Ta Iehova Akameitakianga ki Runga i to Tatou “Enua”

“E ora oki te au mea katoa i taea e taua kauvai ra.”​—EZEKIELA 47:9.

1, 2. (a) Eaa te puapinga o te vai? (e) Eaa te akatutuia maira e te vai o ta Ezekiela ra orama no te kauvai?

E APINGA umere tikai te vai. Te umuumuia ra te reira no te oraanga kopapa katoa. Kare tetai o tatou nei e ora roa me kore e vai. Te irinaki katoa ra tatou i te reira no te tamaanga, no te mea ka rauka i te vai te takore atu e te tama atu i te au tu viivii. No reira ka tama tatou i to tatou au kopapa, to tatou kakau, pera katoa ta tatou kai ki roto i te reira. Na te raveanga i te reira penei ka akaora mai i to tatou au oraanga.

² Te taiku ra te Pipiria i te vai ei akatutu i ta Iehova ra au apinga vaerua orongaia mai no te oraanga. (Ieremia 2:13; Ioane 4:7-15) Te kapiti ra teianei au apinga orongaia mai i te tamaanga tona au tangata na roto i te atinga oko o Karaiti e te kite oki i te Atua te kitea ra ki roto i tana Tuatua. (Ephesia 5:25-27) I roto i ta Ezekiela orama iero, te kauvai temeio te tae maira mei te iero te akatutu ra i taua au akameitakianga oronga ora maira. Inara aea taua kauvai ra e tae mai ei, e eaa tona aite anga no tatou i teia tuatau nei?

Tae Atura Tetai Kauvai i te Enua Akaoraia

3. Eaa ta Ezekiela i kite, mei tei ripotiia maira ia Ezekiela 47:2-12?

³ Ei aronga tuikaaia i Babulonia, kua umuumu maata te au tangata o Ezekiela i te au apinga a Iehova ra. Mei teaa ra te akamaroiroianga, i reira, no Ezekiela kia kite i tetai vai meangiti ua i te mama maianga mei te ngai tapu e kua tae atu ki vao i te iero orama ra! Kua aite atu tetai angera i taua vai ra i etai tuanga e 1,000 kupiti. Kua oonu aere maira ia mei te puku o te vaevae ki te tonga turi e ki te taukupu e kua riro atura ei kauvai tei tika ra kia kau aere. Kua apai mai taua kauvai ra i te ora e te akatupuanga oki. (Ezekiela 47:2-11) Kua akakiteia kia Ezekiela: “E i te pae kauvai ra ki runga i te nia o te reira, i teia pae e tera pae, e tupu ei te au rakau katoa ei manga.” (Ezekiela 47:12a) I te tae atu anga taua kauvai ra ki te Tai Mate​—koia tetai roto vai ora kore ra​—kua pupu akera te ora i reira! Kua ki maira i te ika. Kua tupu meitaki ra te angaanga tautai ki reira.

4, 5. Eaa ta Ioela totou no runga i tetai kauvai i aiteite atu ei ki ta Ezekiela ra, e eaa teianei i puapinga maatai?

⁴ Penei kua akamaaraara mai teianei totou manea ki te aronga tuikaa ngati Iuda ra i tetai atu totou tei tataia e tere atu i te rua anere mataiti i mua akera: “E pupui mai oki tetai punavai i te are o Iehova, e ka tamauu iora i te o ra o Sitima.”a (Ioela 3:18) Te totou a Ioela mei ta Ezekiela ra, te totou maira e ka tae mai tetai kauvai mei te are mai o te Atua, koia te iero ra, e ka apai mai i te ora ki tetai ngai maro ra.

⁵ Kua roa te akataka anga mai e Te Punanga Tiaki e ko ta Ioela totou te akatupuia ra i to tatou tuatau nei.b E mea tika, i reira, ko taua tu rai te tika katoa ra no ta Ezekiela orama aiteite. I te enua akaoraia o te au tangata o te Atua ra i teia tuatau nei, mei to Iseraela i taito ra, te tae maira ta Iehova au akameitaki anga.

Tetai Tae Maata no te Au Akameitakianga

6. Te pipianga i te toto ki runga i te atarau orama ra ka tau kia akamaara mai i te au ngati Iuda i teaa?

⁶ Eaa ra te tumu no te au akameitakianga ki rungao i te au tangata akaoraia o te Atua? E akara oki i te vai te tae maira mei te iero o te Atua ra. Mei te reira katoa i teianei tuatau, te aere maira te au akameitakianga mei ko mai ia Iehova ra na roto i tona iero maata​—koia te akanoonoo anga no te akamori ma. Te kapiti maira te orama a Ezekiela i tetai akakiteanga puapinga maata. I te paepae i roto ra, te tae maira te vai na te pae i te atarau, i te pae tonga ua o te reira. (Ezekiela 47:1) Tei rotopu te atarau ra i te iero orama ra. Ka akataka meitaki maira Iehova i te reira kia Ezekiela e kua ikuiku atu e kia pipiia te toto o tetai atinga ki runga i te reira. (Ezekiela 43:13-18, 20) E maata te aiteanga o taua atarau ra no to Iseraela katoatoa. Kua akamanaia ta ratou koreromotu i mua roa ake i ta Mose ra pipi anga i te toto ki runga i te atarau i raro ake ia Maunga Sinai ra. (Exodo 24:4-8) Kua tau te pipianga i te toto ki runga i te atarau orama ra kia akamaaraara ia ratou e me oki atu ratou ki to ratou enua akaoraia ra, ka tae atu ta Iehova au akameitakianga me ka akangateitei ratou i ta ratou koreromotu kiaia ra.​—Deuteronomi 28:1-14.

7. Eaa te aiteanga ta te au Kerititiano e kite i teia tuatau nei i te atarau akatutuia maira?

⁷ Mei te reira katoa, te akameitakiia ra to te Atua au tangata i teia tuatau na roto i tetai koreromotu​—tetai mea meitaki atu, koia te koreromotu ou ra. (Ieremia 31:31-34) Kua roa katoa oki te reira i te akamana angaia na te toto, o Iesu Karaiti ra. (Ebera 9:15-20) I teia tuatau, me tei roto tatou i te aronga akatainuia ra, e au tuanga ra ki taua koreromotu ra, me kare tei roto i te “au mamoe ke atu,” ei aronga puapingaia i te reira, ka kite tatou i te aiteanga maata i taua atarau akatutuia maira. Te akatutu maira te reira i to te Atua ra anoano i te pae ki to Karaiti atinga ra. (Ioane 10:16; Ebera 10:10) Mei te atarau akatutuia maira tei rotopu o te iero vaerua ra, ko to Karaiti atinga oko tei rotopu ia i te akamori ma ra. Ko te tumu anga ia no te akakore anga i ta tatou au ara e no reira no to tatou au manakonakoanga katoa oki no te tuatau ki mua ra. (1 Ioane 2:2) No reira ka tauta tatou kia akono i te ture taokotaiia ra ma te koreromotu ou, koia “te ture a te Mesia ra.” (Galatia 6:2) Me rave tamou tatou i te reira, ka puapingaia tatou mei ta Iehova ra au apinga orongaia mai no te oraanga.

8. (a) Eaa kare i kitea i te paepae i roto i te iero orama ra? (e) Na teaa i raukai i te kau taunga i te iero orama ra kia tama ia ratou uaorai?

⁸ Ko tetai o aua puapinga ra e turanga ma ki mua ia Iehova. I roto i te iero orama ra e apinga tetai kare i roto i te paepae i roto ra ko tei kitea meitakiia ra i te paepae o te tapenakara e i te iero oki a Solomona ra​—koia tetai ariki vai maata, kua tapaia i muri iora e tai, ei orei anga no te kau taunga ra. (Exodo 30:18-21; 2 Paraleipomeno 4:2-6) Eaa ta te kau taunga i te iero orama a Ezekiela te ka taangaanga no te tamaanga? Eaa oki, ko taua vai temeio tei tae maira na te paepae i roto ra! Ae, ka akameitaki a Iehova ia ratou ma te apinga kia rekarekai i tetai turanga ma, me kare e tapu.

9. Akapeea e raukai i te aronga akatainuia ra e to te urupu maata oki tetai turanga ma i teia tuatau nei?

⁹ Mei te reira katoa i teia tuatau, kua akameitakiia tei akatainuia ra ma tetai turanga ma ki mua ia Iehova. Te manako maira Iehova ia ratou ei aronga tapu, ma te karangaanga ia ratou e tuatua tika. (Roma 5:1, 2) Akapeea oki te “aronga maata rava,” tei akatutuia maira e te au kopu kare ra i te kau taunga? Te akamori ra ratou i te paepae i vao akera, e ko taua vai rai te tae atura na roto i taua tuanga o te iero orama ra. Mei teaa ra te tau, i reira, e kua akara atu te apotetoro ko Ioane i te aronga maata rava i te kakauanga i te kakau ma ma te teatea ia ratou e akamori ra i roto i te paepae o te iero vaerua ra! (Apokalupo 7:9-14) Noatu rai e akapeea to ratou akonoia i teianei ao taekeia, penei ka akapapuia ratou e me akono ratou i te akarongo i te atinga oko o Karaiti, te manako maira Iehova ia ratou e te ma ra e te viivii kore. Akapeea ratou me akono i te akarongo? Na te aruanga i te au tapuae o Iesu, ma te irinaki anga ki katoa i te atinga oko ra.​—1 Petero 2:21.

10, 11. Eaa tetai tu puapinga maata o te vai akatutuia maira, e eaa te pirianga o teianei ki te akatotoa maata anga o te kauvai ra?

¹⁰ Mei tei taikuia ra, te vaira tetai atu tuanga puapinga maata no teianei vai akatutuia​—ko te kite ia. I roto i te Iseraela akaoraia ra, kua akameitaki a Iehova i tona au tangata ma te apiianga Tuatua Tapu na te kau taunga ra i rave. (Ezekiela 44:23) Na roto i tetai tu aiteite, kua akameitaki a Iehova i tona au tangata i teia tuatau nei ma te apiianga rava no tana Tuatua mou, na roto i te “kau taunga ariki.” (1 Petero 2:9) Te kite i te Atua ko Iehova, i tana au akakoro anga no te tangata, e e maata oki no Iesu Karaiti e te Patireia Mesia ra kua tae mai i roto i tetai kauvai te tupu maata atura i teia tuatau openga. Mei teaa ra te meitaki te pukeanga oonu akapumaana anga pae vaerua te rauka maira ia tatou!​—Daniela 12:4.

¹¹ Mei te kauvai ta te angera i aite ra i te tupu aere anga kia oonu atu, mei te reira katoa oki te tae anga o te au akameitakianga oronga ora mei ko mai ia Iehova kua tupu maata rava atu kia ravai no te aereanga maata mai te au tangata ra ki to tatou enua pae vaerua akameitakiia ra. Ko tetai atu totou akaora anga tei akakiteia maira: “E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi; naku, na Iehova, e akarapurapu i te reira i tona tuatau.” (Isaia 60:22) Kua tika teianei au tuatua​—e au mirioni ua atu kua aere mai kia kapiti ma tatou i te akamori ma! Kua akariro a Iehova kia maata te “vai” kia rava na te katoatoa te ariu maira kiaia. (Apokalupo 22:17) Kua akapapa aia e kia tua aere tana akaaerenga i te enua nei i te au Pipiria e te au puka apii Pipiria oki takapini te ao katoa nei, i roto i te au reo e au anere ua atu. Mei te reira katoa oki te au uipaanga Kerititiano e te au uruoaanga kua akanoonooia i te ao katoa kia raukai te oronga ki te katoatoa te au vai areare no te tuatua mou ra. Eaa te tupu anga ki te au tangata no taua au apinga ra?

Te Apai Maira te Vai i te Ora!

12. (a) Eaa ra i raukai i te au rakau o ta Ezekiela orama ra kia uua maata mai mei ta ratou ra? (e) Eaa te akatutuia maira e teianei au rakau uua ra i te tuatau openga nei?

¹² Te apai maira te kauvai i ta Ezekiela orama ra i te ora e te oraanga meitaki. I to Ezekiela ra kite anga i te au rakau te ka tupu ki te pae o te kauvai ra, kua tuatuaia kiaia: “Kare oki tona rau e mae, kare oki tona ua e pou. . . . e riro oki to reira ua e manga, e tona rau ei vairakau.” Eaa ra teianei au rakau ka uua mai ei na roto i teia tu umere? “No te mea i na te ngai-tapu mai to ratou vai i te taʼe anga mai.” (Ezekiela 47:12e) Ko teianei au rakau akatutu anga te akaata katoa maira i ta te Atua au apinga oronga mai no te akaoraanga i te au tangata kia apa kore ua na te akatumu anga ki runga i to Iesu ra atinga oko. I runga i te enua nei i teia tuatau, te rave ra te toenga o tei akatainuia i te arataki anga i te orongaanga i te akamatutu anga i te pae vaerua e te rapakauanga oki. A muri ake i te rauka anga i te 144,000 katoatoa ra to ratou tutaki i te rangi, ka riro te au puapinga tei tupu maira no ta ratou tavini anga ei kau taunga ei au oa tutara kapiti ma Karaiti katoa kia totoaia ki te tuatau ki mua, ka taki openga atu ki te autu takiri anga i te mate mei ia Adamu mairai.​—Apokalupo 5:9, 10; 21:2-4.

13. Eaa te rapakauanga te raveia nei i to tatou tuatau nei?

¹³ Te tae atura taua kauvai orama ra ki roto i te Tai Mate oraanga kore ra e kua rapakau atu i te katoatoa o ta te reira ka itae atu. Te akatutu maira teianei tai i tetai tu mate i te pae vaerua. Inara te maata ra te oraanga “ki te au ngai katoa i taea e taua nga kauvai, e ora anake ïa.” (Ezekiela 47:9) Aiteite katoa i te tuatau openga nei, te aere maira te au tangata ki te oraanga i te pae vaerua i te au ngai ravarai e itae atu te vai ora ra. Te aronga mua tei akaora akaouia ko te toenga o tei akatainuia ra i te 1919. Kua oki viviki mai ratou ki te oraanga i te pae vaerua mei tetai tu mei te mate rai, e tu angaanga kore. (Ezekiela 37:1-14; Apokalupo 11:3, 7-12) Kua itae atura taua au vai puapinga maata ra kia etai atu aronga mate ra i te pae vaerua, e kua ora mai ratou e kua akatupu mai i tetai aronga maata rava no te au mamoe ke atu te tupu ua atura kia tini, te inangaro ra e te tavini ra ia Iehova. Kare e roaia ka akatotoaia atu teia oronga anga ki te aronga maata rava o te aronga akatuakaouia maira.

14. Eaa te akatutu meitakiia maira i teia tuatau nei no te tupuanga maata te angaanga ravakai i te tuanga taatai o te Tai Mate ra?

¹⁴ Te akatupu ra te matutu maroiroi i te pae vaerua i te uua anga. Te akatutuia maira teia e te angaanga ravakai te tupu maata ra ki taatai o te tai tei mate ra i mua ana. Kua tuatua a Iesu ki tana nga pipi: “E akariro au ia korua ei ravakai tangata.” (Mataio 4:19) I te tuatau openga nei, kua akamata mai te angaanga ravakai ma te akaputuanga i te aronga toenga o tei akatainuia ra, inara kare i akamutu atu ki reira. Te vai oronga ora maira mei ko mai i te iero vaerua o Iehova ra, kapiti katoa te akameitakianga no te kite tika, te akatupu ra kia ora te au tangata i te pa enua katoa ra. Te au ngai ravarai tei itaeia e taua kauvai ra, kua tupu te oraanga pae vaerua ki reira.

15. Eaa te akakite maira e kare te au tangata ravarai e ariki i ta te Atua au apinga oronga mai no te oraanga, e eaa te tupu anga openga no taua aronga ra?

¹⁵ Inara, kare ko te katoatoa te ka akarongo meitaki i teianei i te tuatua no te oraanga; kare katoa oki te aronga katoatoa te ka akatuakaouia mai i te tuatau o te Tutara Anga Tauatini Mataiti o Karaiti ra e akarongo. (Isaia 65:20; Apokalupo 21:8) Te akakite ra te angera e kare etai tuanga o te tai ra e akaoraia. Ko teianei au ngai ruarua e te ora kore e “vaioia ïa ei tai.” (Ezekiela 47:11) Ko te au tangata o to tatou tuatau nei, kare ko te katoatoa te ka ariki i te vai oronga ora maira na Iehova. (Isaia 6:10) Ia Aramakito, te aronga katoatoa tei iki kia vai ua ratou ki roto i tetai tu maki, e te ora kore i te pae vaerua ka vaioia ei tai, koia oki, ka akapouia e tuatau ua atu. (Apokalupo 19:11-21) Inara, ko te aronga tei inu tiratiratu i taua au vai ra ka rauka kia manakonako kia ora atu e kia kite i te tupu anga openga o teianei totou.

Te Tae ra te Kauvai i Parataito

16. A naea e akapeea oki te orama iero a Ezekiela ra e tupu ei ki tona akatupu anga akaotianga ra?

¹⁶ Mei etai atu au totou akaora anga ra, ka kitea te akatupu anga openga o ta Ezekiela orama iero ra i te tuatau o te Tauatini Mataiti ra. I reira kare te pupu kau taunga ra i konei i te enua nei. “E riro ra ratou ei taunga na te Atua, e na te Mesia, e e au to ratou iaia e kia okotai tausani i te mataiti.” (Apokalupo 20:6) Ka taokotaiia teianei kau taunga ma Karaiti i te orongaanga i te puapinga ki te katoa o to Karaiti ra atinga oko. No reira ka akaoraia mai te au tangata tuatua tika, ka akaora akaouia ki te tu apa kore ua!​—Ioane 3:17.

17, 18. (a) Akapeea te akataka anga i tetai kauvai oronga ora mai ia Apokalupo 22:1, 2, e aea te tuatau maata no te akatupu anga i taua orama ra? (e) I Parataito, eaa te kauvai o te vai o te ora ra ka kite ei i tetai tuatau no te akatotoa maata anga?

¹⁷ Ei tupu anga, i reira te kauvai tei akaraia ra e Ezekiela ka tae ei ma te vai ririnui maata te oraanga. Ko tei reira te tuatau maata te tupu anga no te totou tataia ia Apokalupo 22:1, 2 ra: “Kua akakite maira aia iaku i tetai vai ora, e vai taʼe oki, mei te io te areare, no roto mai i te terono o te Atua e to te Punua-mamoe ra. E tei rotopu i te arataa i taua oire ra, e tei tetai pae vai e tetai pae, ko te rakau ora te tu anga, okotai ngauru ma rua tu o te ua, okotai marama okotai ua anga, e ope rava ake te au marama katoa ra: e te rau o taua rakau ra, ko te rapakau ïa i to te pa enua.”

¹⁸ I te tuatau o te Tauatini Mataiti, pouroa te au maki​—te pae kopapa, te manako, e te manako ngakau oki—​ka rapakauia. Kua akatutu meitakiia mai teianei na “te rapakau ia i to te pa enua” na roto i te au rakau akatutuia maira. E akameitaki i te au apinga orongaia mai e Karaiti e te 144,000 ra, “kare oki to reira e karanga e, ‘Kua maki au.’ ” (Isaia 33:24) E ka tomo atu te kauvai ra ki tona tuatau no te akatotoa anga maata rava. Ka akatupu atea roaia e ka akaoonuia kia raukai te akono i te au mirioni ua atu, penei e au pirioni, o te aronga tangata akatuakaouia mai te ka inu i taua au vai ma ra no te ora. Na te kauvai o te orama ra i rapakau i te Tai Mate ra, i te apai mai anga i te ora ki te ngai ua e tae ei te au vai. I Parataito, ka aere mai te au tangata e te au vaine ki te oraanga i te tu ki tikai, kia rapakauia i te mate na Adamu ra me ka akono ratou i te akarongo i te au puapinga no te oko te orongaia ra kia ratou. Kua akakite maira Apokalupo 20:12 e e “nga buka” te ka eeuia i taua tuatau ra, ei orongaanga kia tere atu te marama no te kite ei puapinga no te aronga te ka akatuakaouia mai. E mea mii ra e ko etai kare e akatika kia rapakauia, noatu rai i Parataito ra. Ko teianei aronga meameaau te ka ‘orongaia ki te miti’ no te akapou anga mutu kore ra.​—Apokalupo 20:15.

19. (a) Akapeea te akatupu anga i te veeanga i te enua ra i Parataito? (e) Eaa te tu i Parataito ra ta te oire e akatutu maira? (ng) Eaa te aiteanga puapinga maata o te ngai o te oire i mamao ke atura mei te iero?

¹⁹ Pera katoa oki i taua tuatau ra, ka akaotiia te veeanga i te enua i te orama a Ezekiela ra. Kua akara a Ezekiela i te tua anga tika i te enua ra; pera katoa oki ka papu i te au Kerititiano tiratiratu e ka rauka iaia tetai ngai, tetai akatuanga, ki Parataito. Penei katoa, ko te anoano i tetai are nona uaorai kia noo ki roto e kia akono oki ka tupu ia na roto i te tu tau ra. (Isaia 65:21; 1 Korinetia 14:33) Ko te oire ta Ezekiela i akara ra te akatutu tau ra i te akanoonoo anga tau ta Iehova e akakoro ra no te enua ou. Kare te pupu kau taunga akatainuia ra e vai mai i te pae kopapa ki roto i te au tangata nei. Te akakite maira taua orama ra i te reira na te akatutuanga i te oire ra i roto i tetai enua tu “noa” i mamao ke atu i te iero ra. (Ezekiela 48:15) I te tuatau te tutara ra te 144,000 ma Karaiti i te rangi ra, kare e kore to te Ariki ra aronga komono i runga i te enua nei. Ka puapinga maataia tona au tangata i raro ake iaia ra mei te tiaki anga aroa e te arataki anga a te pupu ariki ra. Inara, ko te noo anga tikai o te kavamani ra, kare i runga i te enua nei, mari ra i te rangi. Te aronga ravarai i runga i te enua nei, kapiti katoa oki te pupu ariki ra, ka riro kia kauraro i te Patireia Mesia ra.​—Daniela 2:44; 7:14, 18, 22.

20, 21. (a) Eaa ra i tau ei te ingoa o te oire ra? (e) Eaa te au uianga te ka tau to tatou kite i te orama a Ezekiela ra kia akariro ia tatou kia ui kia tatou uaorai?

²⁰ E akara i te au tuatua openga o te totou a Ezekiela: “Te ingoa o taua oire ra mei taua rā maira, Tei Reirā Iehova.” (Ezekiela 48:35) Kare teianei oire e vai mai kia oronga mana me kare tikaanga, kare katoa ia e vai ki reira kia akatupu i tetai anoano tangata nei. No Iehova ia oire, ma te akaataanga mutu kore i tona manako e tona au aerenga aroa e te tau. (Iakobo 3:17) Na teianei e oronga mai kia tatou i te akapapu anga akapumaana ngakau e ka akameitaki a Iehova i tona taiate “enua ou” tei patuia ra no te au tangata aere ua atu ki roto i tetai tuatau mutu kore ki mua.​—2 Petero 3:13.

²¹ Kare ainei tatou e mareka ana i te manakonakoanga i mua ia tatou? E mea tau, i reira, kia ui tatou tataki tai e: ‘Akapeea toku manako ki te au akameitakianga umere tei akakiteia mai i te orama a Ezekiela ra? Te turu tiratiratu ra ainei au i te angaanga te raveia ra e te au akaaere aroa ra, kapiti katoa oki te aronga o te toenga o tei akatainuia ra e te au mema manakoia ra o te pupu ariki? Kua akariro ainei au i te akamori anga ma ei tei rotopu tikai o toku oraanga? Te akono meitaki katoa ra ainei au i te au vai o te oraanga te tae maata maira i teia tuatau nei?’ Kia rave ua atu tatou tataki tai katoa e kia mareka oki i ta Iehova au apinga oronga mai na roto atu i te tuatau mutu kore katoa ra!

[Au Tataanga Rikiriki i Raro]

Akapeea Koe me Pau?

◻ Eaa ta te au vai tei tae maira mei te iero ra e akatutu maira?

◻ Eaa te rapakauanga ta Iehova i akatupu na te kauvai akatutuia maira, e eaa ra i tupu ei kia maata roa atu taua kauvai ra?

◻ Eaa ta te au rakau i te pae o te kauvai ra e akatutu maira?

◻ Eaa ta te oire ra ka akatutu mai i te tuatau o te Tutara Anga Tauatini Mataiti ra, e eaa te ingoa o te oire ra i tau ei?

[Au Tutu i te kapi 23]

Te akatutu maira te kauvai o te ora i ta te Atua ra au apinga oronga mai no te ora ra