Eaa ra ka Oronga ei kia Iehova?

I TE ra e iti vera ra ki rungao i te taoni Sidona meangiti ko Zarephata, te piko ra tetai vaine takaua no te koikoi vaie. Kua anoanoia aia kia tutungi i tetai ai e raukaʼi iaia i te tunu i tetai kai meangiti ua​—penei ko te kai openga ia ta raua ko tana tamaiti meangiti ka kai. Kua ngata iaia i te akono ia raua ko tana tamaiti i roto i te tuatau maro e te onge, e kua tae roa mai ki teia openga kino. Te mate ra raua i te pongi.

Kua aere mai tetai tangata. Tona ingoa ko Elia, e kua kite ua atu te vaine takaua e e peroveta aia na Iehova. Te akara anga e kua rongo ana aia i teia Atua. E tuke a Iehova mei ia Baala, tei riro ra tana akamori anga viivii, kino ei mea tupu maata i tona enua ko Sidona. No reira i to Elia pati anga kiaia no tetai vai inu, kua inangaro tikai aia i te tauturu. Penei kua manako aia e na te rave anga i te reira ka rauka iaia ta Iehova mareka anga. (Mataio 10:41, 42) Inara e maata akaou atu ta Elia i pati atu​—e manga kai ua. Kua akamarama aia e manga kai ua tana tei rava no tetai kaikai anga openga. Inara, kua raurau ua atu a Elia, te akapapuanga kiaia e ka oronga temeio ua mai a Iehova i te kai nana e tae ua atu ki te openga o te tuatau maro. Eaa tana i rave? Te karanga ra te Pipiria e: “Kua aere atura aia, e kua rave i ta Elia i tuatua maira.” (1 Ariki 17:10-15) Te akatutu maira teia au tuatua ngoie ua i tetai rave anga akarongo maata​—no tei maata ra, e tikai, kua akapaapaa a Iesu Karaiti i te reira vaine takaua e vaitata i te tai tauatini mataiti i muri mai!​—Luka 4:25, 26.

Noatu rai, penei ka akara anga tuke ua ake e ka pati maata a Iehova mei tetai vaine putaua. Koia tikai me akamanako tatou i tetai pure tei orongaia e tetai tangata rongo maataia. Na ta te Ariki ko Davida koianga i te au akaputu anga no tana tamaiti ko Solomona ei taangaanga ki runga i te patu anga o te iero kua akakeu ia i te tu oronga maata. I te au tuatua o teia tuatau, te au apinga aroa tei akaputuia mai kua taea e pirioni ua atu tara te maata! Inara, kua karanga a Davida i roto i tana pure kia Iehova e: “Koai ra au nei, e eaa toku nei au tangata, e tikaʼi ia matou kia apai ua atu mei teianei te tu? No ko na mai ia koe na te au mea katoa nei, e no roto i taau ta matou i apai atu kia koe na.” (1 Paraleipomeno 29:14) Mei ta Davida i karanga ra, na Iehova te au mea ravarai. No reira i tetai ua atu taime me oronga tatou no te akamaata i te akamori anga ma, te oronga ua ra tatou kia Iehova tei riro ra nana takere ia. (Salamo 50:10) No reira, te mama maira te uianga, Eaa ra a Iehova i inangaro ei ia tatou kia oronga i te akamata anga?

E Tuanga Puapinga o te Akamori Anga Mou

Te pauanga ngoie roa atu koia oki mei te au tuatau mua kua akariro a Iehova i te orongaanga ei tuanga puapinga o te akamori anga mou. Kua akaatinga te tangata akarongo ko Abela i etai o tana manu puapinga maata kia Iehova. Kua rave katoa te au pateriareka ko Noa, Aberahama, Isaaka, Iakoba, e Iobu i te au atinga mei teia.​—Genese 4:4; 8:20; 12:7; 26:25; 31:54; Iobu 1:5.

Kua akaue te Ture a Mose pera katoa kua akatere i te orongaanga o te au akaputu anga kia Iehova. Ei akaraanga, kua akaueia te au Iseraela katoatoa kia taite, me kore kia oronga i tetai tuanga ngauru o te au apinga o te enua e te tupu anga maata o ta ratou manu akono. (Numero 18:25-28) Ko tetai atu au akaputu anga kare te reira i akatere roaia ana. Ei akaraanga, kua umuumuia te au Iseraela takitai kia oronga kia Iehova te au uua anga mua o tana au manu e te kai. (Exodo 22:29, 30; 23:19) Inara, kua akaruke te Ture i te tangata takitai kia akataka i te maata tana ka oronga mei tana au uua anga mua, tera ua kia oronga aia i te mea meitaki rava. Kua akapae katoa te Ture no te orongaanga akameitaki anga e te au atinga tia, tei oronga katoa uaia. (Levitiku 7:15, 16) Kua akamaroiroi katoa a Iehova i tona iti tangata kia oronga i tau i te meitaki o tana akameitaki anga ia ratou. (Deuteronomi 16:17) Mei te reira katoa te akatu anga o te tapenakara e i muri mai te iero, kua oronga te aronga tataki tai i ta tona ngakau i akakeu ra iaia kia oronga. (Exodo 35:21; 1 Paraleipomeno 29:9) E tikai kua riro teia tu akaputu anga oronga uaia ei mea mareka maataia e Iehova!

I raro ake i te “ture a te Mesia,” kia riro te au orongaanga katoatoa ei mea oronga uaia. (Galatia 6:2; 2 Korinetia 9:7) Kare te aite anga o te reira e kua akamutu te au pipi a Karaiti i te oronga me kore ra e meangiti ua ta ratou i oronga. Kare ko te reira tei tupu! I te au apotetoro a Iesu e tutu aere ra i Iseraela, kua aru tetai pupu vaine ia ratou e kua tavini ia ratou mei ta ratou uaorai au apinga. (Luka 8:1-3) Kua rauka katoa i te apotetoro ko Paulo te au apinga aroa tei turu ra i tana angaanga mitinari, e oti kua akamaroiroi aia i etai au putuputuanga kia oronga i te au moni ki tetai atu i te au taime tei anoanoia ra. (2 Korinetia 8:14; Philipi 1:3-5) Kua tuku te pupu akaaere i Ierusalema i te au tangata tau meitaki kia akapapu e kua tua aereia te au tauturu akaputuia mai ki te aronga tei anoano ra. (Angaanga 6:2-4) Ma te taka meitaki ra, kua kite te au Kerititiano mua i te reira ei akameitaki anga no te turu i te akamori anga ma na teia au tu.

Noatu ra, penei ka manako tatou e eaa ra a Iehova i akariro ei i te orongaanga ei tuanga no tana akamori anga. Ka akara ana e a au tumu.

Te Tumu ka Oronga ei Tatou

Te mea mua, te akariro ra a Iehova i te orongaanga ei tuanga o te akamori anga ma no te mea na te raveanga i te reira e mea meitaki ia no tatou. Te akaari ra te reira i to tatou tu ariki no te tu meitaki o te Atua. Ei akaraanga, me ka oko tetai tama me kore ka maani i tetai apinga aroa na tetai metua, eaa ra te metua ka marekaʼi ma te rekareka? Te riro ra ainei te apinga aroa ei akaki i etai anoano tikai kare e rauka i te metua i te akaki atu? Penei kare. Mari ra, te rekareka ra te metua i te kite i te tama te akatupu anga i tetai vaerua ariki e te oronga. No te au tumu aiteite rai te akamaroiroi ra a Iehova ia tatou kia oronga e te rekareka ra me pera tatou. Akapenei tatou me akaari kiaia e te ariki tikai ra tatou i tona au tu takinga meitaki maata katoatoa e tona tu oronga ua kia tatou. Nana “te au mea memeitaki i o maiia ra, e te au mea tika ravarai,” no reira kare rava e pou ta tatou au tumu no te akameitaki iaia. (Iakobo 1:17) Tei maata atu, kua oronga a Iehova i tana uaorai Tamaiti akaperepere, te akatikaanga iaia kia mate e raukaʼi ia tatou te ora e tuatau ua atu. (Ioane 3:16) Ka rava ainei ta tatou akameitaki anga iaia?

Te rua, me akariro tatou i te orongaanga ei mea matauia, te apii ra tatou i te aru ia Iehova e tana Tamaiti, ko Iesu Karaiti, na roto i tetai tu ngateitei puapinga rava. E oronga putuputu ua ana Iehova, ma te tu aroa tamou. Mei ta te Pipiria e karanga ra, nana i oronga mai kia tatou “te ora, e te aʼo, e te au mea katoa.” (Angaanga 17:25) Penei ka rauka tikai ia tatou i te akameitaki iaia no te aʼo ravarai ta tatou ka akaea, no te kai ravarai ta tatou ka kai ma te rekareka, no te au tuatau mataora e te merengo ravarai i te oraanga. (Angaanga 14:17) Mei tona Metua, kua akaari a Iesu i tetai vaerua oronga. Kua oronga ua aia iaia uaorai. Kua kite ainei koe i to Iesu rave anga i te au temeio, kua na roto atu aia i tetai ngere anga? E tere atu i te okotai taime te akakite maira te au Tuatua Tapu kia tatou i tona akaora anga i te au tangata maki, e mana ‘tei riro na no ko nei atu iaia nei.’ (Luka 6:19; 8:45, 46) E tu oronga tikai to Iesu tae roa ki tona oronga anga i tona uaorai meta, tona oraanga, e tae ua atu ki te mate anga tikai.​—Isaia 53:12.

No reira me oronga tatou, me ko to tatou taime, to tatou ririnui, me kore ta tatou au apinga, te aru ra tatou ia Iehova e te akarekareka ra i tona ngakau. (Maseli 27:11; Ephesia 5:1) Te aru katoa ra tatou i te akaraanga apa kore no te tu tangata tei akarukeia mai no tatou e Iesu Karaiti.​—1 Petero 2:21.

Te toru, ka riro te orongaanga ei akamerengo i te au anoano tikai e te puapinga. E tika, ka rauka ngoie ua ia Iehova i te akamerengo i te au anoano o te au inangaro Patireia ma te kore to tatou tauturu, mei tei rauka oki iaia i te akanoo i te au toka kia kapiki ua i te mea e ka taangaanga ia tatou kia tutu aere i te tuatua. (Luka 19:40) Inara kua iki aia i te akangateitei ia tatou ma teia au akameitaki anga. No reira me oronga tatou i ta tatou au apinga no te akamaata i te au inangaro Patireia, tei ia tatou te merengo anga maata o te kiteanga e te rave ra tatou i tetai tuanga tikai i roto i te angaanga puapinga rava e tupu ra i teianei ao.​—Mataio 24:14.

E mea kite uaia e te umuumuia ra te moni no te akapuapinga i te angaanga a te Au Kite o Iehova i teianei ao. I te mataiti 1995, kua akapou te Taiate e vaitata i te $60 mirioni no te akono ua anga i te au painia takake, te au mitinari, e te au akaaere tutaka i roto i ta ratou angaanga tutu aere. Inara, e manga akapou anga ua te reira me akaaiteia ki te akatu anga e te akatere anga o te au opati manga e te au ngai nenei anga takapini i teianei ao. Inara, ka rauka pouroa te reira i te akatupuia na roto i te au akaputu anga oronga uaia!

Kare te iti tangata o Iehova e tamanako ua ana e me kare ratou i te aronga apinganui, penei ka tuku ua ratou na tetai atu e apai i te apainga. Ka riro teia tu ei arataki atu ia tatou kia akangaropoina i teia tuanga o ta tatou akamori anga. Kia tau ki te apotetoro ko Paulo, te mamae ra te au Kerititiano i Makedonia i te ‘putaua maata.’ Noatu rai, kua pati akatenga ratou no te akameitaki anga o te orongaanga. E ta ratou i oronga, i kite ei a Paulo, “tei tika ia ratou ra, e e maata atu rai”!​—2 Korinetia 8:1-4.

Te a, kua akariro a Iehova i te orongaanga ei tuanga o te akamori anga mou no te mea ka riro te orongaanga ei tauturu ia tatou kia mataora. Kua karanga a Iesu uaorai e: “E mea meitaki i te oronga atu i te rave mai.” (Angaanga 20:35) Akapera oki ta Iehova maani anga ia tatou. Ko tetai tumu oki te reira penei ka manako tatou e noatu te maata o ta tatou ka oronga kiaia, kare rava e rauka ia tatou i te akaaite atu i te tu ariki ta tatou e kite ra i to tatou au ngakau nona. Ma te mataora, ra, kare a Iehova e anoano maata mai i te ka rauka ra ia tatou i te oronga. Ka papu ia tatou e te rekareka ra aia me oronga rekareka tatou i te ka rauka ia tatou!​—2 Korinetia 8:12; 9:7.

Ka Rauka te Akameitakianga mei te Akaarianga i Tetai Vaerua Oronga

Te oki anga ki ta tatou akaraanga mua, ka akamanako ana e naringa te vaine takaua o Zarephata i manako ua e na tetai atu e akono i te anoano o Elia no tetai manga. Mei teaa atura i te akameitakianga tana ka ngere!

Kare e ekoko anga e ka akameitaki a Iehova i te aronga te akaari ra i tetai vaerua oronga. (Maseli 11:25) Kare te vaine takaua o Zarephata i anoanoia kia mamae no te orongaanga i tana i manako ra e ko tana manga openga. Kua tutaki a Iehova iaia ma tetai temeio. Mei ta Elia i taputou ra, kare tana au ariki varaoa mata e te inu i pou ana e tae ua atu ki te taime i topa ei te tuatau maro. Inara kua rauka iaia tetai tutaki anga maata atu. I te roko angaia tana tamaiti e te maki e mate atura, na Elia, te tangata o te Atua mou ra, i akaora mai iaia. Mei teaa atura ta teia i akatupu no te akamaroiroi iaia i te pae vaerua!​—1 Ariki 17:16-24.

I teia tuatau kare tatou e tapapa atu kia akameitakiia ma te au temeio. (1 Korinetia 13:8) Inara te akapapu maira a Iehova ia tatou e ka akamatutu aia i te aronga tei tavini ra iaia ma te meta katoa. (Mataio 6:33) No reira ka rauka tatou kia aite atu ki te vaine takaua o Zarephata, te oronga ua anga, ma te papu e ka akono a Iehova ia tatou. Pera katoa, ka rekareka tatou i te au tutaki anga maata i te pae vaerua. Me te riro ra ta tatou orongaanga ei rave anga putuputu, i te mea e i tetai taime ua, e mea manako openga ua ra, ka tauturu te reira ia tatou kia akono meitaki i to tatou mata e te akara matatio i te au inangaro Patireia, mei ta Iesu i akakite ra. (Luka 11:34; akaaite ia 1 Korinetia 16:1, 2.) Ka tauturu katoa te reira ia tatou kia piri vaitata kia Iehova raua ko Iesu ei au taeake angaanga no raua. (1 Korinetia 3:9) E ka kapiti atu te reira ki te vaerua aroa, e te oronga ua te akairo takere ra i te aronga akamori o Iehova i te ao katoa.

[Pia i te kapi 31]

AU RAVENGA TA ETAI E IKI RA NO TE ORONGA

AKAPUTU ANGA NO TE ANGAANGA I TEIANEI AO

E manganui te akapae ra me kore te akapapa ra i tetai moni no te tuku ki roto i te au pia akaputu anga tei akairoia: “Akaputu Anga no te Angaanga a te Taiate i Teianei Ao​—Mataio 24:14.” I te au marama katoatoa e tuku ana te au putuputuanga i teia au moni ki te opati maata o teianei ao i Brooklyn, New York, me kore ki te opati manga o te reira ngai.

Kia tuku tika katoaia te au moni tauturu tei oronga uaia ki te Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, me kore ki te opati o te Taiate e akono ra i toou enua. Ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te au akaputu anga no te akakite i teia apinga aroa tikai.

AKANOO ANGA I TE TURANGA NO TE TAUTURU

Penei ka orongaia te moni ki te Taiate Punanga Tiaki kia tukuia ki tetai ngai tei irinakiia, tae roa ki te mate o te tangata oronga, e a tetai taime me anoanoia e te reira tangata, ka akaokiia te reira kiaia. No tetai akakite anga maata atu, e tata ki te Treasurer’s Office i te ngai noo anga i akakiteia i runga ake nei.

ORONGAANGA PARANIIA

I te pae i te au moni aroa oronga ua e te au moni tauturu akaturangaia, te vaira tetai atu au ravenga orongaanga no te akapuapinga i te angaanga Patireia i teianei ao. Ka kapiti mai te:

Akapapuanga: Penei kia tukuia te ingoa o te Taiate Punanga Tiaki e ko tei puapingaia mei tetai tika anga akapapu anga ora me kore tetai akapapa anga akaangaroi anga/moni pakari. Kia akakiteia ki te Taiate tetai ua atu akanoo anga mei teia.

Akapapa Anga Pangika: Penei kia tukuia te au akapapa anga pangika, te au pepa tuku anga, me kore te au akapapa anga akaangaroi no tetai tangata ki roto i te tataanga irinakiia na me kore tei maaniia kia tutakiia me mate ake ki te Taiate Punanga Tiaki, kia tau ki te au ikuiku anga a te pangika o te reira ngai. Kia akakiteia ki te Taiate tetai ua atu akanoo anga mei teia.

Apinga Akaputuia e te Poni: Penei ka orongaia te au apinga akaputuia e te poni ki te Taiate Punanga Tiaki ei apinga aroa me kore i raro ake i tetai akanoo anga ka aere ua rai te puapinga ki tei oronga mai i te reira.

Enua: Penei ka orongaia te au enua e te au are ka rauka i te oko ki te Taiate Punanga Tiaki ei apinga aroa me kore na te akono anga i tetai pepa koreromotu ki tei oronga mai i te reira, te ka rauka iaia i te noo ki roto i te tuatau e ora ra aia. Kia araveiia atu te Taiate i mua ake ka akamanaiaʼi tetai ua atu enua ki te Taiate.

Au Koreromotu e te Au Tataanga Irinakiia: Penei ka oronga tikaia te apinga me kore te moni ki te Taiate Punanga Tiaki na roto i tetai koreromotu tikaia e te tataia, me kore kia tukuia te ingoa o te Taiate te ka puapingaia no tetai tataanga koreromotu irinakiia. Tetai tataanga irinakiia tei orongaia ki tetai akaaerenga akonoanga ka riro te reira ei au puapinga i te pae o te tero i tetai taime. Kia tukunaia tetai kopi o te koreromotu me kore te tataanga irinakiia ki te Taiate.

Te aronga tei inangaro ra i te kite i teia au akanoo anga orongaanga paraniia e tata atu ki te Planned Giving Desk i te ngai noo anga tei papaia i raro ake nei me kore ki te opati o te Taiate te akono ra i toou enua. Kia tae atu ki te Planned Giving Desk tetai kopi o te au papaanga pepa tau no runga i tetai ua atu o teia au akanoo anga.

Kua akapapa te Taiate i tetai poroutia reo Engarani ko te Planned Giving. Te aronga i te Unaite Teite te parani ra i teianei no te oronga i tetai apinga aroa takake ki te Taiate me kore no te akaruke i tetai tika anga i te matenga penei ka riro teia akakite anga ei tauturu tikai. E tika tikai te reira me ka inangaro ratou i te akatupu i tetai akakoroanga pamiri me kore tetai akakoro anga enua paraniia koi taangaanga ei i te au puapinga o te tero ei akameangiti mai i te tutaki o te apinga aroa me kore te tika anga. Ka rauka te poroutia i te patiia, na te tataanga atu me kore na te tereponi.

PLANNED GIVING DESK

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 878-7000