Eaa te ka Rauka i te Raveia no te Tu Taitaia?

AKAPEEA tetai tangata i te tamaki anga i te tu taitaia? Ko teia te uianga tei uiia atu i etai tutaka akaaere, tei atoro putuputu i te au putuputuanga a te Au Kite o Iehova. Ta ratou au pauanga ka tauturu ia tatou kia akara matatio i te au tumu no te tu taitaia e te au rapukau anga no teia turanga te ka akakeu i te au Kerititiano katoatoa.

E maata atu i te akara matatio anga ka anoanoia kia autu i te tu taitaia, inara ka kapiti paa te au akairo i te ngere anga i te pure me kore i taau uaorai apii, te tu paruparu i te aere anga ki te uipaanga, te kore anga i te tu oraora, e tetai tu aroa kore ki te au taeake Kerititiano. Inara, ko te akairo kite maata ia ko te tu paruparu no te angaanga tutu evangeria. E akara matatio tatou i te au akairo e tetai au rapakau anga.

Te Tu Taitaia i Roto i ta Tatou Angaanga Tutu Evangeria

Kua kite tikai a Iesu Karaiti i te au manamanata te kapiti atura ki te apainga kia akariro mai ei au pipi. (Mataio 28:19, 20) Kua tuku atu aia i tana au pipi ei “mamoe i rotopu i te au luko ra,” te kiteanga e ka rokoia mai ta ratou angaanga tutu aere e te takinokino anga. (Mataio 10:16-23) Inara, kare teia i tetai tumu no ratou kia taitaia. Ko te tika, te au tavini tei irinaki ma te pure kia Iehova kua akamaroiroi putuputuia e te takinokino anga.​—Angaanga 4:29-31; 5:41, 42.

Noatu e kare te au pipi a Karaiti i tamamaeia e te takinokino anga pakari, kare ratou i ariki meitakiia ana i te au taime ravarai. (Mataio 10:11-15) E pera katoa, kare te angaanga tutu aere a te Au Kite o Iehova i rave mama uaia i te au taime katoatoa i teia tuatau nei.a Ki te au tangata e manganui, te irinaki anga i te Atua e iki anga naau uaorai e apinga kare ratou e inangaro i te tuatua. E kare tetai aronga ke e irinaki ana i tetai akaaerenga akonoanga penei no to ratou au tu papakitai. Kare e ekoko anga, te tu papakitai, te ngere anga i te au tupu anga, me kare tetai atu au manamanata ka riro mai ei au tumu no te taitaia maata. Akapeea ra te autu anga i teia au manamanata?

Te Rauka Anga Mai te Au Tupu Anga Meitaki

Te tu rekareka ka rauka mai ia tatou mei ta tatou angaanga orometua te piri vaitata atura i tetai tuanga ki te au tupu anga tei rauka mai. Akapeea, i reira, e raukai ia tatou tetai angaanga tupu maata? E tika, “ei ravakai tangata” oki tatou. (Mareko 1:16-18) E aere ana te ravakai tangata i Iseraela taito ra i te po kia tautai e rauka mai ei te maata anga o te ika. Ka umuumu katoa tatou kia akara matatio i to tatou ngai e kia “ravakai” tatou me tei te kainga te maata anga o te tangata e ka ariki rekareka ratou i ta tatou tuatua. Penei e aiai teia, i te openga o te epetoma, me kare i tetai atu taime. Kia tau ki tetai tutaka akaaere, ka tau teia turanga i te ngai tei te angaanga te tangata i te au ra katoa. Kua kite aia e ka apai putuputu mai te tutu aere anga i te aiai i te au tupu anga meitaki rava. Te oronga katoa maira te tutu aere anga terepaoni me kare te akakitekite ua anga kia itae ia te au tangata e manganui.

Te akatupu ra te akakoromaki anga i te au mea meitaki i roto i te angaanga orometua. I Europa Itinga e i roto i tetai atu au enua Aperika, te tere ra te angaanga tutu aere anga o te Patireia ki mua, e kua akatupu teia i te au tupuanga memeitaki. Mei te reira rai, kua akamataia te au putuputuanga e manganui i roto i te au ngai tei manakoia e kare e meitaki ana me kore i te ngai katoa tei angaanga putuputuia. Inara, ka peea oki me kare toou ngai e akatupu ana i te au meitaki?

Tamouanga i te Tu Manako Meitaki

Te taka meitaki ra te au akakoro anga tei akanoo ia e Iesu i roto i te manako ka tauturu ia tatou kia kore e taitaia me aro tatou i te manamanata i roto i te angaanga orometua. Kua anoano a Karaiti i tana au pipi kia kimi i te aronga tau, kare te ariu anga i te au pupu tangata katoatoa. I etai atianga kua akakite atu aia e kare te tuanga maata o te tangata e ariki i te tuatua meitaki, mei te maata anga o te au Iseraela kare ratou i akarongo ki te au peroveta taito ra.​—Ezekiela 9:4; Mataio 10:11-15; Mareko 4:14-20.

Te arikiia nei “te evangelia o te basileia” ma te tu rekareka e te aronga “akaaka te ngakau.” (Mataio 5:3; 24:14) Ka inangaro ratou kia tavini i te Atua na roto i te tu tana i tuku mai. No reira, te tupu anga o ta tatou angaanga e kapiti anga maata ia ki te tu ngakau o te tangata kare ki to tatou tu katau i te akakitekiteanga i te tuatua. Inara, ka tau tatou kia rave i to tatou tu meitaki kia akareka i te tuatua meitaki ki te tangata. Inara, tei te Atua te tupu anga, no te mea kua tuatua Iesu: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.”​—Ioane 6:44.

Te akakite ra ta tatou angaanga evangeria i te ingoa o Iehova. Noatu e ka akarongo te tangata e me kare, ka tauturu ta tatou angaanga tutu aere kia akatapu i to Iehova ra ingoa tapu. E pera katoa, na ta tatou angaanga evangeria, ka akapapu mai e me e au pipi tatou na Karaiti, e e akameitaki anga to tatou kia o atu ki roto i te angaanga puapinga rava atu te raveia ra i to tatou tuatau nei.​—Mataio 6:9; Ioane 15:8.

Te Tu Taitaia e te Au Pirianga Tangata

Tetai au pirianga tangata, i roto i te ngutuare tangata me kare i roto i te putuputuanga, ka akatupu i te tu taitaia. Ei akatauanga, tei reira te manako e kare te tangata e marama iaku. Penei te au tarevake o te au taeake ka taitaia ia tatou. Teia akaou, te Tuatua Tapu ka tauturu maata ia tatou.

Te “au taeake” takapini i teianei ao te riro ra ei pamiri maata pae vaerua. (1 Petero 2:17) Inara ka ngaro te manako taokotai me te tupu ra te au manamanata tu tangata. Ae, kare te au Kerititiano i te anere mataiti mua i paruruia mei taua au manamanata, no te mea kua akamaara taokioki ua te apotetoro Paulo ia ratou kia noo taokotai. Ei akatauanga kua akamaroiroi atu aia i te nga vaine Kerititiano e rua​—ko Euodia raua ko Sunetuke​—kia akaoti marie i to raua pekapeka.​—1 Korinetia 1:10; Ephesia 4:1-3; Philipi 4:2, 3.

Me ko teia te manamanata, akapeea tatou e akaou ei i te aroa no to tatou au taeake? Na te akamaaraanga kia tatou uaorai e kua mate a Karaiti no ratou e ko ratou, mei ia tatou rai, te tuku ra i te akarongo ki roto i tona atinga oko. E akamaara katoa tatou e kua papa to tatou au taeake e manganui i te aru ia Iesu Karaiti na te tukuanga i to ratou oraanga no tatou.

I etai mataiti i topa, i Paris, Varani, kare tetai Kite mapu i taroaroa i te mou anga i tetai kiri kakau te vaira tetai pomu tei tukuia i vao i te Are Uipaanga Patireia. Kua oro aia ki raro i nga tuanga o te ara kakenga i mua ake ka pei ei i te reira ki roto i tetai punavai te ngai i aruru ei te reira. I te ui angaia e na teaa i akakeu iaia kia oronga i tona oraanga na roto i teia tu, kua pau atu aia e: “Kua kite au e tei roto to tatou oraanga i te kino. No reira kua manako au e e meitaki atu kia mate ko au anake ua e kia kore e mate atu te katoatoa.”b Mei teaa ra te akameitakianga kia rauka te au taeake tei papa ra kia aru vaitata i ta Iesu akatauanga!

Kapiti katoa, ka manako tatou i te vaerua taokotai anga te vaira i rotopu i te Au Kite o Iehova i roto i te au puakapa tamamae anga i te Tamaki II o te Ao.c I ou ake nei, kua tamou marie katoa to tatou au taeake i Malawi i to ratou tu tiratiratu ei au Kerititiano mou. Kare ainei te manako o to tatou au taeake i roto i te putuputuanga tei angaanga i raro ake i te turanga o taua tu rai e akakeu ia tatou kia akakore i te au maro anga me kore akameangiti ua i te au manamanata i te au ra tataki tai? Me tatanu tatou i te manako o Karaiti ra, ka riro mai to tatou au piri anga i te au ra tataki tai ma te au taeake akamori ei tumu no te akapumaana, kare i te tu taitaia.

Toou Uaorai Manako Ngakau Taitaia

“Kia tavareia te apinga tapapaia ra, e aati te manava: kia tupu ra te mea inangaroia ra, e tau ïa ki te rakau ora.” (Maseli 13:12) I roto i te mata o tetai au tavini o Iehova, kare e rapu mai ana te openga o teia akatereanga. Te kite nei te au Kerititiano e te noo nei tatou i ‘te tuatau kino maata’ mei te aronga irinaki kore e manganui.​—2 Timoteo 3;1-5.

Inara, e tuke ki te aronga irinaki kore, ka tau te au Kerititiano kia rekareka e kia kite i roto i teia au turanga kino te “akairo” o to Iesu parutia, tei akakite mai e kare e roa atu ana ka takore te Patireia o te Atua i teia nei akatereanga kino. (Mataio 24:3-14) Noatu e ka kino atu te turanga​—mei te ka tupu i te “mate maata” rai​—ko teia au tupu anga e tumu rekareka no tatou no te mea te akakite maira te reira i te aere anga mai o to te Atua ao ou.​—Mataio 24:21; 2 Petero 3:13.

Te tatari anga pae manako i te akao anga o te Patireia i te au tupu anga i teia tuatau nei ka akatupu i tetai Kerititiano kia oronga i te maata anga o tona taime ki te aruaru anga i te au apinga materia. Me akatika aia i taua au mea ra mei te angaanga e te tarekareka kia akapou i tona taime e te maroiroi, ka ngata iaia i te rave meitaki i tana au apainga Tuatua Tapu. (Mataio 6:24, 33, 34) Ka akatupu taua tu i te roi e te tu taitaia. Kua tuatua maira tetai akaaere tutaka: “Kare i te manako tau kia tauta i te patu i tetai akatauanga kino o te akatereanga ou i roto i teia akatereanga o te au mea nei.”

Te Rapakauanga Meitaki Rava e Rua

I te rave anga i te kimikimi anga, ka akapeea tetai tangata e kite ei i tetai rapakau anga meitaki? Ko te apii naau uaorai tetai o te au mea meitaki rava atu. Eaa ra? “Ka akamaara mai te reira ia tatou eaa ra te tumu ka rave ei tatou i ta tatou ka rave,” i na tetai akaaere tutaka ei. Kua akataka maira tetai atu: “Te rave anga i te tutu aere anga mei tetai apainga te riro maira ei mea mama ua i tetai taime.” Inara ko tetai apii meitaki ka tauturu ia tatou kia rauka mai tetai akara anga meitaki no to tatou turanga i te akavaitata anga tatou ki te openga. E tau ki taua manako rai, kua akamaara putuputu mai te au Tuatua Tapu ia tatou kia angai meitakiia i te pae vaerua kia rauka mai te mataora i te rave anga i te anoano o te Atua.​—Salamo 1:1-3; 19:7-10; 119:1, 2.

Ka rauka i te aronga pakari i te tauturu i etai atu kia autu i te tu taitaia na te rave anga i te au atoroanga akamaroiroi ki runga ia ratou. I teia au atoroanga, ka akaari atu te aronga pakari e ko tatou tataki tai te ariki maata ia ra e e tuanga maata i rotopu i te iti tangata o Iehova. (1 Korinetia 12:20-26) No runga i te au taeake Kerititiano, kua tuatua tetai tangata pakari: “Kia akamaata i to ratou puapinga, kua akamaara au ia ratou i te au mea ta ratou i rave i te tuatau i topa. Ka akaari atu au e e okomaata tikai ratou i te mata o Iehova e kua orongaia te toto o tana Tamaiti no ratou. Kua ariki meitakiia teia uriurianga manako i te au taime ravarai. I te akatumuia anga teia au akaarianga Pipiria ngaueue kore, ka rauka i te aronga taitaia i te akanoo i te au akakoroanga ou, mei te pure ngutuare tangata, te apii e te tatauanga Pipiria.”​—Ebera 6:10.

I te au atoroanga, ka anoanoia te aronga pakari kia matakite i te akaari anga e kare e rauka i te akamareka i te Atua. Mari ra, ka rauka i te aronga pakari i te tauturu atu i te au taeake akamori taitaia kia kite e mama ua te apainga o ta Iesu au pipi. No reira, ta tatou angaanga Kerititiano e tumu no te rekareka.​—Mataio 11:28-30.

Autuanga i te Tu Taitaia

Noatu te au tumu o te reira, e kino tikai te tu taitaia e ka tau kia tamakiia. Inara, e akamaara e, kare ko tatou anake ua i roto i teia tamaki. Me taitaia tatou, e ariki i te tauturu o to tatou au taeake Kerititiano, e maata katoa oki te aronga pakari. I te rave anga i te reira, ka akameangiti tatou i te au manako ngakau taitaia.

I runga ravao, ka umuumu tatou kia ariu ki te Atua no te tauturu kia autu i te tu taitaia. Me pure tatou ma te irinaki ia Iehova, penei ka tauturu aia ia tatou kia autu tikai i te tu taitaia. (Salamo 55:22; Philipi 4:6, 7) Noatu te tu, ei iti tangata nona, ka rauka ia tatou i te ariki i te au manako o te tata taramo tei imene ra: “E ao to te au tangata i kite i te reo rekareka ra: e aaere rai ratou, e Iehova, i te mārama o to mata ra: E rekareka ratou i to ingoa e po ua atu te rā, e ka teitei ratou i te tuatua-tika naau ra. Ko koe oki te kakā o to ratou maroiroi; e na te akaperepere aau ra e teitei ei to matou tara.”​—Salamo 89:15-17.

[Au Tataanga Rikiriki i Raro]

[Tutu i te kapi 31]

Ka rauka te au atoroanga akamaroiroi a te aronga pakari i te tauturu i te au Kerititiano kia autu i te tu taitaia