Tu Aiteite Kore​—I Akakoro Ainei te Atua i te Reira?

Te pauanga i te tuatua okotai kare. Ka akara ana tatou e no teaa ra.

KUA akakoro te Atua e kia aiteite te au tuatau ki te au tangata ravarai kia rekareka e kia mataora i te oraanga. No to te tangata angaia mai anga, ka tatau tatou: “Kua tuatua iora te Atua, E anga tatou i te tangata i to tatou uaorai tu, kia aite ki to tatou uaorai tu: e kia mana ratou ki rungao i te au ika o te tai, e ki rungao i te au manu o te reva, e ki rungao i te au puaka, e ki rungao i te enua katoa nei, e ki rungao i te au mea totoro katoa ra, e totoro aere ua i te enua nei.” I te oti anga i te anga i te enua, “akara akera te Atua i te au mea katoa tana i anga, e i na, te meitaki roa ra.”​—Genese 1:26, 31.

Ka rauka ainei i te Atua i te akakite i te au turanga maromaroa o te tu aiteite kore i teia tuatau ei mea “meitaki roa”? Kare rava, “ko te Atua oki te aroa.” (1 Ioane 4:8) Kua tuatuaia nona e “kore [aia] e akono i te tu o te tangata” e te “tika rava tana angaanga ra; ko tei tau katoa tona au aerenga; e Atua tuatua-mou, e te kino kore ra, e tuatua-tika tana, e te tiratiratu!” (Deuteronomi 10:17; 32:4; akaaite ia Iobu 34:19.) E kua taopenga te apotetoro ko Petero: “Kua kite mou atura au e, kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”​—Angaanga 10:34, 35.

Mei te mea e Atua aroa ua, papaki tai kore, tika, tiratiratu, e te tuatua tika, akapeea e raukai iaia i te anga i te au tangata ma te tu aiteite kore roto roa no runga i to ratou tika anga kia rekareka i te mataora? Kia tuku i te iriiri i roto i te tangata e kia tuku ia ratou ki roto i tetai akatereanga tu aiteite kore te patoi ra i tona tu peretana. Kua akakoro aia ia ratou e kia “anau rangatiraia e kia aiteite te tu ngateitei e te au tika anga.” Inara, i teia tuatau kare te au mea i akapera. No teaa ra?

Te Aka o te Tu Aiteite Kore

I te mea kua anga te Atua i te au tangata kia aiteite kare te aite anga e kua akakoro aia no te katoatoa kia aiteite i te au tu tikai. Ka tuke ratou i te tu karape, te au inangaro, e te tu tangata. Ka tuke katoa ratou i to ratou turanga me kare i te maata o te mana akaaere. Ei akaraanga, kare te tane e te vaine i aiteite i te au tu ravarai, inara kua anga te Atua i te vaine ei “tauturu tau” no te tane. (Genese 2:18) I te akara anga te tuke ra te au metua mei te tamariki i te akaaere anga. Inara, noatu i teia au tu tukeke, kia rekareka pouroa​—te tane, te vaine, e te tamariki​—ei tika anga orongaia mai e te Atua i te au tuatau aiteite kia akamerengo i te au umuumu anga kia mataora. Kia rekareka ratou katoatoa i te tu ngateitei aiteite e te au turanga ki mua i te Atua.

Ma te aiteite katoa, ki te au tamariki vaerua a te Atua, tei angaia i mua ake i te au tangata ravarai, kua orongaia te au tuku anga angaanga tukeke e te au apainga. (Genese 3:24; 16:7-11; Isaia 6:6; Iuda 9) Noatu rai, i roto i te au arai anga tei orongaia kia ratou, kua rauka i te katoatoa i te rekareka i te au apinga tu-Atua no te oraanga e te mataora kia aiteite te tu. Kua akaata ratou i reira i te tu papaki tai kore o te Atua na roto i tetai tu umere.

E mea mii kia tuatuaia, e tai ua vaerua kare i merengo ana i ta te Atua akanoonoo papaki tai kore. Kua anoano aia e kia maata atu tana i orongaia mai e te Atua, te inangaro anga i te turanga teitei tikai. Na te akonokonoanga i teia anoano tarevake, kua akariro aia iaia uaorai e kia patoi ia Iehova, koia Tei Anga kua tau te tika anga kia akono i te turanga maata i te ao katoa. I muri mai kua akakeu teia tamaiti vaerua meameaau a te Atua i te au tangata kia maro mei te Atua ma te maata i Tana i oronga kia raua. (Genese 3:1-6; akaaite ia Isaia 14:12-14.) No reira, i te akara anga kua kino ta Iehova apinga no te tangata kia rekareka i te oraanga e kia mataora. Teia vaerua meameaau, tei akatakaia mai ia Apokalupo 20:2 e ko “te Diabolo ra, ko Satani,” kua riro mai e ko tei akamata i te kino ki te tu aiteite kore o te tangata.

Ka Taui Ainei te Au Mea?

Te pau anga i te tuatua okotai ae!

Inara naai e apai mai i te au taui anga anoanoia? Kua tauta pakari etai au arataki, kare e ekoko anga ma te ngakau tae, no etai au anere mataiti i te rave akapera. Kua kotingaia to ratou manuia anga, te taki anga i te tangata e manganui kia taopenga e e mea tika kore kia tapapa e ka akatikatika ia te manamanata o te tangata no runga i te tu aiteite kore. Inara, kua tataia to te Atua manako, i roto ia Isaia 55:10, 11: “Mei te ua e topa nei, e mei te kiona, no runga mai i te rangi ra, e kare i oki akaou ki reira, kua tamauu ra i te enua, e kua akatupu ra, e kua akauua mai oki i tana, i raukaʼi oki te ua i te aronga e ruru, e te kai i te aronga e kai ra: Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”

Mei teaa ra te pumaana i te kite e kua tata te Atua ko Iehova e ka akatupu aia i tana akakoroanga mua kia oronga ki te tangata ravarai i te au tuatau aiteite o te oraanga e te mataora! Ei Atua mou, kua akakoro aia iaia uaorai kia akatupu i tana i taputou. Ma te mataora, tei iaia te anoano e te mana kia rave akapera. Akapeea aia me akatupu i teia?

Te vaira te pau anga ki roto i te Patireia ta Iesu Karaiti i apii i tana au pipi kia pure: “E to matou Metua i te ao ra, . . . Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:9, 10) Ae, ko te Patireia o te Atua te ravenga ta Iehova ka taangaanga no te “akapueurikiriki e e akapou i taua au basileia katoa ra [te vai ra i teianei], e ka vai rai te reira e tuatau ua atu.”​—Daniela 2:44.

I raro ake i te tutara anga a te Patireia i te rangi ra, ka mama mai tetai taiate tangata ou. I teia ra, kua tata te apotetoro ko Ioane i roto i te puka openga o te Pipiria, o Apokalupo: “E kite atura au i te rangi ou e te enua ou, kua kore oki tei muatangana rangi e tei muatangana enua.” (Apokalupo 21:1) Ngaro ke atura te au tutu viivii o te tu aiteite kore​—te putaua, te maki, te akateitei, te iriiri tangata, e tetai au mamae anga tangata.a

Maata atu i te anere mataiti, kua arataki ana te Au Kite o Iehova i te au tangata ki taua Patireia. (Mataio 24:14) Na roto i te kapi neneiia e te tauturu anga, kua aruaru ratou ia ratou uaorai i te tauturu anga i te tangata kia rauka te kite no runga i ta te Atua akakoroanga tei tataia i roto i te Pipiria. Inara, kare anake ta ratou angaanga i te ao katoa i oronga, ki te tangata i te manakonakoanga kia ora ma te aiteite e te mataora a te tuatau ki mua pera katoa kua apai mai i te au meitaki i teianei no te akakoromakianga i te kino o te tu aiteite kore. Ka akara ana tatou e akapeea.

[Tataanga Rikiriki i Raro]

[Tataanga i te kapi 5]

Kua akakoro te Atua e kia rauka i te au tangata ravarai te au tuatau aiteite o te oraanga e te mataora