Au Uianga a te Aronga Tatau

Me akarongo tetai Kerititiano i te au reo, te aite anga ainei o te reira e tei raro ake aia i te tamanataanga a te temoni?

Kare. Kua ripotiia mai e i akaari mai ana te au temoni ia ratou uaorai na te reira mataara, e manganui te aronga tataki tai tei rongo ana i te au reo me kare kua kite i tetai au tu manamanata kare i rauka i te akatakaia mai, kua kitea mai na roto i te kimikimianga e e maki to ratou.

Noatu i te anere mataiti mua, kua kitea mai e i tetai taime kua akatupu te au takinoanga a te au temoni e te au turanga i te pae kopapa i te au tupuanga aiteite. Ia Mataio 17:14-18, ka tatau tatou no runga i tetai tamaiti ou tei akaoraia e Iesu. Noatu e kua akaari mai te tamaiti ou i te tu kino tikai o te maki uti, na tetai temoni tikai i akatupu i tona mamae. Inara, i tetai atianga i mua atu te apai mai anga tetai urupu i te au tangata tei tamamaeia kia Iesu kia akaoraia, kua kapitiia mai etai tei “tuia e te temoni ra e te maki uti ra.” (Mataio 4:24, NW) I te akaraanga, kua kiteaia e ko etai au maki uti kare na te temoni. E maki pae kopapa to ratou.

Kua ripotiia mai e ko etai tei mamae no te maki schizophrenia, e maki te ka rauka i te rapakau putuputuia ma te vairakau, te rongo ra i te au reo me kare te kite ra i etai au maki te akara anga ei mea manamana.a Ko tetai au turanga i te pae kopapa penei ka akatupu katoa i te oripuanga o te manako ta etai e manako tarevake ra e na te au temoni i akatupu mai. No reira, penei ko etai aronga tataki tai tei ripoti mai e kua rongo ana i te au reo me kare e au tu manamanata atu tetai penei e kare e tau kia akakore i te tamanamanata anga temoni, ka tau aia kia akamaroiroi tikaiia kia akamanako i te kimikimi anga me e akatakaanga ainei no te pae kopapa tana e kite ra.

[Tataanga Rikiriki i Raro]