Akamaru a Iehova i Tona Mamae

Akamutu te tuatua a teia pupu tane. Ka rongoia te tangi anga o te matangi mei te metepara Arapia. Pou ta Iobu tuatua, kua roiroi ratou i te tauetono. Akamanako ana iaia e akara ra ma te mata tumatuma i tona toko toru taeake ko Eliphaza, Biladada e Zophara—mei te mea e te inangaro ra aia kia tuatua mai ratou. Inara kua akara ua ratou ki raro, te kite anga e kua puapinga kore ta ratou tuatua kikite, “au tuatua tarevakaua” e te akakino anga ia Iobu. (Iobu 16:3) I teianei, kua tauta a Iobu i te paruru i tona tu tiratiratu.

Penei kua manako a Iobu e ko tana apinga toe, ko tona tu tiratiratu. Ngere aia i tana apinganui, kua mate pouroa tana tai ngauru tamariki, kare tona au oa e te kopu tangata i tauturu iaia, e te mea openga kua tu aia i te maki kino. Uri kerekere tona pakiri, kua vaîia tona kopapa ki te iro, e te repo e kua pe. Aunga kino tona aʼo. (Iobu 7:5; 19:17; 30:30) Noatu ra, na te tuatua akakino a teia toko toru tangata i akatupu i te riri maata kia Iobu. Kua tauta aia i te akapapu e kare aia i apa. Te oti anga ta Iobu tuatua, kua noo muteki ua ratou. Kua akamutu ta ratou au tuatua akakino. Inara, kua mamae rai a Iobu. Anoano maata aia i te tauturu!

Ka mārama tatou i te tumu i manako tarevake ei a Iobu. Kua anoano aia i te aratakianga e te akatikatikaanga. Inangaro aia i te tuatua akapumaana e te akamaroiroi tei kore te nga tangata toko toru i rave ana. Kua kite ana koe i tetai atianga i anoano ei koe i te akamaroiroi e te akapumaana? I maromaroa ainei koe i te aronga taau i manako e e oa tikai noou? Me apii tatou akapeea te Atua ko Iehova i te tauturu anga i tona tavini ko Iobu, akapeea a Iobu te ariu atu anga, ka rauka mai te manakonakoanga e te tauturu maata no tatou.

E Tangata Ako Meitaki e te Pakari

Ka kite tatou i te tupuanga poitirere i roto i te tua o Iobu. Tu ua ra te tangata i te pae mai, ko te mapu ko Eliu. Kua noo vaitata aia kia ratou i te akarongo muteki i te aronga pakarikari e tauetono ra. Kare aia i mareka ana.

Kua riri a Eliu ia Iobu. Kua mamae aia i te akara atu i teia tangata tuatua tika ko Iobu “no te mea kua akatika aia iaia uaorai kare i te Atua.” Noatu rai, kua tangi a Eliu ia Iobu—kite aia i to Iobu mamae, tona tu ngakau tae, e te inangaro i te akoanga takinga meitaki e te pumaana. No reira a Eliu i mareka kore i teia toko toru oa pikikaa! Kua akarongo aia ia ratou e akakino ra ia Iobu, e akaparuparu ra i tona akarongo, tu ngateitei e tona tu tiratiratu. Tei kino maata, kua akaari mai ta ratou tuatua akakino e e kino te Atua. E āka inangaro to Eliu i te tuatua!—Iobu 32:2-4, 18.

“Te vai ou nei au,” i karanga ai aia, “e kua pakari rava kotou: i taitaiaʼi au, e kua mataku akera i te akakite atu i toku manako ia kotou.” I teianei, kare aia e noo muteki ua. Kua na ko aia: “Kare oki tei te aronga nunui te kite: e kare oki te aronga taito i kite i te tuatua-tau.” (Iobu 32:6, 9) Akamata i reira a Eliu i tana tuatua i te akapapu anga i te mea mou. E tuke takiri tana tuatua ki ta Eliphaza, Biladada, e Zophara. Kua tuatua maru aia kia Iobu e kare aia e tuatua taakaaka iaia e kare katoa e akakino iaia. Akangateitei aia ia Iobu na te tuatua anga i tona ingoa e te akakite kiaia e kare teia aronga i akangateitei iaia.a Ma te tu akaaka, karanga aia: “E tenana, e Iobu, ka akarongo mai koe i taku tuatua nei.”​—Iobu 33:1, 7; 34:7.

Kua ako pakari a Eliu ia Iobu: “Koia tika rai, i tuatua ana koe i roto i oku nei pukai taringa, . . . E viivii kore toku, kare e kino, kare aku ara; kare oki e kino i roto iaku: I na, te kimi ra aia i te tapepe anga iaku.” Kua akataka tika atu a Eliu i te tumu o te manamanata na roto i teia uianga: “E mea tika ainei teia i toou na manako, taau i karanga ra e, Kua maata te tuatua-tika naku ra i ta te Atua?” Kare aia e āriki i teia manako tarevake. “I na, kare koe e akatikaia i tenana tuatua,” i karanga ai teia tangata ou. (Iobu 33:8-12; 35:2) Kite a Eliu i to Iobu riri otooto no te au tumatetenga tei tupu kiaia e te takinokino anga a tona au oa pikikaa. No reira kua tuatua a Eliu kia Iobu e: “Te vai ra te riri otooto, kia matakite, ko te rave ke aea aia ia koe i te tainga okotai.”​—Iobu 36:18.

Akakite Mai a Eliu i to Iehova Aroa Takinga Meitaki

Te mea maata, kua paruru ta Eliu tuatua i te Atua ko Iehova. Akakite aia i tetai tuatua mou puapinga i te na ko anga e: “Kia atea ke atu te tuatua kino i te Atua; e te ara i te Mana katoatoa . . . kare oki te Mana katoatoa e taruri ke i te tuatua-tau.” (Iobu 34:10, 12) Ei akaraanga no to Iehova tuatua tau e te aroa ua, kua akamaara a Eliu kia Iobu e kare a Iehova i akautunga ana ia Iobu no tana tuatua tarevake e te akangateitei kore. (Iobu 35:13-15) Kare katoa a Eliu i karanga ana e tei iaia te au pauanga, mari ra kua tuatua akaaka aia: “I na, e maata te Atua, kare e kitea e tatou.”​—Iobu 36:26.

Noatu e ako pakari ta Eliu i oronga, kua rave aia i te reira ma te takinga meitaki. Tuatua aia no te manakonakoanga manea e ka akaora a Iehova i to Iobu maki. Akakite te Atua ki tona tavini tiratiratu: “E maata oki te poria o tona ra kopapa i to te tamariki ra: e oki aia ki te au rā o tona ou anga ra.” Tetai akaou akaraanga no to Eliu tu takinga meitaki koia oki: Kare aia e ako ua ia Iobu, mari ra kua pati ia Iobu kia tuatua e kia pau iaia. Karanga aia: “E tuatua koe, te inangaro nei oki au i te akatika ia koe.” (Iobu 33:25, 32) Kare ra a Iobu i pau mai. Penei kare ona manako i te paruru iaia mei teia akoanga akamaroiroi e te takinga meitaki. Peneiake kua aue aia no teia tuatua aroa.

E maata ta tatou ka apii mei teia nga tangata akarongo. Ka kite tatou mei ia Eliu akapeea me ako e me akapumaana i te aronga e mii ra. Kare te oa mou e tāpupu i te akakite i tetai tarevake me kore te aerenga mako kore a tetai. (Maseli 27:6) Ka inangaro tatou kia riro ei oa mei tera te tu, te takinga meitaki e te akamaroiroi i te aronga e mamae ra, noatu ka tuatua akakino mai ratou. E me anoano tatou i te akoanga, te akamaara maira to Iobu akaraanga e kia akarongo akaaka ua tatou i te ako eiaa e akapae i te reira. Ka anoano tatou pouroa i te akoanga e te akatikatikaanga. Me āriki tatou i te ako, ka ora tatou.—Maseli 4:13.

“Na Roto i te Puaioio”

Te tuatua anga a Eliu, kua taiku putuputu aia i te matangi, te tiao rangi, te mangungu e te uira. Karanga aia no Iehova: “Ka akarongo marie ana i te kokokina anga o tona reo, e te aruru i riro mai no roto i tona vaa.” Muri akera kua taiku a Eliu i “te puaioio.” (Iobu 37:2, 9) I te akaraanga, iaia e tuatua ra te akamata ra tetai uriia e te pakari atura te matangi. I te openga, kua tupu te puaioio. E oti kua tupu tetai mea umere rava. Kua tuatua mairā Iehova!—Iobu 38:1.

Me tatau tatou i te puka o Iobu, mea umere tikai te tatau i te au pene no runga i ta Iehova i tuatua kia Iobu. Mei te mea atura e puaioio tuatua mou ïa te pupui ra i te au tuatua puapinga kore, te au tuatua pikikaa a Eliphaza, Biladada e Zophara. I muri roa mai i tuatua ai a Iehova ki teia toko toru tangata. Akamou ua aia i tona manako ki runga ia Iobu; kua tuatua tika atu aia ki tona tavini akaperepere mei tetai metua rai e ako ra i tana tamaiti.

Kua kite a Iehova i to Iobu mamae. E kua tangi aia i tona tavini, mei tetai metua rai e tangi ra me rokoia tana tamariki akaperepere e te mamae. (Isaia 63:9; Zekaria 2:8) Inara, kite katoa aia e “te tuatua anake ra kare i kite ra” a Iobu e te akamaata atura i tona au manamanata. No reira kua akatikatika a Iehova ia Iobu na te ui i te au uianga kiaia: “Iea koe iaku i akatumu i te enua nei? ka akakite mai na, peneiake te kite na koe.” I te tuatau taito i angaia te au mea ravarai, “ka imene katoatoaʼi te au etu popongi” te au tamariki angera a te Atua ma te rekareka i te au mea angaia. (Iobu 38:2, 4, 7) Kare a Iobu i kite ana i teia.

Tuatua ua atu a Iehova no runga i tana au mea i anga. Mei te mea e kua oronga aia i tetai akaariari anga i te au apii taieni no te au natura, kapiti mai te akataka anga i te akara etu, te apii i te au mea ora, te enua, e te tu e angaanga ra te au mea tini ravarai. Mea maata ta Iehova i akataka ko te au tu manu tukeke tei matauia i to Iobu ngai—te riona, te orebi, te puakanio momoavao, te atini momoavao, te puakatoro taetaevao, te renanima, te oroenua, te neze, te aeto, a Behemota (penei ko te hippopotamus), e te mea openga ko Leviatana (penei e araketa). Ka akamanako ana i te tikaanga ngateitei kia akarongo ki te ako no runga i te ao natura tei orongaia e Tei Anga i te ao katoa e pini ua ake!b

Apiianga no te tu Akaaka e te Aroa

Eaa te akakoroanga o teia? Kua anoanoia a Iobu kia akaaka. Na te kopekope anga e kua takinokinoia aia e Iehova, te akamaata ra a Iobu i tona uaorai mamae, e te akamamao atura iaia mei tona Metua aroa. No reira kua uiui a Iehova kia Iobu teiea aia te angaia anga teia au mea mekameka e me kua rauka ia Iobu, te angai, akatere, me kore te akararata i te au manu Tana i anga. Me kare e rauka ia Iobu te akaaere i te au mea rikiriki ta Iehova i anga, koai i reira aia te akava i Tei Anga mai? Kare ainei e teitei roa ake to Iehova au aerenga e tona au manako i to Iobu manako kotingaia?

Pouroa ta Iehova tuatua, kua akaari i tona akaperepere maata ia Iobu. Mei te mea e te akamārama ra a Iehova kia Iobu: ‘E taku tamaiti, me naku i anga e i akono i teia au mea, i toou manako kare ainei au e akono ia koe? Ka akaruke tikai au ia koe, ka apai ke i taau tamariki, toou paruruanga, e toou oraanga kopapa? Kare ainei ko Au anake ka akaoki i taau i ngere e te akamaru i toou mamae ngakau?’

E rua taime kua pau a Iobu i ta Iehova au uianga. Kare aia i akakino ana, e akatika iaia uaorai, e te maani kotoeanga. Kua āriki akaaka aia e e iti ua tona kite, e kua tataraara i tana tuatua tarevake. (Iobu 40:4, 5; 42:1-6) I konei, te kite ra tatou i to Iobu akarongo ketaketa. Noatu te au mea pouroa tana i akakoromaki, kua vai rai tona akarongo ketaketa i roto ia Iehova. Kua āriki aia i ta Iehova akoanga e kua taui i tona tu. Penei ka ui tatou kia tatou uaorai e: ‘E tu akaaka ainei toku i te āriki i te akatikatika anga e te akoanga?’ Ka anoano tatou pouroa i teia. Me āriki tatou i te ako, te aru ra tatou i te akarongo o Iobu.

“Kare Oki ta Kotou Tuatua i Tau Iaku”

Teianei e apinga ta Iehova i rave ei akapumaana ia Iobu i tona mamae. Te tuatua anga Aia kia Eliphaza, te akara anga koia te tangata metua i te toko toru oa pikikaa, karanga a Iehova: “Kua tupu toku riri ia koe, e nga oa katoa noou ra toko rua; kare oki ta kotou tuatua i tau iaku, mei ta toku tavini mei ta Iobu.” (Iobu 42:7) Akamanako ana i teia au tuatua. Te karanga ra ainei a Iehova e e pouroa te au tuatua a teia toko toru tangata e mea pikikaa e kare takiri a Iobu tuatua tarevake? Kare.c Inara, e tuke takiri to Iobu tu ki tona aronga akaapa. Kua ati ngakau a Iobu, kua mii aia e kua mamae aia i ta ratou au akaapa anga pikikaa. No reira, ka mārama ua tatou i te tumu i tuatua tarevakaua aia i tetai au atianga. Inara, kare a Eliphaza e tona nga oa i akamaru mai i tona tumatetenga. No te paruparu i to ratou akarongo, kua tuatua kino ratou ma te akatietie. Kua akakino ratou i te tu tiamā o Iobu, e kua akakino katoa ratou ia Iehova, kapiki anga iaia ei Atua riririri e te kino!

No reira rai a Iehova i umuumu ei i te tutaki mei ia ratou. Kua anoanoia ratou kia akaatinga e itu puakatoro e itu mamoe toa—e atinga maata, no te mea i muri mai i raro i te Ture a Mose kua akanooia te puakatoro ei atinga na te taunga maata me kua apa te iti tangata no tana ara i rave. (Levitiku 4:3) Ko te manu oko maata rava atu teia ka akaatingaia i raro i te Ture. E tetai, akakite a Iehova e ka āriki ua aia i ta ratou atinga me pure a Iobu na mua no ratou.d (Iobu 42:8) Pumaana iora to Iobu ngakau i te akatikaia anga aia e tona Atua e te kite i ta Iehova tuatua tau i te autu anga!

Papu ia Iehova ka rave a Iobu i tei patiia kiaia, kia akakore i te ara a te aronga akakino iaia. Kua rave akapera a Iobu i ta tona Metua i akaue. (Iobu 42:9) Kua akapapu mai tona akarongo i tona tu tiratiratu. E kua akapapa teia i te mataara no te au akameitakianga maata roa atu i roto i to Iobu oraanga.

“Kua ki te Atu i te Aroa e te Takinga-Meitaki Maata”

Akaari a Iehova kia Iobu e “kua ki te Atu i te aroa e te takinga-meitaki maata.” (Iakobo 5:11) Akapeea ra? Akaora a Iehova i to Iobu maki. Akamanako i tei tupu kia Iobu te kite anga aia e “maata oki te poria o tona ra kopapa i to te tamariki ra” mei ta Eliu i totou! Kua kapiti akaou mai tona kopu tangata e te au oa kiaia, aroa atura iaia ma te apinga aroa. Akaoki akaou a Iehova i to Iobu apinganui, e taki rua taime te maata i tana i rauka i mua ana. Akapeea tona mamae ngakau—te takake anga tana tamariki? Kua pumaana a Iobu e tana vaine te anau anga e tai ngauru akaou tamariki! E kua akaroa atu a Iehova i to Iobu oraanga. Kua ora a Iobu e 140 mataiti, e kua kite aia i te a uki o tana uanga. Tatau tatou: “Mate iorā Iobu kua ruaine, e ma te iu i tona ra puke rā.” (Iobu 42:10-17) E i roto i te Parataito, ka taokotai akaou a Iobu e tana vaine ki to raua ngutuare tangata, kapiti mai te tai ngauru tamariki ta Satani i tamate.—Ioane 5:28, 29.

Eaa a Iehova i tutaki ei ia Iobu? Pau mai te Pipiria: “Kua kite kotou i te akakoromaki o Iobu.” (Iakobo 5:11) Kua akakoromaki a Iobu i te au tumatetenga e ngata ia tatou te tamanako. Te tuatua “akakoromaki,” te akakite maira e kua ora mai a Iobu mei te au timataanga kino. Kua akakoromaki aia ma te akarongo e te inangaro mou ia Iehova. Kare aia i akamoupuku, kua akakore ua aia i te ara a te aronga tei akakino mai iaia. E kua mou piri aia i tona manakonakoanga e kua akaperepere i tona tu tiratiratu.—Iobu 27:5.

Ka anoanoia tatou kia akakoromaki. Papu e ka timata a Satani i te akaparuparu ia tatou mei tana i rave kia Iobu. Inara me akakoromaki tatou ma te akarongo, me vai akaaka ua, me akakore i te ara a etai ke, e te tauta ua atu kia vai tiratiratu, ka ketaketa roa to tatou manakonakoanga. (Ebera 10:36) Ka riri a Satani me akarekareka maata tatou i te ngakau o Iehova, tei aroa mai ia tatou, me aru tatou i te akarongo o Iobu!