“Na te Tuatua-Mou Kotou e Akarangatira”
“Ka kite ïa kotou i te tuatua-mou, e na te tuatua-mou kotou e akarangatira.” I akakite ei a Iesu iaia e apii ra i te urupu i roto i te iero i Ierusalema. (Ioane 8:32) Kua rauka ua i ta Iesu au apotetoro i te akataka i ta Iesu au apii anga e ko te tuatua mou. Kua kite ana ratou i te au kite anga maata o te akamata anga tu-Atua o to ratou puapii.
INARA, i teia tuatau, penei ka ngata i etai i te akataka i te tuatua mou ta Iesu e tuatua ra. Mei te au ra o te peroveta ko Isaia, i teia tuatau te vaira “ia ratou, to tei tuatua i te kino ra e meitaki, e te meitaki ra e kino; tei tuatua i te poiri ra e mārama, e te mārama e poiri, tei tuatua i te maamaa ra e vene, e te vene ra e maamaa.” (Isaia 5:20) Ma te au manako e manganui, te au apii anga, e te au tu oraanga te akamaataia ra i teia tuatau, e manganui te tangata te manako ra e te tau ua ra te au mea e kare e apinga mei te tuatua mou.
I te tuatua anga a Iesu ki tana aronga akarongorongo e na te tuatua mou kotou e akarangatira, kua pau atu ratou i te na ko anga: “E tamariki matou na Aberahama, kare ua matou i riro ei tuikaa na etai ke: eaa koe i tuatua mai ei e, Ka akarangatiraia kotou?” (Ioane 8:33) Kare ratou i umuumu ana no tetai ke me kare tetai apinga kia akarangatira ia ratou. Inara kua akamarama atu a Iesu: “Tika, tika tikai taku e karanga atu kia kotou, ko te rave i te kino ra, e tuikaa ïa no te kino.” (Ioane 8:34) Ka rauka i te tuatua mou ta Iesu e tuatua ra i te akatuera i te mataara kia akarangatiraia mei te ara. Kua karanga a Iesu: “Na te Tamaiti kotou e akarangatira ra, kua rangatira tika ïa kotou.” (Ioane 8:36) No reira ko te tuatua mou te ka akarangatira i te tangata koia oki ko te tuatua mou no runga ia Iesu Karaiti, te Tamaiti a te Atua. Na roto ua i te akarongo i te atinga o te oraanga apa kore o Iesu e raukai tetai kia akarangatiraia mei te ara e te mate.
I tetai atianga kua tuatua a Iesu: “Ka akatapu koe ia ratou i te tuatua-mou naau, ko te tuatua aau na te tuatua-mou.” (Ioane 17:17) Ko te tuatua a te Atua tei akakiteia i roto i te Pipiria te tuatua mou te ka apai mai i te rangatira mei te mataku tau kore e te akamori anga pikikaa. Tei roto i te Pipiria te tuatua mou no runga ia Iesu Karaiti, te ka taki atu i te tangata kia tuku i te akarongo ki roto iaia e ka akatuera i te mataara ki tetai manakonakoanga kaka no te tuatau ki mua. E apinga meitaki ra i reira i te kite i te tuatua mou o te Tuatua a te Atua!
Mei teaa ra te puapinga no te kite i te tuatua mou? E manganui te au akonoanga i teia tuatau, te karanga ra e te aru ra i te Pipiria, kua akakeu maataia e te au apii anga e te au peu a te tangata. E putuputu te taime, kare te au arataki akonoanga e manata ana no runga i te tika tikai o ta ratou tuatua mei ia ratou e manata ra kia arikiia mai e te urupu. Kua manako etai e te merengo ua ra te Atua i tetai atu tu akamori anga, tera ua kia ngakau tae te reira. Inara kua akamarama atu a Iesu Karaiti e: “Kua vaitata, e teianei oki taua ora ra, e akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra.”—Ioane 4:23.
Me ka inangaro tatou i te akamori i te Atua ma te arikiia, ka tau tatou kia kite i te tuatua mou. E maro anga puapinga teia. Tei runga to tatou mataora anga mutu kore i te reira. No reira, ka tau te katoatoa kia ui kiaia uaorai: ‘Te arikiia ra ainei taku akamori anga e te Atua? Te inangaro ngakau tae ra ainei au i te kite i te tuatua mou o te Tuatua a te Atua? Me kare te mataku ra ainei au i ta te kimikimi anga meitaki ka akakite mai?’