongo oki to matou, kare i te aerenga kite mata.” I te tata anga i te reira ra, kare tetai i o ratou ra i itae atu ki to ratou tutaki i te rangi ra. Kare i rauka ia ratou kia kite atu i te reira ma to ratou mata kopapa ra, inara kua akatumu meitakiia to ratou akarongo ki te reira. Kua akatuia a Karaiti mei te mate mai, ei popo mua no te aronga kia akameitakiia ma te oraanga ki te rangi. E tere atu i te 500 au kite tei akara iaia i mua ake i tona kakeanga ki te rangi ra. (1 Korinetia 15:3-8) Kua rava te tumu no ratou kia akatere i to ratou oraanga katoa na taua akarongo ra. E au tumu tau katoa oki to tatou no te aerenga akarongo.

19. Mei tei akakiteia maira ia Ebera 1:1, 2, na roto iaai ta te Atua ra tuatua anga mai kia tatou?

¹⁹ I teia tuatau nei, kare a Iehova e tuatua mai ana ki tona au tangata na roto mai i tetai angera, mei tana i rave kia Mose ra i te ngangaere tei ka ra. Kua tuatua mai te Atua na roto i tana Tamaiti. (Ebera 1:1, 2) Ta te Atua i tuatua mai na roto iaia ra, kua tataia e Ia ki roto i te Pipiria, tei uriia nei ki roto i te au reo o te au tangata takapini teianei ao.

20. Akapeea to tatou turanga i meitaki maata atu ei i to Noa, to Aberahama, e to Mose ra?

²⁰ E maata roa atu ta tatou i ta Noa, ta Aberahama, e ta Mose i to ratou tuatau. Tei ia tatou te Tuatua katoatoa a te Atua​—e maata to te reira kua tupu ke ana. I te manako anga i te au mea ravarai ta te Pipiria i tuatua no te au tangata e te au vaine tei akapapu ra ia ratou uaorai ei au kite tiratiratu no Iehova i tei aro atu i te au tu timataanga ravarai, kua raurau maira Ebera 12:1: “E kopae atu tatou i te au mea teiaa ravarai, e te ara e rokoia ngoie ei tatou nei, e oro tamou marie ei i teianei oroanga i tukuia mai ki mua ia tatou nei.” Kare to tatou akarongo i tetai apinga kia manako kore uaia. “Te ara e rokoia ngoie ei tatou nei” ko te ngere ia i te akarongo. Te umuumuia ra tetai maro anga ketaketa me kia tamou marie tatou i te “aerenga akarongo.”

[Tataanga Rikiriki i Raro]

Eaa Taau Pau Anga?

◻ Eaa te kapitiia atura ki te “aerenga akarongo”?

◻ Akapeea tatou ka puapingaiaʼi i te tu o ta Noa akaari anga i te akarongo ra?

◻ Akapeea te tauturu anga ia tatou a te tu o ta Aberahama ra akono anga i te akarongo?

◻ Eaa te Pipiria i tou atu ei kia Mose ei tetai akatauanga no te akarongo?

[Tutu i te kapi 10]

Kua aaere a Aberahama na te akarongo

[Tutu i te kapi 10]

Kua akakite a Mose raua ko Aarona i te akarongo ia raua i mua ia Pharao ra