Taomianga Aiteite​—Ka Riro Ainei ei Puapinga kia Koe?

Pouroa tatou kua anauia mai ma te inangaro tumu anga kia arikiia mai e tei aiteite kia tatou ra. Kare e tangata anoano kia reka koreia, kia kopaeia aia. No reira, i te au tu tuke tuke, te mana ra tei aiteite mai ki runga ia tatou.

TE AKATAKAIA ra tei aiteite mai e ko “tetai tei aite ra te turanga ma tetai atu; . . . tetai no taua pupu taiate rai, e maata oki me akatumuia ki runga i te mataiti ra, te tu, me kare te turanga.” I tetai pae, te taomianga aiteite ra ko te mana tei oparaia maira ki runga ia tatou no te aronga tei aiteite ra kia tatou, kia aru atu tatou i to ratou tu manakoanga me kare tu raveanga ma te kite me kare ma te kite kore. Te mea matauia te kitea ra te taomianga aiteite na roto i tetai marama puapinga koreia. Inara, mei ta tatou ka kite, ka rauka ia tatou kia akaariu i te reira ei puapinga no tatou.

Mana ki Rungao i te Au Pupu Katoatoa

Kare te taomianga aiteite ra i kotingaia ki te aronga ou anake; te tupu ra ia ki te au pupu katoatoa. Te kitea ra tona mana me kite tatou ia tatou uaorai te ui ra i te au uianga: “Te rave ra etai atu i te reira, eaa au ka kore ei?” “Eaa au ka tuke ei i te au taime ravarai?” “Eaa ta etai ka manako e ka tuatua?” “Pouroa toku au oa te aere kapiti ra ma te tokorua e ka akaipoipo atu, mari ra kare au. E tarevake ainei toku?”

I te mea te tupu ra te taomianga kia aru atu ki te au pupu katoatoa, te akaraanga e tere atu ia i te tuatau mapu anga. Te tuatua ra The World Book Encyclopedia e “te maataanga o te aronga mapu te riro ra kia oonu atu te o anga ma to ratou pupu aiteite ra​—koia oki, to ratou au oa e ta ratou tei matau ra. Te akara ra teianei aronga mapu ki to ratou pupu aiteite ra, kare ki to ratou au metua, no te mareka anga, e penei ka taui ratou i to ratou tu akono kia raukai taua mareka anga ra.” Te manako ra te aronga mapu, ta te reira i kapiti mai “e te tupu tau ua ra ratou me ka ariki mai tei aiteite ra kia ratou e ka rekareka oki kia ratou.” Ki te openga ra ka riro ratou “kia o atu ki roto i te au tumu ta ratou i manako ka akatupu kia marekaia mai ratou, mei te tu o to ratou kakau ra, te kite arataki anga, e te autu i te aere kapiti anga ma tetai atu.”

Penei ka kite te au tokorua akaipoipoia e ko ta ratou au ikianga eaa te tu kainga kia oko me kare kia tutaki epetoma, eaa te tu motoka kia akaoro, me kia anau tamariki me kare, e te au tumu e manganui te manaia ra na te taomianga aiteite te tu​—eaa te arikiia ra i to ratou ngai, i roto i to ratou au oa me kare pupu eteniki. Etai au pamiri ka aere oonu ua atu ki roto i te kaiou kia aiteite atu ei ma te aronga i te pae mai e to ratou au oa aiteite ra. Ae, ta tatou au akakoro anga, to tatou manakoanga, e ta tatou au iki anga e putuputu te akavareia e te mana kikite no te taomianga aiteite ra. I te manako anga i tona mana, ka rauka ainei ia tatou kia akono i te taomianga aiteite ra na roto i tetai tu e puapingai, kia tauturu ia tatou na roto i te arataki anga ta tatou e anoano ra kia aere? E tika, ka rauka ia tatou!

Taangaanga Meitaki Anga i te Mana Aiteite Tau

Te kite ra te au taote e etai atu aronga karape no te ora anga i te puapinga no te koropinianga i ta ratou aronga maki ma te au tangata manako tau e etai atu au mana no te ora anga meitaki. Ko taua tu reva ra ka riro ei tetai tumu anga kia ora mai. Ei akatauanga, te au tangata tei tipuia ra te rima me kare te vaevae, e e putuputu te tauturuia na te akono akaokianga mai kia ora te kopapa e te manako ngakau na te akatauanga meitaki e te akamaroiroi anga a etai atu tei rokoia ra e taua mamae aiteite ra. Te taka meitaki ra e, na te tauruanga ia koe uaorai ki roto i tetai reva tau meitaki tei kapiti ra i te au tu papu, e te ngaueue kore ko tetai mataara ia no te tamataanga ki roto i te tu tika no te taomianga aiteite meitaki.

Te tika katoa ra teianei kaveinga i roto i te putuputuanga Kerititiano, no te mea ko te mana aiteite ngaueue kore ko tetai tumu ia i akaue ei a Iehova i tona au tangata kia uipa putuputu mai. Te raurau ra te Atua ia tatou ‘kia akono marie tetai ki tetai, ka akamaroiroi atu ei kia maata te aroa, e i te angaanga memeitaki ra.’ (Ebera 10:24, 25) E puapinga maata taua akamaroiroi anga ra no te au taomianga mamae e manganui to te ao o teia tuatau nei. No te tupu anga teianei au taomianga, ka tau te au Kerititiano ‘kia uapou ia ratou uaorai’ kia vai maroiroi i te pae vaerua. (Luka 13:24) No reira, ka umuumu tatou e ka ariki oki i te turu anga aroa mei ko mai i te au oa akarongo ra. Kapiti katoa, penei ka tau tetai papaki kia akakoromaki ‘i etai tara i roto i te kopapa,’ penei e maki me kare e apikepike. (2 Korinetia 12:7) Penei ko etai te tauta pakari ra kia akaruke i etai ravenga kikino me kare maromaroa, me kare penei te kite ra ratou i te tu ngata kia akono i te au mea umuumuia no te oraanga. No reira, e pakari tatou kia koropini ia tatou uaorai ma te au tangata tei piri vaitata ra kia Iehova ki te Atua e tei rekareka ra i te tavinianga iaia. Na taua aronga aiteite maira e akapanu ia tatou ki runga e ka tauturu ia tatou ‘kia akakoromaki tiratiratu tae roa ki te openga.’​—Mataio 24:13.

Na te ikianga i te aronga aiteite tika, i reira, ka rauka ia tatou te akatere i te mana ta ratou ka tuku mai ki runga ia tatou. Kapiti katoa, te kaikai vaerua meitaki e te aratakianga tau te orongaia maira i te au uipaanga Kerititiano ka akaketaketa mai i te akamaroiroi anga te ka rauka mai ia tatou mei te aronga aiteite kia tatou ra.

Inara, kare te aereanga ki te au uipaanga Kerititiano i te mea ngoie ua. Penei e meangiti ua te turu anga te rauka ra i tetai papaki e penei kare ua mei ko mai i to ratou tokorua akaipoipo ra, penei e au tamariki ta etai no te akapapa, e penei ko te apinga ei apai atu tetai manamanata no etai ra. Inara e tamanako: Me ka kore koe i tuku i teianei au arairai anga kia tapu ia koe, i reira penei ka akauru taau akatauanga ia etai atu tei o atura ma taua au turanga aiteite ra. I tetai tu, te oronga ra koe e etai atu mei ia koe rai kare i te akatauanga meitaki anake mari ra i tetai tu tau no te mana aronga aiteite​—e ko te reira kare no tetai tu maro anga.

Ko te tika, ko te apotetoro ko Paulo, koia ra tetai tei akakoromaki ma te au tu ngata e manganui e te au arairai anga, kua akamaroiroi mai i te au Kerititiano kia aru i tana akatauanga meitaki e ta etai atu Kerititiano pakari katoa oki. Kua tuatua aia: “E aku au taeake, ei aru kotou katoa iaku nei, e akara meitaki i te aronga e na reira katoa, ko matou oki to kotou akaraanga.” (Philipi 3:17; 4:9) Kua akara atu te au Kerititiano mua i Tesalonia ra i to Paulo akaraanga meitaki. Kua tata a Paulo no ratou ra: “E i riro mai nei oki kotou ei aru ia matou, e i te Atu oki, kua āriki oki kotou i te tuatua ma te mate maata, ma te rekareka a te Vaerua Tapu. E kua riro oki kotou ei akaraanga na te aronga katoa i akarongo i Makedonia na e i Akaia nei.” (1 Tesalonia 1:6, 7) Na to tatou tu akono papu e te akaraanga ka rauka kia aiteite te tupu anga ki runga i te aronga ta tatou e taokotai atura.

E Kopae Atu i te Au Mana Puapinga Kore

Me te anoano ra tatou kia kopae ke i te taomianga aiteite tau kore ra, ka tika tatou kia arai atu i te mana o ‘te aronga oki i tau i ta te kopapa nei.’ (Roma 8:4, 5; 1 Ioane 2:15-17) Me kare ra, ka arataki ke atu te taomianga aiteite tamamae ra ia tatou mei ia Iehova e tana akoanga pakari. Te tuatua ra Maseli 13:20: “Ko tei kapiti katoa i tona aerenga ki to te aronga pakari ra, ka pakari katoa ïa: ko tei kapiti ra ki te aronga neneva ra, e mate ïa.” Ka rauka ainei ia koe kia tamanako i tetai tei mate ra no te taomianga tau kore aiteite ra? Ei akatauanga, ko tetai papaki Kerititiano, kia takiia atu ki te noinoi apinga, te ainga tau kore, me kare te kai anga tau kore i te apinga akakona ra no te mana o to ratou au oa aiteite ra.

Noatu rai i roto i te putuputuanga Kerititiano ra, ka rauka kia riro tatou ki raro ake i te mana taomianga aiteite tau kore ra me ka iki tatou i te aronga takitai tei paruparu ra i te pae vaerua ei oa taokotai anga. (1 Korinetia 15:33; 2 Tesalonia 3:14) E putuputu taua aronga ra i te kore e inangaro kia uriuri te au tumu pae vaerua ra; penei ka akaapa ua ratou i te aronga tei rekareka ra i taua au tu uriuri anga ra. Me ka iki tatou i teia aronga ei oa piri vaitata no tatou, penei ka opara te taomianga aiteite ia tatou ki roto i tetai tu aiteite, e kare e roaia penei ka kite tatou i to tatou manakoanga e te tu akono te akaata ra i to ratou. Penei ka akamata tatou i te manako puapinga kore ua i te aronga te tika ra to ratou akarongo e tei tauta ra kia tere ki mua i te pae vaerua.​—​1 Timoteo 4:15.

Mei teaa ra te pakari atu kia tatanu i te au pirianga oa ma te aronga te tauta ra kia akamareka ia Iehova, tei rekareka ra i te au tumu pae vaerua! Ka tauturu taua au taokotai anga ra ia tatou kia akaata mai i “te pakari no runga maira.” “E mea iro koreia ïa, e mea au ïa, e te maru, e te akarongo ngoie, kua ki ïa i te aroa, e te takinga-meitaki, . . . kare oki e pikikaa.” (Iakobo 3:17) Kare te aite anga o teianei e kare e rauka i te au tangata manako pae vaerua kia tuatua i etai apinga i te pae atu i te au tumu pae vaerua. Ei tuke anga! E tamanako ua i te au tumu meitaki tuke tuke tei akamanakoia ra i roto i te au puka Punanga Tiaki mei te makatini Awake! ra. Kare e openga no te au tumu tau no te uriuri anga manako, e na te akamanako anga i te au tumu atea te tu, ka akaata tatou i te inangaro no te oraanga e te angaanga manea a Iehova.

Mei tetai tei meitaki ra i te pa poro ka meitaki atu tana pa poro na te pa poroanga ma etai atu tei meitaki ra no te pa poro, ka akateitei ake te taokotai anga tika ia tatou i te pae manako, te manako ngakau, e te pae vaerua oki. I tetai pae, ka rauka i te taokotai anga tarevake kia taki atu ia tatou ki roto i tetai aerenga pikikaa na te akamaroiroianga ia tatou kia taki atu i tetai oraanga takirua te tu. Mei teaa ra te meitaki atu kia rekareka i tetai akava ngakau ma, ma te akateitei anga i toou tu uaorai!

Tetai Papaki Tei Puapingaia

Ka kite te maata anga o te au tangata e kare i ngata roa te apiianga i te au apii anga Pipiria e tona tu akono tau e te au umuumu anga pae vaerua. Inara, ko te apinga ngata, ko te taangaanga i teianei au apinga. Mei ta te au akatauanga te aru mai nei ka akaari mai, ka rauka i te mana tau aiteite kia tauturu ia tatou kia tavini atu ia Iehova ma te ngakau katoa ra.

Kua tuatua tetai Kite e orometua ra raua ko tana vaine i te au tuatau katoa, e ko te au akatauanga a te aronga tei aiteite atura kiaia kua riro ei akatupu anga i tana akakoro anga i te oraanga. Iaia e tupu akera, kua akakoromaki aia i te au mana tau kore ra. Inara kua iki aia ei au oa nona te aronga tei akamaroiroi ra iaia kia rave putuputu i te angaanga orometua e i te aereanga ki te au uipaanga Kerititiano. Na te pirianga mou ma teianei au oa i tauturu iaia ki runga i te arataa ki te pakari pae vaerua

Kua tata tetai atu Kite: “I muri ake i to maua akaipoipo anga ko taku vaine, kua aere atu maua ki tetai putuputuanga i reira ra e nga tokorua aiteite ki to maua mataiti e painia tamou raua. Na ta raua akatauanga i tauturu ia maua kia akamata i te angaanga orometua tamou. I reira kua rave katoa maua i te patuanga i te vaerua no te painia ki roto i te putuputuanga. Ei tetai tupu anga, e manganui tei kapiti mai kia maua ei au painia.”

Na te taokotai anga ma te aronga e au akakoro anga teokaratiki to ratou ka akariro i te akarongo ia Iehova kia ngoie mai. Ko teianei tetai atu tupu anga puapinga no te mana tau no tei aiteite ra. Ko tetai Kite tei akamata i te angaanga orometua tamou i te au tuatau katoa ei tangata ou e i muri akera ei tutaka akaaere, i teianei te tavini ra i tetai o te au opati manga o te Taiate Punanga Tiaki. Kua tata aia: “Ko etai au manakoanga mua e te marekaia noku ko to te au tavini angaanga tamou i te au tuatau katoa ra tei aere mai ki to matou kainga. Te vai tamou ra tetai ngai no tetai atu nooanga i ta matou kaingakai. Kua oronga mai tetai akaaere kotinga i tetai kiri tutuanga naku, iaku e tai ngauru mataiti ra. E apinganui naku taua kiri ra tae mai ki teianei tuatau.”

I te akaataanga ki runga i tona au mataiti mapu anga, kua tuatua mai teianei Kite: “E manganui te aronga ou i roto i te putuputuanga tei anoano kia o atu ki roto i te au angaanga a te putuputuanga, e kua akamaroiroi mai ta ratou akatauanga i etai ke o matou ra kia aiteite te anoano anga.” Kua tauturu atu te aronga aiteite tau i teianei mapu, mei tetai uri rai, kua tupu atu ei tangata Kerititiano meitaki mei te rakau rai. Te au metua, te pati atura ainei kotou ki to kotou kainga ra i te aronga te ka rauka kia oronga i te mana papu e te akamatutuanga ki ta kotou tamariki?​—Malaki 3:16.

Inara, kare e rauka ia tatou katoatoa kia rave i te angaanga orometua tamou i te au tuatau katoa mei te aronga tei taikuia akenei. Mari ra ka rauka ia tatou katoatoa te apii kia anoano atu ia Iehova ‘ma to tatou ngakau katoa, e ma to tatou vaerua katoa, e ma to tatou manako katoa.’ (Mataio 22:37) Na ta tatou iki anga i te aronga aiteite maira e rave i tetai tuanga maata i ta tatou akatupuanga i taua anoano ra e, pera katoa oki, i to tatou au manakonako no te oraanga mutu kore.

Kua oronga maira te tata taramo i tetai papaanga mama e te tau no te puapinga mou i te oraanga: “E ao to te tangata, kare e aaere i te ako a te akono kore i te Atua, kare e tu i te arataa o te aronga rave ara ra, kare oki e noo i te nooanga o te aronga taitoito ra. Ko tei inangaro ra i te ture a Iehova; e tei tana ture tona manako anga i te po e te ao. E tau aia ki te rakau i tanumia ki te pae kauvai ra, ko tei ua i tona ra tuatau tikai, e ko tei kore roa e mae tona rau; ko tana katoa e rave ra, te meitaki ra ïa.”​—Salamo 1:1-3.

Mei teaa ra tetai akapapu anga meitaki roa! Noatu rai e apa ua tatou nei e te rave tarevake ra, ka riro to tatou oraanga kia meitaki me ka tuku tatou na Iehova ra e arataki ia tatou e me ka aere ua atu tatou ki te vairanga ta te Atua i oronga maira no te aronga mana aiteite tau ra​—koia “to [tatou] au taeake katoa i te ao nei.”​—1 Petero 5:9.

[Tutu i te kapi 24]

Te oronga maira te putuputuanga i tetai aronga mana aiteite tau

[Tutu i te kapi 25]

Te au metua, e akamaroiroi atu i ta kotou tamariki kia kapiti atu ma te aronga aiteite akamatutu maira