Ripoti a te Aronga Tutu Patireia

“E Puareinga Roa to Toou ra Au Tangata”

E repera to te rangatira o te nuku vaeau Arama ra ko Naamana. Me ka vaioia kare e rapakauia, ka akariro teianei maki kino kia akakinoia te kopapa e ka mate oki. Eaa ta Naamana ka rave? I roto i te aronga o to Naamana ra ngutuare ko tetai tamaine meangiti ua, “no te enua maira no Iseraela ei tuikaa.” E kua tuatua mataku kore atura aia e kua akataka atu oki i te peroveta ko Elisaia te ka rauka kia rapakau ia Naamana.​—2 Ariki 5:1-3.

No tona tu mataku kore, kua kimi a Naamana ia Elisaia ra e kua rapakauia aia. Pera katoa oki, kua riro a Naamana ei tangata akamori ia Iehova ra! Ko teianei tupu anga, tei tataia ra i te Pipiria, kua tupu i te tai ngauru anere mataiti M.T.N. (2 Ariki 5:4-15) I teia tuatau nei, e manganui te au mapu te akaari ra i te tu aiteite te mataku kore i te tuatuaanga no runga i te au manako no te Patireia. Te akakite maira te tupu anga no Mozambique te aru mai nei i teia.

Ko Nuno e ono mataiti tetai papuritia o te tuatua meitaki kare ra i papetitoia ake. Noatu ra i mua ake i tona riro anga ei tetai papuritia kare i papetitoia, kua akaputu a Nuno i te au tamariki i te pae mai i tona kainga, kua oronga i te pure, e oti kua apii ia ratou i te Pipiria, kua taangaanga i te puka My Book of Bible Stories.

E manganui te au taime kua ara vave a Nuno i te popongi Maanakai e kua akamaaraara atu i tona ngutuare tangata: “A teia ra ka aere tatou ki vao i te angaanga orometua.” Kua kitea tona tu totomapu no te angaanga orometua i roto i etai atu au tu ra. I te aere kapitianga ma tona nga metua i te tutu aere anga i te arataa i Maputo, e putuputu a Nuno i te aravei anga i te au tangata koia anake ua. I tetai atianga mei te reira ra, kua aere maira tetai tangata pitiniti kiaia e kua ui mai: “Eaa koe i okooko ei i teianei au makatini?” Kua tuatua atura Nuno: “Kare au e okooko ana i te au makatini, inara ka ariki au i te au tauturu ei tauturu i te angaanga tutuanga.” Kua na ko atura taua tangata pitiniti ra: “Noatu rai e kare au e inangaro ana, te manako meitaki ra au i toou tu manako e te kite oki. Ka anoano au kia tauturu atu i teianei angaanga.”

I tetai atu atianga, kua aravei atura Nuno i tetai tangata i te arataa e kua oronga kiaia i te puka True Peace and Security​—How Can You Find It? Kua ui atu taua tangata ra: “Kare ainei koe e aere ana ki tera apii i ko ra?” “Ae,” ta Nuno i pau atu, “Te aere ra au ki tera apii, inara i teia ra te oronga nei au i tetai tuatua puapinga maata no roto mai i teianei puka. Te akakite maira ia e ka rauka ia koe kia noo ki roto i te ao ou ta te Atua ra ka apai mai, mei tei akaariia maira i te tutu i roto i teianei puka.” Kare ra a Nuno i kite e ko te tangata tana i tuatua atura ko tetai puapii i tona ngai apii ra. Kare e kua ariki anake te puapii ra i taua puka ra mari ra i teianei kua rauka putuputu katoa iaia nga makatini Te Punanga Tiaki e te Awake! no ko mai ia Nuno ra.

I te ui anga kia Nuno eaa aia i inangaro ei kia rave i te angaanga tutu aereanga, kua karanga aia: “Te anoano ra au kia tuatua ki te au tangata e kia apii atu ia ratou no Iehova e tana Tamaiti, ko Iesu Karaiti.” Kua tuatua katoa aia: “E me ka kore te au tangata e anoano kia akarongo atu, kare ia i te tumu no te taitaia.”

I te ao katoa, e au tauatini ua atu te au mapu mei ia Nuno ra “e puareinga roa to [ratou]” kia apii e kia tutu atu i te Patireia o te Atua ra. (Salamo 110:3) Inara kare teia e tupu ua mai. Te au metua tei apii ra i ta ratou tamariki no runga ia Iehova mei te meangiti anga maira, kua akanoo i tetai akatauanga meitaki i te angaanga orometua ra, e ka aruaru maroiroi ei i te au manako no te Patireia ra ka tutaki apinganuiia.