Naai e Akatikatika i Toou Manako?

“KARE e na tetai e akakite mai kiaku e eaa te ka manako? E kare e na tetai e akakite mai kiaku e eaa te ka rave!” I te tuatua anga i te reira ma te maro ko te aite anga e e irinaki anga maata toou i roto ia koe uaorai e i roto katoa i taau ka tuku. Ko te reira ainei toou manako? Tei maramaia, kare e na tetai e tuku i te iki anga noou. Inara e mea pakari ainei i te kopae viviki atu i te ka riro mai ei ako anga meitaki? Kare ainei e rauka i tetai te tauturu ia koe kia tuku i te au iki anga pakari? Noatu rai, ka papu ainei ia koe kare tetai, te tika ra, e akatikatika i toou manako, e kare koe i kite i te reira?

Ei akaraanga, i mua ake i te tamaki II o te ao, kua akatere a Joseph Goebbels, te minita akakite aere ua o Hitler, i te ngai teata o Tiamani. Eaa ra? No te mea kua kite aia e na teia e oronga i te akamana anga ririnui te ka rauka iaia i te “mana te au irinaki anga o te tangata e pera katoa to ratou tu.” (Propaganda and the German Cinema 1933-1945) Penei kua kite ana koe i te meitaki toanuanu o te reira tana i taangaanga e tetai atu au ravenga kia akavare i te au tangata​—te au tangata noa ua—​kia aru matapo i te au apiianga Nazi.

Ko te tika koia oki e akapeea koe me manako, e akapeea koe me rave, kua akakeu uaia te reira i tetai tu e te au manako ngakau e te au manako o te aronga taau e akarongo ra. E tikai, kare teia i te mea kino. Me ko teia te aronga te manako meitaki ra ia koe​—mei te au puapii, te au taeake, me kare te au metua—​ka rauka ia koe i reira te puapinga maata mei ta ratou ako anga e te manako. Inara me e aronga ratou te manako ua ra ia ratou uaorai e kua akavareia e kua oripuia ratou uaorai i ta ratou e manako ra, e “tuatua puapinga kore,” mei ta te apotetoro ko Paulo i akataka ia ratou, kia matakite!​—Tito 1:10; Deuteronomi 13:6-8.

No reira, auraka e manako merengo e kare e rauka i tetai i te akakeu ia koe. (Akaaite ia 1 Korinetia 10:12.) Penei kua tupu ke ana te reira​—ma te putuputu i taau ka akatika—​kare koe i kite ana. E akono ana i te akaraanga ngoie no tetai apinga taau ka iki i te oko me aere koe ka okooko. E ikianga tau ainei, naau uaorai? Me kare te akakeu putuputu ra ainei tetai aronga, kare i kiteia, i taau iki anga? Kua karanga te tangata tata tianara kimikimi ko Eric Clark e te pera ra ratou. “Te maata o te akakite anga i te maro anga ia tatou,” i nana ei, “e meangiti ua ta tatou e kite ra, inara, vaitata rai, kua akakeu maata ia tatou.” Kua ripoti katoa aia me uiia ki te tangata e mei teaa rai te meitaki i te akakite anga, “kua akatika te maata anga kua angaanga te reira, inara kare kia ratou.” E manako ana te tangata e kua akakeuia tetai atu, inara kare ratou. “I te akara anga, e koia ua, kua akakeuia ratou.”​—The Want Makers.

Kukumiia ki Roto i ta Satani Akatikatika Anga?

Me kua akakeuia koe e te akakiteanga i te au ra penei kare e kino pakari ana. Inara, te vaira tetai akakeu anga, kino roa atu. Te akaari taka meitaki maira te Pipiria e ko Satani te pu akavare tikai. (Apokalupo 12:9) E aiteite tana apiianga ki te manako o tetai tei akakite aere e tei tuatua e e rua nga mataara no te akakeu anga i te tangata oko​—“na te akavareanga ia ratou me kare na te akatanoanga kia ratou.” Me ka rauka i te aronga tuatua aere e te aronga akakitekite i te taangaanga i taua au ravenga kia akatikatika i toou manako, mei teaa te karape ia Satani i te taangaanga i taua ravenga aiteite ra!​—Ioane 8:44.

Kua kite te apotetoro ko Paulo i teia. Kua mataku aia e penei kare tetai o tona au taeake Kerititiano e maroiroi e ka riro mai i raro ake i ta Satani akavare anga. Kua tata aia: “Te mataku nei ra au, ko te akakinoia aea to kotou ngakau kia kore atu te tavaitai ua e tau i te Mesia nei, mei ta te ovi i pikikaa atu ia Eva i tona pakari.” (2 Korinetia 11:3) E akamanako pakari i te reira akamatakite anga. Te openga penei ka riro mai koe mei te aronga tei irinaki e tau te tuatua anga e te akatanoanga​—“inara kare kia ratou.” Ko te tika e te angaanga ra ta Satani apiianga te kiteaia ra takapini ia tatou i te kino, te taeke anga, e te pikikaa te akatutu nei i teia uki.

No reira, a Paulo i pati ei i tona au taeake Kerititiano “eiaa e akatau atu i teianei ao.” (Roma 12:2) Kua tapoto tetai tangata uri Pipiria i ta Paulo au tuatua i te na ko anga: “Auraka e akatika i te tangata takapini ia koe kia kukumi ia koe ki roto i ta reira akatikatika anga.” (Roma 12:2, Phillips) Ka tauta a Satani i te rave i tetai apinga no te maro ia koe ki roto i tana akatikatika anga, mei te tangata maani potera taito tei maro i te karaea kia rauka te au akairo e te tutu tana i inangaro i te taomi ki runga i te reira. Kua akapapa a Satani i te au poritiki, te ravenga okooko, te akonoanga e te tarekareka anga o te ao kia rave i te reira. Mei teaa te totoaanga o tana akakeu anga? Kua totoa te reira i te ngai ravarai mei to te apotetoro ko Ioane rai tuatau. “Te vai ua nei rai to te ao ravarai,” i tuatua ei a Ioane, “i raro ake i taua vaerua kino ra.” (1 Ioane 5:19; akara katoa ia 2 Korinetia 4:4.) Me te ekoko ra koe no runga i to Satani tu no te akavare i te tangata e te akakino i to ratou manako, e akamaara ana e mei teaa ra te tau tikai i te rave anga aia i teia ki te iti tangata katoa, o Iseraela, tei akatapuia ki te Atua. (1 Korinetia 10:6-12) Penei ka tupu rai te reira kia koe? Ka tupu me akaruke koe e kia akavare a Satani i toou manako.

Kia Kite e Eaa te Tupu Ra

Tei matauia, ka akakeu taua mana kikite i toou manako me akatika ua koe ia ratou. I roto i tana puka The Hidden Persuaders, kua karanga a Vance Packard: “E paruru pakari rai ta tatou no te patoi i te aronga akavare [uuna ra]: ka rauka ia tatou i te iki kia kore e akavareia. Vaitata rai i te au turanga katoatoa e iki anga rai ta tatou, kare tatou e anoanoia kia akavareia me kua kite tatou e eaa te tupu ra.” Te tika katoa ra te reira no te tuatua anga e te pikikaa.

E tikai, kia “kite e eaa te tupu ra,” ka tau koe kia tuku i to manako kia ariki e kia ariu ki te au akakeu anga meitaki. Ka anoanoia tetai manako meitaki, mei tetai kopapa meitaki rai, kia utuutu meitakiia e angaanga ei. (Maseli 5:1, 2) Ka kino te kore te akakite anga i te au akakite anga tau kore. Koi tikai e te anoanoia ra koe kia paruru i toou manako mei te au manako akavareanga e te au apiianga, e tauta kia kore e akatupu i te manako reka kore e te irinaki kore i te au ako anga me kare te akakite anga te orongaia ra kia koe.​—1 Ioane 4:1.

Kare te akakeu anga tika i aiteite ki te au manako uunaia. Kua akamatakite papu te apotetoro ko Paulo i te mapu tane ko Timoteo kia matakite “ko te au tangata kikino e te aronga pikikaa ra, e tupu rai to ratou kino, e e maata atu, i te pikikaa ua anga atu, e te pikikaa angaia mai.” Inara kua kapiti atu a Paulo: “Kia mou marie ra koe i taau i apii ra, i tei tukuia atu ia koe ra, kua kite oki koe i toou kite i kite ei koe ra.” (2 Timoteo 3:13, 14) I te mea ka akakeu te au mea taau ka tuku ki roto i toou manako ia koe, ko te taviri kia ‘kite oki koe i toou kite i kite ei koe ra,’ kia papu e te manako meitaki maira taua tangata ra ia koe, kare ia ratou uaorai.

Naau te iki anga. Ka rauka ia koe i te iki “eiaa e akatau atu i teianei ao” na te akatika anga i te au manako o te ao e te au akatere anga puapinga kia akaaere i toou manako. (Roma 12:2) Inara kare teia ao e manako ana ia koe. “E matakite,” i reira, i akamatakite ei te apotetoro ko Paulo, “ko te pou aea kotou i te tuatua pakari e te pikikaa puapinga kore a tetai tangata atu, i te tuatua ikuiku a te tangata nei.” (Kolosa 2:8) Kare e anoanoia te tauta anga i te kukumiia anga ki roto i ta Satani akatikatika anga na teia tu, me kare kia ‘pou aea.’ Mei tetai auai rai. Ka akakinoia koe na te akaea anga i te reira reva kino.

I tetai atu manako, ka rauka ia koe i te kopae e kia kore e akaea i taua “reva.” (Ephesia 2:2) Mari ra, e aru i ta Paulo ako anga: “Ei tu ke ra to kotou i te akaou anga o to kotou ngakau, kia taka tikai ia kotou i to te Atua ra anoano, tei meitaki, e te tau, e te apa kore.” (Roma 12:2) Ka anoanoia ra te tauta anga. (Maseli 2:1-5) E akamaara kare a Iehova i tei akavare. Te oronga ra aia i te akakite anga ka rauka ua, inara e puapingai mei te reira, kia akarongo koe i te reira e kia tuku kia akakeu te reira i toou manakoanga. (Isaia 30:20, 21; 1 Tesalonia 2:13) Kia puareinga ua koe i te akaki i toou manako i te tuatua mou tei roto i te “au tuatua tapu,” ta te Atua Tuatua akauruia, te Pipiria.​—2 Timoteo 3:15-17.

Ariu ki ta Iehova Akatikatikaanga

Te anoano no tetai ariu anga puareinga e te akarongo i taau tuanga e puapingai koe mei te akatikatika anga a Iehova kua akatutu ririnuiia i te akakite anga a Iehova ki te peroveta ko Ieremia kia atoro i te ngai angaanga o tetai tangata maani potera. Kua kite a Ieremia i te tangata maani potera e kua taui i tona manako no runga i te ka rave i tetai potera i te kite anga i te apinga tana i maani ra kua “kino iora te kapu karakaraea i angaia e ia i te rima o te potera ra.” Kua na ko atu a Iehova: “Kare ainei e tika iaku kia rave, mei ta teianei potera, ia kotou, e te ngutuare o Iseraela e? . . . I na, mei te karakaraea i roto i te rima o te potera, koia katoa kotou i toku nei rima, e te ngutuare o Iseraela e.” (Ieremia 18:1-6) Ko te aite anga ainei o te reira e mei te katukatu karaea ora kore ainei te tangata i Iseraela i roto i to Iehova rima e nana oki e akatikatika ki roto i tetai ua atu vairanga me kare ra tetai atu?

Kare a Iehova e taangaanga ana i tona mana ririnui kia akariro i te tangata e kia rave i te au apinga kare i anoanoia ra; kare katoa aia i apa no te au apinga viivii, mei te turanga rai o te tangata potera. (Deuteronomi 32:4) Ka tupu te au viivii me patoi te aronga ta Iehova e tauta ra i te akatikatika na tetai tu papu i tana arataki anga. Ko tetai tuke anga maata ia i rotopu ia koe e te katukatu karaea ora kore. E tu rangatira toou. Te akonoanga i te reira, ka rauka ia koe i te ariu ki ta Iehova akatikatika anga me kare ka patoi akakoro i te reira.

E apiianga tau ia! Mei teaa te meitaki i te akarongo ki te reo o Iehova i te patoi teitei anga i te reira, “E kare e na tetai e akakite mai kiaku e eaa te ka rave”! Ka anoano katoatoa tatou i ta Iehova akakeu anga paruru. (Ioane 17:3) Kia riro mei te tata taramo ko Davida, tei pure: “E akakite mai koe kiaku i to au arataa, e Iehova; e apii mai koe iaku i to au aerenga.” (Salamo 25:4) E akamaara i ta te Ariki ko Solomona i tuatua: “E riro te tangata pakari i te akarongo, e e tupu te kite.” (Maseli 1:5) Ka akarongo ainei koe? Me pera koe, “na te akono meitaki e tapapa ia koe i reira; e na te kite e tiaki ia koe.”​—Maseli 2:11.