Ta Tatou Tuanga Okomaata​—Eaa Tona Aiteanga Kia Koe?

“Ka aere mai kotou, te aronga i akaoraia e taku Metua, e noo ki te basileia i akonoia no kotou mei te maani anga mairai i te enua nei.”​—MATAIO 25:34.

1. Eaa etai au apinga i rauka i te au tangata ei tetai tuanga?

E AU apinga ta te au tangata katoatoa tei akatuangaia mai na ratou. No tetai papaki penei kua kapiti ta ratou tuanga i tetai oraanga apinga akapumaana. Ko etai atura ko tetai oraanga putaua. I etai au tu, te au uki muatangana, no tei tupu kia ratou me kare ta ratou i akarongo, kua tuku io i tetai ikuiku anga no te makitakita kino ki tetai atu pupu eteniki. Inara, ko tatou katoatoa, kua rauka ia tatou okotai apinga aiteite. Kua rauka mai ia tatou katoatoa mei te tangata mua maira, koia Adamu, tetai akatuanga ia no te ara. Kua taki atu taua akatuanga anga ra ki te mate.​—Koheleta 9:​2, 10: Roma 5:12.

2, 3. Eaa te tuanga ta Iehova i akapapa mai i te akamataanga no te au anaunga a Adamu raua ko Eva, e eaa i kore ei i rauka ia ratou te reira?

² Ei Metua aroa i te rangi ra, kua oronga maira Iehova i tetai tuanga tuke roa no te au tangata i te akamata anga​—te oraanga mutu kore ma te tu apa kore ua ki roto ia Parataito. Kua orongaia ki to tatou nga metua mua, ko Adamu raua ko Eva tetai akamata anga apa kore ua, e te ara kore oki. Kua oronga te Atua ko Iehova i te paraneta koia te enua nei ei apinga aroa no te au tangata. (Salamo 115:16) Kua oronga mai aia i te kainga i Edene ra ei akaraanga e eaa te tu e riro ei te ao katoa nei e kua akanoo maira ki mua i to tatou nga metua mua ra i tetai angaanga akaaoanga meitaki. Kia anau mai raua i te tamariki, kia akono oki i te enua e te au ngangaere tuke tuke e te oraanga manu katoa oki; e akavi oki i te enua katoa takapini ei Parataito. (Genese 1:28; 2:​8, 9, 15) Ka rave katoa ta raua anauanga i teia. Mei teaa ra tetai akatuanga umere kia rauka te oronga atu kia ratou ra!

³ Inara, me kia rekareka ratou i te reira katoatoa, ka tou a Adamu raua ko Eva e ta raua anaunga kia pirianga meitaki ma te Atua ra. Kua kaiou raua i te aroa e te akarongo kia Iehova ra, inara kua kore a Adamu raua ko Eva i ariki i ta te atua i oronga atu kia raua ra e kua akarongo kore i tana akauenga. Kua ngere raua i to raua kainga Parataito e te au manakonako anga ta te Atua i akanoo ki mua ia raua ra. No reira, kare i rauka ia raua kia oronga atu i teianei au apinga ki ta raua anaunga.​—Genese 2:​16, 17; 3:​1-24.

4. Akapeea e raukai ia tatou te tuanga ta Adamu i akaruke ra?

⁴ Kua akono aroa ua a Iehova i te ravenga kia raukai i te anaunga o Adamu raua ko Eva te tika kia rauka mai te tuanga ta Adamu i akakore ra. Akapeea? I ta te Atua tuatau tau ra, kua oronga mai tana uaorai Tamaiti, ko Iesu Karaiti, i tona oraanga tangata apa kore ua ra ei oki mai i te anaunga o Adamu ra. Na teianei tu kua oko maira Karaiti ia ratou katoa. Inara, kare te tuanga ra e riro ua mai ia ratou. Ka umuumuia e ratou tetai turanga marekaia ma te Atua ra, te ka rauka ia ratou na te akonoanga i te akarongo i te puapinga tapokiangaara o to Iesu ra atinga e na te akakiteanga i taua akarongo ra ma te rave anga. (Ioane 3:​16, 36; 1 Timoteo 2:​5, 6; Ebera 2:9; 5:9) Te akaari ra ainei toou aerenga oraanga i te ariki anga no taua apinga orongaia maira?

Tetai Akatuanga tei Orongaia Mai na Roto ia Aberahama

5. Akapeea ta Aberahama akaari arikianga no tona pirianga ma Iehova ra?

⁵ Iaia i akono ei i tana akakoroanga no te enua kua rave a Iehova i tetai aerenga takake ma Aberahama. Kua arataki atu aia i taua tangata tiratiratu ra kia akaruke i tona enua e kia aere atu ki tetai enua ta te Atua uaorai ka akaari atu kiaia. Kua akarongo mareka atura Aberahama. I muri ake i to Aberahama taeanga ki reira, kua tuatua atura Iehova e ko te anaunga o Aberahama, kare ko Aberahama uaorai, ka riro ia ratou taua enua ra ei tetai tuanga. (Genese 12:​1, 2, 7) Akapeea to Aberahama manako anga? Kua mareka aia kia tavini ia Iehova i tetai ua atu ngai e noatu eaa ta te Atua ra arataki anga kia raukai i tana anaunga to ratou ngai akatuangaia mai. Kua tavini a Aberahama ia Iehova i tetai enua kare ra nona no te 100 mataiti, tae roa ki tona matenga. (Genese 12:4; 25:​8-10) Ka rave ainei koe i te reira? Kua karanga a Iehova ia Aberahama ei “oa” nona.​—Isaia 41:8.

6. (a) Eaa ta Aberahama i akakite na tona tu puareinga kia tuku atinga i tana tamaiti? (e) Eaa te tuanga okomaata ta Aberahama ka rauka kia tuku atu ki tana angaanga?

⁶ E manganui te au mataiti i tapapa ia e Aberahama tetai tamaiti, ko Isaaka, tana i akaperepere ra. I te tupu akeanga taua tamaroa ra ei tangata ou, kua akaue atura Iehova ia Aberahama kia rave atu i taua tamaiti ra e kia oronga iaia ei atinga. Kare a Aberahama i kite e te vaitata ra aia i te akakite eaa ta te Atua uaorai ka rave i te orongaanga i tana Tamaiti ei oko; inara, kua akarongo aia e i te taime tikai ka oronga ia a Isaaka ei atinga i tapu mai ei te angera a Iehova iaia. (Genese 22:​9-14) Kua tuatua ke ana a Iehova e ko tana au taputou kia Aberahama ka akatupuia na roto ia Isaaka. No reira, kua akarongo meitaki a Aberahama e, me ka umuumuia, ka akaoki mai te Atua ia Isaaka mei te mate maira, noatu rai e kare taua tu apinga ra i raveia i mua ana. (Genese 17:​15-18; Ebera 11:​17-19) No te mea kare a Aberahama i tapu mai i tana tamaiti, kua akakite a Iehova: “E ka meitaki te pa enua katoa o te ao nei i toou ra uanga.” (Genese 22:​15-18) Na teia i akakite e ko te Uanga tei taikuia ra ia Genese 3:15, ka aere mai te Mesia akaora ra na roto mai i te kopu o Aberahama. Mei teaa ra tetai akatuanga okomaata kia orongaia mai!

7. Akapeea ta Aberahama, ta Isaaka, e Iakoba akaari arikianga no to ratou tuanga?

⁷ Kare a Aberahama i kite i te puapinga maata o ta Iehova i rave i reira ra; kare katoa oki tana tamaiti a Isaaka e tana mokopuna ko Iakoba, tei riro ra “ko nga tangata tuanga ïa ma ia katoa i tei tuatuaia maira.” Inara i irinaki ratou katoa ia Iehova. Kare ratou i kapiti atu ia ratou uaorai ki etai o te patireia oire i taua enua ra no te mea te kimi ra ratou i tetai apinga meitaki atu​—“te oire tumu mou, ko te akatu e te tutara o taua oire ra, ko te Atua ïa.” (Ebera 11:​8-10, 13-16) Inara, kare te anaunga a Aberahama katoatoa i ariki i te okomaata o taua tuanga ra tei rauka mai na roto ia Aberahama.

Tetai Papaki tei Manako Tau Kore i Taua Tuanga Ra

8. Akapeea ta Esau akaarianga e kare aia i ariki i te tu okomaata no tona tuanga?

⁸ Kua manako kore a Esau, te tamaiti mua a Isaaka ra, kia manako meitaki i tona tika anau anga ei tama mua. Kare aia i ariki i te au mea tapu ra. No reira i tetai ra ia Esau e mate pongi ra, kua oko atu aia i tona tika ei tama mua ki tona teina, kia Iakoba. No teaa ra? Kua tauiia no tetai kaikaianga i te areto e te pipi! (Genese 25:​29-34; Ebera 12:​14-17) Te iti tangata na roto maira iaia e tupu ei ta te Atua ra au taputou kia Aberahama ka akatupuia mai ia Iakoba, tei tauiia ra tona ingoa e te Atua kia Iseraela. Eaa te au tuatau ta te reira tuanga i akatuera atu kia ratou?

9. No to ratou tuanga pae vaerua, eaa te akaora anga i akatupuia ki te anauanga a Iakoba, me kare a Iseraela ra?

⁹ I tetai tuatau onge i te kai, kua aere atura Iakoba e tona ngutuare tangata ki Aiphiti. I reira kua anau ratou kia tini roa, inara kua riro atu oki ratou ei au tavini. Inara, kare i ngaropoina ia Iehova tana koreromotu ma Aberahama ra. I ta te Atua ra tuatau tau, kua akaora atu aia i te au tamariki a Iseraela mei te tuikaaanga e kua akakite kia ratou e ka apai aia ia ratou ki roto i tetai “enua e taʼe a vai ua te u, e te meli,” ki te enua tana i taputou kia Aberahama ra.​—Ebera 3:​7, 8; Genese 15:​18-21.

10. I Maunga Sinai, eaa etai tupu anga takake i rokoia ma tei akatuangaia ra ki te tamariki a Iseraela?

¹⁰ I te aereanga atu te au tamariki a Iseraela ki te Enua Taputouia, kua akaputuputu atura Iehova ia ratou ki te Maunga i Sinai. I reira kua tuatua atu aia kia ratou: “Kia akarongo tikai kotou i toku reo, e kia akono i taku ra koreromotu, ka riro ïa kotou ei apinga akaperepere maata naku, i te au tangata ravarai ra: noku uaorai oki te ao katoa nei: E riro rai kotou ei basileia taunga naku, e ei iti-tangata tapu.” (Salamo 19:​5, 6) I muri ake i te akatika anga te au tangata ra ki teianei, kua oronga atura Iehova i tana Ture kia ratou​—ko tetai apinga ia kare aia i rave ana ki etai atu au tangata ra.​—Salamo 147:​19, 20.

11. Eaa etai au apinga okomaata kapitiia ki roto i te tuanga pae vaerua o te au tamariki a Iseraela ra?

¹¹ Mei teaa ra tetai tuanga pae vaerua ta taua iti tangata ou ra! Kua akamori ratou i te Atua mou anake ra. Kua aratakiia mai ratou e ia mei Aiphiti maira e kua riro ei aronga kite mata no taua au tupu anga umere ra i te oronga maianga te Ture i Maunga Sinai ra. Kua akaapinganui maataia atu ta ratou tuanga i te rauka anga ia ratou “te tuatua ra a te Atua” i tukuia mai kia ratou na roto i te au peroveta ra. (Roma 3:​1, 2) Kua akamanaia ratou e Iehova ei au kite nona. (Isaia 43:​10-12) Ka mama mai te Uanga Mesia ra i roto i to ratou iti tangata. Kua tou mai te Ture kiaia ra, ka akataka mai oki iaia, e ka tau kia tauturu ia ratou kia ariki i to ratou umuumu nona. (Galatia 3:​19, 24) Pera katoa, ka orongaia te tika kia ratou kia tavini taokotai ma te Uanga Mesia ra e ko tetai o te kau taunga e tetai iti tangata tapu o te patireia ra.​—Roma 9:​4, 5.

12. Noatu rai i tomo atu ratou i te Enua Taputouia ra, eaa to Iseraela i korei e kite? No teaa ra?

¹² Kua tika ki tana i taputou, kua taki atura Iehova i to Iseraela ki te Enua Taputouia. Inara mei ta te apotetoro ko Paulo i akataka i muri akera, no to ratou ngere i te akarongo, kare taua enua ra i riro ko “te akaangaroianga.” Ei au tangata, kare ratou i tomo ki to ‘te Atua akaangaroianga’ no te mea kare ratou i kite e i angaanga oki kia rotai ma te akakoro anga no ta te Atua uaorai ra akaangaroianga, tei akamata maira i muri ake i te anga maianga ia Adamu raua ko Eva ra.​—Ebera 4:​3-10.

13. No te kore i ariki i to ratou tuanga pae vaerua ra, eaa ta Iseraela i akakore atu ei iti tangata ra?

¹³ E rauka ua i to Iseraela kopapa ra kia akaki i te numero katoa no te aronga te ka kapiti atu ma te Mesia ki tona Patireia i te rangi ei tetai patireia kau taunga e tetai iti tangata tapu ra. Inara ra kare ratou i ariki i to ratou tuanga okomaata. E toenga ua to te Iseraela kopapa ra tei ariki i te Mesia i tona aerenga mai. Tei tupu, e tokoiti ua te numero tei kapitiia atu ki roto i te patireia kau taunga tei akakiteia maira. Kua rave keia atu te Patireia mei te Iseraela kopapa ra e kua “tukuia atu ki te aronga e akaua mai i te ua ra.” (Mataio 21:43) Ko teea iti tangata te reira?

Tetai Tuanga ki te Au Rangi Ra

14, 15. (a) I muri ake i to Iesu matenga, i akapeea to te au pa enua ra akamata anga i te akameitaki ia ratou uaorai na te “uanga” o Aberahama ra? (e) Eaa tei rauka i te au mema o “te Iseraela o te Atua” ei tuanga?

¹⁴ Te iti tangata tei orongaia ra te Patireia ko “te Iseraela o te Atua,” te Iseraela vaerua, no te 144,000 pipi a Iesu Karaiti tei anauia ra i te vaerua. (Galatia 6:16; Apokalupo 5:​9, 10; 14:​1-3) Tetai papaki o taua 144,000 ra e au ngati Iuda kopapa, inara ko te maataanga no te au iti tangata Kenitara maira. Na taua tu ra ko ta Iehova taputou kia Aberahama, e na roto i tona “uanga” kua akamata te akatupu anga e ka akameitakiia, to te pa enua ravarai. (Angaanga 3:​25, 26; Galatia 3:​8, 9) I taua akatupu akamata anga ra, kua akatainuia te au tangata o te au pa enua ma te vaerua tapu e kua akatamarikiia e te Atua ko Iehova ei au tamariki vaerua, ei au taeake no Iesu Karaiti. No reira, kua riro katoa ratou ei tuanga rua no taua “uanga” ra.​—Galatia 3:​28, 29.

¹⁵ I mua ake i tona matenga, kua akakite a Iesu ki te aronga penei ka riro ei au mema ngati Iuda no taua iti tangata ou ra, i te koreromotu ou, te ka akamanaia na tona uaorai toto. I runga i te tumu anga o to ratou akarongo i taua atinga akamanaanga ra, te aronga tei raveia ki roto i taua koreromotu ra ka riro ei “atinga okotai” ra. (Ebera 10:​14-18) Kua rauka kia “akatikaia” ratou e kia akakoreia ta ratou ra ara. (1 Korinetia 6:11) No reira, i taua tu ra kua riro ratou mei ia Adamu rai i mua ake i tona ara anga. Inara, kare ratou e noo ki roto i tetai parataito i te enua nei. Kua tuatua a Iesu e te aere ra aia e akamanea i tetai ngai no ratou i te rangi. (Ioane 14:2,3) Kua akakore ratou i to ratou manakonako anga no te enua nei kia raukai tetai ‘tuanga tei vaioia no ratou i te au rangi ra.’ (1 Petero 1:4) Eaa ta ratou ka rave i reira? Kua akataka maira Iesu: ‘E akono au i tetai koreromotu ma kotou . . . no tetai basileia.’​—Luka 22:29.

16. Eaa tetai angaanga meitaki roa no te tavini anga te vai maira ki mua no te au Kerititiano akatainuia ra?

¹⁶ Mei te au rangi maira, te aronga te ka tutara ma Karaiti ra, ka rave ma etai atu apinga ra, kia tauturu i te akakore atu mei te enua nei i te au tu meameaau katoa i te tu ngateitei o Iehova ra. (Apokalupo 2:​26, 27) Ei te tuanga rua o te uanga vaerua o Aberahama, ka akono ratou i te apaianga mai i te akameitakianga o te oraanga apa kore ua ki te au tangata o te pa enua ravarai ra. (Roma 8:​17-21) Mei teaa ra tetai tuanga okomaata no ratou!​—Ephesia 1:​16-18.

17. Eaa te au tu o ta ratou tuanga ta te aronga Kerititiano akatainuia ra ka rekareka ia ratou e vai nei i te enua?

¹⁷ Inara kare te tuanga o te au pipi akatainuia a Iesu no te tuatau anake ki mua ra. I roto i tetai tu kare ra e rauka i tetai ke atu, kua tauturu atura Iesu ia ratou kia kite ia Iehova, koia te Atua mou ra. (Mataio 11:27; Ioane 17:​3, 26) Na te tuatua e te akatauanga, kua apii atura aia ia ratou eaa te aiteanga no ‘te irinakianga ia Iehova’ e eaa te o atura ki te akarongo kia Iehova. (Ebera 2:13; 5:​7-9) Kua oronga atura Iesu kia ratou i te kite i te tuatua mou no runga i ta te Atua akakoroanga e kua akapapu atu ia ratou e na te vaerua tapu e taki atu ia ratou kia ki atu te kiteanga i te reira. (Ioane 14:​24-26) Kua tauru atura aia ki runga i to ratou au manako e te au ngakau i te puapinga maata o te Patireia o te Atua. (Mataio 6:​10, 33) Kua oronga katoa a Iesu i te angaanga na ratou kia akakite aere e kia akariro te au tangata ei au pipi i Ierusalema, i Iudea, i Samaria, e tae ua atu ki te openga o te enua ra.​—Mataio 24:14; 28:​19, 20; Angaanga 1:8.

Tetai Tuanga Okomaata no te Urupu Maata

18. I roto i teea tu ta Iehova taputou e ka akameitaki to te pa enua ravarai ia ratou uaorai na roto i te “uanga” o Aberahama i te akatupu angaia i teia tuatau nei?

¹⁸ Papu rai, te numero ki katoa o te Iseraela vaerua, koia te “anana iti” o te aronga akatuangaia i te Patireia, kua oti te iki anga. (Luka 12:32) No etai rau ngauru mataiti i teianei, kua arataki atu a Iehova i te manako anga ki te akaputuanga i tetai urupu maata no etai ke atu no te au pa enua ravarai. No reira, te taputou a Iehova kia Aberahama e na roto i tona “uanga” ka akameitaki to te pa enua ravarai ia ratou uaorai te akatupuia nei i tetai aerenga maata. Te rekareka nei ra, e ko teianei aronga akameitakiia te rave angaanga tapu katoa ra kia Iehova e te kite ra e ko to ratou ora tei runga i te akarongo i te punua mamoe a te Atua ra, ia Iesu Karaiti. (Apokalupo 7:​9, 10) Kua ariki ainei koe i ta Iehova pati anga aroa kia riro koe e ko tetai tuanga no taua pupu mataora ra?

19. Ki teea tuanga ta te aronga o te au pa enua e tapapa atura te akameitakiia maira i teianei?

¹⁹ Eaa te tuanga okomaata te oronga maira Iehova ki te aronga kare e ko tetai o te anana iti? Kare, kare ia i tetai tuanga i te au rangi ra. Ko te tuanga ia tei tau ra kia orongaia e Adamu ki tana anaunga​—koia te manakonako anga no te ora mutu kore i te tu apa kore ua ki roto i tetai parataito te ka riro kia takapini marie aere i te ao katoa nei. Ka riro ia ei ao ka “kore rava te mate, e te aue, e te mii; e te mamae oki, e kore katoa ïa.” (Apokalupo 21:4) E kia koe, i reira, ta te Tuatua akauruia a te Atua ra i tuatua: “E irinaki kia Iehova, ka rave ei i te meitaki; e noo koe i te enua i reira, e kare koe e kore i te angaiia mai. Kia mataora oki koe ia Iehova; e nana e oronga mai i ta to ngakau i anoano ra. E roa poto ake, e kare ua te tangata kino ra . . . Kareka te aronga maru ra, ka noo ïa i te enua, e ka rekareka ratou i te maata o te au ra. Ka riro te enua no te aronga tuatua-tika, ka noo tamou rai ratou i reira.”​—Salamo 37:​3, 4, 10, 11, 29.

20. Akapeea te rekareka anga o te “mamoe ke atu” i te maata anga o te tuanga pae vaerua o te au Kerititiano akatainuia ra?

²⁰ E tuanga to te “mamoe ke atu” a Iesu i te ngai o te Patireia o te rangi i te enua nei. (Ioane 10:16a) Noatu rai e kare ratou e noo ki te au rangi ra, e maata to te tuanga pae vaerua te rekarekaia ra e te aronga akatainuia te orongaia atura kia ratou. Na roto mai i te pupu taokotaiia o tei akatainuia ra, “te tavini akono meitaki e te pakari,” e akatueraia ki te au mamoe ke atura te kiteanga i te au taputou okomaata te vaira i roto i te Tuatua a te Atua. (Mataio 24:​45-47; 25:34) Kapitiia, te kite ra te aronga akatainuia e te au mamoe ke atu e te akamori ra oki i te Atua mou, ia Iehova. (Ioane 17:​20, 21) Kapiti katoa, te akameitaki ra ratou i te Atua no te puapinga o te atinga tapokianga ara o Iesu ra. Te tavini kapiti ra ratou ei anana okotai i raro i te Tiaki okotai, koia Iesu Karaiti. (Ioane 10:16e) E tuanga katoa ratou no tetai taeakeanga aroa okotai i te ao katoa nei. Te rave kapiti ra ratou i te akameitaki anga ei Au Kite no Iehova e tona Patireia oki. Ae, me ko koe tetai kua akatapuia e kua papetitoia ei tavini no Iehova, pouroa teianei te kapitiia ra ki roto i toou tuanga pae vaerua ra.

21, 22. Akapeea tatou katoatoa i te akaari anga e te akaperepere ra tatou i to tatou tuanga pae vaerua?

²¹ Akapeea te okomaata teianei tuanga pae vaerua kia koe? Te rava ra ainei taau akateitei anga i te reira kia akariro i te raveanga i te anoano o te Atua ei apinga maata i toou oraanga? Ei akakite anga i te reira, te rave ra ainei koe i te akoanga a tana Tuatua e tana akaaerenga kia putuputu te aerenga ki te au uipaanga katoa a te putuputuanga Kerititiano ra? (Ebera 10:​24, 25) E maata ainei te puapinga o taua tuanga ra kia koe e kia rave ua atu i te tavini i te Atua noatu te au tu ngata? Te rava ra ainei te maroiroi o toou ariki anga e kia akaketaketa ia koe kia arai atu i tetai ua atu timata anga kia aru i tetai aerenga penei ka taki atu ki te akarukeanga i te reira?

²² Kia akaperepere tatou katoatoa i te tuanga pae vaerua ta te Atua i oronga mai no tatou. Ia tatou e tamou marie ra i to tatou mata ki runga i te Parataito a te tuatau ki mua, kia rave ki katoa tatou i te au angaanga pae vaerua ta Iehova e oronga mai nei na tatou i teianei. Na te patuanga tikai i to tatou au oraanga takapini i to tatou pirianga ma Iehova ra, te akakite papu ra tatou i te okomaata kia tatou taua tuanga orongaia maira e te Atua. Kia riro tatou ki roto i te aronga te akakite ra: “E akateitei au ia koe, e taku Atua, e te ariki; ka akameitaki rai au i toou ra ingoa e tuatau e tuatau ua atu.”​—Salamo 145:1.

Akapeea Koe me Akataka?

• Naringa i tiratiratu a Adamu ki te Atua, eaa te tuanga tana ka tuku mai kia tatou nei?

• Akapeea ta te anaunga a Aberahama akono i te tuanga tei vai maira kia ratou?

• Eaa te kapitiia ra ki te tuanga no te au pipi akatainuia a Karaiti?

• Eaa te tuanga o te urupu maata ra, e akapeea ratou me akaari e te ariki tikai ra ratou i te reira?

[Au Tutu i te kapi 20]

Kua rauka te taputou i te anaunga a Aberahama no tetai tuanga okomaata

[Au Tutu i te kapi 23]

Te ariki ra ainei koe i taau tuanga pae vaerua?