“Te Meitaki i te Tangata” kia Akono i te Au Mamoe a Iehova

“Iaia i kake ki runga, e aronga tuikaa e manganui tana i arataki, e kua oronga ua maira te meitaki i te tangata nei.”​—EPHESIA 4:8.

1. Eaa te akataka anga ta tetai tuaine Kerititiano i akakite no te aronga pakari i tona putuputuanga ra?

“AKAMEITAKI kia kotou no te akonoanga maata mai ia matou. Ta kotou katakata, to kotou pumaana, e to kotou manako anga e tika tikai. Tei reira rai kotou ei taringa akarongo mai e kia tuatua mai no te Pipiria te taki ra i to matou vaerua ki runga. Te pure nei au e kia kore au e manako akaiti ua ia kotou.” Ta tetai tuaine Kerititiano i tata atu ki te aronga pakari i tona putuputuanga. Te taka meitaki ra, kua akatukiia tona ngakau e te aroa akaariia e te au tiaki Kerititiano tei akono atura.​—1 Petero 5:2, 3.

2, 3. (a) Kia tau ki ta Isaia 32:1,​2, akapeea ta te aronga pakari aroa ra utuutu anga no te au mamoe a Iehova? (e) Aea ka tau ei tetai tangata pakari kia akamanakoia ei apinga aroa orongaia mai?

² E apinga orongaia mai e Iehova te aronga pakari ra ei tiaki i tana au mamoe. (Luka 12:32; Ioane 10:16) Ko te tika, no te maata to Iehova akaperepere i tana au mamoe ra​—e kua oko aia ia ratou ma te toto okomaata o Iesu ra. No reira rai, i reira, i marekai a Iehova me akono atu te aronga pakari i tana anana ma te tu maru. (Angaanga 20:28, 29) E akara i te akatakaanga totou i teianei aronga pakari me kore e “ui ariki”: “E riro oki tetai tangata mei te punanga i te uriia ra, mei te pipinianga i te matangi maata ra; mei te au vai taʼe i te ngai keremarō ra, mei te marumaru o tetai mato maata i te enua papamarō ra.” (Isaia 32:1, 2) Ae, ei paruru ratou, ei akaanga i te roiroi, e ei akapumaana i tana au mamoe. Te aronga pakari te tiaki aroa ra i te anana te tauta ra ratou kia akono i ta te Atua e tapapa maira ia ratou.

³ Te taikuia ra taua aronga pakari ra i te Pipiria ei “te meitaki i te tangata.” (Ephesia 4:8) Me tamanako koe i tetai apinga meitaki, ka manako ra koe i tetai apinga orongaia mai ei akaki i tetai umuumuanga me kare kia apai mai i te mataora ki tei rauka ra iaia te reira. Ka rauka ra kia akamanakoia tetai o te aronga pakari ei tetai apinga orongaia mai me ka taangaanga aia i tona au kite kia oronga i te tauturu te umuumuia e kia tauturu oki i te tu mataora o te anana ra. Akapeea e raukai iaia te rave i teia? Te akakite maataia maira te pauanga te kiteia ra i ta Paulo au tuatua ia Ephesia 4:7-16, no to Iehova ra manakoanga aroa no tana au mamoe.

“Te Meitaki i te Tangata Nei”​—Noea Mai?

4. I te akatupu anga ia Salamo 68:18, na teea tu to Iehova ra ‘riro anga ki runga’ e koai ma “te meitaki i te tangata nei”?

⁴ I ta Paulo taiku anga i te tuatua “te meitaki i te tangata nei,” te taiku ra aia i te Ariki ia Davida, tei tuatua ra no Iehova: “Kua riro koe ki runga, kua arataki koe i te tuikaa e manganui ra, e kua rauka ia koe te apinga no te tangata ra.” (Salamo 68:18) I muri ake i te noo anga to Iseraela i te Enua Taputouia ra no etai mataiti, kua riro akatutu atura Iehova “ki runga” ia Maunga Ziona e kua akariro ia Ierusalema ei oire maata no te patireia o Iseraela ko Davida tona ariki. Inara koai ma “te apinga no te tangata ra”? Ko ratou te au tangata tei rave tuikaaia ra i te tuatau i peke ei taua enua ra. Ko tetai papaki o taua aronga tuikaaia ra tei akariroia ei tauturu i te ngati Levi ma te angaanga i te tapenakara ra.​—Ezera 8:20.

5. (a) Akapeea ta Paulo akakite anga e e akatupu anga to Salamo 68:18 i te putuputuanga Kerititiano ra? (e) Na teea tu to Iesu ra ‘kake anga ki runga’?

⁵ I roto i tana reta ki to Ephesia, kua akakite a Paulo e e tupuanga maata atu to te au tuatua a te tata taramo ra ki roto i te putuputuanga Kerititiano. I te akataka anga ia Salamo 68:18, kua tata a Paulo: “Kua orongaia mai te meitaki kia tatou katoa nei i ta te Mesia i tau i te oronga mai. Koia i tuatuaiaʼi e, ‘Iaia i kake ki runga, e aronga tuikaa e manganui tana i arataki, e kua oronga ua maira te meitaki i te tangata nei.’” (Ephesia 4:7, 8) I konei te tuatua ra Paulo i teianei taramo kia Iesu ei tetai komono no te Atua ra. “Kua riro te re o teianei ao” ia Iesu na tona aerenga tiratiratu. (Ioane 16:33) Kua autu katoa oki aia ki rungao i te mate e ki rungao ia Satani na ta te Atua ra akatuakaouanga iaia mei te mate maira. (Angaanga 2:24; Ebera 2:14) I te 33 T.N., kua kake a Iesu tei akatuakaouia maira “ki runga rava atu i te au rangi ravarai nei”​—kia teitei atu i etai atu au mea ora katoa i te rangi ra. (Ephesia 4:9, 10; Philipi 2:9-11) Ei tetai tei autu ra, kua arataki atu a Iesu i te “au tuikaa” mei ko atu i te enemi ra. Akapeea ra?

6. Akamata atu ia Penetekote 33 T.N., i akapeea ta Iesu tei kake atura ki runga akamataanga i te akakino i to Satani are, e eaa tana i rave ma te “au tuikaa” ra?

⁶ Iaia i te enua nei, kua akakite a Iesu i tona mana ki rungao ia Satani na te akaoraanga i te aronga tei mou ereereia ra ki te au temoni. Mei te mea rai e kua tomo atura Iesu ki roto i te are o Satani, kua tapeka atura iaia, e kua apai ke atura i tana au apinga. (Mataio 12:22-29) E tamanako ua, i tona akatuakaouangaia e te oronga angaia ‘te mana katoa o to te rangi e te ao katoa nei,’ mei teaa ra te aruanga ta Iesu ra ka rauka kia rave i reira! (Mataio 28:18) Akamata atu ia Penetekote 33 T.N., kua rave a Iesu tei kake atura ki te rangi, ei komono no te Atua, i te akakinoanga i te are o Satani na te ‘arataki ke atuanga i te au tuikaa’​—te au tangata tei roa ra te tuikaa anga ki te ara e te mate e i raro i ta Satani akatere anga. Kua riro mareka ua mai teianei “au tuikaa” “mei te tavini o te Mesia, i te akono anga i to te Atua ra inangaro ma te tae o te ngakau.” (Ephesia 6:6) Ko te tika, kua tataraia mai ratou e Iesu mei ta Satani akatereanga e, ki to Iehova ra tuanga, kua oronga atu ia ratou ki te putuputuanga ei “te meitaki i te tangata nei.” E tamanako ana i to Satani riri anga puapinga kore ua i to ratou ao angaia mei raro ake i tona iu tikai ra!

7. (a) Eaa te au angaanga ta “te meitaki i te tangata nei” i rave i te au putuputuanga ra? (e) Eaa te angaanga tika ta Iehova i oronga ki te au tangata takitai tei tavini ra ei tangata pakari?

⁷ Te kitea ra ainei e tatou taua “meitaki i te tangata nei” i roto i te putuputuanga i teia tuatau? E tika, te kitea ra e tatou! Te kite ra tatou i te tavinianga ei aronga pakari, ma te rave angaanga maata anga ‘ei apii evangelia; ei tiaki, e ei orometua’ ki roto e tere atu i te 87,000 au putuputuanga o te au tangata o te Atua i te ao katoa nei. (Ephesia 4:11) Kare a Satani apinga e anoano maata atu i te kite ia ratou i te takinga kinoanga i te anana ra. Inara kare te reira i te tumu i orongai te Atua ia ratou na roto ia Karaiti ki te putuputuanga ra. Kareka ra, kua oronga a Iehova i teianei au tangata ei meitaki no te putuputuanga, e ka akakiteia oki ta ratou tuatua kiaia no te au mamoe tei orongaia na ratou e akono. (Ebera 13:17) Me te tavini ra koe ei tetai tangata pakari, kua oronga atu a Iehova i tetai tika meitaki kia koe kia akakite ia koe uaorai ei tetai apinga meitaki, me kare akameitakianga, ki toou au taeake. Ka rauka ia koe te rave i te reira na te raveanga e a nga apainga puapinga maata.

Me e Umuumu Anga Tetai no te “Akatau”

8. I teea au tu te tau ra tatou katoa kia akatauia i etai taime?

⁸ Te mea mua ko “te meitaki i te tangata nei” te orongaia ra “ei akatau i te aronga tapu,” ta Paulo i tuatua. (Ephesia 4:12) Ko te nauna Ereni tei uriia e “akatau” te taiku ra i te tukuanga i tetai apinga “kia tika ki tona ngai.” Ei au tangata apa ua ra, ka umuumuia tatou katoatoa kia akatauia mei tetai tuatau ki tetai tuatau​—kia apaiia to tatou manakoanga, au tu manako, me kare tu akono “kia tika ki tona ngai” ma to te Atua ra manakoanga e tona anoano oki. Kua oronga aroa mai a Iehova i “te meitaki i te tangata nei” ei tauturu ia tatou kia rave i te au akatau anga umuumuia. Akapeea ta ratou rave anga i te reira?

9. Akapeea e raukai i tetai tangata pakari kia tauturu i te akatau i tetai mamoe tei apa ra?

⁹ I etai taime, penei ka patiia tetai tangata pakari kia tauturu atu i tetai mamoe tei rave i te apa ra, penei kua rave aia i ‘tetai takainga tarevake i mua ake ka matakite aia i te reira.’ Akapeea tetai o te aronga pakari i te tauturu anga? “Ka akaora kotou ko tei akono i ta te Vaerua ra i te reira, ma te ngakau maru,” ta Galatia 6:1 i tuatua. No reira, me oronga tetai tangata pakari ra i te akoanga, auraka e akaapa riri atu i tei apa ra, ma te au tuatua tamamae atu. Ka tau te akoanga ei akamaroiroi anga auraka ei “akamataku” i tei tuatuaia atura. (2 Korinetia 10:9; akaaite ia Iobu 33:7.) Penei kua manako ngakau akama ke ana aia, no reira ka kopae ke te tiaki aroa ra i te akaparuparuanga i to te reira vaerua. Me taka meitaki te akakeu anga a te akoanga, noatu e ngaueue kore e na te oronga anga i roto i te aroa, e mea tika kia akatau i te manakoanga me kare tu akono o tei apa ra, e na reira te akaoraanga iaia​—2 Timoteo 4:2.

10. Eaa te o atura ki te akatauanga i etai ke ra?

¹⁰ I te orongaanga i “te meitaki i te au tangata nei” no te akatau anga ia tatou, kua manako a Iehova e kia riro te aronga pakari ei akapumaanaanga i te pae vaerua e kia tau no tona au tangata kia aru atu. (1 Korinetia 16:17, 18; Philipi 3:17) Kare te akatauanga ia etai ke ra e kapiti ana i te akatikatikaanga anake ua i te aronga tei aaere ra i te aerenga tarevake mari ra i te tauturuanga katoa i te aronga tiratiratu kia mou tamou ki te aerenga tika.a I teia tuatau nei, ma te au manamanata e manganui te akatupu ra i te ngakau taitaia, e manganui te umuumu ra i te akamaroiroi anga kia mou tamou marie. Penei te anoano ra tetai papaki i te tauturu maru kia akatau atu i to ratou manakoanga ma to te Atua ra. Ei akaraanga, te rave ngata ra tetai papaki au Kerititiano tiratiratu ma te au manako ngakau oonu e e puapinga kore ratou me kare e tau kore. Penei kua manako ngakau taua aronga “ngakau taitaia” ra e kare a Iehova e inangaro mai ia ratou e noatu ko ta ratou au tauta anga meitaki kia tavini atu i te Atua kare e arikiia mai e ia ra. (1 Tesalonia 5:14) Inara ko teia tu manakoanga kare i tau ma to te Atua ra manako anga no te aronga akamori iaia ra.

11. Eaa ta te aronga pakari ka rauka kia rave ei tauturu i te aronga rave ngata ra ma te au manako ngakau e e tau kore ua ratou ra?

¹¹ E te aronga pakari, eaa ta kotou ka rave kia tauturu atu i taua aronga ra? E oronga takinga meitaki atu kia ratou i te akapapu anga Tuatua Tapu e te manako aroa maira Iehova i tona au tavini tataki tai e ka akakite papu atu kia ratou e te piri tika atu nei teianei au irava no te Pipiria kia ratou tikai. (Luka 12:6, 7, 24) E tauturu atu ia ratou kia kite e na Iehova i ‘akatae mai’ ia ratou kia tavini atu iaia, no reira e mea tika kua kite aia e puapinga to ratou. (Ioane 6:44) E akakite tika atu kia ratou e kare ko ratou anake​—e manganui te au tavini tiratiratu o Iehova kua kite i te au manako ngakau aiteite. I tetai tuatau kua manako ngakau taitaia oonu te peroveta ko Elia e kua anoano aia kia mate atu. (1 Ariki 19:1-4) Tetai papaki o te au Kerititiano akatainuia i te anere mataiti mua ra kua ‘akaapa’ to ratou ngakau uaorai ia ratou. (1 Ioane 3:20) E pumaana ra te kiteanga e e aronga tiratiratu i te tuatau Pipiria ra “mei ia tatou katoa te tu.” (Iakobo 5:17) Ka rauka katoa ia koe te akara akaou i te au atikara akamaroiroianga a Te Punanga Tiaki e te Awake! ma te aronga maromaroa. Taau tautaanga aroa kia akaora i te irinaki anga o taua aronga ra kare e riro kia kitea koreia mai e te Atua nana ra i oronga mai kia koe “te meitaki i te tangata nei.”​—Ebera 6:10.

“Kia [Patu] oki” i te Anana

12. Eaa te akakiteia maira e te tuatua ‘te patuanga i te kopapa o te Mesia ra,’ e eaa te taviri ki te patuanga i te anana ra?

¹² Te rua, ko “te meitaki i te tangata nei” kua orongaia mai ma te manako “kia [patu] oki i te kopapa o te Mesia ra.” (Ephesia 4:12, akaaite ia NW.) Kua rave a Paulo i tetai tuatua akatutuanga. “Kia patu” te akakite maira i te manako patuanga, e ko “te kopapa o te Mesia ra” te taiku ra i te au tangata​—koia te au mema akatainuia o te putuputuanga Kerititiano ra. (1 Korinetia 12:27; Ephesia 5:23, 29, 30) Ka tau te aronga pakari kia tauturu i to ratou au taeake kia tupu maroiroi i te pae vaerua. Ta ratou akakoro anga ‘kia patu ake e kare kia akapururu ki raro’ i te anana ra. (2 Korinetia 10:8) Ko te taviri ki te patu ake anga ki runga i te anana ko te aroa ia, no te mea “te patu akera te aroa ki runga.”​—1 Korinetia 8:1, NW.

13. Eaa te aiteanga e kia o te tu tangi, e eaa ra i puapinga maatai no te aronga pakari kia akaari i te tu tangi ra?

¹³ Tetai tuanga o te aroa te tauturu ra i te aronga pakari kia patu atu i te anana ko te tu tangi ia. Te aiteanga o te tu tangi kia manako ngakau atu no etai ke ra​—kia akataka atu i to ratou au manako e te au manako ngakau, ma te akamanako anga i to ratou au kotinga. (1 Petero 3:8) Eaa ra i puapinga maatai no te aronga pakari kia akono i te tu tangi? I runga ravao no te mea ko Iehova​—koia tei oronga maira “i te meitaki i te tangata nei”—​ko tetai Atua tu tangi aia. Me te tamamaeia ra tona au tavini me kare te kite ra i te tu mamae, kua manako ngakau atu aia no ratou. (Exodo 3:7; Isaia 63:9) Kua akamanako atu aia i to ratou au kotinga. (Salamo 103:14) Akapeea, i reira, ka raukai i te aronga pakari kia akaari i te tu tangi?

14. Na roto i teea au tu ka raukai i te aronga pakari kia akaari i te tu tangi kia etai ke ra?

¹⁴ Me ka aere mai tetai tei taitaia ra kia ratou, ka akarongo atu ratou, ma te kite anga oki i tona manako ngakau. Ka tauta ratou kia kite i te tumu anga, te tu tangata oki, e te au turanga o to ratou au taeake. Ei reira me oronga te aronga pakari i te tauturu Tuatua Tapu ei patu ki runga, ka kite te au mamoe ra i te ngoie ua kia ariki atu no te mea no ko mai te reira i te au tiaki tei kite tika ra e tei manako maira ia ratou. (Maseli 16:23) Ka akakeu katoa te tu tangi i te aronga pakari kia akamanako i te au kotinga o etai ke ra e te au manako ngakau penei ka tupu mei te reira maira. Ei akatauanga, penei ka manako akaapa ua te akava ngakau o etai Kerititiano no te kore e rauka ia ratou te rave kia maata atu te tavinianga i te Atua, penei no te ruaine me kare te tu apikepike te kopapa. I tetai pae, penei ka anoanoia te akamaroiroi anga no etai kia meitaki mai ei ta ratou angaanga orometua ra. (Ebera 5:12; 6:1) Ka akakeu te tu tangi i te aronga pakari kia kitea “te tuatua te ka ārikiia” te ka patu ia etai ra ki runga. (Koheleta 12:10) Me patuia ki runga te au mamoe a Iehova e ka akakeuia, ka riro na to ratou inangaro i te Atua e akakeu ia ratou kia rave i te ka rauka katoa ia i te tavinianga iaia!

Au Tangata Akatupu Taokotai Anga

15. Eaa te akatakaia maira na te tuatua anga i te “akarongo okotai”?

¹⁵ Te toru, te orongaia maira “te meitaki i te tangata nei” kia “riro tatou ravarai ei tangata pakari, i te akarongo okotai, e te kite i te Tamaiti a te Atua ra.” (Ephesia 4:13) Te takiota tuatua “i te akarongo okotai” te akakite ra i te taokotai anga kare i te akarongo ua mari ra ei aronga akarongo katoa oki. Ko teianei, i reira, tetai atu tumu i oronga mai ei te Atua kia tatou i “te meitaki i te tangata nei”​—kia akatupu i te taokotai anga i roto i tona au tangata. Akapeea ratou i te rave anga i teianei?

16. Eaa ra i puapinga maatai no te aronga pakari kia tamou marie i te taokotai anga i roto ia ratou uaorai?

¹⁶ Ei akamata anga, ka tika ratou kia tamou marie i te taokotai anga i roto ia ratou uaorai. Me te tatakake ra te au tiaki, penei ka mamae te au mamoe i te akono koreia. Te tuatau okomaata te ka tau kia akapouia i te tiakianga i te anana ra penei ka akapou tau koreia na te au uipaanga e te au taumaroanga i te au tumu rikiriki ua. (1 Timoteo 2:8) Penei kare te aronga pakari e akatika ua i te au tumu ravarai ta ratou e uriuri manako, no te mea e au tangata ratou ma te tu tuke tuke maata. Kare te taokotai anga e akakore atu i to ratou au manako tuke tuke me kare noatu i te akakite anga ia ratou na roto i tetai tu tau i te tuatau o te uriuri anga ma te manako tuera ua. Ka akatamou te aronga pakari i to ratou taokotai anga na te akarongo anga ngateitei tetai ki tetai ma te kore e tuku anga tika na mua. E kia kore te kaveinga Pipiria e aatiia, ka tau ratou takitai kia mareka kia akatika e kia turu oki i te tika openga a te pupu aronga pakari ra. Ka akaari mai te vaerua akatika ua ra e te aratakiia ra ratou e te “pakari no runga maira,” e “mea au ia, e te maru.”​—Iakobo 3:17, 18.

17. Akapeea te aronga pakari i te tauturu anga kia vai marie te taokotai anga i roto i te putuputuanga?

¹⁷ E matakite katoa te aronga pakari kia akatupu i te taokotai anga i roto i te putuputuanga. Me tupu mai te au mana akatataka ke​—mei te urutoe tamamae ra, te manako akatupu akakeuanga tarevake, me kare te vaerua taemoemo​—kia akakoko i te au, e viviki ratou i te oronga i te akoanga tauturu. (Philipi 2:2, 3) Ei akatauanga, penei kua matakite te aronga pakari i etai tei akaapa maata ra me kare te o atura ki te au apinga a etai ke ra, e kua riro ei akamanamanata ia etai ke. (1 Timoteo 5:13; 1 Petero 4:15) Ka tauta te aronga pakari kia tauturu i taua aronga ra kia kite e tarevake teianei raveanga ki ta tatou i apiiia mai e te Atua e ka tika tatou takitai ei runga “iaia uaorai [tana] apainga.” (Galatia 6:5, 7; 1 Tesalonia 4:9-12) Na te taikuanga i te au Tuatua Tapu, ka akataka ratou e ka akaruke mai a Iehova i te au apinga e manganui ki to tatou uaorai akava ngakau takitai, e kare tetai o tatou e tau kia akava i tetai ke no aua tumu ra. (Mataio 7:1, 2; Iakobo 4:10-12) Kia tavini kapiti i te taokotai anga, ka tika tetai reva irinaki e te ngateitei i roto i te putuputuanga ra. Na te oronga anga i te akoanga Tuatua Tapu me anoanoia, ka tauturu “te meitaki i te tangata nei” ia tatou kia akaora i te au e te taokotai anga oki.​—Roma 14:19.

Paruruanga i te Anana

18, 19. (a) Te paruru maira “te meitaki i te tangata nei” ia tatou mei iaai ma? (e) Mei teea tu kino ke atu te tau ra te au mamoe kia paruruia, e akapeea te rave anga a te aronga pakari kia paruru i te au mamoe ra?

¹⁸ Te a, te oronga maira Iehova i “te meitaki i te tangata nei” ei paruru kia kore tatou e tauriuriia “e te matangi ra, i tera tuatua i tera tuatua, mei te tamariki ra, i te ravenga a te tangata nei, e te pakari i te ravenga tini o te pikikaa ra.” (Ephesia 4:14) Te tuatua mua no te “ravenga a te tangata” kua karangaia te aite anga e “kikite i te toka pere” me kare “e karape i te raveanga i te toka pere.” Kare aina te reira e akamaara mai ia tatou i te raveanga kikite a te aronga apoteiti? Na te taangaanga i te au taumaroanga kikite, ka tauriuri ratou i te au Tuatua Tapu i te tauta anga kia akavare i te au Kerititiano mou kia tapae ke mai i to ratou akarongo. Ka tika te aronga pakari kia matakite no taua au “luko taae” ra!​—Angaanga 20:29, 30.

¹⁹ Ka tau katoa te au mamoe a Iehova kia paruruia mei etai atu tu kino katoa. Kua paruru mataku kore te tiaki mamoe taito ra ko Davida i te anana a tona metua i tei akapou ra. (1 Samuela 17:34-36) I teia tuatau katoa oki, penei ka tu mai te au atianga e akaari ei te au tiaki Kerititiano i te tu mataku kore kia paruru i te anana mei tetai ua atu penei ka akono tau kore me kare ka takinga kino i te au mamoe a Iehova, e maata oki te aronga ngoie ua kia akavareia. Ka viviki te aronga pakari i te akaatea ke atu mei te putuputuanga i te aronga rave ara tei rave akakoro ra i te au tu kikite, te akavare, e te ravenga kia akatupu i te rave kino.b​—1 Korinetia 5:9-13; akaaite ia Salamo 101:7.

20. Eaa tatou ka manako ngakau tinamou ei i roto i te utuutu anga a “te meitaki i te tangata nei?

²⁰ Mei teaa ra to tatou akameitaki anga no “te meitaki i te tangata nei”! I ta ratou utuutuanga aroa, ka manako ngakau tinamou tatou, no ta ratou akatau maru ia tatou, ma te patu aroa ia tatou ki runga, e te akaora viviki anga i to tatou taokotai anga, e te paruru anga mataku kore ia tatou. Inara akapeea te manako tau no “te meitaki i te tangata nei” i ta ratou tuanga i roto i te putuputuanga? E akapeea tatou me akaari e te ariki ra tatou ia ratou? Ko teianei au uianga te ka uriuri manakoia i te atikara te ka aru mai.

[Au Tataanga Rikiriki i Raro]

Maara Ainei ia Koe?

◻ Koai ma “te meitaki i te tangata nei,” e eaa ra te Atua i orongai ia ratou ki te putuputuanga na roto ia Karaiti ra?

◻ Akapeea te aronga pakari i te akatupu anga i ta ratou apainga kia akatau i te anana ra?

◻ Eaa ta te aronga pakari ka rauka kia rave ei patu atu i to ratou au oa akarongo ra?

◻ Akapeea ka raukai i te aronga pakari ra kia akaora i te taokotai anga o te putuputuanga?

[Tutu i te kapi 10]

Na te tu tangi e tauturu i te aronga pakari kia akamaroiroi i te aronga te maromaroa ra te ngakau

[Tutu i te kapi 10]

Na te taokotai anga i roto i te aronga pakari ra e akatupu i te taokotai anga ki roto i te putuputuanga