“Te Tuatau e Tupu Ei” te Vaitata Maira!

Kare i roa i mua ake i te kake anga a Iesu ki te rangi, kua ui etai o tana au pipi tiratiratu kiaia: “E te Atu, ei teianei aina koe e akaoki mai ei i te au kia Iseraela?” Kua taiku ta Iesu pau anga e ka va mai tetai tuatau roa i mua ake ka tae mai ei te Patireia. I taua taime ra, ka maata te angaanga a te au pipi ka rave. Kia riro ratou ei au kite no Iesu “i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.”​—Angaanga 1:​6-8.

KARE taua tuku anga angaanga e rauka i te akatupuia i roto i nga mea ra, au epetoma, me kore au marama. Inara, ma te kore i emiemi, kua akamata te au pipi i te tutu aere. Inara kare ratou i ngere i te manako no te tumu tuatua o te tupu anga. Ki tetai urupu maata tei putuputu mai ki Ierusalema, kua tuatua te apotetoro ko Petero no runga i te reira, i te na ko anga: “E teianei, e tataraara kotou, e e ariu mai, kia taparaia ta kotou ara; kia kitea mai te tuatau rekareka no mua mai i te aroaro o te Atua ra; E kia tono mai aia ia Iesu Mesia, ko tei tuatuaia i muatangana no kotou. Ei te rangi rai oki aia noo ei e tikaʼi, e tae ua atu ki te tuatau e tupu ei te au mea katoa nei, ta te Atua i tuatua maira i te vaa o te au peroveta tapu katoa nona, mei te muatangana mai o teianei ao.”​—Angaanga 3:​19-21.

Kia turou mai teia “tuatau e tupu ei” i te “tuatau rekareka” mei ia Iehova. Kia aere mai te tupu anga tei totouia i nga tuanga e rua. Te mea mua, ka vai te tuatau tupu anga rekareka ra i te pae vaerua, te raveia nei i teianei. Te rua, ka aru mai teia i te akanoonooanga o tetai parataito tikai i te enua nei.

Akamata te Tuatau e Tupu Ei

Mei ta te apotetoro ko Petero i tuatua tika atu ki te urupu i Ierusalema, ei te rangi ‘rai a Iesu noo ei.’ Kua tupu teia e tae roa mai ki te 1914, i te akono anga a Iesu i tona mana akaaere e kua akamata i te tutara ei Ariki akataoongaia e te Atua. I taua taime ra, kua totou a Petero, ka “tono mai” a Iehova i tana Tamaiti i te tu kua akatika Aia ia Iesu kia akono i tana tuanga ei tangata maata i roto i ta te Atua au akakoroanga. Kua akataka te Pipiria i te tupu anga na roto i te reo akatutu anga: “Kua anau maira [ta te Atua akaaerenga i te rangi ra] e tamaroa, [to te Atua Patireia tei roto i nga rima o Iesu Karaiti] tei iaia te tutara ki runga i te pa enua katoa ma te sepeta auri ra.”​—Apokalupo 12:5.

Inara kare o te pa enua akakoroanga no te kauraro anga i raro ake i te tutara anga a Karaiti. Ae, kua tuatua akakino ratou i tona aronga tiratiratu i te enua nei, tei kiteaia i teia tuatau e ko te Au Kite o Iehova. Mei to ratou au apotetoro i mua ana, kua apai emiemi kore te Au Kite “tei mou marie i te tuatua-akakite a Iesu Mesia ra.” (Apokalupo 12:17) Kua tupu mai te patoi anga ki te angaanga a teia au Kerititiano ngakau tae mei tetai enua ki tetai. I te 1918, kua apainaia atu te au mema akaaere o te opati maata o te Taiate Punanga Tiaki i Brooklyn, New York, ki roto i te ngai akava anga ma te au akaapa anga pikikaa e kua utunga tika koreia no tetai tuatau roa i roto i te are auri. No tetai manga tuatau kua akara anga e ka poka te angaanga akakite aere i teia tuatau “e tae ua atu ki te openga o te enua ra.”​—Apokalupo 11:​7-10.

Inara, i te 1919, kua tukunaia te au mema o te opati maata tei tapekaia e i muri mai kua akaateaia te au akaapa anga pikikaa. Kare ratou i kaimoumou taime no te rave anga i te angaanga akatupu anga i te pae vaerua. Mei reira mai, kua rekareka te iti tangata o Iehova i te puapinga anga i te pae vaerua.

Kua raveia tetai oroanga kia apii i te tangata o te pa enua ravarai kia akono i te au mea ta Karaiti i akaue i tana au pipi kia rave. (Mataio 28:20) Mei teaa te oraora i te kite anga i etai tei akatutu ana i te tu mei te animara rai i te taui anga i to ratou manako! Kua kiriti ratou i te tu tangata taito, tei akatupu i te au tu mei te “riri,” te “akakino,” e te “tuatua viivii,” e kua aao i te tu tangata ou, “ko tei akaouia i te kite mei te tu katoa o Tei anga [te Atua] iaia ra.” I te pae vaerua, te akatupuia nei te au tuatua a te peroveta ko Isaia i teianei: “Ei reira te luko [tetai tangata tei akatutu i mua ana i te au tu mei te ruko] e noo katoaʼi raua ko te punua mamoe [tetai tangata tei akaari i te tu akaaka]; e te nemera e te punua puaka-nio, e kapiti katoa ïa ki te moe anga; e te punua puakatoro, e te liona ou, e te puakatoro angaiia ra, okotai rai kapiti anga mai.”​—Kolosa 3:​8-10; Isaia 11:​6, 9.

Tetai Atu Tupu Anga te Vaitata Maira!

I te pae mai i te tupu anga tei tupu mai i roto i tetai parataito pae vaerua i teia tuatau, te vaitata maira te tuatau no te akariro anga i to tatou paraneta ei parataito tikai. Kua riro tetai tuanga iti ua o te enua ei parataito i te tuku anga a Iehova i to tatou nga tupuna, ko Adamu raua ko Eva, i roto i te kainga i Edene ra. (Genese 1:​29-31) No reira oki i raukai ia tatou kia tuatua no runga i te Parataito e kua akatupu akaouia. Inara, i mua ake ka tupu ei te reira, kia akaateaia mei te enua te akonoanga pikikaa akangateitei kore i te Atua. Ka akono te au mea poritiki i te ao i teia. (Apokalupo 17:​15-18) I reira, e takoreia ei te au mea poritiki e te okooko anga, e pera to te reira aronga turu. I te openga ra, te aronga patoi openga o te Atua​—ko Satani te Tiaporo e tana au temoni​—ka topiriia no tetai tauatini mataiti​—te roa o te angaanga akatupu anga. A te reira taime, “te medebara, e te ngai vaiavare ua, e rekareka ïa no ratou ra; e rekareka rai te enua ngangaere, e e pua oki mei te tiare.” (Isaia 35:1) Ka riro te katoa anga o te enua e kia kore te manamanata. (Isaia 14:7) Ka akaoki akaouia mai te au mirioni tei mate ra kia ora i te enua nei. Ka kite te katoatoa i te au puapinga akatupu anga o te atinga oko. (Apokalupo 20:​12-15; 22:​1, 2) Kare e aronga matapo, te turi, me kore te pirikoki i te enua nei. “Kare oki to reira e karanga e, kua maki au.” (Isaia 33:24) Kare e roa i muri ake i te openga o te Tutara Anga Tauatini Mataiti o Karaiti, ka tukunaia te Tiaporo e tana au temoni no tetai tuatau poto e ka kite e akapeea ta te Atua akakoroanga no te enua i te akatupu angaia ki taua turanga. I te openga ra, ka takoreia ratou e tuatau ua atu.​—Apokalupo 20:​1-3.

Me tae te enua ki te openga o te tauatini mataiti o te akatupu anga, ka akapaapaa “tei uti i te aʼo” ia Iehova, e ka rave ratou i te reira e tuatau ua atu. (Salamo 150:6) Ko koe ainei tetai i roto ia ratou? Ka riro e ko koe tetai.