Ripoti a te Aronga Tutu Patireia

Te Akatupu ra te Atua i te Reira i Alaska

I RARO ake i tetai tapoki anga kiona e te aiti, te tiaki maira tetai ua meangiti i te tuatau no te tupu mai kia pakari. I roto anake i te toru marama poto ua o te tuatau maana i Alaska, penei ka tupu tetai ua kapati e toru miri mita ki te vaitata i te 40 kiro karama! Ae, ko teia enua tei manakoia e te manganui e e enua puapinga kore, ma te taaka ua e te anu ka rauka i te uua mai i te au ua maata.

E tika tikai teia i te tuanga pae vaerua i Alaska. I reira, i te enua o te au tuatau anu roa, kua rave ua atu te Au Kite o Iehova i te ruru i te ua o te Patireia. Mei tetai atu au tuanga ngai o te enua, te akatupu ra te Atua i te ua kia tupu i roto i te au ngakau uua.​—1 Korinetia 3:6, 7.

● I runga i tetai bus apii, kua kite atu tetai Kite mapu ko Vanessa tona ingoa i tetai tamaine apii, ko Ann, e noo ua ra aia koia anake ua i tona ngai. Kua akara anga maromaroa a Ann, no reira kua pati atu a Vanessa ia Ann kia noo mai i te pae iaia. No reira rai a Ann i maromaroa ei! Kua mate tona mama i te maki pukuatu, e i muri poto mai kua mate tona papa i te maki cancer. No reira a Ann i noo ei i ko i te au kopu tangata i Alaska.

I tetai Maanakai kua tapu a Vanessa na te kainga o tona oa ou iaia i runga i te angaanga tutu aere e kua akaruke i te poroutia Te Manako Tikai ra Ainei te Atua ia Tatou? I tera mai Monite i te apii, kua kimi a Ann i te Kite mapu ra. E manganui ta Ann au uianga Pipiria tei rauka ra ia Vanessa i te pau. “E raveia ana ta kotou apii anga kiea?” i ui ei aia. I te reira aiai kua aere a Ann ki tana uipaanga mua i ko i te Are Uipaanga Patireia.

Kare i roa ana i teia tamaine matiroeroe e 17 mataiti i te kite anga i te ‘au metua tane’ e te ‘au metua vaine,’ mei ta Iesu i taputou maira. (Mataio 19:29) E mei teaa atura i tetai atianga rekareka no te kite ia Ann ma te mataora e te katakata i te akatutu anga i tona akatapu anga kia Iehova na roto i te papetito anga ki te vai i te Uruoaanga Tapere “Au Karere o te Au Tu Atua”!

● I te au ngai mamao o te ngai Arctic Alaska maatamaata​—te ngai i takakeia te au vira e te au anere ua atu kiro mita ngai motutaa​—kua taangaangaia to te Taiate Punanga Tiaki pairere e rua enitini no te ruru i te ua Patireia i roto e tere atu i te 150 au ngai tangata. Inara te tupu anga pae vaerua na roto i tetai apii tamou i te Pipiria tei runga ua te reira i te tata anga pepa. I te mea e akaao anga te tata anga pepa no te manganui, ka anoanoia tetai puapii Pipiria kia manako akatutu e raukaʼi i te akariro i te inangaro o te tangata apiipii kia oraora. Akapeea ra teia i te akatupu angaia?

Kua rave a Kathy i tetai apii Pipiria tere ki mua kia Edna, noatu te noo ra raua e tere atu i te 600 kiro mita te mamao! I te mea e ka kopi i te au uianga i roto i te puka apii, kua maani a Kathy i tetai pepa angaanga ma te au uianga e kua tuku i tetai ngai va no te tataanga i te au pau anga. I muri ake i to Edna tata anga i te au pau anga, kua pau mai a Kathy e kua tata mai i te au tuatua tei anoanoia no te akataka meitaki i tetai manako. Kua akakite a Kathy: “E akanoo ana au i te aiai Ruitoru no ta maua ‘apii,’ e kua titau au i te akono i te reira mei taku ka rave i tetai ua atu akanoo anga apii Pipiria. Kua tuku katoa au i tetai tikiro ateretiia, ma te tamepa na Edna. I te mea e rua epetoma ka pou no te mereanga, ka akara anga manga marie rai tetai apii na roto i te tata anga pepa.”

Ka akamanako ana i te rekareka i te aravei tikai anga a Kathy raua ko Edna i ko i te uruoaanga tapere i Anchorage i muri ake i te apiianga e tai ngauru marama na roto i te mere! Kua rekareka katoa te Au Kite no tei tae mai te aronga apiiia i te Pipiria e tetai atu aronga tei inangaro mei te au vira mamao e manganui i Alaska.

Noatu e kua akara anga maria te tupu anga i tetai au taime, ka tupu viviki tetai au “ua” me akamaeuia ki te marama o te tuatua mou. I te avereti, e tere atu i te tai anere aronga akapaapaa ou ia Iehova tei papetitoia i te mataiti takitai i Alaska! Ka karanga tatou, “Kia akameitakiia koe, e Iehova,” no te akatupuanga i te reira!