E Puapinga Ainei te Tuatua Mou?

Penei e ngata i te akara i te mea tika e te mea tarevake? Te irinaki ra te tangata i to ratou uaorai manako ngakau e kare i te tuatua mou e te au tika. Ei akaraanga, te tuatua “taroaroa i te tika,” tei akatupuia no teia turanga, e mea matauia i teia tuatau.a Te tupu nei teia i teianei ao, e maata te karanga nei kare e tuatua mou.

Kare teia manako i te mea ou. E 2,000 mataiti i topa, kua ui to Roma Kavana ko Ponotio Pilato: “Eaa te tuatua-mou?” (Ioane 18:38) Noatu kare a Pilato i tiaki ana i te pauanga, e uianga puapinga tana. Te oronga maira te Pipiria i te pauanga ka mareka koe, e ka tauturu ia koe i roto i teia ao tei “taroaroa i te tika.”

Te vaira ainei te tuatua mou?

Ae. Te akakite ra te Pipiria i te “tuatua-mou” no te au mea tika e te tu akono tika. Te apii maira e ko te Atua ko Iehovab te Tumu o te tuatua mou, e koia “te Atua tuatua-mou.” (Salamo 31:5) Tei roto i te Pipiria te tuatua mou no ko mai i te Atua, e te akaaiteia ra te reira ki te mārama, te ka arataki ia tatou i roto i teianei ao tika kore.—Salamo 43:3; Ioane 17:17.

Akapeea e kitea ai e koe te tuatua mou?

Kare te Atua e inangaro ia tatou kia āriki matapo ua i te tuatua mou mei te Pipiria. Mari ra, te pati maira aia kia akara matatio e kia taangaanga i to tatou manako tau auraka e irinaki ua i te manako ngakau. (Roma 12:1) Te inangaro maira aia kia kite e kia akaperepere iaia ma te “manako katoa,” e kia akataka meitaki tatou i te tuatua mou mei te Pipiria.—Mataio 22:37, 38; Angaanga 17:11.

Noea mai te pikikaa?

Karanga te Pipiria no ko mai i te enemi o te Atua, ko te Tiaporo ko Satani, ta te Pipiria e karanga ra “e metua oki no te pikikaa.” (Ioane 8:44) Kua pikikaa aia i te Atua ki te nga tangata mua. (Genese 3:1-6, 13, 17-19; 5:5) Mei reira mai, kua pikikaa ua a Satani e kua uuna i te tuatua mou no te Atua.—Apokalupo 12:9.

Eaa te pikikaa i maata ai i teia tuatau?

Karanga te Pipiria i teia “tuatau openga,” e te akavare maata nei a Satani i teianei ao. Ka tuatua pikikaa ua te tangata no te akavare e te arataki ke i tetai. (2 Timoteo 3:1, 13) Tei roto katoa te pikikaa i te au akonoanga o teia tuatau. Mei ta te Pipiria i totou, “no te navenave o to ratou taringa e akaputu ei ratou i te orometua e tau i to ratou uaorai inangaro” e “ka uri ke ratou i to ratou au taringa mei te tuatua mou.”—2 Timoteo 4:3, 4.

Eaa te tuatua mou i puapinga ai?

E akatupu ana te tuatua mou i te tangata kia irinaki i tetai e tetai. Me kare e irinaki, ka puapinga kore te au pirianga oa e te tangata. Karanga te Pipiria e te inangaro ra te Atua i te akamoringa kia akatumuia ki runga i te tuatua mou. Karanga ra: “Te aronga e akamori [i te Atua] ra, kia akamori ma te vaerua e te tuatua-mou ra e tikaʼi.” (Ioane 4:24) Kia apii akapeea te tuatua mou Pipiria me tauturu ia koe kia kite i te pikikaa i roto i te au akonoanga e kia matara mai mei te reira, tatau i te au atikara “Lies That Make God Seem Unlovable.”

Eaa te Atua i inangaro ei iaku kia kite i te tuatua mou?

Inangaro te Atua kia ora koe, e te anoanoia ra koe kia apii i te tuatua mou no runga iaia. (1 Timoteo 2:4) Me apii koe i te au turanga o te Atua no te tika e te tarevake e te aru i te reira, ka rauka tetai pirianga oa kiaia. (Salamo 15:1, 2) Kua tono mai te Atua ia Iesu ki te enua nei kia tauturu i te tangata kia apii i te tuatua mou. Inangaro te Atua kia akarongo tatou ki te au apiianga a Iesu.—Mataio 17:5; Ioane 18:37.

Ka takore ainei te Atua i te tuatua pikikaa?

Ae. E makitakita ana te Atua me akavare te tangata i tetai e tetai. Kua taputou mai aia i te takore i te aronga pikikaa i te enua nei. (Salamo 5:6) Me rave te Atua i te reira, ka akatupu katoa aia i tana taputou: “Te vaa tuatua-mou ra, ka akatinamouia ïa e tuatau ua atu.”—Maseli 12:19.