Akapeea Koe me Akaari i te Tu Akaaka Mou?

E PUAPINGA maata te tu akaaka mou i nga mata o te Atua. Kua tata a Iakobo: “E patoi mai te Atua i te aronga nengonengo, e oronga maira i te aroa ua i te aronga akaaka.” (Iakobo 4:6) I konei penei te tuatua ra a Iakobo no runga i te au manako tei akakiteia i roto i te au Tuatua Tapu Epera. “Teitei ua rai a Iehova, ka akono mairai aia i tei akaaka; kareka te nengonengo ra, ei te mamao ke aia e akara mai ei.” “Te mata teitei o te tangata nei, e taakaakaia ïa, e te teitei o te tangata nei, e tukuia ïa ki raro, e ko Iehova anake ra te ka akateiteiia.” “Te akavaavaa nei aia [te Atua] i te aronga e akavaavaa: kareka te aronga akaaka, te kite aroa nei aia ia ratou.”​—Salamo 138:6; Isaia 2:11; Maseli 3:34.

Kua akamaroiroi katoa te apotetoro ko Petero i te tu akaaka. Kua tata aia: “E kotou ravarai oki ka kauraro ia kotou uaorai, e kia kakauia kotou i te akaaka; ‘e patoi te Atua i tei nengonengo, e oronga mai i te meitaki no tei akaaka.’”​—1 Petero 5:5.

Ta Karaiti Akara Anga o te Tu Akaaka

Penei ka ui koe, Eaa te tu meitaki me kare te puapinga te vaira ma te akaaka? No tetai tangata te tauta ra ei Kerititiano mou e tumu anga te pau anga​—kia akaaka kia riro mei ia Karaiti rai. Kua akaari a Iesu i tona tu akaaka na te ariki anga i te tuku anga angaanga umere kia aere mai ki te enua mei te rangi ra e kia riro mai ei tangata akaaka, tei meangiti i te au angera. (Ebera 2:7) Noatu e Tamaiti aia na te Atua, kua akakoromaki aia i te taakama anga tei titiriia ki runga iaia e tona au enemi akonoanga. Kua tu ua aia i te tuatau o tona timata anga, noatu e ka rauka i te kapiki i te au angera mano tini kia tauturu mai iaia.​—Mataio 26:53.

I te openga ra, kua patiaia a Iesu ki runga i te pou patia, inara kua vai tiratiratu ki tona Metua. No reira, kua rauka ia Paulo i te tata no runga iaia: “Kia okotai rai o kotou tu ngakau e to te Mesia ra to Iesu: Ko te tu ïa aia no te Atua, e kare aia i manako e, e apinga āru kia aite katoa aia i te Atua ra: Kua tuku ke atura ra aia i tona uaorai tu, e kua rave i to te tavini, i te riro anga mai mei te tangata nei te tu: E koia i kitea mei te tangata nei te tu, kua taakaaka iaia uaorai i te akonoanga e tae ua atu ki te mate, ki te mate satauro ra.”​—Philipi 2:5-8.

No reira akapeea e raukai ia tatou i te akaari i te tu akaaka mou? I te au turanga tau, akapeea tatou me akono na roto i te tu akaaka kare i te tu ngakau parau?

Akapeea Tetai Tangata Akaaka me Ariu

Ka akamanako ana tatou i te tuatua akaaka i tona akanoo anga, me i te angaanga me kare i te angaanga Kerititiano. E manuiai tetai angaanga ka anoanoia te au akaaere, te au manitia, e te akaaere. Ka anoanoia tetai kia tuku i te au iki anga. Akapeea koe me ariu atu? Ka manako ainei koe, “Koai aia ka akakite mai ei kiaku e eaa te ka rave? E maata atu toku mataiti i te angaanga ki konei iaia.” Ae, me ngakau parau koe, ka riri koe i raro ake i te kauraro anga. I tetai tua, ka tauta tetai tangata akaaka “auraka takiri e mea e raveia ma te taumāro, e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai.”​—Philipi 2:3.

Akapeea koe me ariu atu me aere mai tetai taiku anga mei tetai tangata ou me kare tetai vaine? Me e akaaka koe, ka akamanako koe i te reira. Me e ngakau parau koe, ka patoi koe i te reira me kare ka kopae koe i te reira. Ka inangaro ainei koe kia akapaapaaia me kare kia tuatua reka uaia te taki atura ki te kino? me kare te ako anga tau ei akamaroiroi ia koe?​—Maseli 27:9; 29:5.

Ka rauka ainei ia koe te autu i te akaaoanga tumatetenga? Ka rauka i te tu akaaka i te tauturu ia koe kia aro atu i te au turanga ngata e kia akakoromaki, mei ia Iobu rai. Me e ngakau parau koe, ka riri ua koe penei ka meameaau i tetai au turanga mamae e te au tu taakama anga.​—Iobu 1:22; 2:10; 27:2-5.

E Aroa ua e te Akakore Anga te Tu Akaaka

E ngata ana i etai tangata i te tuatua, “Te mii nei au. Kua tarevake au. Kua tika rai koe.” Eaa ra? Maata roa te ngakau parau! Inara, ka rauka putuputu i tetai tataraara i te tapu i tetai tauetono anga.

Ka puareinga ainei koe i te akakore i te ara me akariri mai tetai ia koe? Me kare, me e ngakau parau koe, ka rotoriri ainei koe, penei no tetai au ra e te au marama, te kore anga e tuatua ki tei akariri ia koe? Ka tamou ua atu ainei koe i te tutaki kino i te tauta anga kia aiteite? Kua tamateia etai au tangata no te tutaki kino. I tetai, kua riro te tu tamate ei ravenga. Ei akatuke anga, e aroa ua e te akakore i te ara a tetai tangata akaaka. Eaa ra? No te mea kare te aroa e akono i te tutaki anga. Kua puareinga a Iehova i te akakore i te ara a to Iseraela me apuku ratou i to ratou tu ngakau parau. Ka puareinga tei aru akaaka ia Iesu i te akakore i te ara, ma te ripiti ua!​—Ioela 2:12-14; Mataio 18:21, 22; 1 Korinetia 13:5.

Ko tetai tangata akaaka ‘ka akangateitei tetai ki tetai.’ (Roma 12:10) Te tatau ra te New International Version e: “E akangateitei tetai i tetai i runga ake ia koe uaorai.” Te akapaapaa ra ainei koe i tetai e te ariki ra i to ratou au tu karape e te kite? Me kare ka kimi ainei koe i te kino kia akakino i to ratou tu? Ae, te tau ra ainei koe i te akapaapaa tika i tetai au tangata? Me ngata ia koe i teia ngai, penei ko te tinamou kore e ko te ngakau parau toou manamanata.

E akakoromaki kore to te tangata ngakau parau. E tu akakoromaki e te akakoromaki anga roa to tetai tangata akaaka. Akapeea koe? Te taitaia ra ainei koe i tetai ua atu rave anga reka kore? E tuke taua ariu anga ki te akakoromaki anga roa. Me e akaaka koe, kare koe e manako pakari ia koe. E akamaara ana i tei tupu i te manako pakari anga te au pipi a Iesu ia ratou uaorai​—kua tauetono ratou e koai te mea maata atu. Kua ngaropoina ia ratou e e “au tavini puapinga kore” ratou!​—Luka 17:10; 22:24; Mareko 10:35-37, 41.

Kua akataka te tangata tata Varani ko Voltaire i te tu akaaka e “ko te tu tau o te meta . . . te vairakau ki te ngakau parau.” Ae, ko te tu akaaka e tu akaaka ia o te manako. E tu tau ua to te tangata akaaka, kare i te ngakau parau. E tu ngateitei tona e te meitaki.

No reira eaa ra ka tauta ei kia akaaka? No te mea te mareka ra te Atua i te tu akaaka e te tauturu ra ia tatou kia rauka te paruru anga tu-Atua. No to Daniela tu akaaka, kua manako a Iehova i te peroveta ei tangata “akaperepere maataia” e kua tono mai i tetai angera kiaia ma tetai orama! (Daniela 9:23; 10:11, 19) Te apai maira te tu akaaka i te au tutaki anga e manganui. Te apai maira i te au taeake mou te inangaro ra ia koe. Maata atu i te reira, te apai maira i ta Iehova akameitaki anga. “Te tutaki o te taakaaka e te mataku ia Iehova, ko te apinga nui ïa, ko te ngateitei ïa, ko te ora ïa.”​—Maseli 22:4.

[Tutu i te kapi 7]

Ka rauka i te tuatua tataraara akaaka i te akariro i te ora anga kia meitaki