E Rekareka i “te Ora Mutu Kore”

KUA oronga te Atua ko Iehova ki te tangata i te manako mutu kore. (Koheleta 3:11) Na teia i akariro i te tangata kia puapinga kore me tae mai ki te matenga inara, i taua taime rai, te akakeu ra i roto ia ratou i te anoano tapupu kore kia ora ua atu.

Te oronga maira te Puka Tapu, ta te Atua Tuatua akauruia, i te manakonakoanga maata kia tatou. (2 Timoteo 3:16) Kare a Iehova, koia te tumu o te aroa, i anga i te tangata ma te manako kia marama i te manako mutu kore e oti ka akautunga iaia kia noo ua no etai nga mea mataiti. Te anga anga mai ia tatou kia mamae ua no to tatou turanga te tuke ra ia mei to te Atua tu. Kare tatou i angaia mai mei te “au puaka manako kore, i angaia no te āru, e no te mate.”​—2 Petero 2:12.

I te anga mai anga ia Adamu raua ko Eva ma te tu i roto o te mutu kore, kua maani te Atua ko Iehova i tetai apinga “meitaki roa”; kua maani aia ia raua ma te tu kia ora e tuatau ua atu. (Genese 1:31) Inara ma te maromaroa, kua taangaanga puapinga kore te nga tangata mua i to raua tu rangatira, te meameaau anga i te arai anga akatakaia mei Tei Anga te ngereanga i to raua tu apa kore. Tei tupu, kua mate raua, kua oronga mai i te tu apa ua e te matenga ki ta raua uanga.​—Genese 2:17; 3:1-24; Roma 5:12.

Kare te Pipiria i akaruke mai i te tu muna no te akakoroanga o te oraanga e eaa te aiteanga o te mate. Te tuatua ra te reira i te matenga “kare oki e angaanga, kare e kimianga, kare oki e kite, kare oki e pakari” e ko te mate ‘kare ra e tuatua i kitea.’ (Koheleta 9:5, 10) Tera te aite anga, kua mate tei mate. Kare e no roto mai te apiianga o te mate kore o te meta i te Pipiria, no reira kare e apinga muna oonu kia akatikatikaia no runga i te turanga o te mate.​—Genese 3:19; Salamo 146:4; Koheleta 3:19, 20; Ezekiela 18:4.a

E akakoroanga ta te Atua; kare aia i anga i te enua “ei mea puapinga kore.” Kua anga aia i te reira “kia tangataia” e te au tangata apa kore i roto i te au turanga parataito, e kare te Atua i taui i tana akakoroanga. (Isaia 45:18; Malaki 3:6) E kite ei i te reira, kua tuku mai aia i tana Tamaiti ki te enua nei. Na te vai tiratiratu anga e tae ua atu ki te mate, kua oronga a Iesu Karaiti i te au ravenga kia oko mai i te tangata mei te ara e te mate. Ko te tika, kua tuatua a Iesu: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”​—Ioane 3:16.

Mei ito roa mai, kua taputou te Atua e ka anga aia “i te rangi ou e te enua ou.” (Isaia 65:17; 2 Petero 3:13) Ka o mai ki roto i te reira tana ikianga i tetai pupu meangiti o te au Kerititiano tiratiratu kia ora i te rangi ra. Ma Iesu Karaiti, ka akatupu ratou i te tumu anga o te kavamani. Kua taiku te Pipiria ki teia e ko te “basileia o te ao,” me kare te “basileia o te Atua,” te ka oronga mai i te ‘au mea katoatoa o te ao katoa nei.’ (Mataio 4:17; 12:28; Ephesia 1:10; Apokalupo 5:9, 10; 14:1, 3) I muri ake i te akapou anga i te au tu atua kore i to tatou koropu e te tamaanga i te reira, ka apai mai te Atua i tetai taiate tangata ou tuatua tika, me kare te “enua ou.” Ka kapiti mai teia i te au tangata ta te Atua i paruru na roto i te akapou anga o teia akatereanga kino o te au mea. (Mataio 24:3, 7-14, 21; Apokalupo 7:9, 13, 14) Ka piri atu kia ratou te aronga ka akaoki akaouia mai ki te ora na roto i te taputou o te tuakaouanga.​—Ioane 5:28, 29; Angaanga 24:15.

“Te Ora Mutu Kore” i Reira

I te akapapu anga no runga i te akatutu anga rekareka o te oraanga ki runga i te enua Parataito a te tuatau ki mua, te na ko maira te Atua: “I na, te akariro nei au i te au mea ravarai ei mea ou.” (Apokalupo 21:5) E mea ngata no te manako o te tangata i te opu tikai i te au angaanga umere ta te Atua ka rave no te tangata ravarai. Ka anga te Atua i te parataito i te ao katoa, te tutu mei to Edene rai. (Luka 23:43) Mei ia Edene rai, ka maata te manea te tu reka tikai o te kara, te tangi anga, e te tamata anga. Ka kore te putaua e te rava kore o te kai, no taua tuatau ra te na ko maira te Pipiria: “Kua kore te au mea taito.” (Apokalupo 21:4; Salamo 72:16) Kare roa tetai e tuatua e, “kua maki au,” i te mea ka takoreia te maki e tuatau ua atu. (Isaia 33:24) Ae, pouroa te au tumu o te mamae ka ngaro ke, kapiti mai te enemi roa o te tangata, ko te mate. (1 Korinetia 15:26) I roto i tetai orama umere o te “enua ou,” te taiate tangata ou i raro ake i te tutara anga a Karaiti, kua rongo te apotetoro ko Ioane i tetai reo i te na ko anga mai: “E [na te Atua] e orei i te roi-mata katoatoa; e kore rava te mate, e te aue, e te mii; e te mamae oki, e kore katoa ïa.” Eaa atu te ka apai mai i te pumaana maata e te rekareka mari ra te akatupu anga o teia taputou tu-Atua?

I te akataka anga i te oraanga a te tuatau ki mua, kua tuatua maata te Pipiria i te au turanga te ka akamerengo i to te tangata anoano tu akono e i te pae vaerua. Pouroa te au manako tika ta te tangata ravarai i putoto puapinga kore e tae mai ki teianei ka rauka ia. (Mataio 6:10) I roto i teia koia oki ko te anoano no te tika, te vai nei kare i akatupuia no te mea kua takinoia te tangata i te maata anga o te taime e te aronga kino tei tutara i tei paruparu. (Koheleta 8:9) Kua tata totou tikai te tata taramo i te au turanga i raro ake i ta Karaiti tutara anga: “I tona au ra ka ruperupe te tu tika, e ka maata te au.”​—Salamo 72:7, The New Jerusalem Bible.

Ko te tu aiteite tetai anoano tei akaatinga te manganui ia ratou. I roto i te “anga akaou anga,” ka takore te Atua i te iriiri anga. (Mataio 19:28) Ka rekareka te katoatoa i te tu ngateitei aiteite. Kare teia tu aiteite e ka tukunaia mai e tetai tutara anga kavamani kino. Ei tuke anga, ka takoreia te au tumu o te iriiri, kapiti mai te tu noinoi e te ngakau parau te taki ra i te tangata kia kimi i te tutara anga ki rungao i tetai atu me kare kia akamaata i te au apinga meitaki. Kua totou a Isaia: “E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira. Kare ratou e patu, e na tetai ke e noo; kare ratou e tanu, e na tetai ke e kai.”​—Isaia 65:21, 22.

Mei teaa ra to te tangata mamae no te maringi anga toto ia ratou uaorai e ei pupu tamaki anga! Kua tupu ua atu teia mei te tamate anga o Abela e tae roa mai ki te au tamaki o teia tuatau. Mei teaa ra te roa i te manakonako anga te tangata e te tatari anga, ma te akara puapinga kore, i te au kia akanooia! I roto i te Parataito akaokiia mai, ka au e ka maru te tangata ravarai; ka “rekareka ratou i te maata o te au ra.”​—Salamo 37:11.

Te na ko ra a Isaia 11:9 e: “Ka ki te enua i te kite ia Iehova, mei te vairanga tai e ki i te tai ra.” No te tu apa ua, i tetai au apinga, kare e rauka ia tatou i teia tuatau kia marama tikai i te maata o taua au tuatua. Mei teaa te apa kore i te kite o te Atua i te taokotai anga ia tatou ma ia e ka akatupu te reira i te rekareka, ka tau kia apii tatou. Inara i te mea te akakite maira te au Tuatua Tapu kia tatou e ko Iehova te Atua meitaki i roto i te mana, pakari, tika, e te aroa, ka papu ia tatou e ka rongo mai aia i te au pure tuatuaia e te aronga o te “enua ou.”

Papu “te Ora Mutu Kore”​—E Opu i te Reira!

No te manganui, e moemoea me kare e akaraanga tarevake te oraanga mutu kore ki roto i tetai ao meitaki. Inara, no te aronga e akarongo tikai to ratou i roto i te taputou a te Pipiria, e papu tikai teia manakonakoanga. Mei te tutau rai no to ratou au oraanga. (Ebera 6:19) Mei tetai tutau ka mou i tetai pai e ka tapu i te reira mei te papanu aere ua anga, te akariro ra te manakonakoanga o te ora mutu kore i te tangata kia tamou e kia papu e ka tauturu ia ratou kia aro atu i te au tu ngata i te oraanga e kia autu i te reira.

Ka papu ia tatou e ka akatupu te Atua i tana au taputou. Kua akakite mai aia i tetai akapapu anga na te tuatua anga i tetai taputou, e koreromotu kare e rauka i te tauiia. Kua tata te apotetoro ko Paulo e: “Te Atua, inangaro akera aia i te akakite pu mai i te aronga tuanga i tei tuatuaia maira, i te tu ke kore o tana akakoroanga, akatinamou atura i te taputou. Kia maata to tatou rekareka i aua nga tuatua tu ke kore e rua ra, ko tei kore e tika i te Atua kia pikikaa ra, ko tatou, . . . i te irinakianga i tukuia mai ki mua ia tatou.” (Ebera 6:17, 18) Te “nga tuatua tu ke kore e rua ra” kare te Atua e akakore koia oki ko tana taputou e tana tuatua papau, ki runga i te reira kua akatumu tatou i te au tapapa anga.

Te oronga maira te akarongo ki roto i ta te Atua au taputou i te pumaana maata e te akamaroiroi anga i te pae vaerua. Mei tera rai te akarongo o Iosua, te arataki o te iti tangata o Iseraela. I te oronga anga a Iosua i tana tuatua openga ki to Iseraela, kua pakari aia e kua kite e te vaitata nei aia i te mate. Inara, kua akaari aia i te maroiroi e te tiratiratu aati kore, tei mama mai mei te irinaki anga pu i roto i ta te Atua au taputou. I muri ake i te tuatua anga e te aere nei aia i te “arataa o to te ao katoa nei,” te arataa te ka taki i te tangata ravarai ki te mate, kua akakite a Iosua: “Kua kite oki kotou ravarai i roto i to kotou ngakau, e i roto i to kotou katoa au vaerua, e kare rava tetai o te au mea meitaki ta to kotou Atua ta Iehova i tuatua mai ia kotou i poka; kua ope rava i te tupu ia kotou, kare rava tetai o te reira i toe.” Ae, e toru taime kua ripiti ua a Iosua e akono pouroa ua ana te Atua i tana au taputou.​—Iosua 23:14.

Ka rauka katoa ia koe taua akarongo i ta te Atua taputou o tetai ao ou kare e roa atu ka akanooia. Na te apii ngakau tae anga i te Pipiria, ka marama koe e koai a Iehova e eaa i tau ei aia i toou irinaki anga. (Apokalupo 4:11) E akarongo ngaa kore to Aberahama, to Sara, to Isaaka, to Iakoba, e tetai atu aronga tiratiratu taito, tei akatumuia ki runga i to ratou kite meitaki i te Atua mou, ko Iehova. Kua vai ketaketa to ratou manakonakoanga, noatu e “kare rai i rauka te tuatuaia maira” ia ratou e ora ra. Noatu rai, “kua akara ra i taua au mea ra i te atea ke, e kua akarongo tikai, e kua āriki marie.”​—Ebera 11:13.

Te marama anga i te au totou Pipiria, te kite nei tatou e te vaitata maira “taua ra maata o te Atua mana katoatoa ra,” a te reira taime ka tamaia te enua mei te kino. (Apokalupo 16:14, 16) Mei te au tangata taito ra, kia vai papu tatou i te tapapa anga i te au tupu anga a te tuatau ki mua, akakeuia e te akarongo e pera katoa te aroa no te Atua e no “te ora mutu kore.” Te oronga ra te vaitata anga o te ao ou i tetai akakeu anga pakari no te aronga tei akono i te akarongo ki roto ia Iehova e tei inangaro iaia. Ka tau taua akarongo e te aroa kia tatanuia e raukai ta te Atua tu mareka anga e te paruru anga i tona ra maata, te vaitata mai nei.​—Zephania 2:3; 2 Tesalonia 1:3; Ebera 10:37-39.

No reira, te inangaro ra ainei koe i te oraanga? E te anoano maata ra ainei koe i “te ora mutu kore”​—te oraanga ei tavini arikiia e te Atua, ma te manakonakoanga o tetai tuatau mataora ki mua, ae, ma te ora mutu kore? Me koia taau e kimi ra, e akono i te raurau anga a te apotetoro ko Paulo, tei tata e “eiaa oki e irinaki i te apinga maata mou kore, ei te Atua ora ra.” Kua tuatua a Paulo: “Kia apingaia ra i te angaanga meitaki ra,” te akangateitei ra i te Atua, e raukai “te ora mutu kore.”​—1 Timoteo 6:17-19.

Na te ariki anga i tetai oronga anga apii Pipiria ma te Au Kite o Iehova, ka rauka ia koe te kite “e ora mutu kore.” (Ioane 17:3) Ma te aroa, kua rekoti te Pipiria i teia pati anga metua ki te katoatoa: “E taku tamaiti, auraka e akangaropoina i taku nei ture; e kia akono marie toou ngakau i taku nei au akauenga: E au rā roa oki, e te au mataiti ora, e te au, ta te reira e kapiti katoa mai kia koe ra.”​—Maseli 3:1, 2.

[Tataanga Rikiriki i Raro]