Kua Inangaro Aia i te Tauturu

KUA kite ana ainei koe i tetai tangata e kino tikai te maki?​— E inangaro ana koe i te rave i tetai apinga ei tauturu iaia?​— Akapeea ra me no tetai enua ke mai aia me kore e akonoanga ke tana? Te inangaro ra rai koe i te tauturu iaia kia meitaki mai aia?​— Ta tetai tamaine ou ia i rave tei noo ana i roto i te enua o Iseraela vaitata atu e 3,000 mataiti i topa akenei. Ka pukapuka ana taua e eaa tei tupu mai.

E tupu putuputu ana te tamaki i rotopu ia Iseraela taito, ko te ngai ia e noo ra te tamaine, e te enua ko Arama i te pae mai. (1 Ariki 22:1) I tetai ra kua aere mai te aronga o Arama ki Iseraela e kua apai atu i te tamaine meangiti ei tuikaa. Kua apainaia atu aia ki Arama, te ngai i riro mai ei aia ei tavini na te vaine a Naamana, te rangatira no te nuku vaeau o Arama. E kino tikai te maki o Naamana tei tapaia e e repera, te ka akariro i etai kiko o tetai tangata kia pururu ua ki raro.

Kua akakite te tamaine tavini ki te vaine a Naamana e akapeea tana tane e akaoraia ai. Kua karanga aia e: ‘Naringa e tei Samaria a Naamana, ka rauka i te peroveta o Iehova ko Elisaia i te akakore atu i tona repera.’ I na, te tu e tuatua ra te tamaine tavini no runga ia Elisaia te akariro ra ia Naamana kia irinaki e penei ka rauka tikai i te peroveta i te akaora iaia. Ma te akatika anga a Bene-adada, te ariki o Arama, kua aere atu a Naamana ratou ko tetai au tavini i tetai tere roa e 150 kiro mita te mamao i te kimi ia Elisaia.

Te mea mua, kua aere atu ratou kia Iehorama, te ariki o Iseraela. Kua akaari atu ratou i te reta a te Ariki ko Bene-adada kiaia te pati maira i te tauturu no Naamana. Inara kare a Iehorama e irinaki ana ia Iehova me kore i te peroveta ko Elisaia. Te manako ra a Iehorama e te inangaro ra a Bene-adada i te tamaki iaia. I to Elisaia akarongo anga no runga i teia, kua akakite atu aia ki te Ariki ko Iehorama e e: “Tuku mai ia Naamana ki ko nei kiaku nei.” Te inangaro ra a Elisaia i te akaari i to te Atua mana ei akaora mai ia Naamana no te kino o tona maki.​—2 Ariki 5:1-8.

Te tae mai anga a Naamana ki te are o Elisaia ma te au oroenua nana e te au kariota ra, kua tono maira a Elisaia i tetai karere kia akakite kiaia e: ‘E aere koe e pai e itu pai anga i roto i te Kauvai Ioridana, ka ora ai koe.’ Riri a Naamana. Manako ra aia e ko Elisaia te ka aere mai ki vao e te ka arapaki i tona rima ki rungao i te repera kia ngaro atu te reira. Inara, ko teia karere ua tana i kite atu! No reira kua ariu ke akera a Naamana ma te riri e te akamata ra i te oki atu ki te kainga.​—2 Ariki 5:9-12.

Eaa taau ka rave me ko koe tetai o te au tavini o Naamana?​— Ina, kua ui atu te au tavini kiaia e: ‘Naringa paa ei tuatua maata ta Elisaia i tuatua maira kia koe, kare ainei koe e rave i te reira? Eaa ka kore ei e rave i teia mea mama ua nei​—kia pai e kia ma atu ei?’ Kua akarongo a Naamana kia ratou. Kua aere atu aia “ki raro, kua paî atura i Ioridana, e itu akera paî anga, . . . oki akaou maira tona kiko mei to te tamaiti ou ra.”

Kua oki atu a Naamana kia Elisaia e kua na ko atura: “I na, kua kite atura au e, kare rava e Atua i te ao katoa nei, mari ra i Iseraela nei.” Kua taputou aia kia Elisaia e kare rava aia “e apai akaou i te atinga karakaratio, e te atinga katoa, ki te au atua ke, mari ra kia Iehova anake.”​—2 Ariki 5:13-17.

Ka inangaro ainei koe i te tauturu i tetai tangata kia kite ia Iehova e eaa tana ka rave, mei ta tetai tamaine meangiti i rave ana?​— Ia Iesu i runga i te enua nei, kua irinaki tetai tangata tei tuia e te maki repera iaia e kua karanga e: ‘Me ka inangaro tikai koe i te tauturu mai iaku, ka rauka ia koe.’ Kua kite ainei koe e eaa ta Iesu pau anga?​— “Kua tika ïa iaku.” E kua akaora mai a Iesu iaia, mei ia Iehova rai i te akaora anga ia Naamana.​—Mataio 8:2, 3.

Kua kite ainei koe i te ao ou ta Iehova ka anga mai ka rauka i te au tangata ravarai te maroiroi e ka ora ua atu e tuatau ua atu?​— (2 Petero 3:13; Apokalupo 21:3, 4) No reira, papu tikai e ka inangaro koe i te akakite ki tetai ke i teia au mea umere!