E Āriki ia Iehova Tei Anga Mai ia Tatou

1. Eaa te tumu ko Iehova Tei Anga meitaki roa atu?

IA Noema 2010, kua okoia tetai āriki karakaraea no Tinito mai no tetai 70 mirioni tara i Peritane. E mea umere tikai ka rauka i tetai tangata maani apinga i te taangaanga i tetai apinga puapinga kore mei te karakaraea kia maani i tetai āriki manea e te oko maata. Ko Iehova, Tei Anga mai ia tatou e e teitei atu aia i tetai ua atu tangata maani apinga. Te karanga ra te Pipiria kua anga a Iehova i te tangata apa kore “i te one-pueu o te enua nei,” koia oki, te karakaraea. (Genese 2:7) E tamaiti a Adamu “na te Atua” e kua angaia aia ma Tona au tu.​—Luka 3:38.

2, 3. Akapeea tatou me aru i te tu o te ngati Iseraela tei tataraara?

² Te patoianga a Adamu i Tei Anga iaia, kare aia i te tamaiti akaou na te Atua. Inara e maata te uanga a Adamu tei iki ia Iehova ei Tutara no ratou. (Ebera 12:1) Na te akarongoanga i Tei Anga mai ia ratou, kua akaari e kua inangaro ratou iaia ei Metua no ratou e Tei Anga mai ia ratou, kare ko Satani. (Ioane 8:44) Ka akamaara to ratou tu tiratiratu ia tatou i ta te ngati Iseraela tataraara i karanga: “E Iehova e, ko koe rai to matou Metua; e karakaraea matou, e ko koe tei anga ia matou; e angaanga anake matou na to rima.”​—Isaia 64:8.

³ Pera katoa i teia tuatau ka tauta pakari te aronga akamori ia Iehova kia vai akaaka e kia akarongo. E akangateitei maata to ratou kia kapiki ia Iehova ei Metua no ratou, e ka inangaro ratou iaia kia apii ia ratou. Ka puareinga ua ainei tatou kia riro mei te karakaraea maru ta te Atua ka maani ei āriki akaperepereia? Ka manako ainei tatou i te au taeake e te au tuaine e te meitaki maira i te apiiia e te Atua? Ei tauturu ia tatou kia rauka te tu meitaki, ka uriuri tatou koai ma ta Iehova e iki ra kia apii atu, te tumu i apii ei aia ia ratou, e akapeea aia me rave i te reira.

IKI A IEHOVA I TE ARONGA TANA KA APII

4. Akapeea a Iehova me iki i te aronga tana ka akavaitata atu kiaia? Oronga mai i te au akaraanga.

⁴ Kare oki ta Iehova akara anga e tau ki ta te tangata. Mari ra, ka akara a Iehova i te ngakau e ka kite koai tikai tatou tatakitai. (E tatau ia 1 Samuela 16:7e.) Kua akaari a Iehova i teia tu i te akanoo anga aia i te putuputuanga Kerititiano. Kua akavaitata aia kiaia uaorai e tana Tamaiti te aronga ta tetai pae i manako e e puapinga kore. (Ioane 6:44) Tetai akaraanga, ko Saula e tangata Pharisea “tei akakino . . . e te takinga-kino, e te rave kino.” (1 Timoteo 1:13) Inara kua akara a Iehova i to Saula ngakau e kare aia i manako ana e karakaraea puapinga kore ua aia. (Maseli 17:3) Mari ra, kua kite a Iehova e ka rauka a Saula kia maaniia ei “āriki ikiia” no te tutu aere ki “te au etene, e te ui ariki ra, e te tamariki na Iseraela.” (Angaanga 9:15) Kua iki katoa a Iehova i tetai pae te ka rauka i te maaniia ei “āriki no te mea meitaki,” kapiti mai te aronga kona kava i mua ana, te aronga moeaana, e te keikeia. (Roma 9:21; 1 Korinetia 6:9-11) I te apii anga ratou i te au Tuatua Tapu, kua akaketaketaia to ratou akarongo ki roto ia Iehova e kua akatika iaia kia apii ia ratou.

5, 6. Me irinaki tatou ia Iehova Tei Anga mai ia tatou, akapeea te reira te tauianga i to tatou tu (a) ki te aronga i te ngai tutu aere? (e) ki te au taeake e te au tuaine?

⁵ Te irinaki nei tatou ka rauka ia Iehova i te iki e te akavaitata mai i te aronga tau tikai. No reira auraka tatou e akava i te aronga i roto i te ngai tutu aere me kore i roto i te putuputuanga. Ei akaraanga, e akamanako ana akapeea tetai tangata ko Michael te ariu atu anga ki te atoroanga a te Au Kite o Iehova. Karanga aia: “Ka uri atu au e te kopae ia ratou mei te mea e kare ratou i reira. E tu kino tikai toku! I muri mai, i tetai atianga ke, kua aravei au i tetai ngutuare tangata taku e mareka ana no to ratou tu meitaki. E oti i tetai rā, kua poitirere tikai au—e Au Kite ratou no Iehova! Kua riro to ratou tu meitaki ei akakeu iaku kia akara akaou i te tumu i manako papakitai ei au. Kare i roa ana kua kite mai au, kua akatumuia toku manako ki runga i te tu kite kore e te tuatua tarevake, kare ki runga i te tika.” Kua inangaro a Michael i te apii maata atu e kua āriki aia i tetai apii Pipiria. I muri mai kua papetitoia aia e kua riro mai ei tavini tamou.

⁶ Me āriki tatou ia Iehova Tei Anga mai ia tatou, ka taui katoa to tatou manako no runga i te au taeake e te au tuaine. Ka kite tatou ia ratou tataki tai e meitaki atura. Ko teia to Iehova manako no runga ia ratou. Kua kite aia koai tikai ratou e kua kite aia e ka vai to ratou tu apa ua no tetai tuatau poto. Kua kite katoa aia mei teaa tikai to ratou tu. (Salamo 130:3) Ka aru tatou ia Iehova me manako papu katoa tatou no runga i te au taeake. Ka rauka i te angaanga kapiti ki Tei Anga mai ia tatou na te tauturu anga i te au taeake e te au tuaine kia tere ki mua. (1 Tesalonia 5:14, 15) Ka tau te aronga pakari o te putuputuanga kia akanoo i te akaraanga meitaki no te rave i te reira.​—Ephesia 4:8, 11-13.

EAA TE TUMU KA APII EI A IEHOVA IA TATOU?

7. Eaa ra koe i āriki ei i ta Iehova ako anga?

⁷ E karanga ana tetai pae e: ‘Kare au i āriki meitaki i te ako a toku nga metua kia tae rava ki te taime e tamariki taku.’ Me maata mai tatou, penei ka akamata tatou i te inangaro i te ako no te mea kua kite tatou e akairo te reira no te aroa. (E tatau ia Ebera 12:5, 6, 11) Ae, te inangaro nei a Iehova ia tatou ei tamariki nana, te reira te tumu i ako marie ua ai aia ia tatou. Ka inangaro aia ia tatou kia pakari e kia mataora e kia inangaro iaia ei Metua no tatou. (Maseli 23:15) Kare aia e reka ana i te kite ia tatou e mamae ra, e kare katoa aia e inangaro ia tatou kia mate ei aronga ara tataraara kore.​—Ephesia 2:2, 3.

8, 9. Akapeea a Iehova i te apii anga ia tatou i teia tuatau, e akapeea teia apiianga me raveia i te tuatau ki mua?

⁸ I mua ake ka kite ei tatou ia Iehova, penei e manganui to tatou tu tarevake. Inara kua apii a Iehova ia tatou e kua tauturu ia tatou kia taui, e tei tupu mai, e au tu manea to tatou i teianei. (Isaia 11:6-8; Kolosa 3:9, 10) Te noo nei tatou i roto i tetai parataito vaerua. Ko teia te turanga meitaki ta Iehova i anga i teia tuatau ei tauturu i te apii ia tatou. I roto i reira, ka manako au tatou e te tinamou noatu e kua koropiniia tatou e teia ao kino. Tetai pae tei utuutuia i roto i te au ngutuare kare e aroa, i teianei te kite ra ratou i te aroa mou i rotopu i te au taeake e te au tuaine i roto i te parataito vaerua. (Ioane 13:35) Kua apii katoa tatou i te akaari i te aroa ki tetai e tetai. Inara tei puapinga roa atu, kua kite mai tatou ia Iehova e tona aroa mei te metua rai.​—Iakobo 4:8.

⁹ I roto i te ao ou, ka puapinga tikai tatou mei te parataito vaerua. Ka rekareka katoa tatou i te oraanga i roto i tetai parataito tikai tei tutaraia e te Patireia o te Atua. I tera tuatau, ka apii ua rai a Iehova ia tatou e ka tereni ia tatou na roto i tetai mataara meitaki rava. (Isaia 11:9) Ka oronga katoa mai a Iehova i te au manako e te kopapa apa kore no tatou. Ka māmā i reira ia tatou kia mārama e kia akono tikai i tana au ikuikuanga. No reira kia akatika ua rai tatou ia Iehova kia apii mai ia tatou, e kia akaari ua rai e te riro ra tona aroa ei mea puapinga maata kia tatou.​—Maseli 3:11, 12

TA IEHOVA APII ANGA IA TATOU

10. Akapeea a Iesu te akaata anga i te tu akakoromaki e te karape o Tei Anga mai ia tatou?

¹⁰ Mei tetai tangata karape tei kite i te karakaraea tana e maani ra, kua kite meitaki a Iehova ia tatou. Kua kite aia i to tatou tu paruparu, to tatou kotinga, e to tatou meitaki e tupu ra, e ka apii aia ia tatou tatakitai kia tau ki teia au turanga. (E tatau ia Salamo 103:10-14.) Ka kite mai tatou i to Iehova manako no runga ia tatou na te apiianga akapeea a Iesu te ariu atu anga ki te tu apa ua o tana au apotetoro. I tetai taime, kua tauetono te au apotetoro koai tei maata ia ratou. Naringa koe i reira, eaa taau ka manako no runga i te tu o te au apotetoro? Penei ka manako koe kare ratou mei te karakaraea maru rai. Inara, kua kite a Iesu e ka rauka i te apii ia ratou me akarongo ratou ki tana akoanga takinga meitaki e te akakoromaki e me aru ratou i tona tu akaaka. (Mareko 9:33-37; 10:37, 41-45; Luka 22:24-27) I muri ake i to Iesu tuakaouanga, kua orongaia te vaerua tapu o te Atua ki te au apotetoro e kare ratou e akamou akaou ki runga i tei maata ia ratou. Mari ra, kua akamou ratou ki runga i te angaanga ta Iesu i oronga kia ratou.​—Angaanga 5:42.

11. Eaa te au mataara i riro ei a Davida mei te karakaraea maru rai, e akapeea tatou me aru iaia?

¹¹ I teia tuatau, te taangaanga nei a Iehova i te Pipiria, tona vaerua tapu, e te putuputuanga ei apii ia tatou. Akapeea te Pipiria i te apiianga ia tatou? Ka anoanoia kia tatau i te reira, kia akamanako oonu i ta tatou e tatau ra, e te pati kia Iehova no te tauturu kia akono i ta tatou e apii ra. Kua tata te Ariki ko Davida e: “Kia manako au ia koe i runga i toku roi, kia akamaara au ia koe i te au atianga ra.” (Salamo 63:6) Tata akaou aia: “Ka akameitaki au ia Iehova, ko tei ako mai iaku; te apii maira toku manako iaku i te po.” (Salamo 16:7) Ae, kua akamanako oonu a Davida i te akoanga a Iehova e kua tuku i te reira kia apii i tona au manako oonu e te manako ngakau, noatu e ngata i te āriki i te akoanga. (2 Samuela 12:1-13) Kua akanoo a Davida i te akaraanga manea no te akaaka e te akono meitaki no tatou. No reira e ui kia koe uaorai: ‘Me tatau au i te Pipiria, ka akamanako oonu ainei au e te tuku i te akoanga a te Atua kia pakia toku au manako oonu e toku manako ngakau? Ka rauka ainei iaku i te akamaata atu i te reira?’​—Salamo 1:2, 3.

12, 13 Akapeea a Iehova te apiianga ia tatou na roto i te vaerua tapu e te putuputuanga Kerititiano?

¹² E maata te au mataara ka rauka i te vaerua tapu i te apii ia tatou. Ei akaraanga, ka tauturu te reira ia tatou kia aru i to Iesu au tu e kia akaari i te au ua o te vaerua. (Galatia 5:22, 23) Tetai tu, ko te aroa. Te aroa ra tatou i te Atua e te inangaro ra i te akarongo kiaia e kia apiiia e ïa no te mea kua kite tatou e ka puapingaia tatou mei tana au akauenga. Kapiti mai, ka oronga mai te vaerua tapu i te maroiroi kia patoi i te apiianga a teianei ao kino. (Ephesia 2:2) I to Paulo mapu anga, kua akakeuia aia e te au arataki akonoanga ngati Iuda ngakau parau. Inara kua tauturu te vaerua tapu iaia kia taui i tona tu. Kua tata aia i muri mai: “E tika iaku te au mea ravarai nei i te Mesia, ko tei akamaroiroi mai iaku nei.” (Philipi 4:13) Ka anoano katoaia tatou kia pati no te vaerua tapu, ma te kite e ka pau mai a Iehova i ta tatou au pure ngakau tae.​—Salamo 10:17.

¹³ Te taangaanga katoa ra a Iehova i te putuputuanga e te aronga pakari ei apii ia tatou tataki tai. Ei akaraanga, me kite mai te aronga pakari e tu paruparu to tatou, ka tauta ratou i te tauturu ia tatou. Inara, kare ratou e oronga mai i te ako tei akatumuia ki runga i to ratou uaorai manako. (Galatia 6:1) Mari ra, ka pati akaaka ratou kia Iehova no te mārama e te pakari. E oti, ka rave ratou i te kimikimi anga i roto i te Pipiria e ta tatou au puka Kerititiano kia kite i te au akakiteanga te ka tauturu ia tatou. Me aravei mai te aronga pakari ia koe e me oronga i te ako meitaki e te aroa, penei no toou akamaneaanga, e akamaara e akapapuanga teia i to te Atua aroa noou. Me akono koe i te akoanga, ka riro koe mei te karakaraea maru te ka rauka ia Iehova i te apii ia koe e kia puapinga.

14. Noatu e mana tona ki rungao i te karakaraea, akapeea a Iehova te akangateiteianga i to tatou tu rangatira?

¹⁴ Me mārama tatou akapeea a Iehova i te apiianga ia tatou, ka tauturu te reira ia tatou kia rauka te pirianga meitaki ki te au taeake e te au tuaine. Pera katoa, ka manako papu tatou i te au tangata i te au ngai tutu aere, kapiti mai ta tatou aronga apii Pipiria. I te tuatau Pipiria i mua ake ka maani ei i te karakaraea, kua tamā te tangata maani apinga i te reira e kua akaatea i te au toka rikiriki e tetai au mea ke. Ka tauturu a Iehova, Tei Anga mai ia tatou, i te tangata tei inangaro kia apiiia. Kare aia e mārō ia ratou kia taui, mari ra, ka akaari aia i tona au turanga mā. I reira ka anoanoia ratou kia iki me ka rave ratou i te au tauianga tei anoanoia.

15, 16 Akapeea te aronga apii Pipiria te akaarianga e ka inangaro ratou ia Iehova kia apii ia ratou? Akatutu mai.

¹⁵ Akamanako ana i tei tupu ki tetai tuaine i Autireria, ko Tessie. E mea māmā ua nona kia apii i ta te Pipiria e karanga ra. Inara kare aia e tere ana ki mua, e kare aia i aere ana ki te au uipaanga. Kua pure te tuaine kia Iehova e kua manako i te akamutu i tana apii. I reira kua tupu tetai mea umere. I ta raua apii, kua akakite a Tessie ki tona puapii te tumu kare aia e tere ana ki mua. Akakite aia e mei te pikikaa rai aia no te mea e reka ana aia i te pere moni. Inara i teianei kua manako aia i te akamutu i te pere moni.

¹⁶ Kare i roa, kua akamata a Tessie i te aere ki te au uipaanga e te akaari i te tu Kerititiano noatu e kua aviri mai tona au oa iaia. I muri mai, kua papetitoia a Tessie e kua riro mai ei painia tamou, noatu e e tamariki rikiriki tana. Te taka meitaki ua ra me akamata te aronga apii Pipiria i te rave i te au taui anga ei akamareka i te Atua, ka akavaitata atu aia kia ratou e ka apii ia ratou kia riro mai ei au āriki akaperepereia.

17. (a) Eaa taau e reka ra ia Iehova Tei Anga mai ia koe? (e) Eaa te au apiianga ta tatou ka uriuri i te atikara ka aru mai?

¹⁷ I teia tuatau, te maani nei rai te aronga maani apinga i te karakaraea ei au āriki manea. Mei te reira katoa, te apii marie nei a Iehova ia tatou ma te taangaanga i tana akoanga, e te akara matariki ra aia akapeea tatou me ariu atu. (E tatau ia Salamo 32:8.) Te kite ra ainei koe i to Iehova inangaro noou? Te kite ra ainei koe ia Iehova e apii meitaki ra ia koe? Me koia ia, eaa te au tu ka tauturu ia koe kia vai maru ua ei karakaraea ka rauka ia Iehova i te apii? Eaa te au tu kino taau ka kopae kia kore koe e riro ei karakaraea marokiakia kare e rauka i te apiiia? Akapeea te au metua te angaanga kapiti anga kia Iehova i te apii i ta ratou tamariki? Ka pauia teia au uianga i roto i te atikara ka aru mai.