Ta Iehova Aratakianga ia Tatou

“E arataki iaku na te arataa tikai.”​—SALAMO 27:11.

1, 2. (a) Akapeea ta Iehova aratakianga i tona au tangata i teia tuatau? (e) Eaa te o atura ki te raveanga kia puapingaia i te au uipaanga?

KO Iehova te Tumu o te marama e te tuatua mou, mei ta tatou i kite i te atikara i mua akenei. Na tana Tuatua i akamarama i to tatou aerenga ia tatou e aaere ra na te arataa tau tikai. Te arataki ra a Iehova ia tatou na te apiianga ia tatou i tona au aerenga. (Salamo 119:​105) Mei te tata taramo i taito ra, ka akarongo akameitaki tatou ki ta te Atua ra au aratakianga e ka pure: “E apii mai koe, e Iehova, i toou ra arataa, e arataki iaku na te arataa tikai.”​—Salamo 27:11.

² Ko tetai raveanga ta Iehova e oronga maira i te apii anga i teia tuatau na roto i te au uipaanga Kerititiano. Te rave ra ainei tatou i te meitaki katoa no teianei oronga anga aroa na (1) te aere putuputuanga, (2) te akarongoanga meitaki i te porokaramu, e te (3) na te papa anga kia rave i te au tuanga te o atura te aronga akaputu atu? Pera katoa oki, te akono meitaki ra ainei tatou me rauka mai ia tatou etai manako anga te ka tauturu ia tatou kia vai ki roto i te “arataa tikai”?

Te Akapeea ra Taau Aerenga ki te Uipaanga?

3. I akapeea tetai tavini i te au tuatau ravarai i te akatupu anga i te ravenga meitaki no te aere putuputu ki te au uipaanga?

³ Kua aere putuputu tetai papaki papuritia Patireia ki te au uipaanga Kerititiano mei te tamariki rikiriki anga. “Ia matou ko toku nga tuakana i tupu ake ei i te au mataiti 1930 ra” te maara ra tetai orometua tamou o te Au Kite o Iehova, “kare matou i ui i to matou nga metua me ka aere matou ki te uipaanga. Kua kite matou e te aere ra matou, na te maki anake ka kore ei. Kare to matou ngutuare tangata i kore e aere ki te au uipaanga.” Mei te peroveta vaine ra ko Ana, “kare [teianei tuaine] i akaruke” i te aereanga ki te ngai akamorianga ia Iehova.​—Luka 2:​36, 37.

4-6. (a) Eaa ra etai papuritia Patireia ka kore ei e tae ki etai au uipaanga? (e) Eaa ra ka umuumuiai kia aere atu ki te au uipaanga ra?

⁴ Ko koe ainei tetai tei roto i te aronga te aere putuputu ra ki te au uipaanga Kerititiano, me kare kua riro ainei koe kia aere i etai taime ua? Kua iki tetai papaki Kerititiano tei manako ra e te meitaki ra ratou kia akapapu tikai. No etai epetoma tokoiti, kua tata ratou i tetai pepa no te au uipaanga ravarai ta ratou i aere ana. I ta ratou akara matatio anga i te tata anga i te openga o te tuatau tei akatakaia ra, kua poitirere ratou i te numero o te au uipaanga ta ratou kare i aere ana.

⁵ ‘No reira rai,’ penei ka tuatua tetai e. ‘Tei raro ake te au tangata i te taomianga maata i teianei tuatau e kare i te mea ngoie no ratou kia aere putuputu ki te au uipaanga.’ Te tika ra e te noo nei tatou i te au tuatau pekapeka. Te mea maata, kare e ekoko anga ka tupu te taomianga kia maata roa atu. (2 Timoteo 3:13) Inara kare aina te reira e akariro kia maata atu te umuumuia kia aere putuputu ki te au uipaanga? Me kare tetai kaikai anga tau tamou marieia i te pae vaerua ei akamaroiroi ia tatou, kare e rauka ia tatou te manakonako kia akakoromaki i te taomianga ta teianei akatereanga e apai mai nei. No teaa ra, me ka kore te taokotai anga putuputu penei ka timataia tatou kia akaruke takiri i “te arataa oki o te aronga tuatua-tika ra”! (Maseli 4:18) E tika ra, me tae atu tatou ki te kainga i te openga o tetai ra ngata, penei kare tatou e manako ngakau papu ana kia aere ki te uipaanga. Me aere atu ra tatou noatu to tatou roiroi, inara, ka puapingaia tatou uaorai e ka akamaroiroi atu oki tatou i to tatou au oa Kerititiano i te Are Uipaanga Patireia ra.

⁶ Te akakite maira Ebera 10:25 i tetai au tumu puapinga maata eaa tatou ka tau ei kia aere putuputu ki te uipaanga. I reira te akamaroiroi ra te apotetoro ko Paulo i te au oa Kerititiano kia akaputu atu ia ratou uaorai ‘no te mea te akara na ratou i taua rā ra i te vaitata anga mai.’ Ae, ka tika tatou kia kore e ngaropoina i te tika e te vaitata maira “taua rā o te Atua ra.” (2 Petero 3:12) Me ka manako tatou e te mamao ke atura te openga o teianei akatereanga, penei ka akamata tatou i te tukuanga kia pokia te au angaanga vaerua tau, mei te aereanga ki te uipaanga ra, e te au aruaruanga tangata ua nei. I reira, mei ta Iesu i akamatakite maira, ‘ka rokoia mai ei tatou e taua rā ra.’​—Luka 21:34.

Kia Riro e ko Tetai Tei Akarongo Meitaki

7. Eaa ra i puapinga maatai no te tamariki kia akarongo matakite i te au uipaanga?

⁷ Kare e rava kia aere ua ki te au uipaanga. Ka tika tatou kia akarongo matakite, ma te akamanakoanga i te au mea tuatuaia i reira. (Maseli 7:24) Te kapiti ra teia i ta tatou tamariki. Me aere tetai tamaiti ki te apii, te manakoia maira aia kia akarongo atu ki te puapii, noatu rai me kare tetai tumu tuatuaia e marekaia kiaia me kore te akara mamao ke atura i tona kite. Te kite ra te puapii e me ka tauta taua tamaiti ra kia akarongo atu, ka rauka iaia etai puapinga mei taua apiianga ra. Kare ainei i te mea tau no te tamariki aere apii ra kia akarongo atu ki te apiianga orongaia mai i te au uipaanga putuputuanga ra e kare kia tuku uaia kia moe me akamataia te uipaanga ra? E tika, i roto i te au tuatua mou okomaata te kitea ra i te au Tuatua Tapu e “e mea kimingata oki tai papaki.” (2 Petero 3:16) Inara auraka tatou e manako akameangiti ua i to tetai tamaiti kite kia apii. Kare te Atua e pera. I te au tuatau Pipiria ra, kua akaue atura aia i te au tavini ou ‘kia akarongo ratou, e kia apii, e kia mataku ia Iehova e kia rave oki i te au tuatua ravarai o teianei ture,’ ko tetai papaki kare e ekoko anga e ngata no te tamariki kia kite. (Deuteronomi 31:12; akaaite ia Levitiku 18:​1-30.) Te manako meangiti maira ainei a Iehova i te tamariki o teia tuatau nei?

8. Eaa te au takainga ta tetai papaki metua e rave ra ei tauturu i ta ratou tamariki kia akarongo meitaki i te au uipaanga ra?

⁸ Te kite ra te au metua Kerititiano e te akakiia ra tetai tuanga o te umuumu anga pae vaerua o ta ratou tamariki na ta ratou e apii ra i te au uipaanga. No reira, te akanoonoo ra etai metua no ta ratou tamariki kia moe poto ua i mua ake i te au uipaanga ra kia tae atu ei ratou ki te Are Uipaanga Patireia ra ma te maroiroi e te papa oki kia apii. Penei ka kotingaia e etai metua me kare ka akakore pakari atu i te akaraanga tivi no ta ratou tamariki i te au po uipaanga ra. (Ephesia 5:​15, 16) E ko taua au metua ra ka akameangiti mai i te au manako ke, na te akamaroiroianga i ta ratou tamariki kia akarongo e kia apii oki, kia tau ki to ratou mataiti e te kite.​—Maseli 8:32.

9. Penei na teaa e tauturu ia tatou kia tupu te kite i te akarongo anga?

⁹ Te tuatua atura Iesu ki te aronga kua pakari i tana tuatua anga: “E matakite i to kotou akarongo anga.” (Luka 8:18) I teia tuatau nei, e putuputu e te ngoie atu kia tuatuaia te reira i te raveia. E tika, e rave anga ngata te akarongoanga tikai, inara ka rauka kia akatupuia te kite i te akarongo. Ia koe e akarongo ra ki tetai tuatua anga Pipiria me kare tuanga uipaanga, e tauta kia akataka i te manako maata ra. E tamanako atu e eaa ta te vaa tuatua ka tuatua mai i muri ake. E kimi no etai tumu taau ka taangaanga i taau angaanga orometua me kare ka rave i toou oraanga. E tamanako akaou i te au tumu i te reira e akamanakoia ra. E tata poto i etai tumu.

10, 11. Akapeea etai metua i te tauturu anga i ta ratou tamariki kia meitaki atu te akarongo anga, e eaa te au ravenga taau i kite ei tauturu?

¹⁰ Te au ravenga akarongoanga meitaki te rauka ra i te apii meitakiia i te tuatau ouanga ra. Noatu rai i mua atu i to ratou kite anga i te tatau e te tata oki, ko tetai tamariki o te apii mua kua akamaroiroiia e to ratou au metua kia “tata te au tumu” i te tuatau au uipaanga ra. Ka tata ratou i tetai akairo ki runga i tetai aenga pepa me taikuia mai etai tuatua matauia mei ia “Iehova,” ia “Iesu,” me kare “Patireia” ra. Na teia tu, ka kite te tamariki i te akamanako eaa tei tuatuaia maira mei runga mai i te paata.

¹¹ Noatu rai ko te tamariki kua pakarikari mai i etai taime te umuumu ra i te akamaroiroi anga kia akarongo. I te kiteanga e te akaraanga moemoea ua ra tana tamaroa e 11 ra mataiti i te tuatau o te uruoaanga Kerititiano ra, kua oronga atu te upoko ngutuare ra ki taua tamaiti ra i etai Pipiria e kua pati atu kiaia kia akara i te au tuatua tapu i te taiku anga mai e te vaa tuatua ra. Kua akara atu taua metua tane ra, tei tata katoa ra i te au tumu tuatuaia, i tana tamaroa e mou ra i te Pipiria. I muri iora, kua aru taua tamaiti ra i te porokaramu o te uruoaanga ma te manakoanga maata atu.

E Tuku e kia Akarongoia Mai Toou Reo

12, 13. Eaa ra i puapinga maatai kia kapiti atu ki te imeneanga putuputuanga?

¹² Kua imene te Ariki ko Davida: “Ka akapini atu ei au i to atarau, e Iehova: Ka akakite atu ei ma te reo akameitaki.” (Salamo 26:​6, 7) Te oronga maira te au uipaanga a te Au Kite o Iehova i te au atianga meitaki no tatou kia akakite i to tatou akarongo ma te reo maata. Tetai tu na tatou ka rauka kia rave i teia na te kapitianga i te imene anga putuputuanga ra. Ko tetai tuanga puapinga maata teia no ta tatou akamori anga, inara ka ngoie ua kia manako koreia.

¹³ Etai tamariki kare ra i kite ake i te tatau ka akamou ngakau ua i te au tuatua o te au imene Patireia te ka imeneia i te au uipaanga i te epetoma tataki tai. Te mareka ra ratou kia imene kapiti atu ma te aronga kua pakari mai. Inara, i te tupu anga te tamariki kia pakarikari mai, penei ka meangiti mai to ratou inangaro kia piri atu i te imeneanga au imene Patireia. E akama katoa to tetai papaki o te aronga kua pakari i te imeneanga i te au uipaanga. Inara, e tuanga te imeneanga no ta tatou akamori anga, mei te angaanga orometua ra oki i tuanga ia no ta tatou akamori. (Ephesia 5:19) Ka rave tatou i te meitaki e rauka i ta tatou angaanga orometua kia akapaapaa ia Iehova. Kare aina e rauka katoa ia tatou kia akakaka iaia na te akamaata anga i to tatou reo imene​—me te reka ra e me kare​—na te au imene akapaapaa e akatuki i te ngakau?​—Ebera 13:15.

14. Eaa ra i tau ei te teateamamao anga matakite i mua akera i te au tumu no ta tatou apii i te au uipaanga putuputu anga?

¹⁴ Ka apai katoa mai tatou i te akapaapaa ki te Atua me ka tuatua akamaroiroi tatou i te au atianga o te au tuanga o ta tatou au uipaanga te o atura te aronga akaputu katoaia. Te umuumu ra teianei i te teateamamao anga. Ka akapouia e tuatau kia tamanako i te au tuanga oonu o te Tuatua a te Atua. Te apotetoro ko Paulo, tetai tei apii maataia i te au Tuatua Tapu, kua kite i teianei. Kua tata aia: “Aue te oonu o te apinga nui o te pakari e te kite i te Atua e!” (Roma 11:33) Te au upoko ngutuare, e mea puapinga maata kia tauturu koe i te au mema takitai o toou ngutuare tangata kia kimi ki roto i te pakari o te Atua ra, mei tei akakiteia maira i te au Tuatua Tapu. E akanoo i tetai atianga i te apii Pipiria a te ngutuare tangata ra kia akataka atu i te au tumu ngata e kia tauturu atu i toou ngutuare tangata kia teateamamao no te au uipaanga.

15. Eaa te au manako anga penei ka tauturu i tetai kia pau mai i te au uipaanga ra?

¹⁵ Me ka inangaro koe kia putuputu atu te pauanga i te au uipaanga, eaa ka kore ei e akapapa i mua akera i tetai apinga taau i anoano kia tuatua? Kare e umuumuia kia maata rava. Tetai irava tau no te Pipiria kia tatauia ma te irinaki anga me kare tetai tuatua e tokoiti ua tuatua iki meitakiia no te ngakau maira ka arikiia ia. Kua pati etai papuritia ki tei akono i te apiianga kia akatakaia te pauanga mua no tetai parakaoa na ratou, kia kore ei ratou e ngere i tetai atianga no te akakite i to ratou akarongo ra.

Ka Riro te Kamakura kia Pakari Mai

16, 17. Eaa te akoanga ta tetai o te aronga pakari i oronga ki tetai tavini orometua, e eaa ra i meitaki ei te reira?

¹⁶ I te au uipaanga a te Au Kite o Iehova, e putuputu tatou i te akamaaraia mai kia tatau i te Tuatua a te Atua i te au ra takitai. E akapumaana te raveanga i te reira. E ka tauturu oki ia tatou kia rave au ikianga pakari, kia akatikatika i to tatou au tu apa, kia kopae te au timataanga, e kia akatika mai i to tatou tu tau i te pae vaerua me kua rave tatou i tetai takainga tei tarevake ra.​—Salamo 19:7.

¹⁷ Ka papa ua te aronga pakari karape ra kia oronga i te akoanga Tuatua Tapu te tau ra kia umuumuia no tatou. Ta tatou ua ka rave kia ‘rauka maira taua manako ra’ na te kimianga i ta ratou akoanga akatumuia i te Pipiria. (Maseli 20:5) I tetai ra kua ui atu tetai tavini orometua ou ki tetai o te aronga pakari no etai manako e akapeea e riro ei kia maata atu te puapinga o te putuputuanga iaia ra. Kua eeu atu taua tangata pakari tei kite meitaki i taua tangata ou ra, i tana Pipiria kia 1 Timoteo 3:3, tei tuatua maira e ka tau te au tangata akataoongaia “ei tangata maru ra.” Kua akakite aroa atura aia i etai au tu te ka rauka i taua tangata ou ra i te akono atu i te tu maru i tona pirianga ma etai ke ra. Kua riri ainei taua taeake ou ra i te akoanga tau i rauka ra iaia? Kare rava ia! “Kua taangaanga te tangata pakari ra i te Pipiria,” tana i akataka, “no reira kua kite au e ko taua akoanga ra no ko mai ia Iehova.” Kua akono akameitaki taua tavini orometua ra i te akoanga e kua riro kia meitaki te aerenga ki mua.

18. (a) Na teaa i tauturu i tetai Kerititiano ou kia arai i te timataanga i te apii ra? (e) Eaa te irava Pipiria taau e akamaara ana me ka aro atu ki te timataanga?

¹⁸ Ka rauka katoa i te Tuatua a te Atua te tauturu i te aronga ou ‘kia rere ke i te au anoano o to ou anga ra.’ (2 Timoteo 2:22) Tetai Kite ou no Iehova tei karatuati ua akenei mei te apii teitei kua rauka iaia kia kopae ke i te timataanga i tona au mataiti apii katoa na te tamanakoanga e te akonoanga i etai au irava Pipiria ra. E putuputu aia i te manako anga i te akoanga tei tataia ia Maseli 13:20: “Ko tei kapiti katoa i tona aerenga ki to te aronga pakari ra, ka pakari katoa ïa.” No reira ra, kua matakite aia kia tatanu i te au akaoa anga ma te aronga anake tei akangateitei oonu ra i te au kaveinga Tuatua Tapu. Kua manako aia: “Kare au i meitaki ake i etai ke ra. Me ka kapiti atu au ma te urupu tarevake, ka anoano au kia akamareka i toku au oa, e ka rauka kia taki atu te reira ki te taitaia.” Kua tauturu katoa mai te akoanga a Paulo iaia tei tataia ra ia 2 Timoteo 1:8. Kua tata aia: “Eiaa koe e akama i te tuatua-akakite a to tatou Atu, . . . e āriki katoa ra koe i te mate o te evangelia nei.” Kia rotai ma taua akoanga ra, kua tua mataku kore ua aia i tona au irinakianga akatumuia i te Pipiria ra ma tona au oa pupu ra i te au atianga tau ravarai. Me akaueia aia kia oronga i tetai ripoti tuatuaia ki tona pupu, kua iki aia i tetai tumu tei akatika ra iaia kia oronga i tetai akakite anga tau no runga i te Patireia o te Atua ra.

19. Eaa ra i kore ei e rauka i tetai tangata ou kia kopae atu i te au taomianga o teianei ao, inara na teaa i oronga atu kiaia i te maroiroi pae vaerua?

¹⁹ Me ka aere ke oki tatou mei ‘te arataa tuatua-tika’ ra, ka rauka i te Tuatua a te Atua kia tauturu ia tatou kia akatikatika i to tatou au takainga. (Maseli 4:18) Kua kite tikai tetai tangata ou te noo ra ki Aperika i teia. I te aere atuanga tetai o te Au Kite o Iehova e atoro iaia, kua ariki aia i tetai apii Pipiria. Kua rekareka aia i tana i apii ra inara kare i roaia kua o atura ki te kapiti anga kino i te apii. I muri akera, kua panu atu aia ki roto i tetai tu oraanga tau kore. “Kua tamamae toku akava ngakau iaku, e kua akamutu au i te aereanga ki te au uipaanga,” tana i akakite. I muri iora, kua akamata akaou aia i te aere ki te au uipaanga. Kua tuatua mai teianei tangata ou i teia akakiteanga umere: “Kua kite au e ko te tumu maata no teia tu katoa kua akamatepongiia au i te pae vaerua. Kare au uaorai i apii ana. Ko te tumu tera i kore ei e rauka iaku kia maro atu i te timataanga. I reira kua akamata au i te tatau i Te Punanga Tiaki e te Awake! Kua aere marie mai toku maroiroi akaou anga i te pae vaerua e kua tama i toku oraanga. Kua riro teia ei akakiteanga meitaki ki te aronga tei akara mai i te au taui anga taku i rave. Kua papetitoia au, e i teianei kua mataora au.” Na teaa i oronga ki teianei tangata ou i te maroiroi kia akakore i tona tu paruparu i te pae kopapa? Kua rauka akaou iaia te maroiroi pae vaerua na tana apii putuputu i te Pipiria.

20. Akapeea ka raukai i tetai tangata ou kia kopae atu i to Satani au takino anga mai?

²⁰ Te au mapu Kerititiano, tei raro ake kotou i te takinga kinoanga i teia tuatau! Me kia arai atu kotou i ta Satani au takinga kino, ka tika kotou kia kai putuputu i te kai vaerua. Te tata taramo, i te akaraanga ko tetai tangata ou aia uaorai, kua kite i teia. Kua akameitaki aia ia Iehova no te oronga maianga i tana Tuatua, no reira ‘te tangata ou i tama i tona arataa.’​—Salamo 119:9.

Te Ngai ta te Atua e Arataki, ka Aru Tatou

21, 22. Eaa tatou ka tau kore ei kia manako e ko te aerenga no te tuatua mou e ngata roa?

²¹ Na Iehova i arataki mai i te iti tangata o Iseraela ki vao ia Aiphiti ki roto i te Enua Taputouia. Penei kua manakoia te aerenga tana i iki e tau kore e te ngata mei to te tangata ra manako. Kare i aere na te ngai ngoie ua i te akaraanga, e manga tikatika ua te aerenga i te pae o te Tai Mediterranean, kua taki atura Iehova i tona au tangata na runga i te aerenga ngata i te metepara ra. Inara, ko teianei e takinga meitaki ia i ta te Atua ra tuanga. Noatu rai e poto atu, te aerenga na te pae i te tai ka aere atu to Iseraela na roto i te enua o te au Philiseti riririri ra. Na te ikianga i tetai atu aerenga, kua akakore a Iehova i te aro vaveanga tona au tangata ma to te au Philiseti ra.

²² Aiteite katoa oki, te arataa ta Iehova e taki atu nei ia tatou i teia tuatau penei ka akaraanga ngata i etai atianga. I te epetoma taki tai, e papaanga ki ta tatou no te au angaanga Kerititiano, kapiti katoa te au uipaanga putuputuanga, te apii naau uaorai, e te tutu aere anga. Penei ka akaraanga ngoie atu etai atu arataa ra. Inara na to tatou aru anake i ta te Atua taki anga ka tae ei tatou ki te ngai ta tatou e rave pakari nei kia itae atu. No reira, e rave ua atu tatou i te apiianga puapinga maata mei ko mai ia Iehova e kia vai tamou marie ki runga i “te arataa tuatua-tika” e tuatau ua atu!​—Salamo 27:11.

Ka Rauka Ainei ia Koe te Akataka?

• Eaa tatou ka tau ei kia aere putuputu ki te au uipaanga Kerititiano?

• Eaa te ka rauka i te au metua kia rave ei tauturu ia ta ratou tamariki kia akarongo matakite i te au uipaanga ra?

• Eaa te o atura ki te riroanga e ko tetai tei akarongo meitaki?

• Eaa te ka tauturu ia tatou kia paupau i te au uipaanga ra?

[Tutu i te kapi 16, 17]

Na te aereanga ki te au uipaanga Kerititiano ka tauturu ia tatou kia tamou marie i te ra o Iehova ra i to tatou manako

[Au Tutu i te kapi 18]

E au ravenga tuketuke kia akapaapaa ia Iehova i te au uipaanga Kerititiano