Au Uianga a te Aronga Tatau
Kia tau ki ta Mataio 17:20, kare i rauka i te au apotetoro te rapakau i tetai tamaiti mamae ‘no to ratou akarongo kore.’ Inara, ia Mareko 9:29, kua piri atu to ratou rauka kore ki te anoano anga no te pure. Eaa ra i tuke ei nga akamarama anga tei orongaia i nga papaanga Evangelia tukeke?
E tikai, e tuanga kapipitiia nga papaanga e rua, kare i patoi tetai ki tetai. Te mea mua, e akara ia Mataio 17:14-20. Kua akakite mai tetai tangata kua tu tana tamaiti i te maki uti e kare i rauka i te au pipi a Iesu te rapakau i te tamaiti. I reira kua rapakau atura Iesu i te tamaiti na te tuaruanga i te temoni tei tamamae iaia. Kua ui te au pipi eaa i kore ei i rauka ia ratou te tuaru te temoni. Kia tau ki ta Mataio papaanga, kua pau atu a Iesu: “No to kotou akarongo kore; tikai taku e karanga atu kia kotou nei, Angairi e akarongo to kotou mei tetai ua sinapi nei ka tika ia kotou kia karanga atu ki teianei maunga, Ka aere i ko atu; e nana e aere ua; e kare rava e mea e kore e tika ia kotou.”
E uri i teianei kia Mareko 9:14-29, te ngai ka kitea e tatou tetai tuatua maata atu. Ei akaraanga, te akakite maira a Mareko 9:17 e i teia turanga na tetai vaerua kino i akatupu i te maki uti. E mea tau kia akamanako te tuatua ra te Pipiria i tetai ngai e kua rapakau a Iesu i te maki uti e te au tangata uruia e te temoni. (Mataio 4:24) I roto i teia turanga tuke, kua akatupuia te au tupu anga viviki e tetai “vaerua murare,” koia oki, e vaerua kino, ta te taote ko Luka i akapapu maira. (Luka 9:39; Kolosa 4:14) E akara i te tuatua ia Mareko 9:18, “E te ngai e opukia mai ei aia [te temoni] iaia.” No reira kare te tamaiti i akakino tamouia e te temoni, i tetai atianga ua ra. Noatu rai, kare i rauka i te au pipi te tuaru i te temoni e te rapakau i te tamaiti. I te uianga ratou eaa ra, kua pau atu a Iesu: “Kare teianei tu demoni e tae ua ki vao, mari ra i te pure e te akakore anga kai.”
Inara, na te tatau matakite anga i ta Mareko papaanga, te akaari maira e kare e patoi anga ki ta Mataio i tata ra. Ia Mareko 9:19, ka tatau tatou kua mii a Iesu i te tu akarongo kore o te reira uki. I te Mareko 9 irava 23, kua tataia e kua akakite aia ki te metua o te tamaiti: “E tika te au mea katoa nei i te tangata akarongo ra!” No reira kua tuatua maata a Mareko i te puapinga o te akarongo. I roto ra i te Mareko 9 irava 29, kua oronga mai a Mareko i tetai tuatua kapipiti atu. Kua kapiti a Mareko i ta Iesu i tuatua no runga i te pure, kare a Mataio e Luka i kapiti ana.
Eaa, i reira, ta tatou ka tuatua? I tetai atu au atianga kua rauka i te 12 apotetoro e te 70 pipi te tuaru i te au vaerua kino. (Mareko 3:15; 6:13; Luka 10:17) Inara i teia akaraanga kare i rauka i te au pipi te tuaru i te temoni. Eaa ra? Me kapipiti tatou i te au tuatua tei taikuia i te au papaanga ke ke, ka taopenga tatou kare te reira i akapapaia e kia pera i teia turanga. Penei ko tetai tuanga i te manamanata ko te temoni i o mai, i te akara anga e tuke te au tu, te au inangaro, e te au tu karape o te au temoni. I teia ra, kua anoanoia te akarongo pakari, e te pure akatenga no ta te Atua tauturu. E tikai, e akarongo to Iesu mei te reira. Kua rauka katoa iaia te turu anga o Tei Akarongo i te pure, koia tona Metua. (Salamo 65:2) Kare ua e ka rauka ia Iesu te rapakau te tamaiti maki na te tuaru anga i te temoni inara kua rave aia i te reira.