‘Te Au Ai no te Anoano kia Kite i Roto i te Ngakau e te Manako’

“Kare e rauka i te au tuatua kia akakite i te rekareka e te tu rapurapu te tupu ra iaku e kaikai maata ra i te Is There a Creator Who Cares About You? Te anga maira ki roto i tetai i te inangaro​—kare, i tetai umuumuanga—​kia maata atu te kite. Akameitaki kia kotou no te tutungianga i te au ai no te anoano kia kite i roto i toku ngakau e te manako oki.”

KO TE tu manako ngakau te reira o tetai o te Au Kite o Iehova mei North Carolina, U.S.A. mai, no runga i te puka tei orongaia mai na te Taiate Punanga Tiaki i “Ta te Atua Tu Oraanga” au Uruoaanga Tapere i te 1998/99. Noatu e me kare aau kopi o te puka, e akamanako i etai atu tupuanga.

I etai au ra i muri mai i te raukaanga tana kopi i te uruoaanga i San Diego, i California, U.S.A., kua tata tetai tangata: “Te kite nei au i teianei puka e maata te akamaroiroianga akarongo. Te akaki ra ia i taku ngakau ma te ariki anga oonu no ta Iehova au angaanga anga maianga. Kua tae au ki te kapi 98, e kare au e akara mareka atu ana ki te ra e itae ei au ki te openga! No te maata oki tetai rekareka akamerengo anga.”

Kua tata maira tetai vaine Orieni e: “Kua taangaanga te vaa tuatua uruoaanga i te tuatua ‘tetai puka umere tikai,’ e kua tano te reira tuatua no te puka ra. Ko tetai mea meitaki e kare te puka e opara te tangata kia ariki i te vai anga i te Atua, mari ra kua akakite mai ia i te au tika anga.”

Te kapiti ra i te au tika no te au mea kiteaia e te taineti ei akamarekaanga no to tatou ao katoa e pini ua ake, te oraanga, e tatou oki. Na teia i akamanako oonu i te aronga e manganui. “Kare tikai aku au tuatua ei akakite i te oonu anga te akatupu anga kiaku a teianei puka rikiriki,” ta tetai vaine i California i tata. “Kare i rauka iaku kia tuku i taua puka ra ki raro i te akataka anga mai a te au kapi tataki tai i te au mea kiteaia tei eeuia maira no to tatou ao katoa e pini ua ake e te oraanga katoa oki. E maata tikai taku i kite! Ka akaperepere tikai au i teianei puka rikiriki e ka tua aere i te reira ma te aronga e manganui te ka rauka iaku.”

Ko tetai tu tei akamareka i te aronga e manganui ko te oronga anga tapoto mai i te akataka anga Pipiria, i te akakite teiteianga i te tu o Tei Anga maira. “Te akakite manako anga no te Pipiria, tei orongaia i vaitata ki te openga o te puka ra, ko tetai ia o te mea meitaki katoa taku i tatau ana,” ko tetai tuatua anga matauia ia. I muri poto ake i tetai uruoaanga mua i New York, U.S.A., kua tata mai tetai atu: “Ka riro ko te puka ou tei orongaia mai nei ei puka maata te tauruanga o ta kotou i tata ana. Kua umere tikai au i te au akapapu anga taineti e te vai nei tetai Tei Anga maira. Ko te akataka anga poto tikai no te Pipiria uaorai kua rava ua no te akataka anga i te au tumu tei orongaia maira e kia akakeu oki i te anoano kia maata atu te tatau anga.”

Taineti Ngoie ua te Marama Anga

Penei ka akara anga ngata te akakiteanga taineti i roto i nga pene mua ra, inara teia etai au manako anga matauia.

Kua tata tetai tangata Kanata: “Mei teaa ra te tuke anga ki te au puka apiianga tei tauta ra te aronga tata kia manako akateitei atu tatou ma ta ratou au tuatua roroa ra. E meitaki tikai ta kotou apiipii anga i te akariroanga i te au tumu no te physics, te kemikara, te D.N.A., te chromosomes, e te vai atura, kia ngoie ua te marama anga kia matou. Naringa na kotou i tata te au puka apii teitei taku i apii i te au mataiti kua topa!”

Kua tata tetai poropeta apii teitei no te physics: “[Te] oronga taka meitaki maira te au itiu tei o mai ma te kore ua e tomo oonu ki raro na te au tumu rikiriki ngata ra. Te akamanako kapiti ra taua puka ra ma tei tatau e te taiku maira i te au arataki taineti e manganui. Ko teia tetai ‘mea tika kia tatauia’ no tetai ua atu te inangaro ra kia kite i te akamata anga mai o te ao katoa e pini ua ake e te oraanga oki, me ko tetai taineti me kare ko tetai tangata noa nei.”

Kua tuatua tetai vaine ou te apiipiiia ra ei neti: “Kare i rauka iaku kia irinaki i toku nga mata kia eeu i te pene 4 e kia tatau i tetai taiku anga no te puka mai ta matou e taangaanga ra i to matou pupu! Kua oronga atu au i te puka ki to matou poropeta e kua tuatua atu kiaia e kua kite au ka kitea e ia taua akakite anga ra ei mea akapumaana. Kua akaari atura au kiaia i te kapi 54 no runga i te roro. Kua tatau muteki ua kiaia uaorai e kua tuatua, ‘E meitaki tikai teianei! Ka akara matatio au i te reira.’ ”

Kua tata tetai mema paramani i Belgium: “Ko tei akatuki mai iaku e tei apai ke atu i toku manako ko te akapapa anga taineti tei akaketaketa maira e kare te taineti o teianei tuatau e patoi ana i te apiianga Atua okotai o te Pipiria mari ra, te taokotai atura ma ratou katoa. Ko teianei tetai manako anga puapinga maata.”

Kiteanga Meitaki Atu i Tei Anga Maira

Kua tauturu taua puka ra i te au tangata i te au enua e manganui kia kite meitaki atu i te Atua e kia manako ngakau piri vaitata maata atu kiaia. Kua kite tetai tei tatau ra i te Oire o Fukuoka, i Tiapani, e: “Mei te mea rai e kua akaanga tikaia atu nga titia ki runga ia Iehova ra no te taime mua. Te meitaki ra te akairinakianga a taua puka ra. Kua rauka iaku kia kite atu ia Iehova mei tetai turanga kare rava au i manako tae roa mai ki teianei.” Kua tata tetai tangata Salvador: “Kua akataka meitaki tikai kotou i to te Atua aroa ua, aroa meitaki, kare e riri vave, e te ki i te takinga meitaki aroa. E tika tikai, ko teianei tikai ta tatou e anoano nei kia piri vaitatai kiaia e ki tana Tamaiti oki. Ko te puka mua te reira tei akataka meitaki mai i to Iehova ra au tu manako e te au manako ngakau tangata no tana Tamaiti, ko Iesu.” E ko tetai tei tatau ra i Zambia kua na ko maira: “Kua mou a Iehova i tetai aiteanga ou tikai noku i teianei.”

E mea matauia ra, te manako rapurapu ra te Au Kite o Iehova kia tua atu ki etai ke ra i te Is There a Creator Who Cares About You? Kua akakite mai tetai: “I te oti anga iaku i te tatau i te pene 10 [“Me te Manako Tikai ra Tei Anga, Eaa ra i Maatai te Mamae Anga?”] Kare i rauka iaku kia kore e tuatua, ‘Ko teianei tikai te puka ta matou e anoano ra i Tiapani!’ Ka inangaro au kia akariro i te au tumu i roto i teianei pene naku uaorai e kia taangaanga maata atu i te reira i te angaanga tutu aereanga.” Ko tetai atu vaine te apii ra i te Pipiria ma tetai atu tamaine tei akatupuia akera ki roto i te iero i te ngai ko tona metua ra te orometua. “E tuatau ngata tona kia ariki i te apiianga no Tei Anga mai. Kare e apinga opara anga i te akataka anga i teianei puka, inara tei roto i reira te au tika, no reira te manako nei au e noatu ko te au Buda ka rauka kia tatau i te reira ma te kore e manako tapupu anga. Te akariro katoa maira te reira kia maata atu to tatou manako ngakau no to Iehova ra aroa.”

Mei England mai ko te akataka anga i te puapinga: “Koi oti ua akenei iaku te puka Creator e te vaitata nei au i te akamata i te tatau akaou. Mei teaa ra tetai puka umere! Ka rauka anake i tetai kia inangaro atu ia Iehova me te tatau ra i te reira. Kua oronga atu au i tetai ki te vaine i te pae mai iaku, koia i muri ua ake i te tatauanga e rua ua pene kua karanga e, ‘Kare i rauka iaku kia tuku i te reira ki raro, e akamareka tikai ia.’ Te papu ra iaku ka tauturu teianei i te au tangata kia kite e kia inangaro oki i Tei Anga Mekameka maira ia tatou nei.”

Ko tetai tangata i Maryland, U.S.A., kua tuatua: “E tatomo tikai ia ki roto i toku au ivi e te uo ivi i te pae vaerua! Te parani nei au kia oronga i tetai kopi ki te au tangata katoatoa taku e rave pitiniti atura. Te kite ra au i etai taime e mea ngata kia akamata i te tuatua atu ma taua aronga tangata maata ra te angaanga, e te kite apiianga oki. Ma teianei puka ka kitea e au i teianei te araveianga mareka, e te meitaki oki.”

Te taka meitaki ra, e tei te puka Is There a Creator Who Cares About You? tetai akakeu anga papu ki runga i te au tangata i te enua katoa nei.

[Akameitakianga no te Tutu i te kapi 25]

Cover photo above, Eagle Nebula: J. Hester and P. Scowen (AZ State Univ.), NASA