Akakoreanga i te Kino o te Tu Aiteite Kore

Kare e roa atu ka apai mai Tei Anga te tu aiteite te anoano ra te tangata. A te reira taime, ka rauka ia tatou i te rave i te au takainga no te akakore anga i te kino o te tu aiteite kore te akakino ra ia tatou e to tatou au ngutuare tangata. Mei ta Nelson Mandela, te peretiteni i mua ana o Aperika Apatonga, i akakite, “ko ta tatou i akariro i tei rauka ia tatou, kare e ko tei orongaia mai kia tatou, te akatakake ra i tetai tangata mei tetai.”

KUA akapapu te tuatua enua i tana au tuatua. E manganui te au tane e te au vaine e meangiti tei orongaia i te anau anga te manuia nei, na te taangaanga meitaki i tei rauka ia ratou, i akatakake ia ratou mei to ratou au taeake akapuapingaia. Kia tuatua uaia, ko te aronga tei akapuapingaia ma te au meitaki mei te anau anga kua kaimoumou i tei rauka ia ratou e kare i akono tikai ki tona tu tau.

E Taangaanga Meitaki i Tei Rauka ia Koe!

Te inangaro ra te Au Kite o Iehova i te tauturu i te tangata kia rauka te kite no runga i ta te Atua akakoroanga na roto i te apii anga i te Pipiria. Inara, kua kite ratou, e kia puapinga tikaiia mei te akakite anga a te Pipiria, kia kite te tangata i te tata e te tatau. No te reira tumu, kua apii te Au Kite o Iehova e tauatini ua atu tangata kia tatau e kia tata, te kapiti anga mai e 23,000 tangata (mei rotopu mai i te 1990) i roto i tetai ua enua i Aperika Opunga. Te tuatuaanga no runga i te angaanga tauturu ua ta te Au Kite o Iehova e oronga ra, kua akakite te San Francisco Examiner e: “Penei ka manako koe ia ratou ei au tangata tau kia aruia. Te tutaki ra ratou i ta ratou tero, te akara ra i te aronga maki, te autu ra i te kite kore i te tatau e te tata.”

Kapiti mai, na roto i tetai apii tere ki mua i te tuatua ki te katoatoa, kua tereni te Au Kite o Iehova e anere tauatini ua atu tangata kia riro mai ei au vaa tuatua tau, kua rauka i te tuatua ma te tukatau i te ngai tangata. I roto i teia au tauatini te vaira tetai aronga tei manamanata tikai i te tuatua. Ka akara ana i te tangata no Aperika Tonga mai tei tata e: “Kua kino tikai taku tuatua tapupu e kua manako au iaku uaorai, te irinaki anga ki tetai kia tuatua noku. . . . I te piri anga au ki roto i te Apii Orometua Teokaratiki e kua oronga i te tatauanga Pipiria ki mua i tetai aronga akarongo meangiti . . . , kua tuatua tapupu tikai au e kare i rauka iaku i te akaoti i taku tuanga i roto i te tuatau tei akanooia mai. I muri mai i te uipaanga kua oronga takinga meitaki mai te [tangata ako] i te tuatua tau kiaku. Kua taiku mai aia e kia tatau maata au kiaku uaorai. Kua rave au i teia, te akapouanga taime i te au ra, te tatau maata anga i taku Pipiria e te makatini Punanga Tiaki.” Kua tere meitaki atu teia tangata ki mua e i teianei te oronga ra aia i te au tuatua ki te aronga akarongo e maata atu i te au anere, ki te au tauatini ua atu.

Rekarekaanga i te Tu Aiteite i Roto i te Au Taeake

No te kite apii anga, te akonoanga i te pae kopapa, e te turanga i te pae moni e te tu tangata, te tuke maata ra te au turanga i roto i te Au Kite o Iehova. Kua akaata ua teia au tukeke i te au turanga apa ua o te ao te noo nei ratou. Inara me akatukeia atu ki tetai au pupu akonoanga, vaitata rai kua akakore ia te iriiri iti tangata, te iriiri tu tangata, e te iriiri i te pae moni mei ia ratou.

Kua rauka ia ratou teia na te rave anga i tei rauka i te taangaangaanga i ta ratou i apii mei te Pipiria. Kua takave ngakau katoa ratou i te au kaveinga Pipiria mei: “E kare oki ta Iehova akara anga e tau ki ta te tangata; e akara oki te tangata ki te tu i vao ake, karekā Iehova e akara ïa i te ngakau.” (1 Samuela 16:7) “Kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” (Angaanga 10:34, 35) “Auraka te kino e tutakiia atu ki te kino i te tangata ravarai nei. Ka akonokono ana i te mea tika tikai ki mua i te aroaro o te tangata katoa nei. Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei.”​—Roma 12:17, 18; akara katoa ia 1 Timoteo 6:17-19; Iakobo 2:5, 9.

I te akono tiratiratu anga i teia au kaveinga Pipiria te akamaata ra i te taokotai anga, kua patoi te Au Kite o Iehova i te akakoromaki i roto rai i to ratou au turanga i etai akono anga i te tu aiteite kore tei akatumuia ki runga i te kiri tangata, te tu tangata, me kare te au tuke anga i te pae moni. Ei akaraanga, kare a teia au tumu tuanga i te ikianga e koai te ka tau kia akatotoaia atu te au akameitaki anga angaanga i roto i te putuputuanga Kerititiano. Kua oronga uaia te au turanga apainga, mei te apiianga e te akaaereanga, na runga i te tumuanga tei tau i te pae vaerua.​—1 Timoteo 3:1-13; Tito 1:5-9.

No te au tangata tataki tai tei mamae i raro ake i te au tu aiteite kore o tetai ao iriiri, mei teaa ra te oraoraanga me akono mai tetai tangata ia ratou ei au tungane e te au tuaine ma te turanga aiteite ki mua i Tei Anga ia ratou! Ka rauka ia Martina i te akapapu i teia. I muri ake i te akaruke anga tona papa i te ngutuare tangata, kua maata mai aia i roto i tetai kainga putaua e okotai metua. E putuputu te taime kua akonoia aia mei tetai kare i ariki ia, kare i papu tikai, e kua ngata iaia e kia meitaki ua ki tetai atu. Kua akatupu aia i tetai tu manako kore. Inara, kua taui te au mea i muri ake i te akamata anga aia i te apii te Pipiria e kua riro mai e ko tetai o te Au Kite o Iehova. Kua tuatua mai aia: “Te tamaki nei rai au i te au manako papu kore, inara te rauka nei iaku i te akono atu i taua manamanata. Kua meitaki mai toku uaorai tu ngateitei, e te tuatua nei au ma te papu tikai. Kua oronga mai te tuatua mou i te tu apainga kiaku. I teianei kua kite au e te inangaro ra a Iehova iaku e e mea puapinga te oraanga.”

Ei pupu Kerititiano i te pa enua, te rekareka ra te Au Kite o Iehova i te au enua e tere atu i te 230 i te tu aiteite e mea umere i teia tuatau. Ka rauka ainei i tetai atu akaaerenga akonoanga i te tuatua akapera e kia turu atu i te reira ma te au tuatua tika?

E tikai, te manako tika ra te Au Kite o Iehova. Te akakite ra ratou i te riro anga e ko tetai i roto i tetai reva apa ua, kare e rauka ia ratou i te akakore i te tu aiteite kore o te tangata no etai au anere mataiti kua tauta tetai i te akapera​—kua autu kore ra. Noatu rai, te rekareka ra ratou i roto rai i to ratou au turanga, e maata ta ratou i rave no te akakore i teia tu kino. Ma te akarongo ketaketa i roto i ta te Atua taputou, te akara ra ratou ki mua i tetai ao ou tuatua tika te ngai ka kore ei te tu aiteite kore.

Ae, kare e roa atu ka akaouia te au tangata akarongo ki te tu aiteite “i te tu ngateitei e te au tikaanga” ta to ratou Anga i akakoro no ratou kia rekareka i te akamata anga. E manako meitaki tikai! E i teia taime nei ka tika tikai ia!

[Tutu i te kapi 7]

Te tamaki ra te Au Kite o Iehova i te kore e kite i te tatau e te tata na te apiianga i te ngauru tauatini ua atu tangata kia tatau e kia tata

[Tutu i te kapi 8]

Tauturu te tuatua mou Pipiria i te akaatea i te iriiri iti tangata, te iriiri tu tangata, e te iriiri i te pae moni