Te Akakeuia Ra Ainei Koe Mei ia Iesu Rai?
“Akara atura aia i te pouou tangata maata, tangi atura ia ratou, no te mea, mei te mamoe tiaki kore ratou, e kua apii atura aia ia ratou.”—MAREKO 6:34.
1. Eaa ra i kitea puiai e ka akakite te aronga tataki tai i te au tu meitaki?
NA ROTO mai i te tuatua enua e manganui te aronga tataki tai kua akakite i te au tu meitaki. Ka marama koe i te tumu. Tei te Atua ko Iehova te aroa, te takinga meitaki, te oronga ua, e etai atu au tu ta tatou e manako maata ra e kua akakite mai aia. Kua angaia mai te au tangata i to te Atua ra tu. No reira ka rauka kia ariki tatou eaa te aronga e manganui ka akaari ei i tetai tu aroa, takinga meitaki, inangaro, e etai atu au tu-Atua, mei ta te maata anga ka akaata mai i tetai akava ngakau. (Genese 1:26; Roma 2:14, 15) Inara, penei kua kite koe, e e viviki ua tetai papaki i te akakite i teianei au tu i ta etai atu ra.
2. Eaa etai au angaanga meitaki ka rave te au tangata, penei te manako ra ratou e te aru ra ia Karaiti?
2 Penei kua kite koe i te au tangata e te au vaine tei putuputu ra te atoro me kare te tauturu i te maki, akaari i te inangaro ki te aronga apikepike, me kare te oronga ua ra ki te aronga putaua. E manako, katoa, i te aronga tataki tai tei akakeuia ra ratou e te inangaro kia akapou i to ratou oraanga i te rave angaanga i te au ngai repera me kare au matiroeroe, te aronga te rave angaanga ua ra i te au are maki me kare te au kainga no te aronga pakari, me kare te au tangata tei tauta ra kia tauturu i te aronga kare o ratou ngai nooanga me kare te aronga akapuangaia. Penei, tera tetai papaki o ratou te manako ngakau ra e te aru ra ratou ia Iesu, tei akanoo maira i te akatauanga no te au Kerititiano. Ka tatau tatou i roto i te au Evangeria e kua rapakau a Karaiti i tei maki ra e kua angai i tei pongi ra. (Mareko 1:34; 8:1-9; Luka 4:40) Ko ta Iesu ra akakite anga aroa, tu maru, e te inangaro oki e au akaata anga i ‘te manako o te Mesia,’ koia tei aru ra i tona Metua i te rangi ra.—1 Korinetia 2:16, akaaite ia NW.
3. Kia raukai tetai manako tau no ta Iesu ra au angaanga meitaki, eaa ta tatou ka tau kia akamanako?
3 Inara, kua kite ainei koe, e e manganui te aronga i teia tuatau tei akatukiaia atura e to Iesu aroa e te inangaro kua kore i kite i tetai taviri puapinga no te manako o Karaiti? Ka rauka ia tatou te kite oonu ki roto i teianei na te akamanako anga matakite ia Mareko pene 6. Ka tatau tatou i reira e kua apai mai te au tangata i te aronga maki kia Iesu kia rapakauia. I roto i reira, ka kite katoa tatou e i te akaraanga e ko te aronga e au tauatini ua atura tei aere maira kiaia kua mate pongi, kua angai temeio atura Iesu ia ratou. (Mareko 6:35-44, 54-56) Ko te rapakauanga i te maki e te angaianga i tei onge ra e akakiteanga meitaki ia i te inangaro aroa ra, inara ko te reira ainei te au raveanga maata ta Iesu i tauturu atu ia etai ke ra? E akapeea e raukai ia tatou kia aru meitaki atu i tana akatauanga meitaki rava ra no te aroa, te takinga meitaki, e te inangaro, mei tana i aru ra ia Iehova?
Akakeuia kia Akono i te Au Umuumuanga i te Pae Vaerua
4. Eaa te akanoonooanga no te tataanga ia Mareko 6:30-34 ra?
4 Kua tangi atura Iesu i te aronga takapini iaia te tumu maata no to ratou au umuumuanga pae vaerua. Ko taua au umuumuanga ra te mea maata ia, e maata atu i te pae kopapa. E akamanako i te tataanga ia Mareko 6:30-34. Te tupuanga tei tataia i reira kua rokoia ki taatai o te Tai o Galilea, e vaitata oki ki te tuatau o te Pasa i te 32 T.N. Te mataora ra te au apotetoro, no te tumu meitaki oki. Koi oti ua akera tetai tere maata, kua aere mai ratou kia Iesu, kare e ekoko anga te inangaro ra kia akakite atu kiaia i tei tupu ra. Inara, kua akaputu atu tetai urupu. No to ratou tini oki kare i rauka ia Iesu ratou ko tana au apotetoro kia kai e kia akaangaroi. Kua na ko atura Iesu ki te au apotetoro: “Ka taki aere tatou ko tatou anake uaorai i tetai ngai motutaa, e noonoo iti ua na.” (Mareko 6:31) Kua kake atu i tetai pai, penei i vaitata ia Kaperenauma, kua tere atura ratou i runga i te Tai o Galilea ki tetai ngai motutaa. Inara kua oro atu taua urupu ra na taatai e kua tae atu na mua atu i te pai. Akapeea a Iesu me akono? Kua taitaia ainei aia i te akakore anga i tona noo ua anga? Kare rava ia!
5. Akapeea to Iesu ra manako ngakau ki te aronga tini tei aere maira kiaia, e eaa tana i rave no te reira tu?
5 Kua akatukiaia atura te ngakau o Iesu na te akaraanga i teia urupu e au tauatini ua atura, kapiti katoa oki te aronga maki, tei tatari marie ra iaia. (Mataio 14:14; Mareko 6:44) I te akaraanga ki tei akakeu ra i to Iesu aroa e i Tana akono atura, kua tata a Mareko: “Akara atura aia i te pouou tangata maata, tangi atura ia ratou, no te mea, mei te mamoe tiaki kore ratou, e kua apii atura aia ia ratou i te au tuatua e manganui.” (Mareko 6:34) Kua kite a Iesu e tere atu i tetai urupu tangata. Kua kite atu aia i te aronga tataki tai e au umuumuanga pae vaerua to ratou. Kua aite ratou mei te au mamoe tei aaere tauturu kore ua ra, kare e tiaki ei arataki ia ratou ki te ngai matie kia kai me kare kia paruru ia ratou. Kua kite a Iesu e ko te au arataki akonoanga ngakau anu ra, ko ratou ra tei manakoia kia utuutu ei au tiaki, kua akavaavaa i te au tangata noa ra e kua kore e rave i tei umuumuia na ratou i te pae vaerua. (Ezekiela 34:2-4; Ioane 7:47-49) Kua akono tuke ra a Iesu ia ratou, te raveanga i te meitaki te ka rauka kia ratou. Kua akamata aia i te apii ia ratou i te Patireia o te Atua ra.
6, 7. (a) Eaa te tuanga mua ta te au Evangeria ra i akakite i ta Iesu i rave no te umuumuanga o te au tangata ra? (e) Ma teea akakeuanga i tutu ei a Iesu e i apii ei?
6 Ka akamanako ana i te akapapa anga e te manako maata te kiteia ra i tetai tataanga aiteite. Na Luka teianei i tata, koia tetai taote manako maata i te meitaki pae kopapa o etai ke ra. “Kua aru maira [te tangata tini ia Iesu]. E kua kapo atura aia ia ratou, tuatua maira kia ratou no te basileia o te Atua, e akaora akera i te aronga maki.” (Luka 9:11; Kolosa 4:14) Noatu rai e kare i pera i te au tataanga ravarai no tetai temeio, i teianei, eaa ta Luka tataanga akauruia i taiku mua mai? Ko te tika ia e kua apii a Iesu i te au tangata ra.
7 Te tau ra teia ma te akaketaketa anga ta tatou ka kite ia Mareko 6:34. Te akakite meitaki maira taua irava ra e akapeea to Iesu ra akakeu angaia ei akakite i tona tangi. Kua apii atura aia i te au tangata, ma te akonoanga i to ratou au umuumuanga pae vaerua. I mua akera i roto i tana angaanga orometua, kua tuatua a Iesu: “E tutu aere rai au i te evangelia o te basileia o te Atua i te au oire ke atu e tikaʼi; i tonokia mai ei oki au.” (Luka 4:43) Inara, te tarevake ra tatou me manako tatou e kua akakite aere a Iesu i te tuatua no te Patireia no te mea e angaanga ia nana, mei te mea rai e kua apiiia aia i te raveanga i te angaanga tutuanga tana ka rave. Kare, na tona inangaro aroa no te au tangata tetai taviri akakeu anga no tana tuaanga i te tuatua meitaki kia ratou. Ko te meitaki tikai ta Iesu i rave—noatu rai no te aronga maki, no tei takinoia e te temoni, te putaua, me kare tei onge ra—no te tauturu ia ratou kia kite, kia ariki, e kia inangaro i te tuatua mou no te Patireia o te Atua ra. Ko taua tuatua mou ra te mea puapinga maata no te tuanga a te Patireia i te akatika anga i te ngateitei o Iehova e te orongaanga i te au akameitakianga tinamou no te au tangata.
8. Akapeea to Iesu ra manako ngakau no tana tutuanga e te apiianga?
8 Ko te rotopu ta Iesu ra rave tutuanga no te Patireia no tona tumu i aere mai ei ki te enua nei. I te vaitata anga ki te openga o tana angaanga orometua i te enua nei, kua tuatua atura Iesu kia Pilato: “I anau mai ei au nei, i aere mai ei au ki te ao nei, e akakite i te tuatua-mou. No te tuatua-mou aia ra, ka akarongo mai ïa i toku reo.” (Ioane 18:37) Kua kite tatou i nga atikara e rua i mua akenei e ko Iesu tetai peretana ngakau maru—utuutu oki, e ngoie ua kia aravei, e akamanako tau, e irinaki, e i runga rava, e aroa ia. Ka tau tatou kia ariki i taua au tuanga o tona tu me te anoano tika ra tatou kia marama i te manako o Karaiti. E mea puapinga tau katoa oki kia kite e ko te manako o Karaiti te kapiti ra i tana tuku anga ei tuanga mua ki runga i tana angaanga tutuanga e te apiianga.
Kua Raurau Aia ia Etai kia Akakitekite
9. Noai ma te tuanga mua i te tutuanga e te apiianga?
9 Te tuku anga i te tuanga mua ki te tutuanga e te apiianga—ei akakite anga i te aroa e te inangaro—kare no Iesu anake ua. Kua raurau aia i tana au pipi kia aru i tona au manako, i te au tuanga mua, e te au angaanga oki. Ei akatauanga, i muri ake i ta Iesu iki anga i tana 12 apotetoro, eaa ta ratou kia rave? Te akakite maira Mareko 3:14, 15 kia tatou: “Kua akataka atura aia i e tino ngauru ma rua, kia aru ratou kiaia, kia unga atu oki aia ia ratou e ako aere; Kua akamana atura oki ia ratou kia akaora i te au maki, kia tuaru oki i te au demoni.” Te kite ra ainei koe i tetai tuanga mua na te au apotetoro ra?
10, 11. (a) I te tonoanga i tana au apotetoro, eaa ta Iesu i akaue ia ratou kia rave? (e) I te akanoonoo anga i te akaunga anga i te au apotetoro ra, eaa te tumu maata?
10 I muri akera, kua rauka ia Iesu i te tauturu i te 12 ra kia akaora ia etai ke ra e kia tuaru oki te au temoni. (Mataio 10:1; Luka 9:1) I reira kua unga atu aia ia ratou i tetai tere kia aere ki “te au mamoe i ngaro i te ngutuare o Iseraela.” Kia rave i teaa? Kua arataki atura Iesu ia ratou: “E tutu aere kotou, na ko atu, Te vaitata mai nei te basileia o te ao, E akaora i te au maki, e tamā i te lepera, e akatu i tei mate, e tuaru i te demoni.” (Mataio 10:5-8; Luka 9:2) Eaa tikai, ta ratou i rave? “Aere atura ratou e [1] ako aere atura i te tangata kia tataraara; e [2] tuaru atura oki i te demoni e manganui ki vao, e kua akaora atura i te maki e manganui, ma te tainu ïa ratou i te manongi.”—Mareko 6:12, 13.
11 I te mea kare te apiianga i taiku muaia i te au atianga ravarai ra, te tuku maata rava ra ainei te tuatua anga i te tumu no te tuanga maata i runga akenei me kare te au manako anga tei o maira ki roto? (Luka 10:1-8) Inara, kare tatou e tau kia akakore i te putuputu o te taiku anga i te apiianga na mua i te akaoraanga. E akamanako ana i te tata katoaanga i teianei tu. I mua ua ake i te akaungaanga i te 12 au apotetoro ra, kua akatukiaia atura Iesu na te tu o taua aronga tini ra. Ka tatau tatou: “Aere aturā Iesu na roto i te au oire e te au vila katoa, i te apii anga i roto i to ratou au sunago, e te ako anga i te evangelia o te basileia, e te akaora anga i te au maki ravarai, e te au mate katoa o te tangata. E kia akara akera aia i te maata o te tangata, aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra. Kua karanga atura aia ki tana au pipi, Te maata ua nei te mou, te iti nei ra te aronga e kokoti: E teianei, e pure kotou i te Atu o te mou, kia unga mai aia i tetai aronga ei rave i taua mou nana ra.”—Mataio 9:35-38.
12. Eaa te akakoroanga kapitiia atu ki te au angaanga temeio a Iesu e te au apotetoro ra?
12 Na to ratou kapitianga kiaia, kua rauka i te au apotetoro ra kia tauru i etai o te manako o Karaiti. Kua kite ratou e ko to ratou riroanga kia aroa tikai e kia inangaro atu oki i te au tangata kapiti katoa i te tutuanga e te apiianga no te Patireia—ko te reira tetai tuanga maata no ta ratou au angaanga meitaki. Kia tau atu ma te reira, ko te au angaanga meitaki no tetai tu kopapa, mei te rapakauanga maki ra kua maata atu i te tauturu anga i tei ngere ra. Mei taau ka rauka kia tamanako, penei ko tetai papaki tangata ka akavatataia atu no te au rapakau anga e te oronga anga kai na te tu temeio. (Mataio 4:24, 25; 8:16; 9:32, 33; 14:35, 36; Ioane 6:26) Inara, kia tere atu i te tauturu anga kopapa, kua akakeu taua au angaanga ra i te aronga akara atu kia kite e ko Iesu tikai te Tamaiti a te Atua e te “peroveta” ta Mose i totou maira.—Ioane 6:14; Deuteronomi 18:15.
13. Eaa te tuanga akaketaketaia i te totou ia Deuteronomi 18:18 no te “peroveta” te aere maira?
13 Eaa ra i puapinga maatai e ko Iesu te “peroveta” ra? Inara, eaa te tuanga taviri tei totouia nana ra? Ka riro ainei kia rongonui te “peroveta” ra no te raveanga rapakau temeio me kare no te orongaanga kai no te aronga i pongi ra? Kua totou maira Deuteronomi 18:18: “Ka akatupu au i tetai peroveta na ratou i to ratou ra ai taeake, mei ia koe [e Mose] na te tu, e ka tuku au i taku tuatua ki roto i tona vaa, e nana e karanga atu kia ratou i te au mea ravarai taku e akaue atu iaia ra.” No reira mei te au apotetoro i apii ra kia akakite i te au manako ngakau maru, kua rauka kia kite ratou e ko te manako o Karaiti te ka tau kia akakiteia i ta ratou angaanga tutuanga e te apiianga oki. Ko te reira te mea meitaki rava atu te ka rauka ia ratou kia rave no te au tangata. Na te reira, ka rauka i tei maki ra e te putaua oki te au puapinga tinamou, kare i te au mea kotinga uaia no te oraanga poto o te tangata me kare no tetai kaikai anga me kare e rua ra.—Ioane 6:26-30.
E Akatupu i te Manako o Karaiti i Teia Tuatau
14. Akapeea te raukaanga te manako o Karaiti i o mai ei ki roto i ta tatou angaanga tutuanga ra?
14 Kare tetai o tatou e manako e ko te manako o Karaiti e mea taka ke ia ki te anere mataiti mua anake—kia Iesu e te au pipi mua ta te apotetoro ko Paulo i tata atura: ‘Tei ia tatou ra te manako o te Mesia.’ (1 Korinetia 2:16, akaaite ia NW.) E ka akatika viviki ua tatou e e apainga ta tatou kia tutu aere i te tuatua meitaki e kia akariro te au tangata ei pipi. (Mataio 24:14; 28:19, 20) Inara, e mea puapinga kia akaata ki runga i to tatou uaorai au akakeu anga no te raveanga i taua angaanga ra. Kare e tau e no tetai tu manako angaanga ua. Ko te inangaro i te Atua tetai tumu maata i rave ei tatou i te angaanga orometua, e ko te riroanga kia aite tikai kia Iesu te kapiti ra i te akakeu anga na te aroa kia tutu aere e kia apii oki.—Mataio 22:37-39.
15. Eaa ra te aroa i riro ei ei tuanga tau no ta tatou angaanga orometua i te ngai tangata ra?
15 E tika ra, kare i te mea ngoie ua kia manako ngakau aroa atu no te aronga kare ra e piri mai ki to tatou au akarongo, e maata oki me ka aro atu tatou i te manako koreia mai, te kopaeanga, me kare patoianga. Inara, me ka ngere tatou i to tatou aroa e te inangaro no te au tangata, ka rauka kia ngere tatou i te akakeu anga puapinga maata no te raveanga i te angaanga orometua Kerititiano ra. Akapeea, i reira, me tatanu tatou i te aroa. Ka rauka ia tatou kia tauta kia akara i te au tangata mei ta Iesu i akara ia ratou ra, “kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) Kare ainei te reira e akataka mai i te aronga maata i teia tuatau nei? Kua akono kore uaia ratou e kua akamatapoia i te pae vaerua e te au tiaki akonoanga pikikaa ra. Ei tupuanga, kare ratou i kite i te arataki anga tau te kitea ra i te Pipiria kare katoa oki te au tu Parataito ta te Patireia o te Atua ka apai mai kare e roaia ki to tatou enua nei. Te aro atura ratou i taua manamanata o te oraanga ra tataki tai—kapiti katoa te putaua, te pekapeka ngutuare tangata, te maki, e te mate oki—kare e manakonako no te Patireia. Tei ia tatou ra ta ratou e umuumu ra: koia te tuatua meitaki no te akaoraanga a te Patireia o te Atua tei akanooia ra i teianei i te rangi ra!
16. Eaa ra i tau ei kia anoano tatou i te tua aere i te tuatua meitaki ma etai atura?
16 Me ka tamanako koe i te au umuumu anga pae vaerua o te aronga takapini ia koe, kare ainei to ngakau e akakeu ia koe kia anoano i te rave i te ka rauka katoa ia koe kia tuatua atu kia ratou no ta te Atua ra akakoro anga aroa? Ae, e angaanga aroa ra ta tatou nei. Me manako tangi atu tatou no te au tangata mei ta Iesu ra, ka kitea te reira i te tangi o to tatou reo, i te tu akaraanga o to tatou mata, te tu o ta tatou apiianga. Pouroa te reira ka akariro kia marekaia mai ta tatou tuatua ki “te aronga i akonoia no te ora mutu kore ra.”—Angaanga 13:48.
17. (a) Eaa etai au tu e raukai ia tatou kia akakite i to tatou aroa e te inangaro no etai ke ra? (e) Eaa ra i kore ei e tau e ei raveanga te au angaanga meitaki me kare ei kapitianga i te angaanga orometua i te au ngai tangata ra?
17 Inara, ka tau to tatou aroa e te inangaro oki kia kitea i to tatou oraanga katoa ra. Te kapiti ra teianei i to tatou takinga meitaki ki te aronga te ngere ra, te maki, e te putaua—i te raveanga i te ka rauka ia tatou kia tauturu atu i to ratou mamaeanga. Te takapini ra i ta tatou au tauta anga i te tuatua e te angaanga kia akakore atu i te mamae ngakau o te aronga tei taka ke ra ta ratou akaperepere i te mate. (Luka 7:11-15; Ioane 11:33-35) Inara, ko taua au akakiteanga aroa ra, takinga meitaki, e te inangaro kare e tika kia riro ei mea maata no ta tatou au angaanga memeitaki, mei ta tetai papaki tangata e manako ra. E maata roa atu te tinamou te puapinga i te au tauta anga akakeuia na te au tu tu-Atua aiteite tei akakiteaia i te raveanga i te angaanga tutuanga e te apiianga Kerititiano. E akamanako ana i ta Iesu i tuatua no te au arataki akonoanga ngati Iuda ra: “Te oronga nei kotou i te ngauru o te minete e te aneto e te kumino, e te akaruke nei i te au mea mamaata o te ture, te tuatua-tau, te aroa, e te akarongo: ko ta kotou ïa e akono e tikaʼi, e auraka katoa e akaruke i tera.” (Mataio 23:23) Ia Iesu kare ko te rave i tetai me kare i tetai ke ra—te tauturuanga te au tangata ma to ratou au umuumuanga pae kopapa me kare te apiianga ia ratou i te au tumu pae vaerua ei oronga oraanga ra. Kua rave a Iesu i aua mea e rua ra. Inara, te taka meitaki ra e ko tana angaanga apiianga ko te mea maata ia no te mea ko te meitaki tana i akatupu ka riro ei tauturu anga mutu kore ia.—Ioane 20:16.
18. Eaa te mea tau kia akakeuia tatou e te akamanako anga i te manako o Karaiti ra?
18 Mei teaa ra to tatou akameitaki anga e kua akakite mai a Iehova i te manako o Karaiti kia tatou nei! Na te au Evangeria ra, ka rauka ia tatou kia kite meitaki atu i te au manako, te au manako ngakau, te au tu, te au angaanga, e te au mea tuanga mua o te tangata maata rava atu tei ora ana. Tei runga ia tatou kia tatau, kia tamanako, e kia rave i ta te Pipiria i akakite mai no Iesu ra. Kia maara, me ka rave tikai tatou mei ia Iesu ra, ka tika tatou kia manako, kia manako ngakau, e kia akataka i te au tumu mei tana i rave ra, kia tau ki te meitaki e rauka ia tatou ei au tangata apa ua nei. Ei reira, kia tamanako tatou kia tatanu e kia akakite i te manako o Karaiti. Kare e aerenga meitaki ke atu kia akono, kare e tu meitaki ke atu no te akono i te au tangata, e kare e aerenga meitaki ke atu no tatou e etai ke atu kia akavaitata ki tei akaata meitaki maira aia, koia to tatou Atua aroa maru, ko Iehova ra.—2 Korinetia 1:3; Ebera 1:3.
Akapeea Koe me Pau?
• Eaa te kite oonu ta te Pipiria e oronga maira e i akapeea ta Iesu akono anga putuputu i te au tangata tei umuumu apinga ra?
• Eaa ta Iesu i akaketaketa mai i tana arataki anga i tana au pipi ra?
• Akapeea ka raukai ia tatou te akaari i ‘te manako o te Mesia’ i ta tatou au angaanga?
[Tutu maata i te kapi 23]
[Tutu i te kapi 24]
Eaa te tu meitaki roa atu ka rauka i te au Kerititiano i te rave no tetai ke?