Au Puapinga no te Inangaroanga i te Tuatua a te Atua
“Kia inangaro marie [i te pakari], e nana koe e tiaki. . . . E takave koe iaia, e nana e akangateitei atu ia koe.”—MASELI 4:6, 8.
1. Eaa te o atura ki te inangaro tikai i te Tuatua a te Atua ra?
E PUAPINGA te tatauanga Pipiria no te Kerititiano. Inara, kare te tatau ua anga i te reira e akakite i te inangaro no te Tuatua a te Atua. Ka peea me ka tatau tetai i te Pipiria e i muri akera ka rave i te au apinga ta te Pipiria e akaapa ra? E mea papu, kare aia e inangaro ana i te Tuatua a te Atua i te tu ta tei tata ra ia Salamo 119 i inangaro i te reira. Kua taki atu te inangaro anga i te Tuatua a te Atua ra iaia kia noo rotai ma tona au umuumu anga.—Salamo 119:97, 101, 105.
2. Eaa te au puapinga te aere maira no te pakari tei akatumuia ki runga i te Tuatua a te Atua ra?
2 I te akonoanga kia rotai ma te Tuatua a te Atua ra ka umuumuia te akatikatika anga tamou marie o te manakoanga o tetai e tona tu oraanga oki. Te akaata maira taua tu ra i te pakari tau i te Atua, te aite anga kia akatupu i te akono anga tau no te kite e te marama tei rauka maira na te apiianga i te Pipiria. “Kia inangaro marie [i te pakari], e nana koe e tiaki. E akateitei koe iaia, e nana e akateitei ia koe; e takave koe iaia, e nana e akangateitei atu ia koe. Nana e oronga mai i te pare manea no to upoko ra: e korona kakā tana e tuku mai ki runga ia koe ra.” (Maseli 4:6, 8, 9) Mei teaa ra tetai akamaroiroi anga kia akatupu i te inangaro no te Tuatua a te Atua ra e kia aratakiia e te reira! Koai kare e anoano kia tiakiia, kia akateiteiia, e kia akakakaia?
Tiakiia Mai i te Akakino Mutu Kore
3. E maata atu i to mua ana, eaa i umuumuiai te au Kerititiano kia tiakiia, e mei iaai ra?
3 Na roto i teea tu te tiaki anga mai i tetai na te pakari tei rauka maira i te apiianga e te akonoanga i te Tuatua a te Atua ra? No tetai apinga, te tiakiia ra aia mei ia Satani te Tiaporo. Kua apii a Iesu i tana au pipi kia pure no te akaora anga mai i tei rave kino ra, koia Satani. (Mataio 6:13) I teia tuatau nei, ko te umuumu anga kia kapiti atu i teianei patianga i ta tatou au pure te rapurapu tikaia ra. Kua uriia mai a Satani ma tana au temoni mei te rangi maira i muri ake i te 1914, e no reira “e riri maata [to Satani], no te mea kua kite aia e e manga tuatau poto ua tona e toe nei.” (Apokalupo 12:9, 10, 12) I teia tuatau kua roa nei, kua tika e te vera teatea ra tona riri iaia e tamaki autu kore ra “i tei akono i te au akauenga a te Atua ra, i tei mou marie i te tuatua-akakite a Iesu Mesia ra.”—Apokalupo 12:17.
4. Akapeea te au Kerititiano i te paruru angaia mei te au taomianga e te au ereere a Satani ra?
4 Kua rave ua atu a Satani i te akatupu anga taitaia no teianei au orometua Kerititiano e kia akatupu i te takinga kino ta ua me kare i etai atu au arairai anga i ta ratou angaanga. Te anoano katoa ra aia kia akavare i te aronga akakitekite Patireia kia akara i te au apinga mei te turanga teitei i te ao nei, te noo akaangaroi ua, te akaputuanga apinga, e te kimikimi akanavenave anga, kare ra i te rave angaanga tutuanga i te Patireia ra. Eaa te tiaki ra i te au tavini tiratiratu o te Atua i te tuku ua anga ki te taomianga a Satani me kare te ereereanga e tana au ereere ra? E tika, ko te pure, e tetai pirianga vaitata ma Iehova, e te akarongo i te papu tikai o tana au taputou ra e puapinga maata ia. Inara te kapiti katoaia ra te reira au tu ma te kite e te tamanako anga kia akono i te au akamaaraara anga no te Tuatua a te Atua. Te aere maira teianei au akamaaraara anga na te tatauanga i te Pipiria e te au tauturu apii Pipiria, te aereanga ki te au uipaanga Kerititiano, te akarongo anga i te ako Tuatua Tapu mei ko mai i tetai oa akarongo ra, me kare na te manako pure anga ki runga i te au kaveinga Pipiria ta te vaerua o te Atua e akamaara maira ki te manako.—Isaia 30:21; Ioane 14:26; 1 Ioane 2:15-17.
5. Na roto i teea au tu ta te pakari tei akatumuia ki runga i te Tuatua a te Atua ra paruru anga ia tatou?
5 Te aronga te inangaro ra i te Tuatua a te Atua te tiakiia ra i etai atu au tu. Ei akatauanga, te kopae ke ra ratou i te au manako taitaia e te au maki kopapa tei tupu maira i te au apinga me ka kai tau kore i te apinga akakona, te kai avaava, e te ainga tau kore oki. (1 Korinetia 5:11; 2 Korinetia 7:1) Kare ratou e turu i te au pirianga akakino na te urutoe me kare tuatua aroa kore. (Ephesia 4:31) Kare katoa ratou e topa ki te ekokoanga na te kapitianga ki roto i te au apiianga akavare no te pakari o teianei ao. (1 Korinetia 3:19) Na te inangaro i te Tuatua a te Atua, kua tiakiia ratou i te au apinga te ka akangere ia ratou i to ratou pirianga ma te Atua e te manakonako no te ora mutu kore. Te rave maata ra ratou i te tauturu i to ratou tangata tupu kia akarongo i te au taputou meitaki o te Pipiria ra, na te kiteanga e ka pera ‘e oraʼi ratou, e te aronga katoa e akarongo mai ia ratou ra.’—1 Timoteo 4:16.
6. Akapeea e raukai i te pakari tei akatumuia ra ki runga i te Tuatua a te Atua kia paruru ia tatou noatu i raro ake i te au turanga ngata ra?
6 E tika, te aronga ravarai—noatu ko tei inangaro i te Tuatua a te Atua—te tupu ra “te au tuatau e te tupu anga kite koreia” kia ratou. (Koheleta 9:11, NW) Te papu ra e ko tetai papaki i roto ia tatou ka kite i etai tumatetenga natura, au maki kikino, au maki tumatetenga, me kare mate roko uaia. Inara, te tiakiia ra tatou. Kare e tumatetenga te ka apai mai i te kino mutu kore ki tetai tangata te inangaro tika ra i te Tuatua a te Atua. No reira, kare tatou e tau kia manako taitaia ua no te apinga penei ka tupu i te tuatau ki mua. I muri ake i ta tatou rave anga i te au matakiteanga tau katoa, e meitaki atu kia akaruke i te au apinga ki roto i nga rima o Iehova e auraka kia tuku i te au tu tinamou kore o te oraanga i teia tuatau kia akangere ia tatou i te au. (Mataio 6:33, 34; Philipi 4:6, 7) E tamou ki te manako i te tika o te manakonako no te tuakaouanga e no tetai oraanga meitaki atu me ka “akariro nei [te Atua] i te au mea ravarai ei mea ou.”—Apokalupo 21:5; Ioane 11:25.
Akapapu ia Koe Uaorai ei “One Meitaki”
7. Eaa te akatutu anga ta Iesu i tuatua ki te au urupu tei aere maira kia akarongo atu kiaia ra?
7 Kua akakite maataia te puapinga o te manako tika no te Tuatua a te Atua ki roto i tetai o ta Iesu au parapore. I ta Iesu akakite anga i te tuatua meitaki i Paretaina katoa ra, kua akaputu atu te au urupu kia akarongo iaia ra. (Luka 8:1, 4) Inara, kare ko te katoatoa, tei inangaro tikai i te tuatua a te Atua ra. Kare e ekoko anga, e e manganui tei aere mai kia akarongo iaia no te mea kua anoano ratou kia kite i te au temeio me kare no to ratou rekareka i tana tu meitaki o te apiianga. No reira kua tuatua atura Iesu ki te au urupu ra i tetai akatutuanga: “Aere atura te ruru ua, e ruru i tana ua; e tei te ruru anga, topa iora tetai pae i te pae arataa; e takatakaiia iora, e kaingaia iora e te manu o te reva. Topa iora tetai pae ki runga i te ngai paikea; e tei te tupu anga ra, mae atura, no te mea kare i mauu. Topa iora tetai pae ki roto i te ngangaere; tupu katoa atura te ngangaere, pokia atura. Topa iora oki tetai pae ki te ngai one meitaki, tupu akera, e uua atura, taki tai anere i te ua okotai.”—Luka 8:5-8.
8. I ta Iesu akatutu anga, eaa te ua?
8 Kua akaari mai ta Iesu parapore e e tuke tuke tei akarongo ki te tutuanga i te tuatua meitaki, tei runga ia i te tu ngakau o tei akarongo atura. Te ua tei ruruia ra ko “te tuatua a te Atua.” (Luka 8:11) Me kare, mei ta tetai atu tataanga no taua parapore ra i tuatua, ko te ua ko “te tuatua o te basileia nei.” (Mataio 13:19) Kua rauka ia Iesu kia taiku i tetai o aua tuatua ra i te mea ko te tumu o te Tuatua a te Atua ra ko te Patireia ia o te rangi i raro ake ia Iesu Karaiti ei Ariki na te reira e akangateitei i to Iehova ra tutara anga e te akatapu oki i tona ingoa. (Mataio 6:9, 10) Ko te tika, i reira, ko te ua ko te tuatua meitaki ia o te Tuatua a te Atua ra, koia te Pipiria. Te akakite maata ra te Au Kite o Iehova i teianei tuatua Patireia ia ratou e ruru ra i te ua i te aru anga i Tei Ruru mua ra, koia Iesu Karaiti. Eaa te tupu anga ta ratou i kite?
9. Eaa te akatutuia maira e te ua tei topa (a) i te pae arataa ra? (e) ki runga i te ngai paikea? (ng) i te one ngangaere ra?
9 Kua tuatua a Iesu e ko tetai pae ua kua topa i te pae arataa e kua takatakaiia ki raro. Te taiku ra teia i te au tangata tei maata ra te apiapi e kua kore te ua o te Patireia e tupu ki roto i to ratou ngakau. I mua ake ka raukai ia ratou te akatupu inangaro no te Tuatua a te Atua “kua aere maira te diabolo, e kua rave ke atura i te tuatua i roto i to ratou ngakau ra, ko te akarongo aea ratou, e ko te ora aea.” (Luka 8:12) Kua topa tetai pae ua ki runga i te ngai paikea. Te taiku ra teia i te au tangata tei akara atura i te tuatua Pipiria mari ra kare i tuku i te reira kia tupu ki to ratou ngakau. Me tupu mai te patoianga me kare me kite ratou i te raveanga ngata kia akono i te akoanga Pipiria, kua “taka ke atura” ratou no te mea kare o ratou aka. (Luka 8:13) Te vaira i reira te aronga tei akarongo i te tuatua mari ra kua riro ke to ratou manako na te pokia e te au apiapi e te au apinganui “e te au mea navenave o teianei oraanga.” I te openga, mei te au ua tei tupu ra ki roto i te ngangaere, kua “pokia atura.”—Luka 8:14.
10, 11. (a) Koai ma te akatutuia maira e te one meitaki? (e) Eaa ta tatou ka tika kia rave kia “tamou marie” i te Tuatua a te Atua i to tatou au ngakau nei?
10 Ei openga, tera te ua tei topa ki runga i te one meitaki. Te tou ra teianei ki te au tangata tei rauka ra ia ratou te tuatua ma “te ngakau pikikaa kore e te tau.” E mea matauia, ka anoano tatou tataki tai kia irinaki e koia tetai i roto i teianei tu. Inara, i roto i te akataka anga openga, ko ta te Atua ra manako anga te tika. (Maseli 17:3; 1 Korinetia 4:4, 5) Te karanga ra tana Tuatua e ko te raukaanga ia tatou “te ngakau pikikaa kore e te tau” ko tetai apinga ia ta tatou ka akapapu na ta tatou au angaanga mei teianei e tae roa atu ki to tatou matenga me kare tae roa ki ta te Atua apai anga mai i te openga ki teianei akatereanga kino o te au mea nei. Me e papu ta tatou akono anga ki te tuatua Patireia mei te akamata anga maira, e meitaki ia. Inara, ko te aronga ma te ngakau pikikaa kore e te tau ka ariki i te Tuatua a te Atua e “e tika i te uua anga i te ua.”—Luka 8:15.
11 Ko te rave anga tika anake kia tamou marie ei i te Tuatua a te Atua ra ki roto i to tatou ngakau na te tatau anga e te apii anga ko koe anake e pera katoa ma te kapiti anga ma te au oa akarongo ra. Te kapiti ra teia i te rave katoaanga i te kai vaerua tei orongaia mai na roto i te aerenga akatakaia mai kia utuutu i te au manako vaerua no te au pipi mou a Iesu ra. (Mataio 24:45-47) Na taua ravenga ra, ko te aronga te ka akatinamou i te Tuatua a te Atua ki to ratou ngakau te akakeuia ra e te aroa kia “tika i te uua anga i te ua.”
12. Eaa te ua ka tika tatou kia mou ma te akakoromaki anga ra?
12 Eaa te ua te uuaia maira e te one meitaki? I te ao natura nei, te tupu ra te au ua ei au ngangaere te ka uua mai i te ua aiteite te tu, te ka rauka kia akatotoaia kia maata atu te ua. Mei te reira katoa, no te aronga ma te ngakau meitaki ra, te tupu ra te ua o te tuatua ki roto ia ratou, i te akariroanga ia ratou kia tupu ua atu i te pae vaerua tae roa ratou, i ta ratou tuanga, kia ruru i te ua ki roto i te au ngakau o etai ke ra. (Mataio 28:19, 20) E ko ta ratou angaanga ruruanga te akairoia ra na te akakoromaki anga. Kua akakite mai a Iesu i te puapinga o te akakoromaki anga i te ruruanga i tana tuatua anga: “Kareka te tāpu tikai e tae ua atu ki te openga ra, ka ora ïa. E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”—Mataio 24:13, 14.
“Kia Tupu te Au Angaanga Meitaki Katoa”
13. Eaa te pure ta Paulo i pure ra tei kapiti atu i te au ua ma te kite anga i te Tuatua a te Atua ra?
13 Kua tuatua katoa te apotetoro ko Paulo i te umuumu anga kia tupu te ua, e kua kapiti atu aia i te uuaanga ma te Tuatua a te Atua ra. Kua pure aia e “kia akakiia mai kotou [tona au oa akarongo] i te kite i [to te Atua] anoano, i te pakari i te au mea ravarai e te kite i te vaerua; Kia tau to kotou aerenga i te Atu i te au mea katoa e mareka mai ei ra, e kia tupu te au angaanga meitaki katoa ia kotou.”—Kolosa 1:9, 10; Philipi 1:9-11.
14-16. Kia rotai ma ta Paulo ra pure anga, eaa te uua anga te akatupuia maira e te aronga tei inangaro ra i te Tuatua a te Atua?
14 No reira te akakite maira Paulo e ko te raukaanga te kite Pipiria kare ia i te openga o te akakoroanga. Mari ra, na te inangaro no te Tuatua a te Atua ra e akakeu ia tatou ‘kia tau te aerenga i te Atu’ na te tamou marieanga ‘kia tupu te au angaanga meitaki katoa ia tatou.’ Teea angaanga meitaki ia? Ko te tutuanga i te tuatua meitaki o te Patireia te angaanga maata ia na te au Kerititiano i teianei tuatau openga. (Mareko 13:10) Kapiti katoa oki, te aronga te inangaro ra i te Tuatua a te Atua te rave ra i te ka rauka ia ratou kia turu putuputu i teianei angaanga i te pae o te moni. Te mareka ra ratou i teianei tuanga, i te kiteanga e “ko te tangata oronga ma te rekareka ta te Atua e inangaro.” (2 Korinetia 9:7) Te aere ra ta ratou au turu anga ei tutaki i te moni akapouia i te akono anga i te tere atu i te tai anere au kainga Betela no reira maira te arataki anga i te angaanga tutu i te Patireia e i tetai papaki ko te nenei anga i te au Pipiria e te au puka apii Pipiria ra. Te tauturu katoa ra ta ratou au turuanga i te tutakianga i te au uruoaanga Kerititiano mamaata e te tonoanga oki i te au akaaere tutaka aere, te au mitinari, e etai atu aronga tutu evangeria i te au tuatau ravarai.
15 Ko etai atu au angaanga memeitaki te kapiti ra i te patuanga e te akonoanga i te au ngai no te akamorianga mou. Te akakeu ra te inangaro no te Tuatua a te Atua i tona aronga akamori kia akapapu e kare te au Are Akaputuputuanga e te au Are Uipaanga Patireia e topa ki roto i te tu akono koreia. (Akaaite ia Nehemia 10:39.) I te mea te mama maira te ingoa o te Atua i mua i tana au are ra, e mea tika e kia ma a roto e vao e kia manea e kia meitaki te tu akono o te aronga te akamori ra ki roto i reira. (2 Korinetia 6:3) Te rauka ra i tetai papaki Kerititiano i te rave kia maata atu. No te inangaro i te Tuatua a te Atua ra i akakeu ia ratou kia aere ki te au ngai mamao kia kapiti atu i te patuanga i te au ngai ou no te akamori anga i te au tuanga o teianei ao te maata ra te umuumu anga no te putaua oki me kare no te ngere i te aronga karape i te rave angaanga.—2 Korinetia 8:14.
16 “Kia tupu te au angaanga meitaki katoa” ka kapiti i te utuutuanga i te au apainga no te pamiri e te akakiteanga manako no te au oa Kerititiano. Te akakeu ra te inangaro i te Tuatua a te Atua ia tatou kia manako atu ki te au umuumu anga no te tangata “kia maata atura ki to te ngutuare o te akarongo ra” e “kia akono i te mea tau i te Atua ra i [to tatou] uaorai ngutuare tangata.” (Galatia 6:10, NW; 1 Timoteo 5:4, 8) I teianei tu, e angaanga meitaki kia atoro i tei maki ra e kia akapumaana i te aronga te aue ra. E mei teaa ra te angaanga meitaki te raveia ra e te aronga pakari o te putuputuanga e te au Hospital Liaison Committee i te tauturuanga i te aronga te aro atura i te turanga maki akaaoanga! (Angaanga 15:29) Te vaira oki te au tumatetenga e manganui—ko etai o te reira e mea natura ko etai atu kua tupu no te tarevake o te tangata. Ma te tauturu a te vaerua o te Atua ra, kua patu te Au Kite o Iehova i tetai akakite anga meitaki i te au tuanga e manganui o te ao nei no te orongaanga viviki i te tauturu ki to ratou au oa akarongo e ki etai atu aronga oki tei rokoia e te tumatetenga e te au tu kino oki. Pouroa teianei e au ua meitaki tei akatupuia e te aronga tei inangaro ra i te Tuatua a te Atua.
Au Puapinga Kaka i te Tuatau ki Mua
17, 18. (a) Eaa te akatupuia ra na te ruruanga i te ua Patireia ra? (e) Eaa te au tupu anga akangaueue enua ta te aronga inangaro i te Tuatua a te Atua ra kare e roaia ka kite?
17 Te rave ua maira te ruruanga i te ua Patireia i te au puapinga maata ki te tangata nei. I te au mataiti koi topa ua akenei e tere atu i te 300,000 tangata i te mataiti taki tai tei tuku i te tuatua o te Pipiria kia akaia ki roto i to ratou au ngakau tae roa kia akatapu ratou i to ratou au oraanga kia Iehova e kia akatutu i te reira na te papetito anga i te vai. Mei teaa ra te kaka te tuatau ki mua te tatari maira ia ratou!
18 Kare e roaia, te kite ra te aronga inangaro i te Tuatua a te Atua e ka tu mai te Atua ko Iehova ki runga kia akamaata i tona ingoa. Ka akapouia a “Babulonia Maata,” koia te patireia akonoanga pikikaa o te ao nei. (Apokalupo 18:2, 8) Ei reira te aronga te patoi ra i te noo ma te rotai ma ta te Atua Tuatua ka tamateia ratou e te Ariki, ko Iesu Karaiti. (Salamo 2:9-11; Daniela 2:44) I muri akera, ka apai mai te Patireia o te Atua i te akaora anga tinamou mei te rave kino, te tamaki, e etai atu au tumatetenga oki. Kare e umuumu akaouia te akapumaana anga i te au tangata no te mamae, te maki, e te mate oki.—Apokalupo 21:3, 4.
19, 20. Eaa te tuatau kaka ki mua te vai maira no te aronga tei inangaro tikai i te Tuatua a te Atua ra?
19 Mei teaa ra te au angaanga kaka te ka raveia i reira e te aronga tei inangaro ra i te Tuatua a te Atua! Ka akamata mai te aronga ora atu ia Aramakito i te angaanga akariroanga i te enua nei ei parataito. Ka rave ratou i te angaanga marekaanga no te teateamamaoanga i te au mea umuumuia no te aronga mate te akaangaroi ra i roto i te rua e tei roto i to te Atua ra maaraanga ma te manakonakoanga tika no te tuakaouanga mai o te aronga mate ra. (Ioane 5:28, 29) A taua tuatau ra, ka aere mai te arataki anga apa kore ki te au tangata o te enua nei mei ko mai i te Atu Ngateitei ra, ia Iehova, na roto i tana Tamaiti akateiteiia, ko Iesu Karaiti. “Eeuia iora nga buka ra,” i te akakiteanga mai i te au apiianga a Iehova ra no te ora anga i te ao ou.—Apokalupo 20:12.
20 I ta Iehova tuatau tau ra, ka akatuia mai te kopapa katoa o te au Kerititiano tiratiratu tei akatainuia ra ki te tutaki i te rangi ra ei ‘aronga tuanga [ratou] e te Mesia.’ Roma 8:17) I te tuatau o te Tauatini Mataiti Tutara Anga o Karaiti ra, ka akateiteiia te au tangata katoatoa i runga i te enua nei tei inangaro ra i te Tuatua a te Atua kia apa kore ua te manako e te kopapa oki. I muri ake i te akapapuanga i te tu tiratiratu i raro ake i te timataanga openga, ka tutakiia ratou ma te ora mutu kore e ka riro kia rekareka i “te rangatira meitaki o te tamariki a te Atua ra.” (Roma 8:21; Apokalupo 20:1-3, 7-10) Mei teaa ra tetai tuatau meitaki te reira! E tika tikai, me kua oronga mai a Iehova kia tatou i tetai manakonakoanga no te rangi me kare no te enua nei, ka riro na te inangaro akakoromakianga no tana Tuatua e te tamanako anga kia noo kia tau ki te pakari tei tau i te Atua ra ka paruru ia ia tatou. E i te tuatau ki mua ka ‘akangateitei ia tatou; e takave tatou iaia.’—Maseli 4:6, 8.
Ka Rauka Ainei ia Koe te Akataka?
◻ Akapeea te inangaro no te Tuatua a te Atua i te paruru anga ia tatou?
◻ Eaa te ua o ta Iesu akatutu anga ra, e akapeea te ruru anga i te reira?
◻ Akapeea tatou i te akapapu anga ei “one meitaki”?
◻ Eaa te au puapinga ka rauka i te aronga inangaro i te Tuatua a te Atua kia tapapa atu?
[Tutu i te kapi 16]
Te ua o ta Iesu akatutu anga te akatutu maira i te tuatua o te tuatua meitaki i te Tuatua a te Atua ra
[Akameitakianga]
Garo Nalbandian
[Tutu i te kapi 17]
Te aru ra te Au Kite o Iehova i Tei Ruru Maata ra
[Au Tutu i te kapi 18]
Ka rekareka te aronga te ka ora atu ia Aramakito i te au ua o te enua ra