“Akatinamou i to Kotou Ngakau”

“Ko te akakoromaki ra te tau ia kotou e, kia oti ia kotou te rave i ta te Atua i anoano ra, kia rauka ia kotou te tutaki i tuatuaia maira.”​—EBERA 10:36.

1, 2. (a) Eaa tei rokoia ki etai o te au Kerititiano i te anere mataiti mua ra? (e) Eaa ra i ngoie uai kia paruparu mai te akarongo?

I TE aronga tata Pipiria katoatoa ra, kare tetai atu i taiku i te akarongo kia putuputu atu i ta te apotetoro ko Paulo ra. E e putuputu katoa oki, aia i te tuatua no te aronga tei paruparu ra te akarongo me kare kua mate. Ei akatauanga, a Humenaio raua ko Alekanedero “kua akangaa pai oki i te akarongo.” (1 Timoteo 1:19, 20) Kua akaruke a Dema ia Paulo no te mea “kua anoano maata ki teianei ao.” (2 Timoteo 4:10) Ko tetai papaki, no to ratou tu akono tau kore ei Kerititiano, ‘kua akaruke i te akarongo.’ Ko etai atu kua akavareia na te pakari pikikaa e kua “tatipake rava akenei i te akarongo.”​—1 Timoteo 5:8; 6:20, 21.

² Eaa ra taua au Kerititiano akatainuia ra i ngere ei i te reira au aerenga? Te tika, “ko te akarongo nei, ko te tumu tikai ïa i te au mea i tatariia nei, e te kite ïa i te au mea kare i akaraia nei.” (Ebera 11:1) Te akono ra tatou i te akarongo i te mea kare ra tatou i akara mata. Kare tatou e umuumu i te reira no te au mea te akaraia ra. E ngoie atu te angaanga no te apinganui te akaraia ra no te apinga vaerua kare ra e akaraia. (Mataio 19:21, 22) E manganui te au mea akara mataia ra​—mei “te anoano tika kore o te kopapa nei, e te anoano tika kore o te mata nei”​—te inangaro maroiroiia e to tatou kopapa apa ua nei e ka rauka kia akaparuparu i to tatou akarongo.​—1 Ioane 2:16.

3. Eaa te tu akarongo te ka tau tetai Kerititiano kia tatanu?

³ Inara, te tuatua ra Paulo, “ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” E akarongo to Mose mei te reira. Kua “akono marie ra oki aia i te tutaki ra ei oko” e kua “maroiroi rava atura aia i te akara anga atu iaia, i tei kore e kitea kia akara ra.” (Ebera 11:6, 24, 26, 27) Te umuumuia ra teianei tu akarongo e te Kerititiano. Mei tei akaraia ra i te atikara i mua akenei, ko Aberahama tetai akatauanga meitaki i teianei tu.

Ta Aberahama Akatauanga no te Akarongo

4. Akapeea te tupu anga ki to Aberahama oraanga ra no tona akarongo?

⁴ I Ura a Aberahama i te rauka anga iaia te taputou a te Atua e ka riro koia te metua no tetai uanga te ka riro ei akameitakianga i te au tangata o te au pa enua katoatoa. (Genese 12:1-3; Angaanga 7:2, 3) Na runga i te tumu anga o taua taputou ra, kua akarongo a Aberahama ia Iehova, e kua aere atu ki Harana na mua e kua aere atu ki Kanaana i muri iora. I reira, kua taputou a Iehova kia oronga i taua enua ra ki te uanga o Aberahama. (Genese 12:7; Nehemia 9:7, 8) Inara, ko te maata anga o ta Iehova i taputou ka akatupuia i muri ake i to Aberahama matenga. Ei akatauanga, kare i riro ia Aberahama uaorai tetai ua atu tuanga o Kanaana​—mari ra ko te ana o Makapela, tana i oko mai ra ei ngai tanumanga. (Genese 23:1-20) Inara, kua vai mai tona akarongo i te tuatua a Iehova ra. I runga ravao, e akarongo tona i tetai “oire tumu mou, ko te akatu e te tutara o taua oire ra, ko te Atua ïa.” (Ebera 11:10) Na taua tu akarongo ra i akatinamou iaia i tona oraanga katoa.

5, 6. Na teea tu te timata angaia to Aberahama akarongo i ta Iehova ra taputou?

⁵ Kua kitea teia i runga tikai i te taputou e ka riro te uanga o Aberahama ra ei tetai iti tangata maata. E tupu ei teianei, ka umuumuia tetai tamaiti na Aberahama, e kua tatari aia no tetai tuatau roa i mua ake ka akameitakiia aia ma tetai. Kare tatou i kite e eaa tona pakari i tona akarongo mua anga i ta te Atua taputou, inara i tona aerenga mamao ki Harana, kare a Iehova i oronga ake i tetai tamaiti nana. (Genese 11:30) Kua rava tona tuatau ki Harana ‘kia akaputu i te au apinga katoa i rauka ia ratou,’ e i tona aere atu anga ki Kanaana, kua 75 ona mataiti e ko Sara e 65. Inara, kare a raua tamaiti. (Genese 12:4, 5) I to Sara itae anga ki roto i nga mataiti 70, kua manako aia e kua ruaine roa aia kia oronga i tetai tamaiti na Aberahama. No reira, i te aruanga i tetai peu no taua tuatau ra, kua oronga aia i tona tavini tamaine kia Aberahama, e kua anau mai tetai tamaiti nana iaia. Inara kare teia i te tamaiti tei taputouia maira. I muri akera kua akaatea keia atu a Hagara raua ko tana tamaiti koia Isemaela. Inara, i ta Aberahama ra pati anga no raua, kua taputou a Iehova kia akameitaki katoa ia Isemaela.​—Genese 16:1-4, 10; 17:15, 16, 18-20; 21:8-21.

⁶ I ta te Atua uaorai tuatau tau​—e roa, e tuatau roa i muri ake i to raua rongo anga mua i taua taputou ra​—kua anauia mai tetai pepe tamaroa, ko Isaaka, na taua Aberahama 100 mataiti ra raua ko Sara 90 mataiti ra. Mei teaa ra te meitaki o te reira! No teia nga tokorua ruaine ra, kua riro mei te tuakaouanga rai te tu i te apai mai anga to raua nga kopapa “mate” ra ei oraanga ou. (Roma 4:19-21) E roa ra te tatari anga, inara i te akatupu angaia taua taputou ra, kua riro ra ei mea tau taua tatari anga ra.

7. Eaa te kapiti anga o te akarongo ra ki te akakoromaki anga?

⁷ Te akamaara maira ta Aberahama akatauanga kia tatou e kare e tau te akarongo no tetai tuatau poto ua. Kua kapiti atu a Paulo i te akarongo ki te akakoromaki anga i tana tata anga: “Ko te akakoromaki ra te tau ia kotou e, kia oti ia kotou te rave i ta te Atua i anoano ra, kia rauka ia kotou te tutaki i tuatuaia maira. . . . Kare ra tatou i to te aronga i unui ki muri e mate atu; no te aronga ra i rauka te akarongo e ora atu ei te vaerua.” (Ebera 10:36-39) E manganui kua tatari no te oraanga katoa no te tupuanga o taua taputou. Kua tatari etai ma te oraanga katoa. Na to ratou akarongo maroiroi i akamatutu ia ratou. E, mei ia Aberahama rai, ka rauka ia ratou te tutaki i ta Iehova ra tuatau tau.​—Habakuka 2:3.

Akarongoanga ki te Atua

8. Akapeea tatou me akarongo ki te Atua i teia tuatau nei, e eaa te reira ka akamaroiroi ei i to tatou akarongo?

⁸ E a apinga tei akamaroiroi i te akarongo o Aberahama, e ka rauka katoa i aua apinga ra te tauturu ia tatou. Te mea mua, kua akakite aia i tona ‘irinaki anga e ko te Atua’ na te akarongo anga i ta Iehova ra tuatua anga. Na reira, kua tuke aia mei te au ngati Iuda o to Ieremia tuatau ra, tei irinaki ra ia Iehova mari ra kare i akarongo i tana au tuatua. (Ieremia 44:15-19) I teia tuatau, te tuatua maira Iehova kia tatou na roto i te au kapi o te Pipiria, koia tana Tuatua akauruia, ta Petero i tuatua e “mei te lamepa e kakā ua i te ngai poiri ra . . . i roto i to kotou ngakau.” (2 Petero 1:19) Me tatau marie tatou i te Pipiria, ka “angaiia i te tuatua i akarongoia nei.” (1 Timoteo 4:6; Roma 10:17) Pera katoa, i teianei tuatau openga, te oronga maira “te tavini akono meitaki e te pakari” i te ‘kai [vaerua] i te ora mou ra,’ te arataki anga i te akono anga i te au kaveinga Pipiria e te kiteanga oki i te totou Pipiria ra. (Mataio 24:45-47) Te akarongoanga kia Iehova na roto i teianei au tu ko te mea tau ia e raukai te akarongo maroiroi.

9. Eaa te ka tupu me ka irinaki tikai tatou i te manakonako anga Kerititiano?

⁹ Kua piri vaitata to Aberahama akarongo ki tona manakonakoanga. “Akarongo atura ïa ma te tatari e, ka riro aia ei metua no te pa enua e manganui.” (Roma 4:18) Ko te rua teianei o te apinga te ka tauturu ia tatou. Kare e tau kia ngaropoina ia tatou e ko Iehova “tei tutaki mai i te aronga i kimi tikai iaia.” Kua tuatua te apotetoro ko Paulo: “No reira oki tatou nei i roiroi ei, e i akakoromaki ei i te akakino, no te mea te irinaki nei tatou i te Atua ora ra.” (1 Timoteo 4:10) Me te irinaki tika ra tatou i te manakonakoanga Kerititiano, ka riro to tatou oraanga katoa ei akakite anga i to tatou akarongo, mei te tu o Aberahama rai.

Tuatuaanga ma te Atua

10. Eaa te tu pure te ka akamaroiroi i to tatou akarongo?

¹⁰ Kua tuatua a Aberahama ma te Atua ra, e ko teianei te toru o te apinga tei akamaroiroi i tona akarongo. I teia tuatau, ka rauka katoa ia tatou te tuatua ma Iehova, kia taangaanga i te apinga orongaia mai koia te pure na roto ia Iesu Karaiti. (Ioane 14:6; Ephesia 6:18) No muri ake i te tuatuaanga i tetai parapore akaketaketaanga i te umuumu anga no te pure anga tamou marie i ui ei a Iesu i te uianga: “Kia tae maira te Tamaiti a te tangata nei, e kitea ainei e ia te akarongo i te enua nei?” (Luka 18:8) Kare te pure patuanga akarongo i te mea manako kore uaia me kare tupu ua mai. E mea oonu tikai tona tu. Ei akatauanga, e mea puapinga tikai te pure anga ma te ngakau tae me e au iki anga puapinga ta tatou ka rave me kare oki ia tatou i raro ake i te taitaia maata.​—Luka 6:12, 13; 22:41-44.

11. (a) Akapeea te akamaroiroi anga ia Aberahama i tana akatuera anga i tona ngakau ki te Atua ra? (e) Eaa ta tatou ka kite mei tei tupu kia Aberahama ra?

¹¹ Ia Aberahama e ruaine maira e te vaira kare a Iehova i oronga atu kiaia i te uanga taputouia ra, kua tuatua atu aia ki te Atua no tona manako anga. Kua akapapu atura Iehova kiaia. Te tupu anga? “Kua akarongo atura [Aberahama] ia Iehova; e kua akono atura aia i te reira ei tuatua-tika nana.” I reira, kua oronga atura Iehova i tetai akairo ei akatinamou i tana au tuatua akapapuanga ra. (Genese 15:1-18) Me ka akatuera tatou i to tatou ngakau kia Iehova ra na roto i te pure, e ka ariki ei i tana akapapuanga i roto i tana Tuatua, i te Pipiria ra, e ka akarongo atu ei iaia na roto i te akarongo ki katoa ra, i reira ka akamaroiroi katoa mai a Iehova i to tatou akarongo.​—Mataio 21:22; Iuda 20, 21.

12, 13. (a) Akapeea to Aberahama akameitaki angaia i tona aru anga i ta Iehova arataki anga? (e) Eaa te au tu tupu anga te ka akamaroiroi i to tatou akarongo?

¹² Te a o te apinga tei akamaroiroi atura i te akarongo o Aberahama ko te turu anga ta Iehova i oronga atura kiaia i tona aru anga i ta te Atua ra arataki anga. I to Aberahama aere anga kia akaora mai ia Lota i te au ariki rave kino ra, kua oronga atu a Iehova i te autu anga kiaia. (Genese 14:16, 20) Ia Aberahama e noo mei te tuitarere ra i te enua te ka akatuangaia ki tona uanga, kua akameitaki atura Iehova iaia i te pae apinga ra. (Akaaite ia Genese 14:21-23.) Na Iehova i arataki te au tauta anga a tona tavini kia kimi i tetai vaine tau na Isaaka ra. (Genese 24:10-27) Ae, “i akameitaki ana oki a Iehova ia Aberahama i te au mea katoa ra.” (Genese 24:1) Ei tupu anga no te ketaketa tona akarongo e no tona pirianga vaitata ma te Atua ko Iehova ra kua karanga a Iehova iaia ko “toku oa.”​—Isaia 41:8; Iakobo 2:23.

¹³ Ka rauka ainei ia tatou i teia tuatau nei taua tu akarongo ketaketa ra? Ae. Me ka aite tatou kia Aberahama ra, e ka timata ia Iehova na te akarongoanga i tana au akauenga, ka akameitaki katoa oki aia ia tatou, e na te reira e akamaroiroi i to tatou akarongo. Ei akatauanga, te akaari maira te akara anga o te Ripoti Tavini Anga Mataiti 1998 e e manganui kua akameitakiia no roto i tetai tu meitaki tikai i ta ratou akarongo anga i te akaue anga kia tutu aere i te tuatua meitaki.​—Mareko 13:10.

E Tata Anga no te Akarongo i Teia Tuatau

14. Akapeea ta Iehova ra akameitaki anga i te angaanga tua aere i te Tuatua Patireia Nu. 35 ra?

¹⁴ Ia Okotopa 1997, kua puapinga maata te raveanga i te tua anga i te Tuatua Patireia Nu. 35 i te ao katoa nei, e akameitaki anga tikai no te totomapu e te maroiroi o te au mirioni ua atu Au Kite tataki tai ra. E mea matauia tei tupu ki Ghana. E vaitata i te 2.5 mirioni kopi tei tuaia i roto i nga reo e a, e vaitata i te 2,000 au apii Pipiria tei patiia mai ei tetai tupu anga ra. Kua akara nga Kite e rua i Cyprus te tua aere ra i te Tuatua Patireia, i tetai orometua te aru aere atura ia raua. I muri akera, kua oronga atu raua i tetai kopi o te Tuatua Patireia nana. Kua akakite mai aia e kua rauka iaia tetai: “No toku umere maata i te tuatua a te reira kua anoano au kia akameitaki atu i te aronga tei akapapa i te reira ra.” I Denmark, e 1.5 mirioni kopi o te Tuatua Patireia tei tuaia ma te au tupu anga memeitaki ra. Kua tuatua tetai vaine tei angaanga ra i te opati public relations i reira e: “E tumu tuatua ta taua aenga pepa ra no te katoatoa. E ngoie ua te maramaia, e te akakeu ra ia koe, te oronga maira i te anoano kia koe kia kite maata atu i te reira. Te aere tika atura ki te mata o te toa puakatoro!”

15. Eaa te au tupu anga te akaari maira e kua akameitaki a Iehova i te au tauta anga kia itae ki te au tangata i te au ngai ravarai?

¹⁵ I te 1998 kua raveia te tauta anga kia tutu aere ki te au tangata kare ki to ratou au ngutuare anake mari ra i te au ngai ravarai. I Côte d’Ivoire kua aere atu nga tokorua mitinari ki te au pai e 322 te vaira i te ngai tutau anga. Kua tua raua e 247 puka, e 2,284 au makatini, e 500 au poroutia, e au anere ua atu au aenga pepa, pera katoa te au vitio na te au mataro ei akarakara i te tuatau te aere ra i te tai. I Kanata kua aere atu tetai Kite ki tetai toa no te au tuanga kopapa motoka. Kua inangaro mai te tangata nona taua toa ra, e kua noo atu te taeake ra ki reira no te a e te apa ora, inara ko te tuatau tei akapouia i te tuatuaanga e manga tere atu i te ora okotai ra i rotopu i te taime e tangata oko apinga tetai. I te openga, kua akapapaia tetai apii no te ora 10 i te po. Inara, i etai taime kare e akamataia tae roa ki te turuaipo e kua raveia tae roa ki te ora rua i te popongi. E akaaoanga tikai taua ora akapapaia ra, inara e meitaki te au tupu anga i rauka mai. Kua iki taua tangata ra kia topiri i tana toa i te au Tapati kia raukai te aere ki te au uipaanga. Kare i roaia kua tupu meitaki aia e tona ngutuare tangata i te apiianga.

16. Eaa te au tupu anga te akaari maira e e apinga ririnui te poroutia Umuumu ra e te puka Kite oki i te angaanga tutu aere e te apii anga oki?

¹⁶ Te poroutia Eaa ta te Atua e Umuumu Maira ia Tatou? e te puka Te Kite te ka Arataki ki te Ora Mutu Kore te aere ua atura ei au apinga ririnui i te angaanga tutu aere e te apiianga oki. I Itaria ko tetai paretenia te tatari ra i tetai bus kua ariki i tetai kopi no te Tuatua Patireia. I tetai ra mai, kua aravei akaouia aia e kua rave atu i te poroutia Umuumu ra. I te au ra taki tai i muri mai i te reira, kua rave aia e 10 ki te 15 miniti i te apii Pipiria i te ngai tiaki anga bus. I muri ake i te tai marama e te apa, kua iki aia kia akaruke i te kainga paretenia e ka oki ei ki tona kainga i Guatemala kia rave ua atu i tana apii. I Malawi tetai vaine putuputu te aere ki te pure ko Lobina kua mareka kore aia i te akamata anga tana nga tamaine i te apii Pipiria ma te Au Kite o Iehova ra. Inara, kua tuatua atu nga tamaine ra i te tuatua mou o te Pipiria ki to raua metua vaine tei rauka ia raua. Ia Tiunu 1997, kua akara a Lobina i te puka Kite ra e kua mareka i te tuatua “Te Kite te ka Arataki.” Ia Tiurai kua akatika aia ki tetai apii Pipiria. Ia Aukute kua aere aia ki te uruoaanga tapere e kua akarongo matariki atu ki te porokaramu katoa ra. Kia tae ki te openga o taua marama ra, kua akaruke aia i tana aere pure e kua tau oki ei tetai papuritia kare ra i papetitoia. Kua papetitoia aia ia Noema 1997.

17, 18. Akapeea te akapapu anga a te au vitio a te Taiate ra i to ratou puapinga maata i te tauturu anga i i te aronga tataki tai kia “kite” i te au mea pae vaerua?

¹⁷ E manganui te aronga ta te au vitio a te Taiate i tauturu kia “kite” i te au apinga vaerua. I Mauritius kua akaruke tetai tangata i tana ngai pure no te kore e taokotai anga i reira. Kua akaari atu tetai mitinari kiaia i te taokotai o te Au Kite o Iehova, na te taangaanga i te vitio United by Divine Teaching. No te mareka anga, kua tuatua taua tangata ra: “Ko kotou te Au Kite o Iehova tei roto ia Parataito i teianei!” Kua akatika aia kia apii i te Pipiria. Kua akaari atu tetai tuaine i Tiapani ki tana tane akarongo kore ra i te vitio Jehovah’s Witnesses​—The Organization Behind the Name, e kua akakeuia aia kia akamata i tetai apii Pipiria putuputu. I muri ake i te akarakaraanga i te United by Divine Teaching, kua anoano aia kia riro ei tetai o te Au Kite o Iehova ra. Te toru tuanga tei tapaia ra ko The Bible​—A Book of Fact and Prophecy kua tauturu iaia kia akono i te au kaveinga Pipiria i tona oraanga. I te openga, kua akaari atu te Jehovah’s Witnesses Stand Firm Against Nazi Assault kiaia e te akamaroiroi ra a Iehova i Tona au tangata kia patoi atu i te au ravenga a Satani. Kua papetitoia taua tangata ra ia Okotopa 1997.

¹⁸ E tokoiti ua teianei no te au tupu anga e manganui, e manganui ua atu tei rekarekaia i te mataiti kua topa akenei. Te akaari maira ratou e e akarongo angaanga to te Au Kite o Iehova ra e te akamaroiroi maira Iehova i taua akarongo ra na te akameitakianga i ta ratou angaanga.​—Iakobo 2:17.

E Tatanu i te Akarongo i Teia Tuatau

19. (a) Eaa tatou i riro ei ki tetai turanga meitaki atu i to Aberahama ra? (e) Eaa te manganui o te aronga tei akaputu atu i te akamaara anga i te mate atinga o Iesu? (ng) Ko teea te au enua tei maata ra te aronga akaputu atu ki te Akamaara Anga i te mataiti kua topa? (Akara i te papaanga i nga kapi 12 ki te 15.)

¹⁹ I te au tu e manganui i meitaki atu to tatou nei turanga i teia tuatau i to Aberahama ra. Kua kite tatou e kua akatupu a Iehova i tana au taputou katoatoa kia Aberahama. Kua akatuangaia to Aberahama ra anaunga ia Kanaana, e i riro ratou ei tetai iti tangata maata. (1 Ariki 4:20; Ebera 11:12) Pera katoa oki, i etai 1,971 mataiti i muri ake i to Aberahama akaruke anga i Harana, ko tetai uanga nona, koia Iesu, kua papetitoia i te vai e Ioane Papetito ra e na Iehova uaorai i muri iora i te vaerua tapu e kua riro maira aia ei Mesia, koia te Uanga o Aberahama i te tu tikai, i te pae vaerua ra. (Mataio 3:16, 17; Galatia 3:16) Ia Nisana 14, 33 T.N., kua oronga a Iesu i tona oraanga ei oko no te aronga te ka akono i te akarongo iaia. (Mataio 20:28; Ioane 3:16) E au mirioni ua atu i teianei ka rauka kia akameitaki ia ratou uaorai na roto iaia ra. I te mataiti kua topa e 13,896,312 tei akaputu atu i te Nisana 14 kia akamaara i teianei angaanga aroa meitaki. Mei teaa ra tetai akatika anga ia Iehova, koia Tei Akono Maata ra i te au taputou!

20, 21. (a) Akapeea te au tangata no te au pa enua mai i te akameitaki anga ia ratou uaorai na roto i te Uanga o Aberahama i te anere mataiti mua ra, e akapeea ratou i te akameitakianga ia ratou uaorai i teia tuatau nei?

²⁰ I te anere mataiti mua ra, e manganui no te pa enua katoa​—akamata mai ma te Iseraela kopapa ra​—tei akono i te akarongo i teianei Uanga o Aberahama e kua riro ei au tamariki akatainuia na te Atua, ei au mema ou no tetai “Iseraela no te Atua” i te pae vaerua ra. (Galatia 3:26-29; 6:16; Angaanga 3:25, 26) Ia ratou tetai tumu tikai i tatariia ra no te ora anga vaerua mate kore i te au rangi ra ei au oa tutara i te Patireia o te Atua ra. E 144,000 anake te ka akameitakiia na roto i teianei tu, e e tokoiti ua to ratou te toe nei. (Apokalupo 5:9, 10; 7:4) I te mataiti i topa akenei, e 8,756 tei akakite mai i to ratou irinaki e ko ratou etai no teia pupu na te kaianga i te oroa i te tuatau o te akono anga i te Oroa Akamaara Anga ra.

²¹ Vaitata te katoatoa o te Au Kite o Iehova i teia tuatau nei no te “aronga maata rava” tei totouia maira ia Apokalupo 7:9-17. No te mea ka akameitaki ratou ia ratou uaorai na roto ia Iesu, tei ia ratou te manakonakoanga no te ora mutu kore ki runga i te enua parataito. (Apokalupo 21:3-5) Te 5,888,650 tei rave ra i te angaanga tutu aereanga i te 1998 ra te akapapu maira e e aronga “maata” tikai ratou. E mea reka tikai i te kite anga ia Rutia e Ukraine i te ripoti anga e tere atu i te 100,000 papuritia no te taime mua. Tei meitaki maata atu, koia oki te ripoti no Marike mai​—e 1,040,238 papuritia ia Aukute! Ko teia etai e toru o te au 19 enua tei ripoti e tere atu i te 100,000 papuritia i tera mataiti i topa.

Manakonako Kare e Roaia ka Akatupuia

22, 23. (a) Eaa tatou ka tau ei kia akatinamou i to tatou au ngakau i teianei tuatau? (e) Akapeea tatou e riro ei kia aite kia Aberahama, e auraka kia aite atu ki te aronga akarongo kore ta Paulo i taiku maira?

²² Kua akamaaraaraia atu ki te aronga tei akaputu maira ki te Akamaara Anga eaa te mamao to tatou aereanga ki roto i te akatupu anga o ta Iehova au taputou ra. I te 1914, kua akateronoia a Iesu ei Ariki no te Patireia o te Atua i te rangi ra. (Mataio 24:3; Apokalupo 11:15) Ae, te tutara maira te Uanga o Aberahama i teianei mei te rangi maira! Kua tuatua a Iakobo ki te au Kerititiano i tona tuatau ra: “E akakoromaki katoa oki kotou; e akatinamou tikai i to kotou ngakau; kua vaitata rava taua [parutia] o te Atu ra.” (Iakobo 5:8, akaaite ia NW.) Inara, ko taua parutia ra e tika tikai i teianei! Mei teaa atu te tumu kia akatinamou tatou i to tatou au ngakau!

²³ Kia akaou tamouia to tatou irinaki anga i te au taputou a te Atua na te apii anga putuputu i te Pipiria e te pure anga tau oki. Auraka tatou e akamutu i te kite anga i ta Iehova ra akameitakianga ia tatou e akarongo ra i tana Tuatua. Ei reira ka aite tatou kia Aberahama, kare mei te aronga tei akaparuparu ra i to ratou akarongo e mate atu ei, mei ta Paulo i taiku maira. Kare e apinga te ka akataka ke ia tatou mei to tatou akarongo tapu maata ra. (Iuda 20) Te pure nei tatou e ka tika teia no te au tavini katoatoa o Iehova i te tuatau o te mataiti tavini anga 1999 e aere ua atu ki tetai tuatau mutu kore ki mua.

Kite Ainei Koe?

◻ Akapeea tatou me akarongo ki te Atua ra i teianei tuatau?

◻ Eaa te au puapinga te aere maira no te au pure tau ki te Atua ra?

◻ Me ka aru akarongo meitaki tatou i ta Iehova arataki anga, akapeea te akamaroiroi angaia to tatou akarongo ra?

◻ Ko teea au tu o te ripoti mataiti (kapi 12 ki te 15) taau i kite e reka tikai no te akamanako anga?

[Tutu i te kapi 12-15]

TE RIPOTI TAVINI ANGA MATAITI 1998 A TE AU KITE O IEHOVA I TEIANEI AO

(Akara i te au puka)

[Tutu i te kapi 16]

Me ka akarongo tatou ki te Tuatua a Iehova ra, ka akaouia to tatou irinaki anga ki roto i tana au taputou ra

[Tutu i te kapi 18]

Ka akamatutuia to tatou akarongo me kapiti atu tatou ki roto i te angaanga orometua