‘E Akaora ia Koe e te Aronga e Akarongo Mai ia Koe’

“Kia matakite ia koe, e taau e apii ra; . . . tei te akapera oki e oraʼi koe, e te aronga katoa e akarongo mai ia koe ra.”​—1 TIMOTEO 4:16.

1, 2. Eaa te akakeu ra i te au Kerititiano mou kia rave tamou marie i ta ratou angaanga akaoraanga?

I TETAI oire taka ke atura i te pae tokerau o Thailand, kua tauta nga tokorua akaipoipo ko nga Kite o Iehova ra kia akakite i to raua tu karape i te reo ou ta raua i tuatua ki nga mema o tetai kopu o te maunga ra. Kia raukai i te akakite i te tuatua meitaki o te Patireia o te Atua ki te au tangata o taua oire ra, koi akamata ua atura aua nga tokorua nei i te tuatua i te reo Lahu.

² “E mea ngata kia akataka i te rekareka e te merengo anga i rauka ia maua, i te raveanga angaanga i roto i teianei aronga tangata marekaia,” ta te tane i akataka mai. “Te manako ngakau tikai ra maua i te kapiti atu anga ma te akatupu anga ia Apokalupo 14:​6, 7, i te akakitekiteanga i te evangeria ‘ki te pa enua katoa e te au kopu e te au reo.’ E tokoiti ua te au kotinga i rotopu i te au enua te toe ra kare te tuatua meitaki i tomo ake, e ko teia tikai io ratou ra. E au apii anga Pipiria ta maua te vaitata ra te kore e oti ia maua te akono.” Te taka meitaki ra, te manakonako nei teianei nga tokorua kia akaora kare ia raua anake ra mari ra i te aronga katoa oki tei akarongo atura kia raua. Ei au Kerititiano kare ainei tatou e manakonako katoa kia rave i te reira?

“Kia Matakite ia Koe”

3. E raukai kia akaora ia etai ke ra, eaa ta tatou ka tika kia rave na mua?

³ Kua ako te apotetoro ko Paulo ia Timoteo, “Kia matakite ia koe, e taau e apii ra,” e te tau ra teia ki te au Kerititiano. (1 Timoteo 4:16) E tika ra, kia tauturu ia etai ke ra kia rauka te ora, ka tika tatou kia matakite ia tatou uaorai na mua. Akapeea ka raukai ia tatou te rave i teianei? Ko tetai apinga, ka tika tatou kia matakite i te tuatua te ora nei tatou. Kua oronga mai a Iesu i tetai akairo e maata ona tuanga kia kite ei tana au pipi i naea “te openga o teianei ao,” i tae mai ei. Inara, kua tuatua katoa maira Iesu e kare tatou e kite tikai a ea e tae mai ei te openga. (Mataio 24:​3, 36) Eaa ta tatou ka tau kia rave no taua tumu ra.

4. (a) Eaa te tu manako tau na tatou kia akono no te tuatau te toe nei i teianei akatereanga? (e) Eaa ta tatou tu manako ka tau kia kopae ke?

⁴ Penei ka ui tatou tataki tai, ‘Te taangaanga ra ainei au i tetai ua atu tuatau te toe nei no teianei akatereanga kia orai au uaorai e te aronga katoa oki e akarongo mai kiaku? Me kare te manako ra ainei au, “I te mea kare tatou i kite a ea tikai e tae mai ei te openga, kare ua au e tamanako atu iaku uaorai ma te reira”?’ E tu manako kino taua mea openga nei. Te aere patoi atura i ta Iesu i akamaroiroi atu: “Kia vai teateamamao rai kotou, no te mea, ei te ora manako koreia e kotou, e tae mai ei te Tamaiti a te tangata.” (Mataio 24:44) E tika rava kare teianei i te tuatau e kore ei tatou e maroiroi no te tavini ia Iehova me kare kia akara atu ki teianei ao no te tinamou anga me kare merengo anga oki.​—Luka 21: 34-36.

5. Eaa te au akatauanga ta te Au Kite o Iehova i mua ake i te akonoanga Kerititiano ra i akanoo?

⁵ Tetai mataara ka rauka ia tatou kia akakite e te matakite ra tatou ia tatou uaorai koia oki na te akakoromaki anga tiratiratu ei au Kerititiano. Kua akakoromaki maire to te Atua au tavini i te tuatau kua topa, noatu me te tapapa ra ratou i te akaora anga i reira tikai e me kare. I muri ake i te akakiteanga i te au akatauanga a taua au kite anga i mua ake i te tuatau Kerititiano mei ia Abela ra, ia Enoka, ia Noa, ia Aberahama, e ia Sara oki, kua akakite a Paulo: “Kare rai i rauka tei tuatuaia maira, kua akara i taua au mea ra i te atea ke, e kua akarongo tikai, e kua āriki marie, kua aaki ua e, e tangata ke ke ratou e te tuitarere ua i teianei ao.” Kare ratou i tuku ua ki tetai inangaro no te oraanga ngoie ua, kare katoa oki ratou i riro ki te au taomi anga akono tau kore koropini ia ratou ra, mari ra kua akara akatenga atu ratou ki mua ‘i te rauka anga tei tuatuaia maira.’​—Ebera 11:13; 12:1.

6. Akapeea te akatupu anga i te manako no te ora o te au Kerititiano o te anere mataiti mua ra, i to ratou akono no te ora anga?

⁶ Kua akara katoa te au Kerititiano o te anere mataiti mua ra ia ratou uaorai ei “tuitarere” i teianei ao. (1 Petero 2:11) Noatu rai i muri ake i te akaora angaia i te akapouanga ia Ierusalema ra i te 70 T.N., kare te au Kerititiano mou i akamutu te tutuanga me kore ka topa ki muri ki roto i te oraanga taito o te ao nei. Kua kite ratou e te tatari maira tetai ora mekameka no te aronga tei vai tiratiratu ra. Ko te tika, e tae roa mai ki te 98 T.N., kua tata te apotetoro ko Ioane: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”​—1 Ioane 2:​17, 28.

7. Akapeea te akaari anga a te Au Kite o Iehova ra i te akakoromaki anga i teianei au tuatau nei?

⁷ I teianei au tuatau nei kua akakoromaki katoa te Au Kite o Iehova i te angaanga Kerititiano, noatu rai kua kite ana ratou i te takinga kinoanga ketaketa. Kua riro ainei ta ratou akakoromaki anga ei puapinga kore? Kare rava ia, no te mea kua akapapu mai a Iesu kia tatou: “Kareka te tāpu tikai e tae ua atu ki te openga ra, ka ora ïa,” me ko te openga te reira o te akatereanga taito nei me kare ko te openga o te oraanga o tetai i teianei. I te tuakaouanga, ka maara a Iehova e ka tutaki oki i tona au tavini tiratiratu katoa tei mate ra.​—Mataio 24:13; Ebera 6:10.

8. Akapeea tatou i te akaari anga e te ariki ra tatou i te akakoromaki anga o te au Kerititiano i te tuatau kua topa ra?

⁸ Pera katoa oki, te mataora nei tatou e kare te au Kerititiano tiratiratu kua topa ra i manako anake i to ratou uaorai ora. E mea tika e ko tatou tei kite nei i te Patireia o te Atua na roto i ta ratou au tauta anga te akameitaki nei e i akakoromaki ratou i te apaianga i ta Iesu akauenga: “E teianei, ka aere kotou, e akariro i to te pa enua katoa ei pipi; . . . ma te apii atu ia ratou, kia akono i te au mea katoa taku i akaue atu kia kotou.” (Mataio 28:​19, 20) Me te vai tuera ua ra taua tika ra kia tatou, ka rauka ia tatou kia akakite i to tatou akameitaki anga na te tutuanga ki etai atu kare ra i rongo ake i te tuatua meitaki. Inara, tutuanga ko te takianga mua ua ia ki te akariroanga tangata ei au pipi.

‘E Matakite i Taau Apiianga’

9. Akapeea ka raukai i te tu manako papu kia tauturu ia tatou kia akamata i te au apii Pipiria ra?

⁹ Te kapiti ra ta tatou angaanga kare i te tutuanga anake mari ra i te apiianga katoa oki. Kua akaue maira Iesu ia tatou kia apii i te au tangata kia akono i te au mea katoa tana i akaue maira. E tika, i etai ngai, e tokoiti ua te anoano ra kia apii no Iehova. Inara no tetai manako anga e puapinga kore taua ngai ra ka rauka kia akaparuparu i ta tatou au tauta anga kia akamata i te au apiianga Pipiria. Ko Yvette, tetai painia i tetai ngai ta etai i tapa e uua kore, kua kite e ko etai tei aere atu ki taua ngai ra, kare rai i manako e puapinga kore, kua akamata i etai au apii anga Pipiria. I muri ake i tona manako anga maata atu te papu anga, kua kitea katoa e Yvette te au tangata tei anoano ra kia apii i te Pipiria.

10. Eaa ta tatou tuanga tumu anga ei au orometua apii Pipiria?

¹⁰ Ko etai Kerititiano penei ka ekoko i te oronga kia apii i te Pipiria ma te aronga e inangaro ra no te mea kare ratou e manako ana e ka rauka ia ratou kia akono i tetai apiianga. E tika, e tuke tuke to tatou au turanga no te kite. Inara kare tatou e anoanoia kia teitei te tu karape e raukai kia riro ei apii i te Tuatua a te Atua. E ririnui te tuatua ma no te Pipiria mai, e kua tuatua oki a Iesu e ka kite te aronga mei te mamoe rai i te reo o te Tiaki mou ra me rongo atu ratou i te reira. Ko ta tatou angaanga i reira, kia oronga ua i te tuatua a te Tiaki Meitaki ra, koia Iesu, kia taka meitaki i te ka rauka ia tatou.​—Ioane 10:​4, 14.

11. Akapeea koe e meitaki atu ei i te tauturuanga i tetai tei apiiia ra i te Pipiria?

¹¹ Akapeea ka rauka meitaki atu ei ia koe te oronga i te tuatua a Iesu? Ei akamataanga, e akamatau kia koe uaorai ma te tuatua a te Pipiria no te tumu tei uriuri manakoia ra. Ka tau kia kite koe uaorai i te tumu na mua e raukai ia koe kia apii atu i te reira kia etai atura. Pera katoa, e tauta kia tamou marie i tetai reva ngateitei inara kia oaoa ua i te tuatau e apii ra. Te aronga apiipiiia ra, kapiti katoa i te aronga ou roa ra, ka meitaki atu te kite me ka maru ua e kia akaari te orometua ra i te ngateitei kia ratou e te takinga meitaki oki.​—Maseli 16:21.

12. Akapeea koe e papu ei e te kite ra tei apiiia i taau e apii atura iaia?

¹² Ei orometua, kare koe e anoano kia oronga ua i te au tumu na tei apiipiiia ra kia tuatua taokioki akaou. E tauturu iaia kia kite marama i tana e apii ra. Te kite apiianga o tetai tei apiiia ra, te tupu anga kite i te oraanga, e te matauanga ma te Pipiria ra ka akatupu i tona kite anga i taau i tuatua ana. No reira, penei ka ui ia koe uaorai, ‘Te mou ra ainei iaia te tumu puapinga o te au tuatua tapu tei tataia ra i te apinga apiiia ra?’ Ka rauka ia koe i te kika mai iaia ma te au uianga kare ra e rauka kia pauia ma tetai tuatua ae ua me kore e kare mari ra te umuumuia ra tetai akataka anga. (Luka 9:​18-20) I tetai pae, te ekoko ra etai aronga apiipiiia i te ui atu ki tetai orometua. Na reira, penei ka aere ua ratou ma te koreanga e kite tikai i te aiteanga o ta ratou e apiiia ra. E akamaroiroi atu i tei apiipiiia ra kia ui atu i te au uianga e kia akakite atu kia koe me ka kore aia e kite meitaki i etai au tumu.​—Mareko 4:10; 9:​32, 33.

13. Akapeea ka raukai ia koe te tauturu i tei apiiia ra kia riro ei orometua?

¹³ Tetai akakoro anga puapinga maata no te akonoanga i tetai apii Pipiria, kia tauturu i tei apiipiiia ra kia riro ei orometua. (Galatia 6:6) No tera tumu, ei manako akaou anga i taau apii, penei ka tau koe kia pati iaia kia akataka mai i tetai tumu kia koe na te tu mama ua, mei te mea rai e te akataka atura aia ki tetai te akarongorongo maira i te reira no tetai taime mua ra. A muri akera, me riro mai aia kia tau kia rave i te angaanga orometua, ka rauka ia koe kia pati atu iaia kia kapiti mai kia koe i te tutu aere. Penei ka manako ngakau pumaana ua aia kia angaanga kapiti kia koe katoa, e na taua tupuanga ra e tauturu iaia kia tupu i te irinaki anga tae roa kia papa aia no te aere ki vao i te angaanga orometua ko ia anake ua ra.

E Tauturu i Tei Apiipiiia ra kia Riro ei Oa no Iehova

14. Eaa taau akakoro anga maata ei orometua ra, e eaa te ka tauturu kia autu i te raukaanga te reira?

¹⁴ Te akakoro anga maata a te orometua Kerititiano ravarai kia tauturu i tei apiiia ra kia rauka te oa anga ma Iehova. Ka tupu teia kia koe kare na te au tuatua anake mari ra na taau akatauanga katoa oki. E tupuanga ririnui ta te apiianga na te akatauanga ki runga i te ngakau o te aronga apiipiiia ra. E maata atu ta te au angaanga ka akakeu i ta te au tuatua, e maata oki me ka rave i te akanooanga au tu akono tau e te akauruanga maroiroi ki roto i tei apiipiiia ra. Me ka kite aia i taau au tuatua e te au angaanga tei tupu mai no tetai pirianga meitaki ma Iehova ra, penei ka tere atu tona akakeuia anga kia tatanu i taua pirianga ra nona uaorai.

15. (a) Eaa ra i puapinga maatai e kia akatupu tei apiiia ra i t akakeu anga tika no te tavinianga ia Iehova? (e) Akapeea e raukai ia koe kia tauturu atu i tei apiiia ra kia rave tamou marie i te aerenga ki mua i te pae vaerua?

¹⁵ Ka anoano koe i tei apiiia ra kia tavini ia Iehova kare no tona kore ua e anoano kia akapouia ia Aramakito mari ra no te mea te inangaro ra aia iaia. Na te tauturuanga iaia kia akatupu i taua akakeu anga ma ra, te patu ra koe ki roto iaia i te au apinga kare e ka i te ai te ka ora atu i te au timata anga no tona akarongo ra. (1 Korinetia 3:​10-15) Ko te akakeuanga tarevake, mei tetai anoano ra kia aiteite atu kia kore me kare ki tetai ke atura, kare e oronga atu kiaia i te ririnui kia arai atu i te au mana tau kore i te Kerititiano kare katoa oki i te maroiroi kia rave i te tika. Kia maara e, kare koe e riro ei puapii mutu kore nona. I te mea tei ia koe te tuatau tika, ka rauka ia koe te akamaroiroi atu iaia kia akapiri vaitata atu kia Iehova na te tatauanga i te Tuatua a te Atua i te au ra ravarai e te tamanakoanga oki i te reira. Na roto i teia tu ka rave tamou marie aia kia “tāpu meitaki i te akonoanga tuatua tika” no te Pipiria mai e te au puka akatumuia ki runga i te Pipiria ra i muri roa ake i te oti anga taau apiianga ma ia katoa ra.​—2 Timoteo 1:13.

16. Akapeea e raukai ia koe kia apii i tei apiiia ra kia pure mei tona ngakau maira?

¹⁶ Ka rauka katoa ia koe te tauturu atu i tei apiiia ra kia akapiri vaitata atu kia Iehova na te apiianga iaia kia pure mei te ngakau maira. Akapeea koe me rave i te reira? Penei ka rauka ia koe kia taki iaia ki te pure akaraanga a Iesu ra, pera katoa oki ki te au pure e manganui no te ngakau maira tei tataia ki roto i te Pipiria, mei to te au taramo rai. (Salamo 17, 86, 143; Mataio 6:​9, 10) Kapiti katoa oki, me akarongo atu taau e apii ra ki taau pure akamata anga e te akaoti anga i te apii, ka kite aia i toou au manako ngakau kia Iehova. Na reira, ka tau taau au pure kia akaata tamou marie i te ngakau tae e te maoraora oki, pera katoa ei tu tau i te pae vaerua e te manako ngakau oki.

Raveanga kia Akaora i Taau Tamariki

17. Akapeea ka raukai i te au metua te tauturu i ta ratou tamariki kia aere na runga i te arataa ki te ora?

¹⁷ Inara, i roto i te aronga ta tatou ka anoano kia akaora, ko te au mema o to tatou ngutuare tangata. E maata te au tamariki a te au metua Kerititiano e ngakau tae e “ma te akarongo turori kore.” Inara, ko etai atu, penei kare i aka oonuia te tuatua mou ki roto i to ratou ngakau. (1 Petero 5:9; Ephesia 3:17; Kolosa 2:7) E manganui to teianei aronga ou te akaruke nei i te aerenga Kerititiano me ka vaitata atu ratou me kare ka tomo atu kia pakarikari mai. Me ko koe tetai e metua, eaa taau ka rauka kia rave ei akariro kia kore e tupu ua mai taua tu ra? Te mea mua, ka rauka ia koe kia akatupu i tetai reva tau i te ngutuare tangata ra. Ka akanoo tetai oraanga ngutuare tangata meitaki i tetai no te manako anga i te mana taoonga, tei ariki i te au puapinga tika, e te au pirianga mataora ma etai ke ra. (Ebera 12:9) Na reira, te au tapeka piri mou tikai i roto i te ngutuare tangata ra ka riro ei te ngai tanu anga ua e tupu meitaki ei te akaoa anga o tetai tamaiti ma Iehova ra. (Salamo 22:10) Ka rave kapiti te au ngutuare tangata maroiroi i te au apinga ei kopapa okotai ra​—noatu rai me ka tika kia tuku atinga nga metua i te tuatau te rauka ra kia taangaangaia kia puapinga uaorai. Na roto i teianei tu ka rauka ia koe te apii i taau tamariki na te akatauanga meitaki kia rave i te tuku anga tika i te oraanga. E te au metua, ko ta kotou tamariki e umuumu maata maira ia kotou, kare i te au puapinga pae kopapa, mari ra ko kotou​—to kotou tuatau, te ririnui, e te aroa. Te oronga ra ainei koe ki taau tamariki i teianei au apinga?

18. Eaa te au tu uianga ka tika te au metua kia tauturu i ta ratou tamariki kia pau?

¹⁸ Kare e tika kia manako ua te au metua Kerititiano e ka riro otomatiki ua mai ta ratou tamariki ei au Kerititiano katoa. Ko Daniela, koia tetai o te aronga pakari e metua no nga tamariki e toko rima, kua kite aia: “Ka tika te au metua kia akataka i tetai tuatau kia tauturu i te takore atu i te au tu ekoko te tupu maira ki ta ratou tamariki i te apii e i etai atu au ngai oki. Ka tika ratou kia tauturu marie i ta ratou tamariki kia kimi i te au pauanga ki te au uianga mei: ‘Te noo tikai ainei tatou i te tuatau openga ra? E okotai ua ainei akonoanga mou? Eaa tetai oa apii akaraanga meitaki i kore ei e tau no te pirianga ei oa? Te tarevake ra ainei te pirianga no te ainga i mua ake i te akaipoipo anga?’ ” Te ai metua, ka rauka ia koe kia irinaki ia Iehova kia akameitaki mai i taau au tauta anga, no te mea te anoano ra aia i te meitaki no taau tamariki.

19. Eaa ra i meitaki ei e na nga metua uaorai e apii atu ma ta raua tamariki?

¹⁹ Ko etai au metua penei ka manako ngakau ua e kore i rava to ratou kite me kia apii atu i ta ratou uaorai tamariki. Inara, kare koe e tau kia manako akapera, no te mea kare tetai atu i roto i tetai turanga meitaki atu kia apii atu i taau tamariki ko koe uaorai. (Ephesia 6:4) Na te apiianga ma taau uaorai tamariki ka akatika ia koe kia kite na mua ake tikai eaa tei roto i to ratou ngakau e to ratou manako oki. No te ngakau mai ainei ta ratou au tuatua me kare e mea maani ua kare i te manako tika tikai? Te irinaki tika ra ainei ratou i ta ratou e apii ra? E tika tikai ainei a Iehova kia ratou? Ka kitea anake e koe te au pauanga ki teianei e etai atu au uianga puapinga maata me ka apii tikai koe uaorai ma taau tamariki.​—2 Timoteo 1:5.

20. Akapeea ka raukai i nga metua kia akariro i te apii a te ngutuare tangata ra kia rekareka e kia puapingaia oki?

²⁰ Akapeea e raukai ia koe kia tamou marie i taau porokaramu apii anga na te ngutuare tangata me ka akamataia e koe te reira? Ko Joseph, tetai no te aronga pakari e e metua oki no tetai tamaroa ou e te tamaine, kua tuatua aia: “Mei te au apii Pipiria katoa rai, ka tau kia rekarekaia te apii anga a te ngutuare tangata, ei apinga e akara atu ei te katoatoa ravarai. E raukai te reira i to tatou ngutuare tangata, kare tatou e tau kia ketaketa roa no tetai taime. Penei ka pou tetai ora no ta tatou apii, inara noatu me i etai atianga e tai ngauru ua miniti i pou, ka apii rai tatou. Ko tetai apinga te akariro ra i ta tatou apii ei tetai tumu teitei i te epetoma no te tamariki e kia akono tatou mei te au nuku rai no te My Book of Bible Stories maira.a Ko te oonu o te manako anga e te kite anga te ka tupu mai e maata roa atu te puapinga i to te au parakaoa e manganui ta tatou ka apii.”

21. Penei a ea te au metua e apii ei i ta ratou tamariki?

²¹ Inara, kare te apiianga i taau tamariki i te mea kotingaia ki te au tuatau apii tei akatakaia. (Deuteronomi 6:​5-7) Kua tuatua te Kite i Thailand tei taikuia ra i te akamata anga maira: “Te maara meitaki nei au i akapeea ta toku Papa rave anga iaku i te angaanga tutu aere, na runga i to maua nga patikara takatakai, tae roa ki te ngai mamao a to matou putuputuanga. E tika ra, na te akatauanga meitaki a to matou nga metua e ta raua apiianga ia matou kia iki kia tomo atu ki te angaanga orometua i te au tuatau ravarai. E tika oki kua vai tamou mai taua au apiianga ra. Te vai nei ra au no te raveanga angaanga i te au tuanga mamao o to matou ngai!”

22. Eaa te ka tupu mai i toou ‘matakiteanga ia koe uaorai e i taau apiianga oki’?

²² A tetai ra kare e roaia, i te tuatau tikai, ka aere mai a Iesu kia rave i ta te Atua ra akavaanga ki runga i teianei akatereanga. Ka topa atu taua tupuanga maata ra ki roto i te tuatua anga no te ao katoa e pini ua ake, mari ra ko te au tavini tiratiratu a Iehova ka rave ua atu i te tavinianga iaia ma te manakonako ua atu anga i te ora mutu kore. Te manakonako ra ainei koe kia riro ko koe tetai i roto ia ratou, kapiti katoa ma taau tamariki e te aronga i apiiia ra i te Pipiria? Ei reira kia maara: “Kia matakite ia koe, e taau e apii ra; e tamou tika rai i te reira: tei te akapera oki e oraʼi koe, e te aronga katoa e akarongo mai ia koe ra.”​—1 Timoteo 4:16.

[Tataanga Rikiriki i Raro]

Ka Rauka ia Koe te Akataka?

• Eaa te tu akono tau na tatou, i te mea kare tatou i kite i te tuatau tikai no ta te Atua akavaanga?

• Na roto i teea au tu ka raukai ia tatou ‘kia matakite i ta tatou apiianga’?

• Akapeea e raukai ia koe te tauturu i tetai te apiiia ra kia riro mai ei oa no Iehova?

• Eaa ra i puapinga maatai e kia akataka te au metua i te tuatau kia apii i ta ratou tamariki?

[Tutu i te kapi 15]

Akatupu meitakiia ra te apiianga na tetai reva ngateitei mari ra kia akono oaoa ua

[Tutu i te kapi 18]

Na te akonoanga i te au tua Pipiria mei te nuku rai, mei ta Solomona akavaanga i nga vaine akaturi e rua, ka akariro i te apii ngutuare tangata kia rekareka