Aaereanga ma te Atua—Ma te Manako Anga Tuatau Mutu Kore
“Ka aaere ra tatou i te ingoa o Iehova o to tatou Atua, e tuatau ua atu.”—MIKA 4:5.
1. Eaa ra ka raukai kia tapaia a Iehova ei “Ariki au mutu kore”?
KARE o te Atua ra ko Iehova akamataanga. Kua tau tikai tona tapa angaia ko “To te au rā Taito ra,” i te mea kua totoa atu tona vaianga mai ki te tuatau openga kore ki mua ra. (Daniela 7:9, 13) Ka rekareka katoa oki a Iehova i tetai tuatau mutu kore ki mua. Koia anake ua te “Ariki au mutu kore.” (Apokalupo 10:6; 15:3, NW) E i tona nga mata, okotai tauatini ua atu i te mataiti “e tau ïa ki te rā okotai i topa ra, e mei te araanga i te po ra.”—Salamo 90:4.
2. (a) Eaa ta te Atua ra akakoro anga no te au tangata akarongo ra? (e) Ka tau tatou kia tuku i to tatou au manakonako anga e ta tatou au parani oki ki runga i teaa?
2 I te mea e mutu kore ua atu Tei Oronga maira i te ora, kua rauka iaia kia mou atu i te manakonakoanga no te ora mutu kore i Parataito ki nga tokorua mua ra, kia Adamu raua ko Eva. Inara, no te akarongo kore, kua akakore a Adamu i te tika ki te oraanga e tuatau ua atu, ma te akatuanga mai oki i te ara e te mate ki tana anaunga. (Roma 5:12) Inara, kare ta Adamu ra meameaau i akakore atu i ta te Atua ra akakoro anga mua mai. Ko te anoano ia o Iehova kia ora te au tangata akarongo e tuatau ua atu, e ka tupu ra iaia tana akakoro anga kare e puapinga kore. (Isaia 55:11) Mei teaa ra te tau, i reira, kia tuku atu tatou i to tatou manakonakoanga e te au parani oki ki te tavinianga ia Iehova ma te manako anga i te tuatau mutu kore. I te mea te anoano ra tatou i te rapurapu anga atu, kia tae mai “taua rā o te Atua ra,” e mea puapinga maata kia maara e ko ta tatou akakoro anga kia aaere ma te Atua ra e tuatau ua atu.—2 Petero 3:12.
Ka Rave a Iehova i Tana Tuatau Akatakaia
3. Akapeea tatou i kite ei e e “tuatau” ta Iehova no te akatupu anga i tana au akakoro anga?
3 Ei te aronga te aaere ra ma te Atua, te manako maata ra tatou kia rave i tona anoano kia oti. Kua kite tatou e ko Iehova Tei Akara Maata ra i te Tuatau, e te irinaki ra tatou e kare e kore tana au akakoro anga e tupu i tana tuatau i akatakai. Ei akatauanga, “kia tae rava akenei ra ki te tuatau tikai, kua tono maira te Atua i tana Tamaiti.” (Galatia 4:4) Kua akakiteia ki te apotetoro ko Ioane e te vaira tetai “tuatau” no te akatupu anga i te au apinga totouia tana i akara i te au akairo ra. (Apokalupo 1:1-3) Te vaira “te tuatau o te aronga i mate, e akavaiaʼi ratou.” (Apokalupo 11:18) E tere atu i te 1,900 mataiti kua topa, kua akauruia te apotetoro ko Paulo kia tuatua e “kua akonoia e [te Atua] te rā e akava mai ei aia i to te ao katoa nei ma te tuatua-tika.”—Angaanga 17:31.
4. Akapeea tatou i kite ei e te anoano ra Iehova kia apai mai i tetai openga ki teia akatereanga kino o te au mea nei?
4 Ka apai mai a Iehova i te openga ki teianei akatere anga kino o te au mea nei, no te mea te tuatua akakinoia ra tona ingoa i te ao o teia tuatau nei. Kua puera te aronga rave kino. (Salamo 92:7) Na roto i ta ratou tuatua e te au angaanga, te akakino ra ratou i te Atua, e te mamae ra aia i te kite anga i tona au tavini i te akakino angaia e te takinga kino anga. (Zekaria 2:8) No reira rai a Iehova i tuatuai e kare e roaia ka akaopeia ta Satani ra akaaerenga katoatoa! Kua oti tikai to te Atua ra manako e aea teia e tupu ei, e te tupu anga o te au totou Pipiria te akataka meitaki maira e te noo nei tatou i teianei i “te tuatau openga ra.” (Daniela 12:4) Kare e roa atu ka rave aia i te akameitakianga no te aronga katoatoa te inangaro ra iaia.
5. Akapeea ta Lota raua ko Habakuka manako anga no te au turanga tei koropini ra ia raua?
5 I anoano te au tavini o Iehova o te tuatau kua topa ra kia kite ratou i te openga o te raveanga kino. Ia Lota tuatua tika ra, “ko tei mamae i te tuatua viivii a te aronga kino ra.” (2 Petero 2:7) I te mamae ngakau anga na te au turanga takapini iaia ra, kua pati te peroveta ko Habakuka: “Mei te aa te roa, e Iehova, o toku kapiki anga, e kare koe akarongo mai! o toku kapiki nui anga atu ia koe i te takinga-kino, e kare koe e akaora? Eaa ra oki koe i akakite mai ei iaku nei i te kino, akara uaʼi koe i te mate nei? te vai nei oki te āru e te rave aroa kore ki mua iaku nei: e te vai nei oki te aronga e akatupu i te karo e te tauetono?”—Habakuka 1:2, 3.
6. Eaa ta Iehova i tuatua i te pauanga i te pure a Habakuka, e eaa ta tatou ka kite mei te reira maira?
6 Kua pau a Iehova i tetai tuanga kia Habakuka i teianei au tuatua: “No te tuatau i akonoia ra taua orama nei, ei te openga ra e tuatua mai ei e kare e pikikaa; roa oti, ka tapapa atu rai; e tae tika mai ïa, e kare e tavarevare.” (Habakuka 2:3) Kua akakite maira te Atua e ka rave aia a “te tuatau akonoia ra.” Noatu ra e penei ka akara anga tavarevare, ka akatupu ra a Iehova i tana akakoro anga—kare e akakoreia!—2 Petero 3:9.
Tavinianga ma te Maroiroi Roiroi Kore
7. Noatu rai e kare a Iesu i kite tikai e aea e tae mai ei te ra o Iehova, i akapeea tana rave anga i tana au angaanga?
7 E mea umuumuia ainei kia kite i te tuatau tikai e tupu ei ta Iehova au akakoro anga, no tatou kia aaere maroiroi ma te Atua ra? Kare ia. E akamanako ana i etai akatauanga. Kua inangaro tikai a Iesu i te tuatau e akonoiai to te Atua ra anoano i te enua nei mei to te rangi katoa ra oki. E tika, kua apii a Karaiti i tana au pipi kia pure: “E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:9, 10) Noatu rai i kite a Iesu e ka pauia teianei patianga, kare ra aia i kite i te taime tikai no taua au tumu ra. I tana totou maata no te openga o te au akatereanga o te au mea nei, kua na ko maira aia: “Kareka te reira rā e te reira ora, kare rava tetai e kite, kare oki te au angela o te rangi, ko toku Metua anake ra.” (Mataio 24:36) I te mea ko Iesu to roto tikai i te akatupuanga i te au akakoro anga a te Atua ra, ka riro koia te ka akono tikai i te akapou anga i te au enemi o tona Metua i te rangi ra. Inara ia Iesu i te enua nei, noatu koia kare i kite e a naea te Atua e rave ei. Kua akariro ainei te reira iaia kia meangiti mai te maroiroi i ta Iehova ra angaanga? Kare rava ia! I to ratou akaraanga i ta Iesu ra tama anga maroiroi i te iero, “kua manako akera te au pipi i te tuatua i tataia ra, ‘Kua pou roa au i te maroiroi i toou are.’” (Ioane 2:17; Salamo 69:9) Kua rave ki katoa a Iesu uaorai i te angaanga i tonokia maira aia kia rave, e kua rave aia i te reira ma te maroiroi kore ra. Kua tavini katoa aia i te Atua ma te manako anga i te tuatau mutu kore ra.
8, 9. I ta te au pipi ra ui anga no te akaoki maianga i te Patireia ra, eaa tei tuatuaia kia ratou, e eaa ta ratou i rave?
8 Ko te tika katoa oki teia no te au pipi a Karaiti. Kua uipa atu a Iesu ma ratou ra i mua ua ake i tona kake anga ki te rangi. Te tuatua ra te tataanga: “E putuputu akera ratou, kua ui maira ratou kiaia, na ko maira, E te Atu, ei teianei aina koe e akaoki mai ei i te au kia Iseraela?” Mei to ratou Pu rai kua anoano ratou kia tae vave mai te Patireia. Inara, kua pau atura Iesu: “Kare ïa i akonoia kia kite kotou i te taime e te tuatau, ta te Metua i vaoo iaia uaorai: Ka rauka ra to kotou mana i te Vaerua Tapu, kia aere mai aia i rungao ia kotou; e ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.”—Angaanga 1:6-8.
9 Kare e akakite anga mai e kua ngakau kore te au pipi ra no teia pauanga. Mari ra, kua rave maroiroi atu ratou i te angaanga tutuanga. I roto i etai au epetoma, kua ki a Ierusalema ra i ta ratou apiianga. (Angaanga 5:28) E i roto i te 30 mataiti, kua totoa atu ta ratou angaanga tutuanga kia tuatuaia e Paulo e ko te tuatua meitaki tei akakiteia akenei “ki te tangata ravarai i raro ake i teianei rangi.” (Kolosa 1:23) Noatu rai e kare te patireia i ‘akaokiia mai ei au kia Iseraela’ mei ta te au pipi i manakonako tarevake ra e kare katoa oki te reira i akanooia ki te rangi i te tuatau o to ratou ora anga ra, kua rave ua atu ratou i te tavinianga maroiroi ia Iehova ma te manako anga i te tuatau mutu kore ua atu ra.
Akara Matatio Anga i to Tatou Akakeu Anga
10. No te kore i kite e aea te Atua ra e akapou ei i te akatere anga a Satani te tuku ra ia tatou kia akapapu i teaa?
10 Te inangaro katoa ra te au tavini o Iehova i teia tuatau nei kia kite i te openga o teianei akatereanga kino o te au mea nei. Inara, kare to tatou manako maata no to tatou akaora anga atu ki roto i te ao ou taputouia maira e te Atua. Te anoano ra tatou kia kite i te akatapu anga i te ingoa o Iehova ra e te akatika anga oki i tona tu ngateitei. No teianei tu, te rekareka nei tatou e kare te Atua ra i akakite mai kia tatou i te ‘ra e te ora’ tei akanooia no te akapou anga i te akatereanga a Satani. Kua akatika teia kia oronga i te akakite anga e te manako nei tatou kia aaere ma te Atua e tuatau ua atu no to tatou inangaro kiaia e kare no te mea e au akakoro anga noinoi no te tuatau poto ua to tatou.
11, 12. Na teea tu te akaaoanga i to Iobu ra tu tiratiratu, e akapeea te pirianga mai taua akaaoanga ra kia tatou?
11 Te tauturu katoa ra to tatou tamou marieanga i te tiratiratu ki te Atua kia akakite papu e te tarevake ra te Tiaporo i tona tuatua anga e ko Iobu tangata tuatua tau ra—e te au tangata oki mei iaia ra—te tavini ra i te Atua no te anoano noinoi no ratou uaorai. I muri ake i ta Iehova ra akataka anga ia Iobu ei tetai tangata apa kore e te tiratiratu, i te mataku anga i te Atua, kua pau kino atura Satani: “E mataku oko kore ua ainei a Iobu i te Atua? Kare ainei tei koropiniia aia e koe, e tona ra are, e tana katoa ra au mea ravarai e pini ua ake? kua akameitaki koe i ta tona rima i rave ra, e kua maata tana apinga i te enua nei. Ka akatika ua atura koe i to rima i tenana, ka rave atu ei i tana kia ope rava, kare aia e kore i te akakino ia koe ki mua i to mata.” (Iobu 1:8-11) Na te tamou marie anga i tona tiratiratu i raro ake i te timataanga, kua akapapuia e Iobu e ko teianei tuatua akakino e pikikaa ia.
12 Na te mouanga aiteite ki tetai aerenga tiratiratu, ka rauka ia tatou kia akakore atu i tetai ua atu akaapa anga a Satani e te tavini ra tatou i te Atua no to tatou kite e te vai maira tetai tutaki anga. No te koreanga i kite i te tuatau tikai e akatupuiai ta te Atua ra tutaki anga i te kino ki runga i te aronga rave kino ra te oronga maira kia tatou i te tuatau kia akapapu e e inangaro tika tikai to tatou ia Iehova e te anoano ra oki kia aaere i tona au aerenga e tuatau ua atu. Te akakite maira te reira e te tiratiratu ra tatou ki te Atua e te irinaki ra ki tana tu raveanga i te au apinga ra. Pera katoa oki, no te koreanga i kite i te ra e te ora ka tauturu ia tatou kia maroiroi e kia ara i te pae vaerua no te mea te kite ra tatou e penei ka tae mai te openga a tetai tuatau, mei tetai keia i te po ra. (Mataio 24:42-44) Na te aaereanga ma Iehova i te au ra ravarai, ka akariro tatou kia rekareka tona ngakau e kia oronga oki i tetai pauanga ki te Tiaporo ra, koia tei akakino maira iaia.
E Parani no te Tuatau Mutu Kore!
13. Eaa ta te Pipiria i akakite mai no te paranianga no te tuatau ki mua ra?
13 Te aronga te aaere ra ma Iehova te kite ra e e mea pakari kia rave i te au parani tau no te tuatau ki mua. Ma te matakite i te au manamanata e te au kotinga no te ruaine anga, e manganui te au tangata te tauta ra kia taangaanga meitaki i to ratou mapu anga e te maroiroi kia raukai ia ratou tetai turanga meitaki me ruaine mai. Ka peea, i reira, to tatou tuatau puapinga maata rava ki mua i te pae vaerua? Te tuatua ra a Maseli 21:5: “Te kimianga o te aronga maroiroi ra, tei runga ïa i te apinga maata: kareka ta te aronga rapurapu ua ra, tei te putaua ïa.” Ko te paranianga na mua ma te manako anga no te tuatau mutu kore ki mua e puapinga tika tikai ia. I te mea e kare tatou i kite tikai e aea e tae mai e te openga o teia akatereanga, ka tau tatou kia akamanako i te au mea umuumuia no te tuatau ki mua. Inara kia akono tau tatou e kua tuku i te au manako tu Atua na mua i roto i te ora anga. Te au tangata tei ngere ra i te akarongo penei ka manako e ko te tukuanga i te au manako ki runga i te raveanga i to te Atua ra anoano e poto ua te puapinga. Inara ko te tika ainei ia?
14, 15. (a) Eaa te akatutu anga ta Iesu i tuatua no te au paranianga no te tuatau ki mua ra? (e) Eaa ra i akara poto uai taua tangata apinganui o ta Iesu akatutu anga ra?
14 Kua tuatua a Iesu i tetai akatutu anga tei akamarama maira i teianei tu. Kua na ko maira aia: “E kainga ua maata to tetai tangata apinga nui: Kua na ko iora aia, i te akaeatu anga ki roto iaia uaorai, Eaa ra au, kare oki aku vairanga e o mai ei toku apinga? Kua na ko akera aia, E akapera au: e vavaʼi au i toku au are kai nei e akatu atu ei ei are mamaata; ei reira akaputuputu ei au i taku kai ravarai e toku apinga: Ka karanga atu ei ki toku vaerua, E taku vaerua e, e apinga maata toou, kua uipa ïa ki te vairanga no te au mataiti e manganui; e akaangaroi marie, e kaikai, e inu, e kia rekareka marie. Kua tuatua maira te Atua kiaia, E tera ra neneva e! ei teianei rai po e tiki naia mai ei toou vaerua: noai iora tenana au apinga taau i akaputu na? Ko te tu ïa o te tangata i akaputuputu i te apinga nona uaorai, kare i maata tona apinga i te Atua ra.”—Luka 12:16-21.
15 Te akakite maira ainei a Iesu i te tumu e kare te tangata apinganui ra i tau kia angaanga maata i tetai tauta anga kia rauka te apinga no te tuatau ki mua? Kare, no te mea te akamaroiroi ra te au Tuatua Tapu i te rave angaanga maata. (2 Tesalonia 3:10) Ko te tarevake o te tangata apinganui ra koia oki kare aia i rave i tei umuumuia kia “maata tona apinga i te Atua ra.” Noatu rai me i rauka kia rekareka aia i tona apinganui no etai mataiti e manganui, i te openga ra ka mate aia. E poto ua tana akara anga, kare i manako no te tuatau mutu kore.
16. Eaa ra ka raukai ia tatou kia irinaki papu ki runga ia Iehova no tetai tuatau tinamou ki mua?
16 Ko te aaereanga ma Iehova ra ma te manako anga i te tuatau mutu kore e manako anga tau ia e te akara anga mamao oki. Ko te reira te tu meitaki no te parani no te tuatau ki mua ra. Noatu rai i te mea pakari kia rave te parani anga tau no te apiianga, te angaanga, e te apainga a te pamiri, ka tau ra tatou kia maara tamou e kare rava a Iehova e akaruke i tona au tavini tiratiratu. Kua imene te Ariki ko Davida: “I vai ou ana au, e teianei kua ruaine; kare ra au i kite i te tangata tuatua-tika i te akaruke angaia, e tona uanga i te pati aere anga i te kai.” (Salamo 37:25) Pera katoa oki kua akapapu maira Iesu e ka oronga mai te Atua i tei anoanoia no te aronga katoatoa tei kimi ra i te Patireia na mua e te aaere ra i te au aerenga tuatua tika no Iehova.—Mataio 6:33.
17. Akapeea tatou i kite ei e te vaitata nei te openga?
17 Noatu rai ka tavini tatou i te Atua ma te manako anga i te tuatau mutu kore, ka vai tamou ra tatou i te ra o Iehova kia vaitata i te manako. Te akakite maata mai nei te tupu anga o te totou Pipiria i te vaitata maianga o taua ra ra. Kua akatakaia mai teianei anere mataiti na te au tamaki, te au maki mate, te ngaruerue enua, e te onge kai, pera katoa oki te takinga kinoanga i te au Kerititiano mou e te tutuanga i te tuatua meitaki o te Patireia o te Atua i te ao katoa nei. Pouroa teia e au tuanga no te tuatau o te openga o teianei akatereanga kino o te au mea nei. (Mataio 24:7-14; Luka 21:11) Te ki nei teianei ao i te aronga “akaperepere ia ratou uaorai, ei noinoi, ei akatietie, ei nengonengo, ei akakino, ei akarongo kore i te metua, ei mareka kore, ei viivii, ei aroa kore, ei akaatikau koreromotu ra, ei tapepe pikikaa, ei mako kore, ei rotoriri, ei akavaavaa i te tangata memeitaki ra, ei pikikaa, ei māro, ei ngakau akateitei, ei anoano i te au mea e navenave ei ra, kare i anoano i te Atua.” (2 Timoteo 3:1-5) I teia tuatau openga kino nei, e ngata tikai te ora anga no tatou ei au tavini no Iehova. Mei teaa ra to tatou inangaro no te ra e takoreia atu ei e te Patireia o Iehova ra te au tu kikino katoatoa! Inara i teianei, e tamanako tatou kia aaere ma te Atua ra ma te manako anga i te tuatau mutu kore ra.
Tavinianga ma te Manako Anga i te Ora Anga Mutu Kore
18, 19. Eaa te akakite maira e kua tavini te aronga taito tiratiratu ra i te Atua ma te manako anga i te tuatau mutu kore ki mua ra?
18 Ia tatou e aaere ra ma Iehova, kia tamou i to tatou manako i te akarongo o Abela, o Enoka, o Noa, o Aberahama, e Sara oki. I muri ake i te taikuanga ia ratou, kua tata a Paulo: “I mate anake atura taua aronga ra ma te akarongo, kare rai i rauka tei tuatuaia maira, kua akara ra i taua au mea ra i te atea ke, e kua akarongo tikai, e kua āriki marie, kua aaki ua e, e tangata ke ke ratou e te tuitarere ua i teianei ao.” (Ebera 11:13) Taua aronga tiratiratu ra “kua anoano ra ratou i te enua meitaki rava ra, koia oki te ao ra.” (Ebera 11:16) I te akarongo, kua akara mua atu ratou ki tetai ngai meitaki atu i raro ake i te tutara anga a te Patireia Mesia o te Atua ra. Ka papu ia tatou e ka tutaki te Atua ra ia ratou ma te ora anga mutu kore i taua ngai meitaki ra—i te Parataito i te enua i raro ake i te tutara Patireia ra.—Ebera 11:39, 40.
19 Kua akakite mai te peroveta ko Mika i te manako papu o te au tangata o Iehova kia akamori mutu kore i te Atua ra. Kua tata aia: “Kia aaere ua te tangata ravarai i te ingoa o tona uaorai atua, ka aaere ra tatou i te ingoa o Iehova, o to tatou Atua, e tuatau ua atu.” (Mika 4:5) Tae roa ki tona matenga kua tavini atu a Mika ia Iehova. Kare e ekoko anga e kia akatuakaouia mai aia i te ao ou, ka aaere ua atu taua peroveta ra ma Iehova e mutu kore ua atu. Mei teaa ra tetai akatauanga meitaki no te aronga o tatou te ora nei i te tuatau oonu atu ki te openga ra!
20. Eaa te manako anga tau no tatou?
20 Te ariki maira Iehova i te inangaro ta tatou e akaari ra no tona ingoa. (Ebera 6:10) Te kite ra aia e e mea ngata no tatou kia tamou marie i te tiratiratu kiaia i roto i teianei ao te tutaraia nei e te Tiaporo. I te mea “te ngaro ke nei teianei ao,” inara “ko tei akono ra i to te Atua ra anoano, e tika ïa i te ora anga e tuatau ua atu.” (1 Ioane 2:17; 5:19) Ma ta Iehova ra tauturu mai, i reira, e akamanako papu ia tatou kia akakoromaki i te au timataanga ta tatou ka aro atu mei tera ra ki tera ra. Kia akatikaia atu to tatou manakoanga e te tu oraanga oki ki runga i te au akameitakianga memeitaki tei taputouia maira e to tatou Metua aroa i te rangi ra. Ka rauka ia tatou te reira me ka tamou marie tatou i te aaereanga ma te Atua ra ma te manako anga i te tuatau mutu kore ra.—Iuda 20, 21.
Akapeea Koe me Pau?
◻ Eaa ta te Atua ra akakoro anga no te au tangata akarongo ra?
◻ Eaa ra a Iehova i kore ei i rave vave i te apai anga mai i te openga ki te ao tau kore i te Atua nei?
◻ Eaa ra i tau kore ei kia akameangiti mai i to tatou maroiroi no te kite koreanga e aea te Atua e akono ei?
◻ Eaa etai au puapinga no te aaereanga ma te Atua ma te manako anga i te tuatau mutu kore ki mua ra?
[Tutu i te kapi 17]
Te umuumuia ra te aaereanga ma te Atua e kia tavini maroiroi tatou iaia mei ta Karaiti au pipi mua ra