E Rave Tamou kia Akaoti i to Kotou Uaorai Ora!

“E aku au akaperepere e, . . . e rave akaoti ua i to kotou uaorai ora ma te mataku e te rutetetete.”​—PHILIPI 2:12.

1, 2. Eaa te au manako matauia ra tei taki atu i te aronga e manganui kia manako ngakau e kare a ratou akatere anga ki rungao i te tu tupu anga ki to ratou au oraanga?

“I ANAUIA mai ainei koe ma tera te tu?” I mua ua akenei, kua akakite taka meitakiia mai taua uianga ra ki runga i te kapi mua o tetai makatini rekaia. I raro ake i te tumu tuatua kua mama mai te au tuatua: “Te tu tangata, te manako ngakau, e te au iki anga oraanga. I roto i te au apii ou te akaariia maira tei roto te maata anga i toou au tu ua.” Penei ka akariro taua au tuatua ra i tetai papaki kia manako ngakau e e meangiti ua ta ratou akatere anga i to ratou uaorai oraanga.

² Kua mataku etai ke e ko te akonoanga tau kore a to ratou nga metua me kare te apiianga tau kore a to ratou au puapii kua riro kia akaapa ia ratou ki tetai oraanga mataora kore. Penei ka manako ngakau ratou e kua topa ratou kia rave akaou i te au tarevake a to ratou nga metua, kia rave i to ratou au manako kino katoa, kia tiratiratu kore kia Iehova​—ei tapoto anga, kia rave i te au iki anga kikino. Ko ta te Pipiria ainei te reira i apii mai? Te papu ra, te vaira etai aronga akonoanga te manako ra e te apii ra te Pipiria i etai apinga mei teia, koia te apiianga no te predestination. Kia tau ki ta teianei apiianga, kua akanoo roaia mai e te Atua ra te au tupu anga ravarai i toou oraanga.

3. Eaa te tuatua akamaroiroianga a te Pipiria no te rauka anga ia tatou kia rave apainga no to tatou tuatau ki mua?

³ E okotai ua tuatua matauia no teianei au manako tuke tuke katoatoa: E meangiti ua taau ikianga, e meangiti oki te akatereanga e akapeea te tupu anga ki toou oraanga. Ko tetai tuatua akamaroiroi kore ia, kare ainei, e te kapiti atura te akamaroiroianga kore ki taua manamanata ra. Te tuatua ra a Maseli 24:10 e: “Kia potopoto to aʼo i te rā i eke ei ra, kua iti roa toou maroiroi.” Inara, te akamaroiroiia ra tatou kia apii, e kia tau ki ta te Pipiria, ka rauka ia tatou ‘kia rave akaoti ua i to tatou uaorai ora.’ (Philipi 2:12) Akapeea ka raukai ia tatou kia akamaroiroi i to tatou irinaki anga papu i teianei apiianga Tuatua Tapu?

Te Angaanga “Patuanga” ta Tatou e Rave ia Tatou Uaorai

4. Noatu rai e te tuatua ra a 1 Korinetia 3:10-15 no te patu anga ma te au apinga kare e ka i te ai, eaa ta teia kare ra e akakite mai ana?

⁴ E akamanako i te akatutu anga a te apotetoro ko Paulo te kitea ra ia 1 Korinetia 3:10-15. I reira, te tuatua ra aia no tetai angaanga patuanga Kerititiano, e ka rauka te kaveinga o tana akatutu anga kia akapiriia atu ki te angaanga orometua i roto e i vao katoa oki. Te akakite ra ainei aia e me ka iki tetai pipi i te openga kia tavini ia Iehova e kia rave tamou oki i taua iki anga ra e e apainga ia na te aronga tei apii e tei tereni oki iaia? Kare. Kua akaketaketa maira Paulo i te puapinga maata o te raveanga te puapii ra i te meitaki te ka rauka iaia i te angaanga patuanga ra. Inara mei ta tatou i kite ana i te atikara i mua akenei, kare aia i tuatua e kare e iki anga a tei apiiia ra me kare a te pipi ra i taua tumu ra. E tika, te tou maira te akatutu anga a Paulo i te angaanga ta tatou e rave ra kia etai ke, kare i te patuanga ia tatou uaorai. Te kitea ra teia no te mea te tuatua ra Paulo no te angaanga tau kore i te patuanga te ka akapouia ko tei patu ra ka ora aia uaorai. Inara, te akapiri atura te Pipiria i etai taime i taua tuatua akatutu anga ra ki te angaanga ta tatou e rave ra no tatou uaorai.

5. Eaa te au Tuatua Tapu te akakite maira e ka tika te au Kerititiano kia rave te angaanga “patuanga” ia ratou uaorai?

⁵ Ei akatauanga, e akamanako ia Iuda 20, 21: “Kareka kotou, e aku au akaperepere e, i te patu anga ia kotou uaorai, i to kotou akarongo tapu maata ra, i te pure anga ma te Vaerua Tapu. Tamou tikai kotou i to kotou uaorai inangaro i te Atua.” Kua taiku a Iuda i konei i taua tuatua Ereni rai no te “patuanga” mei ta Paulo i taiku ia 1 Korinetia pene 3 ra, inara i te akara anga ko tana tumu kia patu tatou ia tatou uaorai ki runga i te pange o to tatou akarongo. I ta Luka tataanga i ta Iesu ra akatutu anga no te tangata tei patu ra i tona are ki runga i tetai papa, kua taiku i taua tuatua Ereni rai no te “pange” mei ta Paulo i taiku i tana akatutu anga no te patuanga Kerititiano ra. (Luka 6:48, 49) Pera katoa oki, kua tuatua a Paulo i te akatutu anga no te akanoo angaia ki runga i tetai “pange” i tana akamaroiroianga i tona au oa Kerititiano kia aere ki mua i te pae vaerua. Ae, te apii maira te Tuatua a te Atua kia rave tatou i te angaanga “patuanga” ia tatou uaorai oki.​—Ephesia 3:15-19; Kolosa 1:23; 2:7.

6. (a) E akatutu mai e akapeea te pipi Kerititiano taki tai i te tupu maianga no tetai angaanga patuanga kapiti ra. (e) Eaa te apainga a te au pipi taki tai ra ka rave?

⁶ E angaanga ainei na tetai tangata okotai ua te patu anga i tetai Kerititiano? Inara, e tamanako ana e kua iki koe kia patu i tetai are. Kua aere atu koe ki tetai tangata maani parani no etai parani. Noatu rai e kua manako koe naau uaorai e rave te maata anga o te angaanga, kua pati ra koe i tetai tangata akatu are kia rave angaanga kapiti korua e kia akakite kia koe i te au ravenga meitaki. Me ka akamou aia i tetai pange maroiroi, e ka tauturu ia koe kia kite i te au parani, kia akakite mai i te au apinga meitaki kia oko mai, e kia apii ia koe i te patuanga, penei ka akatika koe e e angaanga meitaki tana i rave. Inara ka peea me kare koe e rave i tana i akakite mai, ka oko te au apinga okomama e te tau kore ua, e penei ka tapae ke i te au parani a te tangata maani parani. E mea tika ra e kare e rauka kia akaapa koe i te tangata akatu are me kare i te tangata maani parani me ka pururu te are! Mei te reira katoa, te pipi Kerititiano taki tai ra e tupu anga ia no tetai rave kapitianga i te patuanga. Ko Iehova te pu maani parani. Te turu ra aia i te Kerititiano tiratiratu te rave ra ‘ei oa rave angaanga no te Atua,’ te apii ra e te patu ra i tei apiiia. (1 Korinetia 3:9) Inara te o katoa atura tei apiiia. I te openga ra, nana te apainga no tona uaorai aerenga oraanga. (Roma 14:12) Me te anoano ra aia i te au tu Kerititiano meitaki, ka tika aia kia angaanga pakari kia raukai te reira, kia patu i te reira ki roto iaia uaorai.​—2 Petero 1:5-8.

7. Eaa te au akaaoanga ta etai au Kerititiano e aro atura, e penei eaa te ka akapumaana ia ratou ra?

⁷ Te riro ra ainei te aite anga o teianei e, kare e tuanga a te au tu ua, te reva, e te tu tau o to tatou au puapii? Kare rava ia. Te akakite maira te Tuatua a te Atua e ko teianei au mea taki tai e puapinga maata e te mana oki. E manganui te au tu ara e te tau kore no te anau maianga e ka rave anga ngata kia tamakiia atu. (Salamo 51:5; Roma 5:12; 7:21-23) Te terenianga a te au metua e te reva oki o te kainga ka riro ei tetai mana maata ki runga i te aronga ou​—no te meitaki me kare no te kino. (Maseli 22:6; Kolosa 3:21) Kua akaapa a Iesu i te au arataki akonoanga ngati Iuda ra no te au tupu anga kikino o ta ratou apiianga ki runga ia etai ke ra. (Mataio 23:13, 15) I teianei tuatau, te angaanga ra taua au tumu ra ki runga ia tatou katoatoa. Ei akatauanga, te aro atura tetai papaki o te au tangata o te Atua ra i te au akaaoanga ei tetai tupu anga ngata no te au tamariki. Te tau ra to tatou tu takinga meitaki e te aroa no teia aronga. Ka rauka ia ratou te akapumaana no te tuatua mai o te Pipiria e kare ratou i roto i te tu kino kia rave akaou i te au tarevake a to ratou ai metua me kare kia tiratiratu kore. E akamanako ana i akapeea tetai papaki o te ui ariki o Iuda i taito ra i te akatutu anga mai i teia tumu.

Te Ui Ariki o Iuda​—Na Ratou Uaorai ta Ratou Au Iki Anga

8. Eaa te akatauanga puapinga kore a Iotama i tona metua, inara eaa te iki anga tana i rave?

⁸ Kua riro a Uzia ei ariki no Iuda iaia e 16 ua ona mataiti e kua tutara e 52 mataiti. I te maata anga o taua tuatau ra, “kua rave aia i te mea tika ki mua i te aroaro o Iehova, mei ta tona metua, mei ta Amazia i rave ra.” (2 Ariki 15:3) Kua akameitaki a Iehova iaia ma etai au autu anga poitirere i te vaeau. Inara, e mea mii, kua aere taua autu anga ra ki te upoko o Uzia. Kua riro aia kia akatietie e kua akameameaau ia Iehova na te orongaanga akakakara i te atarau i te iero ra, koia tetai angaanga tei akatakaia na te kau taunga ra. Kua akoia a Uzia mari ra kua riri aia. I reira kua taakaakaia aia​—kua rokoia aia e te maki repera e kua oparaia kia noo no te toenga o tona oraanga i te tu taka keanga. (2 Paraleipomeno 26:16-23) Eaa ta tana tamaiti ko Iotama i rave ki te reira katoa? Ka ngoie ua i taua tangata ou ra te riro i te mana o tona metua e ka riri ei ki ta Iehova ra akatikatika anga. Penei ka riro ua te au tangata ra kia mana kino ki runga iaia i te mea kua rave ua ratou i te au ravenga akonoanga tarevake ra. (2 Ariki 15:4) Inara kua rave a Iotama i tana uaorai iki anga. “Kua rave aia i te mea tika i mua i te aroaro o Iehova.”​—2 Paraleipomeno 27:2.

9. Eaa etai o te au mana meitaki ki runga ia Ahaza, inara i akapeea te tuanga openga o tona oraanga?

⁹ Kua tutara a Iotama e 16 mataiti, kua vai tiratiratu kia Iehova no taua tuatau katoa ra. No reira, e akatauanga meitaki to tana tamaiti ko Ahaza, no tona metua tiratiratu ra. E au tu mana meitaki ke katoa oki to Ahaza ra. Kua akameitakiia aia kia ora i te tuatau o nga peroveta tiratiratu ra ko Isaia, ko Hosea, e Mika oki i te rave totouanga i te enua ra. Inara, kua rave aia i tetai iki anga kino. “Kare ra aia i rave i te mea tika i mua i te aroaro o Iehova, mei tona tupuna ra mei ia Davida.” Kua maani aia i te au tiki no Baala e kua akamori ia ratou e kua tutungi oki i etai o tana uaorai au tamaroa i te ai atinga ki te au atua peikani ra. Noatu rai te au tu mana meitaki roa, kua puapinga kore kino rava aia ei tetai ariki e ei tetai tavini oki no Iehova ra.​—2 Paraleipomeno 28:1-4.

10. Eaa to Ahaza tu ei metua, inara eaa te iki anga ta tana tamaiti ko Hezekia i rave?

¹⁰ Mei te tumu mai no te manako anga akamori ma ra, e mea ngata roa kia tamanako atu i tetai metua tei kino atura ia Ahaza. Inara, kare i rauka i tana tamaiti ia Hezekia kia iki i tona uaorai metua! Penei ko nga tamaroa ou ta Ahaza ra i ta ei atinga kia Baala ko to Hezekia uaorai au taeake. Kua riro ainei teianei tu kino ei akaapa ia Hezekia ki tetai oraanga no te tiratiratu kore kia Iehova ra? E tuke anga ra, kua riro a Hezekia ei tetai o to Iuda ra au ariki toko iti tei meitaki tikai​—ko tetai tangata akaperepere e tiratiratu, e pakari katoa oki. “Tei iaia oki a Iehova.” (2 Ariki 18:3-7) Ko te tika, e tumu tetai e tau ei kia irinakiia e ia Hezekia e vaira ei tamaiti ariki ou koia tei akauruia kia tata ia Salamo 119 ra. Me koia ia, kare i te mea ngata kia kite e eaa aia i tatai i te au tuatua e: “Kua taravai toku ngakau i te aue.” (Salamo 119:28) Noatu rai tona au taitaia mamae ngakau, kua tuku a Hezekia na te Tuatua a Iehova e arataki i tona oraanga. Te tuatua ra Salamo 119:105: “E lamepa taau tuatua i toku nei vaevae, e turama no toku nei arataa.” Ae, kua rave a Hezekia i tana uaorai iki anga​—e ko te iki anga tika ia.

11. (a) Noatu rai te tu mana meitaki o tona metua, akapeea te mamao ke atu to Manase ra meameaau kia Iehova? (e) Eaa te iki anga ta Manase i rave i te vaitata anga ki te openga o tona oraanga, e penei eaa ta tatou ka kite mei te reira mai?

¹¹ Inara, ei tetai tuke anga, mei roto mai i tetai o nga ariki meitaki roa o Iuda kua aere mai tetai tei kino roa ra. Kua akatupu te tamaiti a Hezekia ra ko Manase i te akamori itoro, te purepure, e te ta anga kikino katoa oki kia maata rava te totoa anga. Te tuatua ra te tataanga e “kua tuatua mai oki a Iehova kia Manase,” penei na roto i nga peroveta ra. (2 Paraleipomeno 33:10) Kia tau ki ta te ikuiku anga ngati Iuda ra e kua rave a Manase e kua kekeia a Isaia i rotopu. (Akaaite ia Ebera 11:37.) Me ko te tika te reira me kare ia, kare a Manase i akarongo atu ki tetai ua atu akamatakiteanga akauruia. Ko te tika, kua tutungi ora atura aia i etai o ana tamaroa uaorai ei au atinga, mei ta tona tupuna ta Ahaza i rave ra. Inara, ko teianei tangata rave kino, i te aro atuanga i te au timataanga kikino i te tuanga openga o tona oraanga ra, kua tataraara e kua taui i tona au aerenga. (2 Paraleipomeno 33:1-6, 11-20) Te apii maira tana au akatauanga ia tatou e ko tetai tangata tei rave ra i te au iki anga kikino rava kare i mamao roa no te oko akaou mai anga. Ka rauka iaia te taui anga.

12. Eaa nga iki anga tuke ta Amona raua ko tana tamaiti ko Iosia i rave no runga i te tavini anga kia Iehova?

¹² Kua tau ra kia maata te kite o Amona tamaiti a Manase ra mei te tataraara anga a tona metua. Inara kua rave aia i te au iki anga tarevake ra. Kua rave ua atura Amona i “te ara na rungao na rungao” tae roa kia tamateia aia i te openga. E tuke anga pumaana tana tamaiti ko Iosia. I te akara anga kua iki a Iosia kia kite aia mei tei tupu ra ki tona tupuna tane. Kua akamata aia i te tutara iaia e varu ua ra ona mataiti. Iaia e 16 ra mataiti, kua akamata aia i te kimi ia Iehova e i muri akera kua akakite aia i tona tu meitaki, ei ariki tiratiratu. (2 Paraleipomeno 33:20–​34:5) Kua rave aia i tetai iki anga​—koia te iki anga tika.

13. (a) Eaa ta tatou i kite mei nga ariki Iudea ta tatou i akamanako? (e) Eaa te puapinga o te tereni anga a te au metua?

¹³ Te apii maira teianei akara matatio anga poto ua i nga ariki Iudea e itu ra i tetai apiianga ririnui. I etai tuanga, ko te nga ariki kikino katoa na ratou nga tamaiti meitaki e, tetai tuke anga, ko nga ariki meitaki ra na ratou nga tamaiti kikino katoa. (Akaaite ia Koheleta 2:18-21.) Kare teianei e akameangiti mai i te puapinga maata o te terenianga a te au metua ra. Te au metua tei tereni i ta ratou tamariki kia tau ki ta Iehova ra aerenga te oronga ra ki ta ratou anaunga i te tuatau meitaki roa kia riro ei au tavini tiratiratu no Iehova. (Deuteronomi 6:6, 7) Inara, te vaira etai tamariki, noatu rai te au tauta anga a te au metua tiratiratu, ka iki kia aru i tetai aerenga tarevake. Ko etai atu au tamariki, noatu rai te mana kino rava o te au metua, ka iki kia inangaro e kia tavini oki ia Iehova. Ma tana akameitakianga, ka akameitaki ratou i to ratou oraanga. Te tamanako ra ainei koe, i etai taime, e ko teea te tuanga naau? E akamanako i reira, i etai o ta Iehova ra au akapapu anga e ka rauka ia koe i te rave i te iki anga tika ra!

Te Irinaki ra Iehova ia Koe!

14. Akapeea tatou i kite ei e te kite maira Iehova i to tatou au kotinga?

¹⁴ Te kite ra a Iehova i te au mea ravarai. Te tuatua ra Maseli 15:3: “Tei te au ngai katoa nei to Iehova mata, i te akara anga i te kino e te meitaki.” Kua tuatua te Ariki ko Davida no Iehova: “Kua kite oki to mata i toku tu, i toku vai oti kore anga ra; e kua tataia toku au melo katoa, i te au rā katoa i te rave angaia, e kare tetai i taua au mea ra i oti.” (Salamo 139:16) No reira kua kite a Iehova i te au tu tau kore taau e maro atura​—me i akatuangaia mai koe ia ratou me kare naau i anoano ia ratou ei tetai tupu anga no etai au mana tei mamao ke atu i te ka rauka ia koe kia akatere. Te kite tika ra aia akapeea te akatupu anga a te reira kia koe. Te kite ra aia i toou au kotinga e meitaki atu ia koe uaorai ra. E e aroa ua aia. Kare rava aia e umuumu mai kia maata atu i te ka tau kia rauka ia tatou kia rave.​—Salamo 103:13, 14.

15. (a) Eaa tetai tumu no te pumaana anga o te aronga tei tamamae akakoroia ra e etai ke? (e) Te akangateitei maira a Iehova ia tatou taki tai na te orongaanga i teea apainga na tatou?

¹⁵ I tetai pae, kare a Iehova e akara mai ia tatou ei aronga puapinga kore ua no tetai turanga. Me kua rokoia kia tatou etai au tupu anga kikino i te tuatau kua topa, penei ka kitea e tatou te pumaana i te papu anga e te makitakita ra Iehova i taua au tu akono anga mamae tei rave akakoroia ra. (Salamo 11:5; Roma 12:19) Inara ka akakore ua ainei aia i te au tupu anga no ta tatou au ravenga tarevake me ka ariu atu tatou e ka rave akakore i te au iki anga tarevake ra? Kare rava ia. Te tuatua ra tana Tuatua: “Ei runga iaia uaorai ta te tangata ravarai apainga.” (Galatia 6:5) Te akangateitei ra Iehova i te au mea ora kite tataki tai ra ma te apainga kia rave i te tika e kia tavini oki iaia. Mei ta Mose i tuatua ki te iti tangata o Iseraela ra: “Te kapiki nei au ki te rangi e te enua ei kite noku ia kotou i teianei rā e, kua tuku au i te ora e te mate, i te meitaki e te kino, ki mua ia koe: e tenana, ka rave i te ora, kia ora koe e toou katoa uanga.” (Deuteronomi 30:19) Te irinaki ra a Iehova e ka rauka katoa ia tatou kia rave i te ikianga tika. Akapeea tatou i kite ei i te reira?

16. Akapeea tatou ka autu ei i te ‘rave akaoti ua i to tatou uaorai ora’?

¹⁶ E tamanako ana i ta te apotetoro ko Paulo i tata ra: “E tenana, e aku au akaperepere e, . . . e rave akaoti ua i to kotou uaorai ora ma te mataku e te rutetetete. Ko te Atua oki tei angaanga ki roto ia kotou, i te inangaro e te rave, mei tana i anoano ra.” (Philipi 2:12, 13) Ko te tuatua Ereni akamata anga tei uriia ra e ‘rave akaoti ua’ i konei te akataka ra i te apaianga mai i tetai apinga kia oti takiri. No reira kare tetai o tatou i akatakaia kia puapinga kore me kare kia akaruke ua. Te tika ra te Atua ko Iehova kia irinaki e ka rauka ia tatou te akaoti takiri i te angaanga tana i oronga mai na tatou e rave​—te angaanga te taki atura ki to tatou ora​—me kare ra kare rava aia e akauru mai i taua tuatua anga ra. Inara akapeea tatou e autu ei? Kare na roto i to tatou uaorai maroiroi. Me te rava ua ra to tatou maroiroi i roto ia tatou uaorai kare e umuumuia “te mataku e te rutetetete.” Mari ra, ‘te angaanga ra a Iehova ki roto ia tatou,’ te angaanga ra tona vaerua tapu ki roto i to tatou manako e to tatou ngakau, i te tauturuanga ia tatou i “te inangaro e te rave.” Ma taua tauturu aroa ra, e tumu ainei tetai e kore ei tatou e rave i te au iki anga tika i te oraanga e kia akono oki i taua au mea ra? Kare!​—Luka 11:13.

17. Eaa te au taui anga ka rauka ia tatou kia rave ia tatou uaorai, e akapeea ta Iehova tauturu ia tatou i te rave?

¹⁷ E au arairai anga ra etai te ka tau kia autu atu tatou​—penei ko te au ravenga kikino e te au mana akakino no te ora anga katoa ra te ka akatarevake i to tatou manakoanga. Tera ra, ma te tauturu a te vaerua o Iehova, ka rauka ia tatou kia takore atu i teia au tu. Mei ta Paulo i tata ki te au Kerititiano i Korinetia ra, te rava ra te mana ririnui o te Tuatua a te Atua i te uri anga i te “au punanga ketaketa ki raro.” (2 Korinetia 10:4) Ko te tika, ka rauka ia Iehova kia tauturu ia tatou kia rave i te au taui anga maata i roto ia tatou uaorai. Te raurau maira tana Tuatua ia tatou ‘kia kopae i te tangata taito’ e “kia akatangata ou oki ko tei angaia kia tau i te Atua ra, i te tuatua-tika e te tapu mou.” (Ephesia 4:22-24) Ka rauka tikai ainei i te vaerua o Iehova kia tauturu ia tatou kia rave i taua au taui anga ra? Ka tika rava ia! Te akaua maira te vaerua o te Atua ki roto ia tatou​—e manea, e te au tu meitaki ta tatou katoatoa ka anoano kia tatanu. Te mea mua o teianei ko te inangaro ia.​—Galatia 5:22, 23.

18. Eaa te iki anga to te tangata manako te ka rauka kia rave, e eaa ta teia ka tau kia tauturu ia tatou kia akamanako?

¹⁸ Tei roto i te reira tetai tuatua mou akamataraanga maata. Tei te Atua ko Iehova tetai turanga kotinga koreia kia inangaro, e kua angaia mai tatou i tona tu. (Genese 1:26; 1 Ioane 4:8) No reira ka rauka ia tatou te iki kia inangaro ia Iehova. E ko taua inangaro ra​—kare ko to tatou ora anga i mua ana, kare i to tatou au tu tarevake tei rauka maira, kare ko to tatou tu manako kia rave tarevake tei akatuangaia maira​—ko te taviri ia ki to tatou tuatau ki mua. Ko te inangaro i te Atua ko Iehova te mea umuumuia ra no Adamu raua ko Eva kia raukai te vai tiratiratu anga ki Edene ra. Ko taua inangaro ra ta tatou tataki tai e anoano ra kia ora atu ei ia Aramakito e kia autu atu i te timata openga i te openga o te Tutara Tauatini Mataiti o Karaiti ra. (Apokalupo 7:14; 20:5, 7-10) Ko tatou tataki tai ravarai, noatu eaa to tatou au turanga, ka rauka kia tatanu i taua inangaro ra. (Mataio 22:37; 1 Korinetia 13:13) E tamanako meitaki tatou kia inangaro ia Iehova e kia patu ki runga i taua inangaro ra no te tuatau mutu kore katoa ra.

Eaa Toou Manako?

◻ Eaa te au manako matauia te patoi ra i te apiianga papu a te Pipiria no runga i te apainga tataki tai ra?

◻ Eaa te angaanga patuanga te ka tika te au Kerititiano tataki tai kia rave iaia uaorai?

◻ Akapeea te akatutu anga a te au akatauanga a te au ariki o Iuda e ka rave te aronga taki tai i ta ratou uaorai iki anga?

◻ Akapeea ta Iehova ra akapapu anga mai kia tatou e ka rauka ia tatou te au tuku anga tika i te oraanga, noatu rai te au mana tau kore takapini ia tatou?

[Tutu i te kapi 15]

Na te au tu ua ainei e akataka to tatou tuatau ki mua?

[Tutu i te kapi 17]

Noatu rai te akatauanga kino a tona metua, kua iki te Ariki ko Iosia i te tavini i te Atua ra