Tetai Tangata Akatauanga Meitaki Tei Ariki i te Akatikatika Anga

“ZAMBIA kua Kai te au Korokataera e 30 Tangata i te Marama Okotai.” Ta te nutipepa i Aperika i ripoti i etai mataiti kua topa. Kia tau ki ta tetai tangata tei apii ra te animara tei opu ra i teianei au manu no te kimikimianga kite, “kua riro e 12 tangata kia mou i te korokataera okotai ki raro.” Ma tetai iku ririnui e nga tanga maroiroi maata, ka riro ra tetai korokataera ei animara akamataku!

I te akara anga na te taikuanga i te korokataera ei “Leviatana,” kua taangaanga Tei Anga ra i teia nei ei “ariki” oki aia i runga i te au puaka taae ngateitei kia apii atu i tona tavini ia Iobu i tetai apiianga puapinga maata. (Iobu 41: 1, 34) Kua tupu teia e vaitata i te 3,500 mataiti i topa i te enua o Uza ra, penei i tetai ngai i Arabia tokerau ra. I te akatakaanga i taua mea ora ra, kua tuatua te Atua kia Iobu: “Kare rava e toa e tikaʼi kia akaara atu: koai ra tei tika kia mou ki mua iaku?” (Iobu 41:10) E tika ra! Me te mataku ra tatou i te korokataera, mei teaa ra te tau kia mataku tatou i te tuatua patoi atu i Tei Anga maira i te reira! Kua akaari a Iobu i te ariki anga no teianei apiianga na te aakianga i tona ra tarevake.​—Iobu 42:​1-6.

Me ka taikuia a Iobu, ka tau tatou kia maara i tana akatauanga tiratiratu i te akakoromakianga timataanga. (Iakobo 5:11) Ko te tika, kua mareka a Iehova ia Iobu noatu rai i mua ake i te tamata anga ketaketa i tona akarongo ra. I ta te Atua manako anga, i taua tuatau ra e “kare oki ona e aite i runga i te enua nei, e tangata apa kore e te tiratiratu, i te mataku anga i te Atua, e te akaruke anga i te kino.” (Iobu 1:8) Ka tau teianei kia akakeu ia tatou kia apii maata atu no Iobu, e na te raveanga i te reira ka tauturu ia tatou kia kite e akapeea ka raukai ia tatou katoa kia akamareka i te Atua.

Pirianga ma te Atua na Mua

E tangata apinganui a Iobu. I te pae atu i te auro, e 7,000 ana mamoe, e 3,000 kamera, e 500 asini ua, e 1,000 puakatoro, e tetai pupu tavini maata rava oki. (Iobu 1:3) Inara kua irinaki a Iobu ia Iehova, kare i te apinganui. Kua akamanako aia: “E kua akariro au i te auro ei manako anga noku, e kua karanga au ki te auro mā meitaki ra, Ko koe toku irinaki anga; E kua rekareka au i te mea kua maata toku apinga, e no te mea kua maata tei raukai toku rima . . . , e riro katoa te reira ei ara e akautungaia e te akava: kua uuna ïa au i reira i te Atua i runga ra.” (Iobu 31:​24-28) Mei ia Iobu rai, ka tau tatou kia manako maata i tetai pirianga vaitata ma te Atua ko Iehova kia maata atu i te au apinga maata ra.

Au Akonoanga Tau Tikai ma te Au Tangata

Akapeea ta Iobu akono i tona au tavini? E kua kite ratou iaia e tau tikai e te ngoie ua kia aravei atu te akakitea maira e ta Iobu uaorai au tuatua: “I akavaavaa ana au i te tuatua a toku tavini tane, ma toku tavini vaine, i to ratou māro anga mai iaku; Akapeea ra au i reira kia tu mai te Atua? e kia atoro mai aia, naea au i te karanga anga atu kiaia?” (Iobu 31:​13, 14) Kua manako maata a Iobu i to Iehova aroa e no reira kua akono aroa atura i tona au tavini oki. Mei teaa ra tetai akatauanga meitaki, e maata oki no te aronga tei ia ratou te au turanga akaaere i roto i te putuputuanga Kerititiano! Ka tika kia tau tikai ratou, auraka e papakitai, e kia ngoie oki kia aravei atu.

Kua akaari katoa oki a Iobu i tona manako tau no te aronga i vao ake i tona ngutuare tangata. I te akakiteanga i tona manako tau no etai ke ra, kua tuatua aia; “Naringa au kua akangere i te ao i ta ratou inangaro, e kua mata nevaneva te vaine takaua iaku i te tapapa anga; . . . e kua apai au i toku rima ki runga i te matiroeroe, ka kite ei au i toku ra mana i te ngutupa ra: kia topa toku pakuivi i toku papa i reira, e kia aatiia toku rima i te ponaanga ra.” (Iobu 31:​16-22) Kia akamanako ra tatou i te aronga ngere ra ta tatou i kite i roto i te putuputuanga.

No tona manako noinoi kore i tona oa tangata ra, kua akono tau katoa a Iobu i te au tangata ke ra. No reira, kua rauka iaia kia tuatua: “Kare te tangata ke i moe ua i te arataa: kua kiriti au i toku ngutupa ki te tangata aere i te ara.” (Iobu 31:32) Mei teaa ra tetai akatauanga meitaki teianei no te au tavini o te Atua i teia tuatau! Me aere mai te aronga inangaro ou i te tuatua mou Pipiria ki te Are Uipaanga Patireia, penei na roto i ta tatou arikianga ngakau maoraora ia ratou ka tauturu ia ratou kia tere ki mua i te pae vaerua. Inara, ko te aronga akaaere tutaka aere e etai atu au Kerititiano ka umuumu katoa oki i to tatou aroa tau maoraora ra.​—1 Petero 4:9; 3 Ioane 5-8.

Kua rauka katoa ia Iobu te tu manako tika ki tona au enemi. Kare aia i rekareka i te tumatetenga penei ka tupu ki tetai tei makitakita maira kiaia. (Iobu 31:​29, 30) Kareka ra, kua mareka aia kia rave i te meitaki ki taua aronga tangata ra, mei tei akaraia ra i tona tu papaanga kia pure no nga tokotoru aronga akapumaana pikikaa ra iaia.​—Iobu 16:2; 42:​8, 9; akaaite ia Mataio 5:​43-48.

Viivii Kore i te Ainga

E tiratiratu a Iobu ki tona tokorua akaipoipo, kare i tuku i tona ngakau kia akatupu i tetai inangaro tika kore ki tetai atu vaine ke. Kua tuatua a Iobu: “Kua papau au i te koreromotu i oku nei mata: eaa ra au ka akara atu ei ki te paretenia? Kua vare toku ngakau i te vaine, e kua moe tapapa au i te ngutupa o toku oa; Kia riro taku vaine ei taviri sitona na tetai ke, e kia moeia aia e etai ke. E riro oki te reira e ara maata; e ara akautungaia e te aronga akava.”​—Iobu 31:​1, 9-11.

Kare e Iobu i tuku i te au inangaro tau kore kia taviivii i tona ngakau. Kareka ra, kua aruaru aia i tetai aerenga tuatua tika. No reira rai te Atua ko Iehova i marekai i teianei tangata tiratiratu tei maro atura i te au akavare anga tau kore ra!​—Mataio 5:​27-30

Manako Maata i te Pae Vaerua o te Pamiri

I etai atianga, kua akanoonoo nga tamaroa a Iobu i etai kaikaianga tei aere atura tana nga tamaroa e nga tamaine katoa oki. I muri ake i te otianga aua ra ra, e manako maata to Iobu e penei kua ara tana au tamariki kia Iehova na roto i tetai tu. No reira kua rave angaanga a Iobu, no te mea te tuatua ra te tataanga Tuatua Tapu e: “E ope akera nga rā kaingakai ra, kua tiki aturā Iobu e akatapu ia ratou, e ka tu akera aia i te popongi metua, e kua apai i te atinga karakaratio na ratou ravarai e pini ua ake: te karanga ra oki a Iobu, Peneiake kua ara taua au tamariki naku nei, e kua akakino i te Atua i to ratou ngakau.” (Iobu 1:​4, 5) Mei teaa ra ta teianei i akatupu ki runga i te au mema o to Iobu ra ngutuare tangata i tona manako anga e kia mataku tapu ratou ia Iehova e kia aaere i tona au aerenga!

I teia tuatau nei, ka tau te au upoko ngutuare tangata Kerititiano kia apii i to ratou au ngutuare tangata i te Tuatua a te Atua, i te Pipiria. (1 Timoteo 5:8) E tika ra e mea tau kia pure no te au mema o te ngutuare tangata ra.​—Roma 12:12.

Akakoromaki Tiratiratu Anga i te Timataanga

Kua kite te maataanga o te aronga tatau Pipiria i te au timataanga ketaketa tei tupu kia Iobu. Kua tuatua a Satani te Tiaporo ra e i raro ake i etai turanga ngata ka akakino a Iobu i te Atua. Kua ariki atu a Iehova i teianei akaaoanga, e kare i taroaroa kua apai mai a Satani i te tumatetenga ki runga ia Iobu. Kua ngaro atu tana au manu katoatoa. E kino atu oki, kua mamae aia i te taka keanga tana au tamariki katoa i te matenga. I muri poto ake, kua papa atura Satani ia Iobu ma tetai maki ee mamae kino mei tona take upoko ki te tapuae.​—Iobu, pene 1, 2.

Eaa te tupuanga? I te raurau anga tana vaine iaia kia akakino atu i te Atua, kua karanga atura Iobu: “Te tuatua nei koe mei tetai o te au vaine neneva e tuatua ra. E āriki ainei tatou i te meitaki mei ko mai i te Atua, e auraka tatou e āriki katoa i te kino?” Te kapiti katoa maira te tataanga Pipiria: “Kare rai te vaa o Iobu i ara i teia katoa nei au mea.” (Iobu 2:10) Ae, kua akakoromaki tiratiratu a Iobu e kua akapapu i te Tiaporo ei pikikaa. Kia aiteite tatou i te akakoromaki anga au timataanga e akapapu oki e ko ta tatou tavini anga ki te Atua kua akakeuia na te inangaro ma no Iehova ra.​—Mataio 22:​36-38

Kua Ariki Taakaaka i te Akatikatika Anga

Noatu rai e akatauanga meitaki a Iobu i te au tu e manganui, kare aia i tetai tangata apa kore. Kua tuatua aia: “E rauka iaai te mea viivii kore no roto i te mea viivii? Kare rava ïa.” (Iobu 14:4; Roma 5:12) No reira i ta te Atua ra tuatua anga e apa kore a Iobu, e tika teia i te tu e kua akono aia kia tau ki ta te Atua katoa i tapapa atu i tetai o tona au tavini apa ua ra e te ara oki. Mei teaa ra tetai tumu no te akamaroiroi anga!

Kua akakoromaki a Iobu i tona timataanga, inara kua akakite mai te reira i tetai tarevake. I te rongoanga i te au tumatetenga ravarai tei tupu ra kiaia, kua aere atura etai aronga e toru tei karangaia e au akapumaana iaia. (Iobu 2:​11-13) Kua karanga ratou e te akautunga ra Iehova ia Iobu no te raveanga i te au ara kino ra. E mea natura, kua mamae a Iobu no aua akaapa anga pikikaa ra, e kua kimi maroiroi aia kia rave i tetai paruru anga. Inara kua riro aia kia tau kore i te tautaanga kia akatika iaia uaorai. Eaa oki, kua tuatua a Iobu e e maata atu tona tuatua tika i to te Atua uaorai!​—Iobu 35:​2, 3.

No to te Atua aroa ia Iobu, kua akono Aia na tetai tangata ou e tou atu to Iobu apa. Te tuatua ra te tataanga: “Kua tupu akera te riri o Eliu . . . ia Iobu, no te mea kua akatika aia iaia uaorai kare te Atua.” Mei ta Eliu i kite: “I tuatua ana oki a Iobu e, E tuatua-tika taku: e kua akaruke te Atua i taku nei tuatua tau.” (Iobu 32:2; 34:5) Inara, kare a Eliu i kapiti atu ki aua aronga “akapumaana” e toru ra i te tuatua tarevake anga e te akautunga ra te Atua ia Iobu no tona au ara. Kareka ra, kua akakite a Eliu i te irinaki anga i te tiratiratu o Iobu, e kua ako atu aia iaia: “Tei mua ia [Iehova] te tuatua-tau: e tenana, e irinaki koe iaia.” E tika, ka tau a Iobu kia tapapa atu ia Iehova eiaa e tuatua tau kore ua i te paruru anga iaia uaorai. Kua akapapu atura Eliu kia Iobu: “Te tuatua-tau, te maata ua atura te tuatua-tika nana: kare [te Atua] e takingakino.”​—Iobu 35:14; 37:23.

Kua umuumuia to Iobu manakoanga kia akatikatikaia. No reira, kua oronga atura Iehova i tetai apiianga kiaia i to te tangata tu rikiriki ua me akaaiteia atu ma to te Atua ra tu maata. Kua tou atura Iehova i te enua, te tai, e te au rangi ki i te etu, te au manu, e etai atu mea umere e manganui tei angaia ra. I te openga, kua tuatua te Atua no te Leviatana​—koia te korokataera. Kua ariki taakaaka ua a Iobu i te akatikatika anga, e i teianei kua akanoo aia i tetai atu akatauanga.

Noatu rai e te meitaki ra ta tatou rave tavinianga ia Iehova, ka rave tarevake ra tatou. Me e kino tetai tarevake, penei ka akatikatika mai a Iehova ia tatou na tetai tu. (Maseli 3:​11, 12) Penei ko tetai tuatua tapu te ka ko mai i to tatou akava ngakau ka tomo mai ki te manako. Penei Te Punanga Tiaki me kare etai atu puka a te Taiate Punanga Tiaki ka tuatua mai i tetai apinga te ka akamatakite mai ia tatou i tetai apa. Me kare penei na tetai oa Kerititiano e tou aroa mai e kua apa tatou i te akono i tetai kaveinga Pipiria. Akapeea tatou me akono i taua akatikatika anga ra? Kua akakite maira Iobu i tetai vaerua mamae ngakau, i te na koanga: “Te akaviivii nei au iaku uaorai, e te tataraara nei au i raro i te one-pueu e te reu.”​—Iobu 42:6.

Na Iehova i Tutaki

Kua tutaki atura Iehova ia Iobu, na te tukuanga i tona tavini kia ora ua atu no etai 140 mataiti ke atu. I tera tuatau, kua rauka iaia e tere roa atu i tei ngaro ra iaia. E noatu rai kua mate a Iobu i te openga, te papu ra iaia tetai tuakaouanga ki roto i te ao ou a te Atua.​—Iobu 42:​12-17; Ezekiela 14:14; Ioane 5:​28, 29; 2 Petero 3:13.

Ka papu katoa ia tatou ta te Atua akaperepere e te akameitakianga me ka tavini tiratiratu tatou iaia e ka ariki katoa oki i te akatikatika anga akatumuia i te Pipiria te ka aere mai kia tatou. Ei tupuanga, ka rauka ia tatou te manakonako anga papu no te oraanga i ta te Atua akatereanga ou o te au mea nei. Ei puapinga maata atu oki, ka akangateitei tatou i te Atua. Ka tutakiia to tatou tu akono tiratiratu e ka kapiti atu ki te akapapuanga e te tavini ra tona au tangata iaia, kare no te au tumu noinoi, mari ra no te inangaro ngakau katoa ra. Mei teaa ra te marekaanga no tatou kia akariro kia rekareka te ngakau o Iehova, mei ta Iobu tiratiratu i rave ra, tei ariki taakaaka ua i te akatikatika anga!​—Maseli 27:11.

[Au Tutu i te kapi 26]

Kua akaari a Iobu i te manakoanga aroa no te au matiroeroe, te au vaine takaua, e etai atu

[Au Tutu i te kapi 28]

Kua tutaki meitakiia a Iobu no te ariki taakaaka anga i te akatikatika anga