Akapeea e Raukai ia Iesu i te Taui i Toou Oraanga?

E PUAPII maata rava a Iesu Karaiti tei ora ana i Paretaina vaitata rai e 2,000 mataiti i topa. E iti ua tei kiteia no runga i tona meangiti anga. Inara, kua akapapu meitakiia, i tona vaitata anga i te 30 mataiti, kua akamata aia i tana angaanga orometua i te “akakite i te tuatua-mou.” (Ioane 18:37; Luka 3:21-23) Kua akara tikai te au pipi e a tei tata no runga i tona oraanga i te toru e te apa mataiti tei aru mai.

I te tuatau o tana angaanga orometua, kua oronga a Iesu Karaiti i tetai akauenga ki tana au pipi te ka riro ei tu rapakau anga i te au maki o te manganui i te ao katoa. Eaa oki te reira? Kua tuatua a Iesu: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai.” (Ioane 13:34) Ae, ko te pauanga ki te au manamanata e manganui o te tangata ra koia oki ko te aroa. I tetai atu atianga, kua uiia kia Iesu e ko teea akauenga te mea maata roa atu, kua pau atu aia: “‘E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.’ Ko te akauenga mua teia e tei maata. E mei te reira katoa ra te rua, ‘E aroa atu koe i toou tangata tupu mei te aroa ia koe uaorai.’”​—Mataio 22:37-40.

Kua akaari mai a Iesu kia tatou e na roto i te au tuatua e te au angaanga e akapeea me aroa i te Atua e te au taeake tangata. Ka akamanako ana tatou i etai au akaraanga e kia kite e eaa ta tatou ka apii mei iaia ra.

Tana Au Apiianga

I roto i tetai tuatua anga kite meitakiia i roto i te tuatua enua, kua akakite a Iesu Karaiti ki tana au pipi: “Kare e tika i te tangata kia akono i nga pu e toko rua: ka riro aia i te riri atu ki tetai, e te anoano atu ki tetai; e kare ra, ka riro i te tau atu ki tetai, e te akaviivii atu ki tetai. Ko kotou nei oki, kare e tika kia akono atu i te Atua e te Mamona.” (Mataio 6:24) E tau ainei ta Iesu apiianga no runga i te tuku anga i te Atua na mua i to tatou oraanga i teia tuatau, i te mea e te irinaki ra te au tangata e manganui e ka akatikatika te moni i te au manamanata katoatoa? E tika, ka anoano tatou i te moni e meitaki ei. (Koheleta 7:12) Inara, me ka tuku tatou i te “Mamona” kia riro ei pu no tatou, ka akaaere te “anoano maata oki i te moni” ia tatou, te tutaraanga i to tatou oraanga katoa. (1 Timoteo 6:9, 10) E manganui tei inga ki roto i teia puereere kua taopenga ki roto i te ngere anga i to ratou pamiri, to ratou oraanga kopapa, e to ratou au oraanga.

I tetai tua, i te akaraanga ki te Atua ei Pu no tatou te oronga maira i te puapinga ki te oraanga. E ko Tei Anga, koia te Tumu o te ora, e no reira, koia anake te tau ra kia akamoriia e tatou. (Salamo 36:9; Apokalupo 4:11) Ko te aronga tei apii no runga i tona au tu e kua inangaro iaia kua akakeuia kia akono i tana au akauenga. (Koheleta 12:13; 1 Ioane 5:3) Na te rave anga i te reira, ka puapinga tatou uaorai.​—Isaia 48:17.

I te Tuatua i te Maunga, kua apii katoa a Iesu i tana au pipi e akapeea me akaari i te aroa ki te au taeake tangata. Kua tuatua aia: “E te au mea katoa ta kotou i anoano ia etai ke ra, na reira katoa kotou ia ratou.” (Mataio 7:12) Te tuatua “etai ke” ta Iesu i taangaanga i konei te kapiti maira i to tetai au enemi. I roto rai i taua tuatua, kua karanga aia: ‘E aroa atu i to kotou aronga enemi, e pure oki no te aronga tei takinga-kino mai ia kotou.’ (Matthew 5:43, 44) Kare ainei e ka akatikatika taua aroa i te au manamanata e manganui ta tatou e aro atura i teia tuatau? Kua manako akapera te arataki Hindu ko Mohandas Gandhi. Kua taikuia aia i te tuatua anga: “Me ka akaputuputu [tatou] no runga i te au apiianga tei akanooia e Karaiti i roto i teia Tuatua i te Maunga, ka rauka ia tatou i te akatikatika i te au manamanata . . . o te ao katoa.” Ka akatikatika ta Iesu au apiianga no runga i te aroa, me taangaangaia, i te au maki e manganui o te tangata ravarai.

Tana Au Angaanga

Kare anake a Iesu i apii i te au tuatua mou oonu e akapeea me akaari i te aroa inara kua rave katoa aia i tana i apii. Ei akaraanga, kua tuku aia i te anoano o tetai ke i mua ake i tona uaorai. I tetai ra te angaanga pakari ra a Iesu e tana au pipi i te tauturuanga i te tangata e kare o ratou tuatau no te kaikai anga. Kua kite a Iesu e te anoano ra tana au pipi i te akaangaroi anga, e kua apai atu aia ia ratou ki tetai ngai tau. Inara i te tae anga ratou ki reira, kua kite atu ratou i tetai urupu e tiaki maira ia ratou. Akapeea koe me ariu atu i te kite anga i tetai urupu tei anoano ia koe kia angaanga ia koe i manako ei i te akaangaroi anga? Ina, kua “tangi atura [a Iesu] ia ratou” e kua “apii atura aia ia ratou i te au tuatua e manganui.” (Mareko 6:34) Kua akakeu teia manako anga i tetai atu ia Iesu kia tauturu ia ratou.

E maata atu ta Iesu i rave no te tangata e kia apii ua ia ratou. Kua oronga katoa aia i te tauturu tau. Ei akaraanga, i tetai atianga kua angai aia e maata atu i te 5,000 tangata tei akarongo ana iaia e tae ua atu ki te aiai o taua ra. Kare i roa i muri mai i te reira, kua angai aia i tetai urupu maata​—i teia taime e maata atu i te 4,000​—tei akarongo ana iaia i nga ra e toru e kare a ratou apinga toe i te kai. I te atianga mua, kua taangaanga aia e rima au potonga varaoa e e rua manga ika, i muri maira, e itu potonga varaoa e te manga ika. (Mataio 14:14-22; 15:32-38) E temeio ainei? Ae, e tangata rave temeio aia.

Kua rapakau katoa a Iesu i te aronga maki e manganui. Kua akaora aia i te matapo, te pirikoki, te aronga repera, e te aronga turi. Eaa rai, kua akatu aia i te mate! (Luka 7:22; Ioane 11:30-45) I tetai atianga kua pati tetai tangata repera kiaia: “Kia tika ia koe, e mā au ia koe.” Akapeea a Iesu i te ariu anga? “Aroa akerā Iesu iaia, akatika atura i te rima, e akatukia atura iaia, na ko atura, Kua tika ïa iaku; kia mā koe.” (Mareko 1:40, 41) Na roto i te reira au temeio, kua akatutu a Iesu i tona tu aroa no tei mamae ra.

Te ngata ra ainei ia koe i te irinaki i ta Iesu au temeio? Te pera ra etai pae. Inara, kia akamaara e kua rave a Iesu i tana au temeio i te ngai tangata. Kare i rauka i tona aronga patoi, tei tauta i te kimi i te apa i roto iaia i te au atianga ravarai, i te akakore e e tangata rave temeio aia. (Ioane 9:1-34) Pera katoa, e akakoroanga to tana au temeio. Kua tauturu te reira i te tangata kia akataka iaia e ko Tei tonoia mai e te Atua.​—Ioane 6:14.

I te raveanga i te au temeio kare a Iesu i kimi i te akara anga nona uaorai. Mari ra, kua akapaapaa aia i te Atua, te Tumu o tona mana. I Kaperenauma tei roto aia i tetai are tei ki i te tangata. Kua inangaro tetai tangata ngoru e kia rapakauia inara kare e rauka i te tomo atu ki roto. No reira kua tuku atu tona au taeake iaia i runga i tetai roi na roto i te paruru turu. I te kite anga i to ratou akarongo, kua rapakau a Iesu i te tangata ngoru. Tei tupu mai, kua “akakakā [te tangata] i te Atua” e kua tuatua e: “Teia ua nei rai i kiteaʼi e matou teianei ravenga.” (Mareko 2:1-4, 11, 12) Kua apai mai ta Iesu au temeio i te akapaapaa anga kia Iehova, tona Atua, e kua tauturu i te aronga tei ngere ra.

Inara, kare e ko te rapakauanga temeio i te maki, te tumu maata o ta Iesu angaanga orometua. Kua akamarama tetai tei tata i to Iesu oraanga e: “Ko teia ra tei tataia, kia akarongo kotou e, ko Iesu te Mesia, te Tamaiti a te Atua; e kia rauka oki to kotou ora i tona ingoa i te akarongo anga.” (Ioane 20:31) Ae, kua aere mai a Iesu ki te enua nei e raukai i te au tangata irinaki ra te ora.

Tona Atinga

‘I aere mai a Iesu ki te enua nei?’ penei ka ui koe. ‘Noea mai aia i te aerenga mai?’ Kua tuatua a Iesu uaorai: “I eke mai nei oki au mei te rangi mai, e akono i to tei tono mai iaku nei anoano, auraka i toku uaorai anoano.” (Ioane 6:38) I vai ana aia i mua ake i tona riroanga mai ei tangata e ko te Tamaiti anau tai a te Atua. Eaa i reira te anoano o Tei tono mai iaia ki te enua nei? “I aroa mai te Atua i to te ao nei, kua tae rava ki te oronga anga mai i tana Tamaiti anau tai,” i na Ioane ei, ko tetai o te aronga tata Evangeria, “kia kore e mate te akarongo iaia, kia rauka ra te ora mutu kore.” (Ioane 3:16) Akapeea teia i te rauka anga?

Te akakite maira te Pipiria e akapeea te matenga i te riro anga mai e kare e rauka kia kopaeia e te tangata. Kua rauka i nga tokorua mua te oraanga mei te Atua ma te manakonakoanga o te oraanga e tuatau ua atu. Inara, kua iki raua i te akarongo kore i Tei Maani ia raua. (Genese 3:1-19) Tei tupu mai o teia raveanga, kua ara nga tangata mua, e kua iri mai te mate ariki koreia ki runga i te uanga a Adamu raua ko Eva. (Roma 5:12) E raukai i te tangata ravarai te oraanga tika tikai, ka tau kia akakoreia atu te ara e te matenga.

Kare e rauka i tetai taineti i te akakore i te matenga na roto i te enitinia genetic. Inara, ka rauka i Tei Anga i te tangata te ravenga no te apai mai i te tangata akarongo e kia kore e apa e raukai ia ratou te ora mutu kore. I roto i te Pipiria kua kapikiia teia e ko te oko. Kua oko te nga tokorua mua ia raua uaorai e ta raua uanga ki roto i te tuikaa o te ara e te mate. Kua oko raua i to raua oraanga ei nga tangata apa kore akarongo ki te Atua no tetai oraanga takake mai mei te Atua, te tukuanga i ta raua au iki anga e ko teea te mea tika e te mea tarevake. Kia oko akaou mai i te oraanga tangata apa kore, kua anoanoia tetai tutaki anga kia aiteite ki te oraanga tangata apa kore tei kopaeia e to tatou nga metua mua. I te mea kua tu i te ara, kare te au tangata i tau no te oronga mai i te tutaki.​—Salamo 49:7.

No reira kua tomo mai te Atua ko Iehova i te tauturu. Kua tuku aia i te ora anga o tana Tamaiti anau tai ki roto i te tokara o tetai paretenia, tei anau maira ia Iesu. I nga ngauru mataiti i topa ake nei, penei ka kopae koe i te manako no tetai paretenia kia anau. Inara, i teia tuatau, kua rauka i te aronga taineti i te clone i te au mammal e kia tauru mai i te au gene mei tetai animara ki tetai. Koai, i reira, te ka tika i te uiui i te tu karape o Tei Anga no te aere ke atu i te ravenga matauia o te uanga anga?

Ma te vai anga te oraanga tangata apa kore, kua rauka te tutaki no te akaora mai i te tangata ravarai mei te ara e te matenga. Inara, kua anoanoia te pepe tei anauia mai i te enua nei ko Iesu kia maata mai kia riro e ko te “taote” te ka rauka i te oronga i te “vairakau” ei rapakau i te au maki o te tangata ravarai. Kua rave aia i teia na te akonoanga i tetai oraanga apa kore e te tiama. Kare anake a Iesu i kite i te riri o te tangata ravarai i raro ake i te ara inara kua kite i te au kotinga i te pae kopapa i te riro anga mai ei tangata. Kua akariro teia iaia ei taote tangi aroa ua. (Ebera 4:15) Kua akapapu te au rapakauanga temeio tana i rave i tona oraanga i te enua nei ei tei iaia te anoano e te mana no te akaora i te maki.​—Mataio 4:23.

I muri ake i tetai angaanga orometua e toru e te apa mataiti i te enua nei, kua tamateia a Iesu e tona aronga patoi. Kua akaari aia e ka rauka i tetai tangata apa kore i te akarongo ua ki Tei Anga noatu te maata i te au timata anga. (1 Petero 2:22) Kua riro tona oraanga tangata apa kore akaatinga ia ei tutaki i te oko, kua rauka i te akaora i te tangata ravarai mei te ara e te mate. Kua tuatua a Iesu Karaiti: “Kia oronga te tangata i tona uaorai ora no tona au taunga, kare rava e tangata aroa maata atu i te reira.” (Ioane 15:13) I te toru o te ra i muri ake i tona matenga, kua akatuia mai a Iesu ki te ora anga vaerua, e i etai au epetoma i muri maira kua kake atura aia ki runga i te rangi kia oronga i te oko ki te Atua ko Iehova. (1 Korinetia 15:3, 4; Ebera 9:11-14) Na te raveanga i te reira, kua rauka ia Iesu i te taangaanga i te puapinga o tona atinga oko ki te aronga tei aru mai iaia.

Ka puareinga ainei koe e kia puapinga mei teia tu rapakau anga i te pae vaerua, i te pae ngakau e te au maki i te pae kopapa? E rave ei i te reira te umuumuia ra te akarongo ia Iesu Karaiti. Kore oki koe e aere mai ki te Taote? Ka rauka ia koe i te rave i te reira na te apiianga no runga ia Iesu Karaiti e tana tuanga no te akaoraanga i te tangata tiratiratu. Ka mataora te Au Kite o Iehova i te tauturu ia koe.

[Tutu i te kapi 5]

Tei ia Iesu te anoano e te mana no te akaora i tei maki ra

[Tutu i te kapi 7]

Akapeea to Iesu matenga i te akakeu anga ia koe?