“Ka Akamou ei to Ngakau” i te Iero o te Atua!

“E te tamaiti a te tangata na, . . . ka akamou ei to ngakau i te au mea katoa taku e akakite atu kia koe ra . . . te au mea katoa taau e kite ra, ko te akakite atu ïa ki te ngutuare o Iseraela.”​—EZEKIELA 40:4.

1. I roto i teea turanga ta te aronga ikiia e te Atua ra kite anga ia ratou uaorai i te 593 M.T.N.?

KO TE 593 M.T.N. te mataiti, i te 14 mataiti o to Iseraela tuikaanga. Ki te au ngati Iuda tei noo ra ki Babulonia, kua akara anga mamao roa atu to ratou enua kainga akaperepere ra. I te akara anga openga o te maata anga o ratou ra ia Ierusalema, te mura ra ia i te ai, kua pururu tona patu maata ra, kua akakinoia tona au are akaparau angaia ra. Te iero o Iehova​—koia te akakoronaanga akakakaia o taua oire, te ngai akamori anga ma no te enua katoa ra—​kua akariroia ei tetai putuanga toka teita ua. I teianei ko te maata anga o to Iseraela ra tuikaanga te vai maira ki mua. Ka pou etai 56 mataiti i mua ake i te akaora anga taputouia ra.​—Ieremia 29:10.

2. Eaa ra te maaraara anga i te iero o te Atua i Ierusalema ra i akariro ei kia tupu te mii kia Ezekiela?

² E mea tika ra e kua mii te peroveta tiratiratu ra ko Ezekiela kia manako atu i te iero o te Atua te takoto ututua atura e au anere ua atu kiro mita te mamao ke, e ngai tanea nooia e te manu taae anake ra. (Ieremia 9:11) Kua tavini tona uaorai metua ko Buzi ki reira ei taunga. (Ezekiela 1:3) Ka tau ra a Ezekiela kia rekareka katoa i te raveanga i taua taoonga ra, inara kua apai keia aia ei tuikaa ma te aronga mana taoonga o Ierusalema ra iaia e ou ua ra i te 617 M.T.N. I reira kua vaitata aia ki te 50 mataiti, penei kua kite a Ezekiela e kare rava aia e akara akaou ia Ierusalema e kare katoa oki e tuanga nana i te patu akaouanga i tona iero ra. E tamanako ana, e akapeea te maata to Ezekiela rekareka kia akara i tetai orama no tetai iero kaka ra!

3. (a) Eaa te akakoro anga o te orama a Ezekiela no te iero ra? (e) Eaa nga tuanga maata e a no taua orama ra?

³ Kua oronga mai teianei orama akatotoaia, tei akaki maira e iva pene no te puka a Ezekiela i tetai taputou akamaroiroi i te akarongo o to Iudea tei tuikaaia ra. Ka akaora akaouia te akamori anga ma! I te au anere mataiti mei reira mairai, e tae roa mai ki to tatou tuatau nei, kua riro teianei orama ei tetai tumu no te akamaroiroi anga ki te aronga inangaro ia Iehova ra. Naea ra? E akara matatio tatou e eaa te aite anga o taua orama totou a Ezekiela ra ki to Iseraela tei tuikaaia ra. E a ona tuanga maata: te iero, te kau taunga, te ariki, e te enua oki.

Akaoraia te Iero Ra

4. Kua takiia atura Ezekiela kiea i te akamataanga o tana orama, e eaa tana i akara i reira, e naai i arataki aere iaia i te tutaka anga?

⁴ Te mea mua, kua aratakiia maira Ezekiela “ki runga i tetai maunga teitei roa.” I te maunga i te pae tonga ko tetai iero maata, mei tetai oire paruruia ra. Kua taki atu tetai angera “mei te veo aia te tu i te akara anga atu,” e kua arataki atu i te peroveta ra kia tutaka marie i taua are ra. (Ezekiela 40:2, 3) I te tupu aere anga taua orama ra, kua akara matariki atura Ezekiela i taua angera ra i te vaitoanga i te iero i nga ngutupa aiteite e toru ra ma to ratou nga pia rikiriki ra, ko tetai paepae ki vao, ko tetai ki roto ra, nga pia kaikaianga, tetai atarau, e te ngai tapu o te iero ma tona Ngai Tapu e te Ngai Tapu Rava oki.

5. (a) Eaa te akapapu anga ta Iehova i oronga kia Ezekiela? (e) Eaa “te au turuma o to ratou au ariki” tei tau ra kia akaateaia atu i te iero, e eaa i puapinga maatai te reira?

⁵ I reira, kua mama maira Iehova uaorai i roto i te orama. Kua tomo atura Aia i te iero e kua akapapu atu kia Ezekiela e ka noo Aia ki reira. Inara kua akaue atura Aia no tetai tamaanga i Tona are, i te na ko anga: “Teianei ra, kia tuku ke atu ratou i ta ratou au akaturi anga, e te au turuma o to ratou au ariki, kia atea ke atu iaku nei, e ko au te ka noo ki rotopu ia ratou i reira e tuatau ua atu.” (Ezekiela 43:2-4, 7, 9) Ko teia “au turuma o to ratou au ariki” i te akara anga te taiku ra i to ratou au itoro. Kua akaviivii te au tutara e te au tangata meameaau i Ierusalema ra i te iero o te Atua ma te au itoro ra e, ko te tu, kua akariroia ei ariki no ratou. (Akaaite ia Amosa 5:26.) E mamao ke atu i te au atua ora me kare au ariki, e au mea mate teia, e au mea viivii i nga mata o Iehova ra. Ka tika ratou kia takoreia atu.​—Levitiku 26:30; Ieremia 16:18.

6. Eaa te akatakaia maira e te vaitoanga i te iero ra?

⁶ Eaa te tumu no teianei tuanga o te orama ra? Kua akapapu mai ia ki te aronga tuikaa ra i te akaora anga takiriia o te akamori anga ma i te iero o te Atua ra. Pera katoa oki, ko te vaitoanga i te iero ra kua oronga mai i tetai akapapu anga tu-Atua e ko te akatupu anga i taua orama ra ka riro ei mea tika tikai. (Akaaite ia Ieremia 31:39, 40; Zekaria 2:2-8.) Pouroa te au akamori itoro ka tama takiriia. Ka akameitaki akaou a Iehova i tona are.

Te Kau Taunga e te Ariki Ra

7. Eaa te akakite anga tei orongaia maira no runga i te ngati Levi e te kau taunga?

⁷ Kua akapapa katoaia te kau taunga no tetai akatikatikaanga, me kare tamaanga. Kua tau te au ngati Levi kia akoia no te riroanga kia akamori itoro, ko te tamariki kau taunga Zadoka ra kua tau kia akapaapaaia e kia tutakiia no te vai ma anga.a Inara, e turanga tavini to nga pupu e rua ra i roto i te are akaoraia o te Atua ra​—kare e ekokoanga, tei runga i to ratou tu tiratiratu tataki tai. Pera katoa, kua ikuiku a Iehova: “E na ratou e apii i toku ra au tangata i te tu ke anga i tei tapu e tei noa ra, e akakite oki kia kite ratou i tei viivii e tei mā.” (Ezekiela 44:10-16, 23) No reira kua tau te kau taunga ra kia akaoraia, e ko te akakoromaki anga tiratiratu o te au taunga ra ka tutakiia.

8. (a) Koai ma te au ariki o Iseraela i taito ra? (e) Na roto i teea au tu te rave anga a te ariki ra i te akamori anga ma i te orama a Ezekiela ra?

⁸ Te taiku katoa ra taua orama ra ki tetai tei tapaia ko te ariki. Mei te tuatau mairai ia Mose, e ariki to taua iti tangata ra. Ko te tuatua Epera no te ariki, na·siʼʹ, ka tau kia taiku i tetai upoko no tetai ngutuare metua ra, tetai kopu, me kare no tetai iti tangata ra. I te orama a Ezekiela ra, kua akoia te au tutara o Iseraela ra ei pupu no te takinga kino i te iti tangata ra e kua apiiia kia tau e kia tika te akaaere. Noatu rai e kare no te pupu kau taunga, te rave ra te ariki na roto i tetai tu maata i te akamori anga ma. Te tomo atura aia e te aere atu ra oki ki vao i te paepae i vao mai ma te au kopu kare ra no te kau taunga, te noo ra ki roto i te tomo anga o te Ngutupa o te Itinga Ra, e kua oronga atu i etai o te au atinga na te au tangata ra kia oronga. (Ezekiela 44:2, 3; 45:8-12, 17) No reira kua akapapu maira te orama e ko te au tangata o Ezekiela e iti tangata akaoraia ka akameitakiia ma te au arataki meitaki, e au tangata te ka turu i te kau taunga i te akapapaanga i te au tangata o te Atua ra e ka riro ei au akatauanga meitaki i te au tumu pae vaerua ra.

Te Enua

9. (a) I akapeea te akataka aere anga i te enua ra, inara koai ma kare a ratou tuanga? (e) Eaa te atinga tapu, e eaa to te reira?

⁹ I te openga, kua kapiti mai te orama a Ezekiela i tetai akakite anga i te enua o Iseraela ra. Ka akatakaia ma tetai tuanga no te au kopu tataki tai ra. Ka akatuanga katoaia oki tetai ngai no te ariki ra. Inara, kare no te kau taunga, no te mea kua tuatua a Iehova, “ko au oki ta ratou tuanga.” (Ezekiela 44:10, 28; Numero 18:20) Kua akakite mai te orama e ko te tuanga enua no te ariki ra ka akatakaia ki nga pae e rua o tetai ngai taka ke tei tapaia ko te atinga tapu. Ko teia e potonga enua tei tipuia i nga tuanga e toru​—to runga no te au ngati Levi tataraara, to rotopu no te kau taunga, e to raro no te oire ma tona enua uua i nga pae e rua ra. Ka patuia te iero o Iehova ki roto i te tuanga enua no te kau taunga ra, i rotopu i te ngai e atinga ra.​—Ezekiela 45:1-7.

10. Eaa te aite anga o te totou no te akataka aereanga i te enua ra ki te aronga tiratiratu ngati Iuda tuikaaia ra?

¹⁰ Mei teaa ra te taaki anga a teianei katoa i te au ngakau ki runga o te aronga tei tuikaaia ra! Kua akapapuia ki te au pamiri tataki tai katoa ra e tuanga to ratou i te enua ra. (Akaaite ia Mika 4:4.) Ka riro tetai ngai akateiteiia i reira no te akamori anga ma ra. E e akara i te orama a Ezekiela ra e ko te ariki ra, mei te kau taunga katoa oki, ka noo ki runga i te enua tei oronga atingaia ra e te tangata tini katoatoa ra. (Ezekiela 45:16) No reira i te enua akaoraia maira, kua tau te au tangata kia tauturu i te angaanga a te aronga ta Iehova i akataoonga ra kia rave i te arataki anga, na te turuanga ia ratou i te rave kapitianga ma ta ratou arataki anga. I te katoa anga, e tutu teianei enua no te akaaerenga, te taokotai anga, e te tinamou.

11, 12. (a) Akapeea ta Iehova ra totou akapapu anga i tona au tangata e ka akameitakiia e ia to ratou enua kainga akaoraia maira? (e) Eaa tei akatutuia mai e te au rakau i nga pae o te kauvai ra?

¹¹ Ka akameitaki ainei a Iehova i to ratou enua? Te pau maira te totou i teianei uianga ma tetai tutu akapumaanaanga ngakau. Kua tae mai tetai vai mei raro i te turuki o te iero ra, kua tupu kia maata atu te atea i tona aerenga, kua riro ei kauvai oonu i tona tomo atuanga ki te Tai Mate. I reira kua akaora mai ia i te au vai ora kore ra, e kua tupu maata te angaanga ravakai i reira i taua taatai ra. E manganui te au rakau te ua maira i nga pae o taua kauvai ra i te mataiti katoa ra, ma te orongaanga i te maroiroi e te rapakauanga.​—Ezekiela 47:1-12.

¹² Ki te aronga tuikaaia ra, kua akakite akaouia mai e kua akatinamouia te au totou akaora anga ta ratou i akaperepere ra. E tere atu i te okotai taime, kua akataka mai nga peroveta akauruia a Iehova ra i tetai Iseraela akaoraia, kia tangata akaouia oki na roto i te au tuatua parataito ra. Te au ngai mate tei akariroia kia ora mai kua totou taokioki akaouia. (Isaia 35:1, 6, 7; 51:3; Ezekiela 36:35; 37:1-14) No reira ka tau kia manakonako atu te au tangata e ka tae mai ta Iehova ra au akameitakianga oronga oraanga mei tetai kauvai rai mei te iero akaoraia maira. No reira, ko tetai iti tangata tei mate ra i te pae vaerua ka akaoraia ia. Ka akameitakiia te au tangata akaoraia ra ma te au tangata meitaki i te pae vaerua​—e au tangata tuatua tika e te ngaueue kore oki mei te au rakau tei tupu ra i te pae o te kauvai i te orama ra, e au tangata te ka rave i te arataki anga i te patu akaouanga i tetai enua tei akakinoia ra. Kua tata katoa oki a Isaia no “te au rakau tuatua-tika” na ratou “e patu akaou oki i te au ngai tanea takere ra.”​—Isaia 61:3, 4.

A Naea e Akatupuiai Taua Orama Ra?

13. (a) I roto i teea tu ta Iehova ra akameitaki anga i tona au tangata akaoraia maira ma te “au rakau tuatua-tika”? (e) Akapeea te akatupu angaia te totou no te Tai Mate ra?

¹³ I reka kore ainei te aronga tuikaa tei oki akaou maira? Kare rava ia! Kua oki akaou mai tetai toenga akaoraia ra ki to ratou enua kainga akaperepere ra i te 537 M.T.N. I muri iora, i raro ake i te arataki anga a te “au rakau tuatua-tika” ra​—mei te tangata tata tuatua ko Ezera, nga peroveta ko Hagai raua ko Zekaria, e te Taunga Maata ko Iosua—​kua patu akaouia te au ngai kua roa ra te tanea anga. Ei akatauanga i nga Ariki ko Nehemia raua ko Zerubabela, kua tutara i te enua ra ma te tau e te tika oki. Kua akaoraia te iero o Iehova ra, e ko tana au apinga orongaia mai no te oraanga​—koia te au akameitakianga no te akonoanga i tana koreromotu—​kua tae akaou mai. (Deuteronomi 30:19; Isaia 48:17-20) Ko te kite tetai akameitakianga. Kua akaora akaouia te kau taunga kia rave angaanga, e kua apii atu te kau taunga i te au tangata ra i te Ture. (Malaki 2:7) Ei tetai tupu anga, kua ora akaou mai te au tangata ra i te pae vaerua e kua riro akaou ei au tavini uua mai no Iehova, mei tei akatutuia maira e te rapakau anga i te Tai Mate e te akatupuanga i tetai angaanga ravakai puapinga tikai.

14. Eaa ra ka tere roa atu ei te tupu anga no te totou a Ezekiela ra i tei tupu ra i muri ake i te okianga o te au ngati Iuda mei te tuikaa anga i Babulonia ra?

¹⁴ Ko teianei au tupu anga anake ainei te akatupu anga i ta Ezekiela orama ra? Kare; ko tetai apinga maata roa atu te akakiteia maira. E akamanako ana: Kare te iero ta Ezekiela i akara ra e rauka kia patuia mei tei akatakaia maira. E tika, kua akamanako tikai te au ngati Iuda ra i taua orama ra e kua rave oki i etai akataka anga.b Inara, e maata roa taua iero o te orama ra kia o atu ki runga i te Maunga ko Moria, koia te ngai o te iero mua ra. Kapiti katoa oki, kare te iero a Ezekiela ra i roto i te oire mari ra e mamao ke atu i tetai potonga enua ke, inara ko te rua o te iero kua patuia ki te ngai i tu ei to mua akera, i te oire o Ierusalema ra. (Ezera 1:1, 2) Pera katoa oki, kare tetai kauvai tikai i tae mai mei te iero i Ierusalema ra. No reira e akatutu anga meangiti ua ta Iseraela i taito ra i akara no te akatupu anga i ta Ezekiela i totou ra. Te akakite maira teia e te vaira tetai atu tupu anga maata atu i te pae vaerua no teianei orama.

15. (a) I naea i akamatai te iero vaerua o Iehova ra i tana angaanga? (e) Eaa te akakite maira e kare i akatupuia te orama a Ezekiela i te tuatau o to Karaiti ora anga ki runga i te enua nei?

¹⁵ Te taka meitaki ra, ka tika tatou kia akara no te akatupu anga maata o ta Ezekiela orama ra i ta Iehova ra iero vaerua maata, ta te apotetoro ko Paulo e uriuri manako maata ra i te puka o Epera. Kua akamata te angaanga a taua iero ra i to Iesu Karaiti akatainu angaia ei tona Taunga Maata i te 29 T.N. Inara kua akatupuia ainei ta Ezekiela orama i te tuatau ia Iesu ra? I te akara anga kare. Kua akatupu a Iesu, ei Taunga Maata, i te puapinga no te Ra Tapokianga ara na tona papetito angaia, tona matenga ei atinga, e tona tomo anga ki roto i te Ngai Tapu Rava, koia te rangi ra. (Ebera 9:24) Inara, e mea tau kia manakoia e, kare te orama a Ezekiela i taiku mai i tetai tuatua no te taunga maata me kare te Ra Tapokianga ara. No reira i te akara anga kare teianei orama i tou atu ana ki te anere mataiti mua T.N. Ki teea tuatau, i reira, e tupu ei te reira?

16. Eaa ta te akanooanga o ta Ezekiela orama e akamaaraara maira kia tatou no tetai atu totou, e akapeea ta teianei tauturu anga ia tatou kia kite i te tuatau no te akatupu anga maata o ta Ezekiela orama?

¹⁶ No tetai pauanga, e oki akaou tatou ki te orama ra. Kua tata a Ezekiela: “I te au orama a te Atua i arataki aia iaku ki te enua o Iseraela, e kua tuku iora iaku ki runga i tetai maunga teitei roa ra, e mei te mea e e tu no tetai oire tei vaitatao, tei te pae i te apatonga ra.” (Ezekiela 40:2) Te akanooanga no teianei orama, ko te “maunga teitei roa ra,” te akamaara maira ia tatou ia Mika 4:1: “E riro kia tae ki te au rā openga ra, e akatinamouiaʼi te maunga ra o te are o Iehova ki runga i te take o te au maunga ra, e ka akateiteiia ïa ki rungao i te au tuaivi ra, e ka uipa mai te au tangata ki reira.” A naea e akatupuiai teianei totou? Te akakite maira Mika 4:5 e ka akamata teia i te tuatau te akamori atua pikikaa ra to te au pa enua. Ko te tika, ko to tatou uaorai tuatau nei, i “te au rā openga ra,” e apaiiai te akamori anga ma ki runga, e akaoraiai ki tona ngai tika i roto i te au oraanga o te au tavini a te Atua ra.

17. Akapeea te tauturu anga ia tatou a te totou ia Malaki 3:1-5 kia akataka e i naea te iero o te orama a Ezekiela ra i tamaiai?

¹⁷ Na teaa i akariro kia rauka teianei akaora anga? Kia maara, i te tupu anga maata rava o te orama a Ezekiela, kua aere maira Iehova ki te iero e kua raurau kia tamaia te akamori anga itoro i tona are. I naea i tamaiai te iero vaerua o te Atua ra? Ia Malaki 3:1-5, kua totou maira Iehova i te tuatau “ka tae vave mai ïa ki tona ra nao” raua ko tana “karere a te koreromotu,” koia Iesu Karaiti. Te akakoro anga? “Kua aite oki aia ki te ai a te tamā moni ra, e mei te pua a te tamā kakau ra.” Kua akamataia teianei tamaanga i te tuatau o te tamaki mua o te ao ra. Te tupu anga? Kua noo a Iehova ki roto i tona are e kua akameitaki i te enua pae vaerua o tona au tangata mei te 1919 mairai. (Isaia 66:8) Penei ka manako tatou, i reira, e kua kitea tetai tupu anga puapinga maata i te tuatau openga nei no te totou iero a Ezekiela ra.

18. Aea ka akatupu akaotiia te orama no te iero ra?

¹⁸ Mei etai atu totou akaora anga ra, e akatupu anga ke atu to te orama a Ezekiela, ko te mea openga ki roto ia Parataito. A tera tuatau anake e raukai i te tangata ngakau tika te au puapinga ki katoa no te akanoonoo anga iero a te Atua ra. Ei reira a Karaiti e oronga mai ei i te puapinga o tona atinga oko, i te rave kapiti anga ma tana kau taunga e 144,000 i te rangi ra. Pouroa te au tangata akarongo i raro ake i ta Karaiti tutara ka akateiteiia ake ki te tu apa kore ua. (Apokalupo 20:5, 6) Inara, kare ko Parataito te tuatau maata no te akatupu anga i ta Ezekiela ra orama. Eaa i kore ei?

Te Tou ra te Orama ki to Tatou Uaorai Tuatau

19, 20. Eaa ka tikai te akatupu anga maata o te orama ra kia tupu i teia tuatau nei e kare ki roto ia Parataito?

¹⁹ Kua akara atu a Ezekiela i tetai iero tei umuumuia ra kia tamaia i te akamori itoro e te akaturi anga i te pae vaerua. (Ezekiela 43:7-9) Kare tikai teia e tuatua ana no te akamori anga ia Iehova i Parataito. Pera katoa oki, te akatutu maira taua orama ra i te pupu akatainuia ei taunga ia ratou e vai nei i te enua, kare i to ratou tuakaouanga ki te rangi me kare i te tuatau o te Tauatini Mataiti. No teaa ra? E akara oki e te akatutuia maira te au taunga i te paepae o roto ra. Kua akakite mai te au atikara o te au itiu o Te Punanga Tiaki e ko teianei paepae te akatutu maira i te turanga taka ke i te pae vaerua o te au kau taunga tauturu a Karaiti ia ratou e vai nei i te enua.c E akara katoa oki e te akaketaketa maira te orama i te tu apa ua o te au taunga ra. Kua akaueia ratou kia oronga atinga no to ratou uaorai au ara. Kua akamatakiteia ratou i te kino no te riroanga kia viivii​—i te pae vaerua e te tu akono oki. No reira kare ratou e akatutu mai ana i te aronga akatainuia kua akatuakaouia ra, ko ratou ta Paulo i tata ra: “E tangi tikai oki te pu, e e akatuia tei mate ma te pe kore.” (1 Korinetia 15:52; Ezekiela 44:21, 22, 25, 27) Te au taunga i te orama ra te kapiti e te tavini tika atura i te au tangata. Kare teia e raveia i Parataito, i te tuatau tei te rangi te pupu taunga ra. No reira, te oronga maira te orama i tetai tutu no te tu rave angaanga piri vaitata tei akatainuia ra ma te “aronga maata rava” i te enua nei i teia tuatau.​—Apokalupo 7:9; Ezekiela 42:14.

²⁰ No reira ko te orama a Ezekiela no te iero ra te akakite maira i te au tupu anga memeitaki no tetai akatupu anga tama anga i te pae vaerua te raveia nei i teia tuatau. Inara eaa te aite anga o te reira kia koe? Kare teianei i tetai apiianga akonoanga piri, tei taka kore ua ra. E maata te puapinga o teianei orama ma toou uaorai akamori anga mei tera ra ki tera ra no te Atua mou anake, ko Iehova ra. I ta tatou atikara te aru mai nei, ka kite tatou e akapeea.

[Au Tataanga Rikiriki i Raro]

Maara Ainei ia Koe?

◻ Eaa te akatupu anga mua o ta Ezekiela ra orama no te iero e tona kau taunga?

◻ Akapeea te akatupu mua anga te orama a Ezekiela ra no te akatuanga anga i te enua ra?

◻ I te akaora angaia to Iseraela i taito ra koai tei akono ei nga ariki tiratiratu ra e koai tei akono ei “au rakau tuatua-tika”?

◻ Eaa ka tikai kia kiteaia te akatupu anga maata o te orama iero a Ezekiela i te tuatau openga nei?